朱古力迷今個中秋實在太幸福啦，事關各大品牌都推出咗唔同口味嘅朱古力月餅。要精緻有精緻，要創新有創新，減肥？食埋先講啦。
法式朱古力月餅 L’Éclair de Génie
呢間出名食泡芙嘅舖頭今年都繼續推出朱古力月餅禮盒，四款月餅外層分別用上牛奶朱古力同黑朱古力，而其中兩款嘅內餡就用上手工製作嘅法式水果軟糖，煙煙韌韌，口感十足。
朱古力脆皮雪糕月餅 Häagen-Dazs
呢間店嘅雪糕月餅不嬲都好受歡迎，今年嘅禮盒裝就以巴黎街頭為靈感，以微苦嘅黑朱古力脆皮包著各式口味嘅雪糕，好似朱古力、士多啤梨同焦糖脆餅等。而每個月餅上都印上代表巴黎嘅圖案，例如凱旋門同艾菲爾鐵塔等。而另一款禮盒就以唔同顏色嘅朱古力脆皮雕琢成鮮花形狀，送畀女仔一定鍾意。
如意朱古力月餅 龍島
中秋節就緊係要人月兩團團，呢間餅店今年以「如意結」為靈感，推出互相緊扣嘅朱古力月餅。一半係蜂蜜柚子軟心朱古力，而另一半就係小紅莓南瓜子乳酪朱古力。同情人你一啖我一啖就最sweet。至於單身嘅......同左手share食都得嘅。
更多【月餅巡禮】： |
威士忌朱古力月餅 Tiffany’s 紐約吧
呢款月餅就啱哂鍾意飲酒又鍾意食朱古力嘅朋友，用上來自台灣嘅酒廠噶瑪蘭出品嘅威士忌。三款口味分別有經典威士忌、波本桶威士忌同Amontillado雪莉桶威士忌，其中後者更曾獲選為世界第一單桶單一麥芽威士忌。各種威士忌配上唔同濃度嘅朱古力，味道好有層次。
62%特濃朱古力月餅 DALLOYAU
由禮盒設計到月餅都充滿法式風味嘅月餅，禮盒裝有三款口味，分別係特濃朱古力、紅豆同蘭姆酒葡萄乾。其中特濃朱古力用上62%可可濃度嘅朱古力，可可味濃，甜得嚟唔會好膩。
朱古力蛋糕月餅 Godiva
當然唔少得呢個比利時經典品牌，佢哋今年推出嘅呢四款朱古力蛋糕月餅各有特色，好似香脆果仁牛奶朱古力味就用上經烘焙嘅果仁配上柔滑嘅牛奶巧克力醬，口感好豐富。而紅莓黑朱克力味就比較清新，酸酸甜甜，黑朱古力味濃。
朱古力蛋糕月餅 卅二公館 x Pierre Hermé
繼續都係朱古力蛋糕月餅，呢款特別在外層用上唔同顏色嘅朱古力，賣相靚靚。而內餡都好有特色，好似玫瑰覆盆子味咁，裏面仲加咗荔枝果醬，入口香甜，帶少少raspberry嘅酸味，aftertaste仲有微微嘅玫瑰淡香。
文：Crystal
