睇嚟2017年繼續都會係卡通主角之年，以卡通做主題嘅餐廳開極都仲有。你哋飛佛嘅卡通出咗主題餐廳未先？冇都唔緊要，等下可能就會有，今次就畀農場精靈嘅粉絲開心下先，嚟緊喺台中又會開一間醜比頭主題火鍋店呀！

餐廳有兩層高，門口已經有大大隻胖桃公仔可以影相，入到去就好似入咗個森林咁，有樹有藤蔓，仲有3個樹窿卡位同埋有個沙池仔，望落好舒服好relax。

至於嘢食方面，叫得火鍋店當然係主打邊爐，湯底係選用約天然無農藥嘅新鮮蔬菜熬成。必須講下有個黑豆鍋同豆漿鍋，都係香港比較少見嘅湯底，前者將黑豆慢火拌炒之後再連埋白蘿蔔、小豆苗等等熬5個鐘；而後者就係用黃豆磨成豆漿之後，再加入紅棗枸杞，兩款嘅豆香都十足。而就算係麻辣鍋都係用13種中藥材同其他食材製成，辣得嚟都好有養生功效。另外，每個月仲會有一款湯底有農場精靈限定造型添，好鬼得意囉。

而無論係鍋物、蛋糕定係飲品，都會見得到農場精靈嘅蹤影㗎。另外一款估計會大受歡迎嘅飲品就係棉花糖啤酒！有4隻味嘅，芒果、葡萄柚、藍柑橘同蜜桃青梅，賣相靚靚，飲到啤酒麥香中帶有糖嘅甜味同果香。

詳情
醜比頭森林鍋物-台中旗艦店
地址：台中市西屯區玉成路12號
預計開業日期：
1月24-27日（半價優惠）、2月1-8日試業（9折）
2月9日正式開幕
（暫不提供電話訂位，2/4開放網路訂位）

文：Kar



其他國際新食力：
蛋黃哥去咗日本做女僕？ 人氣女僕café變身期間限定主題店
粉絲要打卡啦 台灣Hello Kitty主題餐廳重新開張
Starbucks都有酒飲？ 台灣唯一門市搶先全球出「咖啡啤酒」 




 

隨時接收最新資訊
讚好OpenRice專頁！