作為卡通/動漫迷，梗係要去主題餐廳為你鍾意嘅卡通/動漫角色打氣兼打卡啦～開飯仔就提提大家現時有以下主題餐廳等緊你！
山下菓子 「小丸子幸福之日常」主題
供應期：即日起至2025年9月30日
小丸子動畫開播35周年喇，今次特別推出「小丸子的幸福日常」主題Cafe，將佢嘅校園生活、家庭晚餐、甜蜜下午茶變成現實場景！餐廳化身日系茶屋之外，仲分階段推出5個主題餐點：富士山丸子(小丸子故鄉靜岡縣可以近距離一睹富士山)、抹茶丸子、朱古力丸子、桃子丸子同栗子丸子，設計出富士山造型唐揚雞明太子滑蛋飯、巴斯克蛋糕配日本CREMIA、日本白桃芭菲、栗子手工千層蛋糕/梳乎厘班戟等主食同甜品。另外會隨餐點附送禮品，例如點小食拼盤即可帶走小丸子原木食物盤；凍飲就送小丸子/朋友們嘅掛飾+杯墊；熱飲/指定甜品亦送造型滿分嘅小丸子燙金玻璃杯等。
富士山丸子餐點全階段供應｜富士山造型唐揚雞明太子滑蛋飯($129)、甜點($69起)
抹茶丸子餐點($69起)｜白桃梳乎厘班戟($139)
同學會達摩公仔($79/個，$288/套)｜變身丸子襟章($50/個)
繼光香香雞 聯乘Netflix人氣動畫《坂本日常》跨界合作
供應期：即日起至2025年9月30日
伴隨Netflix《坂本日常》(SAKAMOTO DAYS) 第二部熱播，台灣元祖級炸雞品牌「繼光香香雞」3間香港分店推出聯名套餐同周邊商品呀！即日起第一波聯名套餐($78)包括：經典美味香香炸雞+小食(蒜脆杏鮑菇、海苔味樂薯或4/9起中秋限定柚子胡椒腿丁之中3選1)+飲品/冷泡茶，隨餐附送聯名紙袋同聯名炸雞桶。4/9起開始第二波，凡於門市現場消費淨額滿$50可加價購聯名證件套1個($57/款，4款任選1款)或收藏卡($10/款，4款隨機1款)，滿足坂本迷蒐集慾～
《坂本日常》聯名套餐、周邊
《坂本日常》證件套、收藏卡
壽司郎 (旺角 / 銅鑼灣 / 元朗) VTuber Ina’nis主題
供應期：即日起至2025年9月14日
虛擬YouTuber「VTuber古神祭司Ina’nis」 攻港，壽司郎3間分店設置多個特色打卡位供粉絲朝聖，仲有聯乘餐點同外賣盛合，例如「Ina'nis最愛!炙燒明太子3貫」、「Takodachi能量補充炸章魚塊」、「WAH!來自古神的試煉紅提子芭菲」等，隨餐亦附送限量周邊精品，若堂食或外賣自取消費滿指定金額更可加購獨家周邊𠻹。
主題食品+周邊｜元朗店打卡牆
部分隨餐附送周邊，如環保袋、亞加力小立牌
文：Cathy
