啱啱過完農曆新年，為咗慰勞去年嘅辛勞同預祝來年順利，相信大家都食左唔少新年食品。應節嘅中菜一般都比較多肉同濃味，嚟緊不妨揀返啲健康西餐轉換口味啦。今次介紹嘅3間餐廳都參加咗由降低食物中鹽和糖委員會推出的嘅「少鹽少糖食店計劃」，佢哋都為顧客提供少鹽少糖菜式，而且各有唔同風格嘅西式料理，選擇幾多元化。
西班牙海鮮意粉
鰂魚涌有唔少小店，KaS Simply Deli則著重使用新鮮食材。好似需預訂嘅西班牙海鮮意粉，因選用活蜆，烹調時會逼出蜆本身嘅鹹味；加上大蝦、刺身級帶子同魷魚，鮮味突出；配上以新鮮車厘茄、蘑菇煮出天然甜甜酸酸嘅汁底，再以些厘酒、蒜頭同香草調味，緃使減少咗75%鹽，味道層次仍然豐富。
帶子雜菌意大利飯
減鹽版帶子雜菌意大利飯先炒香洋蔥同雜菌，令意大利米吸收蔬菜嘅天然香氣同甜味，然後略煎刺身級帶子引出天然嘅鹹味，再以少量帶鹹香嘅巴馬臣芝士同黑椒調味，令呢道菜減少一半鹽都依然美味。
普羅旺斯羊架
同樣需預訂嘅普羅旺斯羊架選用紐西蘭羊架，肉質新鮮唔太羶，所以只需少量鹽同黑胡椒醃一醃，略煎後鋪上撈咗芥末、蒜頭同香草嘅天然酵母麵包糠再烤焗，令羊肉帶有濃郁嘅香料味，即使減少一半鹽依然不失風味，食落更充滿肉汁。
Hummus
將軍澳嘅海濱一帶，聚集多間悠閒風格嘅西餐廳，而Picnic Casual Eatery則提供多款地中海菜式。其中鷹嘴豆泥，將營養豐富嘅鷹嘴豆磨成糊，再混入本身帶鹹味嘅芝麻醬、新鮮檸檬汁、天然橄欖油同香草，減少一半鹽反而更突出天然嘅豆香。
Chicken Shish Salad
烤雞係餐廳其中一道主打菜式，但如果想菜肉量均衡啲，可以揀地中海風味嘅香烤雞粒沙律。烤雞粒配搭西生菜、番茄、紅洋蔥、紅蘿蔔同紅椰菜，並以橄欖油、檸檬汁作沙律醬汁，有助中和烤雞嘅油膩感，少一半鹽同樣開胃惹味。
Bebere Mushroom with Rice
呢款飯採用鮮蘑菇，將菇炒香後撈入Berbere香料、椰奶、香菜籽、丁香、大蒜同生薑等調味料，令米飯吸收唔同嘅香氣，減少用鹽量，畀人不一樣嘅素食體驗。
新加坡炒米粉
Bacaba同樣位於將軍澳海濱，提供多款歐亞風味嘅西式料理。呢度嘅新加坡炒米粉冇額外加鹽，餐廳將白洋蔥、青椒、白菜同蔥炒香，令蝦肉、蛋同米粉顯得更清新，同時亦帶有蔬菜嘅甜味。
白酒蜆肉扁意粉
白酒蜆肉扁意粉係唔少意粉控鍾意嘅口味，而蜆肉自帶海水嘅鹹味，無需額外加鹽，簡單用蒜蓉同辣椒炒香再加入白酒，已經香氣十足，重好有味道層次。
野蘑菇意大利飯
呢道野蘑菇意大利飯用大啡菇製作，厚肉多汁，重帶有濃濃嘅菇味，混入松露油同巴馬臣芝士，唔使再加鹽都好夠味，質感重幾creamy𠻹。
