【新店直擊】停不了的芝味！日本人氣芝士蛋糕登陸咗喇！

一芝未平，一芝又起！正當全港都為半熟芝士撻而瘋狂之際，又多一間日本人氣芝士份子加入巿場喇！今次入場嘅係Tokyo Milk Cheese Factory呀，仲一入就入3間分店呀！其中喺上環西港城嘅分店已經率先開幕，係全球第一間海外專門店嚟㗎！勁呀呢？

既愛日本又愛芝士嘅朋友，一定會鍾意佢哋嘅芝士蛋糕，有兩款㗎！艾登芝士蛋糕係用荷蘭艾登芝士加忌廉芝士加檸檬焗製，食落有淡淡檸檬嘅清香，熱食又得，凍食又得，得咗。

另外，招牌貨牛奶芝士餅（Milk Cheese Cake）就用咗法國芝士同北海道牛奶芝士嚟製作，香滑幼軟，入口即溶，唔會太膩。冷藏後再食就有雪糕嘅感覺，如果攤耐少少先食呢，又會有mousse嘅感覺喎，睇你哋鍾意點食啦。不過，每日限量50個咋留意返！

除咗芝士蛋糕，另外仲有芝士曲奇。香港就有兩種口味選擇：海鹽味同蜂蜜味。如果你以為蜂蜜味就會好甜，少年你太年輕了，佢用嘅係藍芝士，所以食到嘅反而會係鹹鹹地嘅味道，係特別嘅。

想再特別啲，就可以send你（或者你個friend）張相去佢哋嘅網頁，就會有全球獨一無二，只係你專屬嘅曲奇包裝盒喇，曲奇盒同每個獨立包裝袋上面，都會有你個靚樣㗎！不過名額暫時只係得60個，要型就要快手喇！

香港專門店資料：
上環（已開業）
地址：德輔道中323號西港城地下4-6號舖
電話：6010 9635
營業時間：12:00pm – 09:00pm

西貢（聖誕期間開業）
地址：西貢普通道9號地下
電話：2459 1331
營業時間：12:00pm – 09:00pm

銅鑼灣（期間限定店，1月中開業）
地址：銅鑼灣希慎廣場1樓中庭

文：Kar

隨時接收最新資訊
讚好OpenRice專頁！