想搵個地方同毛孩放慢腳步，嚟個輕鬆半日遊或週末短trip？愉景灣最近推出「人寵共乘」巴士服務，讓九龍、新界區嘅主人同毛孩齊齊輕鬆直達愉景灣，chill遊露天市集同海邊小餐廳，即睇入到去有咩寵物友善餐廳啦～
橙色主題Cafe MOOJOO Lifestyle Cafe
圖：小清新咖啡店，有寵物友善座位，而且採用落地玻璃設計擴闊視野，舒服到唔想走～呢度主打西式輕食同甜品，推介嘅有炸魚薯條配他他醬，魚炸得酥脆唔油膩，薯條熱辣辣又夠香口；而經典英式早餐配雞蛋仔呢個組合幾有趣，雞蛋仔外脆內軟，加埋煙肉、腸仔、煎蛋，好有飽肚感。甜品方面，伯爵茶口味嘅巴斯克芝士蛋糕係甜品控心水之選，香濃滑身，加埋雪糕真係完美收尾。飲品選擇都幾多，包括焦糖latte、熱朱古力同凍檸檬梳打等，啱晒望住大海曬太陽嘆嘢飲。
寫意西餐廳 The Rink All Day Lounge 
圖：想搵個景靚又高質嘅餐廳同毛孩一齊嘆返餐，呢間意式餐廳絕對值得列入清單，戶外座位開揚舒服，對住海景開餐特別寫意。前菜方面香辣白酒藍青口令人驚喜，唔係普通白酒汁，而係加咗香草同少少辣味，食落層次豐富又開胃。主菜則大推佢哋嘅Fresh Blue Lobster Pasta，選用澳洲藍龍蝦，蝦肉鮮甜彈牙，啖啖肉超滿足。意粉煮到有咬口唔腍身，龍蝦汁香濃掛麵力強，每啖都食到海鮮嘅精華。
高質海景西餐 Figos
圖：patciica
餐廳主打西式家庭料理，分量十足、用料實在，性價比高得嚟又好味。House Special Pizza絕對係招牌之選，配料超足，熱辣辣嘅芝士有拉絲效果，叫細份已經夠晒兩個人食！厚切USA肉眼扒足足12oz，炭香味濃，肉質嫩滑無筋，牛魔王必食～另外仲有炸魷魚、南瓜意大利飯、香蝦芒果沙律等都值得一試。呢度嘅戶外座位對住成片海景，身心視覺都令人超級滿足！
地道土耳其餐廳 Pasha Turkish Cuisine
圖：添比撈
如果想試吓唔同口味嘅異國菜式，呢間土耳其餐廳會係一個幾驚喜嘅選擇。餐廳設有室內同戶外座位，戶外區對住海邊公園，仲有情侶心形打卡位，好有歐洲café嘅感覺。菜式方面推介佢哋嘅牛肉薄餅，餡料十足、肉味香濃，餅底薄脆唔會太厚，食落唔覺heavy；巨型羊肉包都值得一試，羊肉超多、味道夠濃冇羶味。仲有熱辣辣嘅牛肉鐵鍋飯帶少少焦香，飯同牛肉撈埋一齊食真係好惹味。甜品又點可以唔試土耳其雪糕！比普通雪糕多咗份煙韌感，再嘆特色嘅土耳其熱茶或咖啡，暖身又解膩。
「人寵共乘」巴士服務詳情：
全新「愉景灣寵物巴士」服務將於2025年5月11日正式啟動，並會喺6月8日、9月14日、10月12日三個露天市集舉行日同步行駛，接載寵物同主人由將軍澳、啟德、屯門、荃灣西直達愉景廣場。巴士來回每位乘客連一隻寵物只需HK$68，另外亦有套票選擇，車票可透過九巴App1933購買，憑QR code上車即可。
文：Yanica
編：Cathy
