一年一度嘅優秀開飯熱店大賞，今年以「全城打氣 滋味起飛」為主題，啱啱喺前幾日宣佈咗賽果，名單滿有驚喜，當中大部分嘅餐廳都係第一年獲獎，其中更有13間餐廳同時包攬咗地區組別同菜式組別兩個獎項！
今日先同大家介紹7間日、韓、東南亞菜嘅得獎熱店，就算冇得去旅行，都一樣可以食到各國嘅美食啊，食完好西先有力量繼續去做任何事呀！
小曼谷海鮮燒烤屋（最優秀九龍城開飯熱店）（最優秀開飯東南亞餐廳）
圖﹕ RheaChim
喺九龍城一枝獨秀嘅泰國菜餐廳，唔少人專登入去，都係為咗食佢咋！勁多菜式選擇，每日8點至11點仲有live music聽，啱晒gathering呀！必食「泰皇咖喱炒海鮮」，超香咖喱味，唔會太辣之餘，仲帶啲椰香味，會食唔停口呀！入面有青口、大蝦、魷魚、帶子等，夠晒豐富，一啲都唔慳料呀！
阿叔泰麵 （最優秀元朗開飯熱店） （最優秀開飯粥粉麵店）
圖﹕四個後生仔遠赴泰國拜師學藝半年，將充滿泰國風味嘅船麵帶到嚟元朗。船麵嘅湯底一啲都唔hea，用牛骨熬足12個鐘，零味精，肉香味甜！喺指定時段仲只係$15，就食到碗泰版船麵喇，細細碗啱晒小鳥胃嘅女生！
蝦麵店 （最優秀荃灣／葵青開飯熱店）（最優秀開飯粥粉麵店）
圖﹕ 主打檳城蝦麵，麵食配以辣味蝦湯底，加入咗蝦殼、洋蔥、辣椒同少量肉骨等材料熬製而成，熬煮至少7個鐘先做成湯汁。湯底濃郁，食落反而唔會太辣。餐廳仲提供唔少馬來西亞小食，好似馬來香炸雞翼、咖央多士等，絕對可以止一止想去馬拉嘅心癮呀～
六両三 （最優秀尖沙咀開飯熱店）（最優秀開飯東南亞餐廳）
圖﹕仲未飛得去台灣食好西，好在香港都一樣可以食到地道台灣菜！店主係基隆人，喺台灣拜師學藝，將台灣嘅味道帶到嚟香港。店主對每道菜都非常講究，好似牛肉麵嘅湯底就用牛筒骨熬足至少30個鐘，落齊多款香料、藥材，就連麵條都係特別訂製，口感特別Q彈呀！
Outdark （最優秀旺角開飯熱店）（最優秀開飯韓國菜餐廳） 
圖﹕ 嚟自韓國釜山嘅人氣炸雞店，絕對係唔少香港韓仔韓妹嘅心水餐廳呀！嚟到當然要食炸雞啦！一共有5款口味，包括原味、醬油、甜辣、辛辣同香蒜，仲加送薯條、薯角同薯格，相當邪惡呀！炸雞食落唔會太油膩、純肉冇骨，真‧啖啖肉！芝士控必食芝士肋骨鍋，芝士味超香濃，有齊肋骨、金薯蓉、雞蛋卷等，應該要多幾個人些牙先食得晒！
韓閣 （最優秀荃灣／葵青開飯熱店）（最優秀開飯韓國菜餐廳）
圖﹕自認係韓仔韓妹嘅話，呢間餐廳就啱晒你啦！你講得出嘅韓國菜都有，好似炸雞、部隊鍋、人蔘雞湯、石鍋飯等！特別為芝士控推介芝士岩漿炒飯，芝士同蛋漿鋪滿鐵板，炒飯加入辣醬同五花肉片，微辣得嚟，又有香甜嘅芝士味中和返，超級過癮呀~
丼瀛（最優秀觀塘開飯熱店）（最優秀開飯日本菜餐廳） 
圖﹕ 呢間日式餐廳主打刺身丼飯，飯上鋪滿厚切嘅刺身，份量十足。想食得豐富啲嘅話，不妨試下「海之幸丼」，包括三文魚，吞拿魚，油甘魚，牡丹蝦，松葉蟹肉等，每一樣刺身都好有鮮味，完全食得到魚嘅原味！咁高質嘅刺身丼飯，唔係度度都食到呀！
優惠券﹕午市半價優惠 / 晚市7折
文﹕Kiko
編：Kar
