送散水餅已經係離職傳統，而家坊間嘅選擇愈嚟愈多，真係揀到頭都痕埋～開飯仔會持續搜羅多間特色散水餅畀大家，包保同事食得開心！

特濃芝士撻 Bubble Bu Cakery  

圖：Super Cake Lover

如果你都係芝士控，呢間bakery就啱晒喇～佢哋主打芝士撻、奶蓋巴斯克、提拉米蘇、瑪德蓮、岩燒蜂蜜芝士蛋糕等，每款都係低糖、無添加香料同防腐劑，好啱送畀注重健康又識食嘅同事朋友。最受歡迎嘅一定係佢哋嘅芝士撻，有人氣焙茶生朱古力麻糬、特濃開心果、檸檬柚子同伯爵茶麻糬等口味，配埋曲奇撻皮，外脆內滑，層次超豐富，除咗滿足版仲有輕盈版可以揀，好貼心。

搞笑語錄茶包+點心 香港茶鄉

圖：品牌（FB）

講到搞笑又有心思嘅散水餅，不得不提呢間茶包點心專門店！最大賣點就係可以自由配搭你鍾意嘅茶點同養生花果茶，無論你係鍾意蝴蝶酥、雪花酥、花生酥、曲奇，或者黑糖方塊、花茶包都有齊～每份仲有本地創意gag爆封面，如「走先啦係咁先啦下次再玩啦」、「我真係好鍾意返工」等，送畀同事一定開心到笑。而且價錢親民，性價比高得嚟又可以訂製，急單仲可以送去office，啱晒臨急抱拂腳嘅打工仔。

傳統法式瑪德蓮 Fifty Cake

圖：Huntingfoodwithme

主打法式瑪德蓮，有經典香草、川寧伯爵茶檸檬糖霜、蜜餞香橙Valrhona巧克力、極濃郁榛子甘納許以及三重流心芝士等，好特別～最吸引一定係佢哋嘅「硬殼配麻糬」系列，外層係脆殼，中間係軟綿蛋糕再夾埋煙韌麻糬，一啖三重口感，食過真係返唔到轉頭！而且全部瑪德蓮都係獨立包裝，六件起仲有靚靚紙盒，可以加「Thank You」貼紙，夠晒得體又有誠意。

人氣布丁燒 小確幸

圖：品牌（FB）

以每日人手製作嘅布丁聞名，細緻又有心思，可以自選燙印字句，例如「感謝過往關照」、「有緣江湖再會」，將祝福化成實體，傳達你心中嗰份唔捨得又窩心嘅情意。布丁口感滑溜蛋香十足，仲有多款口味選擇，包括芝士、抹茶、Heilala雲呢拿、法芙娜朱古力以及法芙娜榛子等，送畀同事朋友一人一杯，份外有回憶又有味道～

養生燕窩專門店 啖啖燕窩

圖：Bakdiusingchoi

想健康養生啲嘅，不如考慮吓觀塘呢間散水燉品。散水款式可以揀桃膠、雪燕，或者高級啲嘅燕窩心意樽，夠哂心思又有面子，口味選擇超多，包括招牌椰汁、北海道3.6牛奶、冰糖紅棗杞子、滋潤荔枝蜜等，可以自由混搭，根據每位同事口味去揀，夠貼心～溫馨提示每樽都要雪藏，建議收貨當日食用呀。

OpenRice預訂蛋糕服務：（按此）

文：Yanica
編：Cathy