年度盛事「OpenRice優秀開飯熱店大賞」今年以「日嚐作樂」為主題，希望大家從每日品嚐到嘅美食中創造樂趣，從探索餐廳中感受香港「味」力。日前已經宣佈賽果（按此即看賽果），名單上唔單止有唔少新面孔，更有13間餐廳一口氣奪得兩個獎項！今日就同大家睇睇當中六間港式、西式，同多國菜餐廳，下次約朋友諗唔到食咩就可以參考啦。
Bakehouse（最優秀灣仔/銅鑼灣開飯熱店）（最優秀開飯甜品店）
由資深麵包烘焙大師Grégoire Michaud開設嘅烘焙店，好多時候都會見到有人排隊等買新鮮出爐嘅麵包糕點。酸種麵包係用經過36個鐘發酵嘅天然酵母，配以人手搓揉，先可以焗出口感得宜又天然嘅麵包。牛角包同酸種葡撻都係食家推介！
Mamaday（最優秀尖沙咀開飯熱店）（最優秀開飯西式餐廳）
呢間由餐廳名、裝修到菜式都非常幽默搞鬼嘅樓上Cafe由台灣回流返香港開店一直都大受歡迎，有過癮圖案同金句畀大家打卡之餘，食物配搭都有新意。例如好邪惡既咸蛋牛油果蟹肉比薩就用重口味嘅鹹蛋黃配搭清新嘅牛油果同蟹肉，味道層次豐富。
蟲二（最優秀開飯日本菜餐廳）（最優秀開飯新餐廳）
由唐樓活化而成嘅618上海街本來就係打卡熱點，呢間位於頂樓又有齊室內同室外座位嘅Cafe就更加係人氣新餐廳。必食之一係由上環店3rd Space帶過嚟嘅麻糬班戟，仲有伯爵茶同桂花兩款口味。另一推薦係一汁三菜便當，有埋步驟教大家點做茶漬飯二食呀。
Cobber Coffee and Tonys Pastry（最優秀觀塘開飯熱店）（最優秀開飯新餐廳）
圖: tiffsuet
觀塘工廈多平靚正餐廳是常識吧，能夠喺呢區突圍而出一定有佢嘅本領，而呢間Cafe就係靠住即叫即製嘅日式梳乎厘班戟。口感軟棉由有蛋香，甚至有食家嘅評論係可以媲美日本過江龍！主食例如燉飯、意粉等都有水準，而且定價合理，難怪唔少回頭客。
大渣哥茶記（最優秀觀塘開飯熱店）（最優秀開飯港式餐廳）
茶記係唔少人打躉或者食Comfort Food嘅地方，不過呢間大渣哥就絕非一般茶記，唔少菜式都經過改良。例如招牌黑牛黑麵就有濃郁有花生粒嘅沙嗲醬配鮮牛肉，加埋炒蛋同丹麥多士真係無得輸。鮮茄焗豬扒飯就勝在食得出用新鮮蕃茄整，比坊間一般用茄膏整嘅味道自然得多。
番茄師兄（最優秀深水埗開飯熱店）（最優秀開飯粥粉麵店）
邊個話深水埗得文青Cafe？呢間小店連續兩年奪得最優秀深水埗開飯熱店！主打大人小朋友都鍾意食嘅蕃茄湯麵，湯底用大量新鮮蕃茄熬製，蕃茄味濃郁又唔過鹹。無論係配騸牯牛、新鮮滑蛋，定係蔬菜都咁滋味。
OpenRice優秀開飯熱店大賞2021 (查看賽果按此)