雖然而家仲係11月，不過如果想同Honey喺聖誕佳節食個滿足又有氣氛嘅大餐，就要開始準備訂枱喇。雖然唔同自助餐都非常吸引，不過如果自問係選擇恐懼症，或者懶得諗點食最抵嘅朋友仔，咁不如就食唔同餐廳供應嘅聖誕套餐啦！而且香港唔同地方嘅菜式都有，用味蕾跳出香港無難度。
 

比利時　　FRITES Belgium on Tap

喺銅鑼灣、中環、灣仔同鰂魚涌都有分店嘅呢間比利時餐廳12月會推出特色聖誕套餐，晚餐由頭盤比利時混釀啤酒青口鍋掀開序幕，主菜有火雞卷同1855 USDA黑安格斯烤牛扒兩款選擇，最後以聖誕麵包布甸畫上甜蜜句號。
 

西班牙　　The Optimist

灣仔嘅呢間西班牙菜館今年就以西班牙北部傳統燒烤菜式做主題，成個12月都會供應節慶午餐（星期一至五）同晚餐。節慶晚餐選擇包括餐廳最出名嘅烤海鮮同牛扒，例如香烤原條多寶魚，同安格斯帶骨肉眼等。平安夜及聖誕節另有五道菜聖誕晚餐。
 

意大利　　Gradini Ristorante Italiano

呢間中環嘅酒店意大利餐廳會喺平安夜提供三道或五道菜精選晚餐，同聖誕節提供四道菜精選晚餐。平安夜嘅主菜係慢烤塔斯曼尼亞羊脊，用羊脊配搭鵝肝、黑松露醬同羊肚菌餡再用火腿包住，層次豐富。而聖誕節嘅主菜係炭燒田島和牛脊肉，肉質細嫩口味平衡。
 

日本　　千鶴日本料理

雖然聖誕節同日本菜好似有啲風馬牛不相及，但對於日本菜粉絲嚟講，有聖誕套餐當然係一大喜訊！紅磡呢間酒店日本料理店喺平安夜同聖誕節會供應節慶和風八道菜定食，另外平安夜、聖誕節同除夕更有節慶鐵板燒八道菜晚餐，同大家過一個和風聖誕！
 

法國　　AVA Restaurant Slash Bar

尖沙咀呢間西餐廳今年聖誕由由全新法籍大廚Jean-Charles Devillard主理，喺平安夜、聖誕節同除夕分別供應六或五道菜晚宴，當中包括創新嘅法國鴨肝配葡萄酒啫喱及薑餅，法國人聖誕必備嘅煙三文魚，同應節嘅烤雞肉等。

開飯編輯推介：

1. 【專訪】冬甩店美食車舖面 加國回流女生：香港冇吖嘛

2. 2017年港澳版米芝蓮指南

3. 10月份好評餐廳十強

熱門文章推介：

1. 一齊滾起佢！季選任食火鍋

2. 秋冬天，番薯天 5大蕃薯味零食大比拼

3. 油麻地特色美食地圖

隨時接收最新資訊
讚好OpenRice專頁！