對香港人嚟講日式壽喜燒應該完全唔陌生，但你又知唔知原來日本關西同關東嘅壽喜燒係完全兩種唔同食法？銅鑼灣呢間最近正式開張嘅日本餐廳主打坊間較為少見嘅正宗關西風壽喜燒，全吧枱座位可以欣賞到師傅手藝，今次開飯仔就請廚師講解下關西風同關東風兩者差異，同教埋大家點品嘗關西風壽喜燒。
 

壽兵衛廚師Andy

關東關西 煮法、次序大不同！

Andy形容關東同關西嘅壽喜燒就好似中式火鍋有唔同流派咁，關東嘅壽喜燒比較似火鍋，都係準備好湯底然後將牛肉烚熟，菜同牛肉會一次過送上枱。關西嘅壽喜燒會先用牛脂燒香扁鍋，然後煎牛肉、再倒入醬汁，肉同菜會輪流煮。煮法同次序唔同，令關東壽喜燒嘅味道濃啲，而關西壽喜燒嘅牛肉就比較香口。
 

正宗關西壽喜燒食法

Andy指壽喜燒其中一大特色係會有生雞蛋，將煮好嘅牛肉點生蛋漿食更為溫潤。第二係關西壽喜燒會由廚師逐一烹調，肉嘅熟度可以自行選擇，而肉同菜輪流一道道奉上，味道更多變化！
 

壽兵衛主打一對一服務，即係一位師傅對一位客人，食客可以欣賞師傅即席準備及烹調，師傅亦可以同客人多啲交流，令各位有完整、地道嘅日式壽喜燒體驗。

餐廳供應最優質嘅佐賀牛同日本其他產地嘅和牛之外，更設有乾式熟成櫃，製作至少熟成21日嘅美國牛肉。和牛嘅油香會比較突出，而美國牛肉肉香濃郁，後者經過熟成後令兩款牛肉同樣軟嫩多汁。
 

晚市套餐推介

Deluxe Wagyu Set（$980/位）

晚市嘅Deluxe Wagyu Set就可以食齊日本和牛同美國熟成牛，而且更有無限添加三文魚子嘅「滿溢筋子釜飯」！
 

前菜三點、海之幸刺身三點、海膽和牛他他、甜品

墨汁螢光魷魚茶碗蒸

點解茶碗蒸會變黑色？其實係加入墨汁，令香氣更濃郁。裡面亦加入熒光魷魚、墨魚片及香菇片，層次豐富。
 

美國熟成牛肉

拍攝當日係肉眼，簡單以日本岩鹽薄燒已經肉香四溢。肉質軟嫩當中有少少筋，咬得越多口腔裡面嘅牛味就越濃郁。而肉眼裡面嘅大蔥同茗荷花蕊可以平衡油脂，配搭蛋香較為濃郁嘅日本赤卵雞蛋。
 

厚切牛舌

廚師會將牛脷煎至七成熟，外面香脆裡面爽嫩帶脆，完全唔韌。燒嘅時候加上淡雪鹽提鮮，配搭柚子醋、生洋蔥、辣蘿蔔蓉同炸蒜片，口感豐富同時可以一清口腔裡面嘅油膩感。
 

日本和牛肉眼

終於到油脂分佈呈雪花狀嘅和牛啦！和牛嘅肉眼肉質比美國牛肉的確更細嫩，同時又保留部分嚼勁。廚師先香煎再加入少量自家製壽喜燒醬汁，醬汁嘅甜味同肉香好夾。

接住落嚟嘅西冷因為肉味更濃，所以燒嘅時候會落更多醬汁，入口味道更甜之外，口感更接近入口即溶！廚師會建議兩款和牛可以先試原味，再蘸日本生雞蛋。
 

滿溢筋子釜飯

滿溢筋子釜飯選用岩手縣一見鍾情米烹煮，飯粒煙韌香甜。加入多款配料包括松葉蟹肉同黑松露，鮮味同香味已經好豐富，鍋底嘅飯焦重好香脆。驚喜在於可以無限添加三文魚子，因而取名「滿溢筋子」。三文魚子嘅爆漿口感同鮮味絕對係錦上添花。
 

高CP值午市套餐

黑豚壽喜燒（$228/位）

如果想食平啲，Lunch Set絕對係抵食推介，例如呢份黑豚壽喜燒就有齊季節野菜沙律、漬物、茶碗蒸、季節野菜盛盒同黑豚。
 

黑豚包括西冷、腩肉及豬大腸，可以試到唔同口感同風味。
 

壽兵衛 
地址：銅鑼灣銅鑼灣駱克道487-489號駱克駅12樓
OpenRice訂座優惠1：即日起凡於午市光顧晚市的「Premium Wagyu Set」（原價$680）或「Deluxe Wagyu Set」（原價$980），即可每位減$100
優惠2：凡晚市惠顧清酒，即可享「買一送一」優惠，奉送720毫升清酒乙支
優惠3：凡會員光顧，即可享有全單9折，開瓶費及切餅費全免

文：Cathy.H
相、片：Wilfred Chui