又到一年一度一齊食月餅增肥...唔係、係應節先啱嘅中秋節。雖然近年各大食肆同餅店推陳出新，不斷推出創新口味，不過傳統嘅蓮蓉、五仁，或者奶皇月餅依然有唔少捧場者。而且包裝特別嘅傳統月餅禮盒係送畀長輩嘅中秋禮物佳選，開飯仔幫你揀咗以下幾個推介，啱嘅話就記得早啲訂啦。

懷舊包裝白蓮蓉月餅　　澳門英記餅家

由細到大食咗咁多個白蓮蓉月餅，有無諗過係點嚟嘅？有傳係澳門嘅何其芳餅家所創，可惜何其芳餅家已經結業，不過呢間亦係當年嘅名家之一。為咗慶祝創立88周年仲推出咗復刻版，唔單止有懷舊鐵罐，連手挽袋都係用雞皮紙做！另外亦有有齊雙黃白蓮蓉月餅同五仁月餅嘅團圓禮盒。

訂購方法：2016年8月25日至9月15日親臨尖沙咀港威商場地下中秋Popup store，或親臨澳門分店

清新斑蘭蓮蓉月餅　　香港百樂酒店

想喺眾多傳統月餅中突圍而出，就要加多少少心思。例如呢間酒店就喺傳統雙黃白蓮蓉月餅中加入「香料之王」斑蘭，清新得嚟不失香甜。而且仲特別揀咗健康天然嘅海藻糖嚟製造。一盒至尊雙星禮盒就有齊雙黃斑蘭蓮蓉月餅同雙黃白蓮蓉月餅兩款口味。

訂購優惠期至2016年8月31日
訂購方法：親臨Park café，致電2731 2168，或電郵至 parkcafe.phhk@parkhotelgroup.com

大人細路都鐘意　　馬哥孛羅酒店

中秋節係一家大細團聚嘅佳節，呢間酒店就照顧哂大朋友同小朋友。先有華麗月餅禮盒，分別有傳統低糖雙黃白蓮蓉月餅同奶黃月餅兩款口味任揀。再有Piccolo兒童迷你奶黃月餅，唔單止有香甜濃郁嘅迷你奶黃月餅，包裝更有卡通圖案設計，吸引小朋友認識中秋節習俗。

訂購優惠期至2016年8月19日
訂購方法：親臨或致電馬哥孛羅咖啡廳，Three on Canton或add@Prince

典雅低卡傳統月餅　　Ms B's Cakery

與其食完月餅先嚟擔心Keep Fit大計，不如選擇低糖低卡路里嘅月餅。呢間精品餅店今年就推出用麥芽糖醇製作適合開心Share嘅雙黃純白蓮蓉月餅，同只有四分一個蛋黃所以自私食都無壓力嘅迷你月餅。加上禮盒用粉紅蝴蝶裝飾，啱哂送畀注重身材管理嘅朋友。

訂購優惠期至2016年8月12日
訂購方法：親臨Ms B's Cakery或C'est La B

雙黃白蓮蓉x4款新口味　　Flame at Towngas Avenue

鐘情白蓮蓉月餅嘅甘香軟滑，但又覺得有少少悶？呢間餐廳就諗到將四款唔同口味融入傳統雙黃白蓮蓉裡面，包括柑桔、海藻、藍莓蜂蜜同桂花。令你喺呢個中秋可以享受到熟悉中帶不一樣嘅圓滿滋味。

訂購優惠期至2016年8月26日
訂購方法：親臨Flame at Towngas Avenue、煤氣烹飪中心及各煤氣客戶中心，或到網站購買禮券

獨家訂製迷你奶黃月餅　　香港置地文華東方酒店

除咗月餅要好味之外，送禮嘅話仲要個Package夠吸引先夠體面。香港置地文華東方酒店就考慮到呢點喇，唔單止有六件以獨家文華食譜烘焙出嚟嘅香噴噴迷你奶黃月餅，仲有湖水藍同陽光橙兩種顏色嘅方形禮盒。食完月餅，個盒可以用嚟放首飾，正宗月餅箱都變首飾箱。

訂購方法：親臨Amber餐廳，致電2132 0066 ，或電郵至lmhkg-amber@mohg.com