輕鐵5月1日起，將會試推「貓狗同行」計劃*兩個月，大家於週末同公眾假期可以同主子們一齊搭車，一於趁呢段時間沿住輕鐵線嚟個美食探索之旅，發掘沿線嘅特色寵物友善餐廳啦～
抵食手工意粉 Proton 
圖：朝早係咖啡店，夜晚就搖身一變成為型格西餐廳；工業風設計加上環境寬敞，仲有露天座位畀你同毛孩一齊chill，成個氛圍舒服又有格調。午市套餐性價比高，八十幾蚊已經包主菜、沙律或餐湯同埋餐包，飲品仲半價𠻹！Menu大約2-3星期轉一次，有機會推介試燒西班牙黑毛豬鞍，豬肉厚身但肉質嫩滑；小食方面玫瑰蜂蜜炸雞翼都唔錯，外脆內嫩、香甜帶花香～甜品要食呢個芒芝雪山，用croffle配芝士蛋糕、新鮮芒果同雲呢拿籽雪糕，打卡同味道兼備。
元朗誠意西式小店 Chow Chow Cafe
圖：sueli
區內相當受歡迎嘅寵物友善西餐廳，裝修走懷舊路線，加上室內外都有座位，職員親切又有禮，仲會主動為寵物提供飲用水同麵包，絕對加分。人氣推介有手打菠蘿蝦肉漢堡包，蝦餅厚身彈牙，配上燒過嘅菠蘿，味道層次豐富；吉列豬扒冷烏冬亦都好出色，烏冬煙韌爽口，麻醬香濃，豬扒炸得外脆內嫩，水準不俗。晚市套餐就包埋麵包、飲品同甜品，完整又滿足～
小巷特色cafe 阿貴咖啡
圖：藏身元朗小巷，環境舒適、裝潢以綠色為主調，帶點文青風格，仲有戶外座位，打卡一流。呢度主打親民價西式料理，推介菜式有泰式豬頸肉飯，鹹香開胃，豬頸肉厚切多汁配飯一流；泰式鮮蝦意粉則隻隻蝦鮮甜彈牙，味道有層次；芝士滑蛋炸魚柳多士外脆內嫩，配滑蛋同芝士更加滋味。飲品方面，奶蓋泰茶非常有驚喜，焦糖味奶蓋配濃郁泰茶，甜度適中，至於咖啡拉花都好有水準，睇得又飲得。
精緻早午餐 Lorway Coffee & Bakery
圖：eat.ley
位於屯門中央廣場附近，最方便嘅交通係喺輕鐵屯門泳池站落車，位置雖然唔算旺，但勝在環境清幽，地方寬敞，有唔少街坊都會帶狗仔嚟chill吓。餐廳主打All Day Breakfast、手工意粉、漢堡同多款咖啡甜品，款式豐富。人氣之選有Vegan All Day Breakfast，當中煎Portobello菇鮮嫩多汁，兩塊sourdough烘得香脆又唔硬，炒蛋都做得夠滑嫩，值得一試～想惹味啲可以試埋澳洲和牛煙肉芝士漢堡配薯格，漢堡肉汁豐富，醬汁微甜帶芥末香。咖啡方面用上埃塞俄比亞同巴西豆，入口帶朱古力同雲呢拿香，整體味道平衡。
*乘客需提前到MTR e-Store購買「貓狗同行證」(售價：HK$99元）
文：Yanica
編：Cathy
