開飯喇陪伴咗大家原來已經20年啦！為慶祝20週年來臨，OpenRice將會舉行一連串20週年慶祝活動。而首發就係呢個同煤氣烹飪中心合作舉辦嘅「滋味20年工作坊」，喺眾多會員中成功挑出24組幸運兒一齊煮嘢食！今次活動導師Pauline將會喺三小時內同大家一齊煮鱆魚燴五花腩及奇脆雞棗兩味菜，以及示範如何烹調鮑汁雞腳。

「技巧收埋落個袋無用，最重要就係傳授到畀人。」呢個就係Pauline二十多年來教煮食嘅宗旨，佢話希望大家上完佢課堂後，會覺得煮嘢食係一件輕鬆事，提升學生對烹飪嘅興趣。而且Pauline唔單止教煮食方法，仲會教埋大家如何保存食材添。

會員都話是次活動進行得好順利，玩得非常開心！Elanie同Iris兩年前曾經參與過OpenRice舉辦嘅中秋整月餅活動，體驗良好，所以期待咗呢個活動已經兩年啦。佢哋覺得今次活動安排順暢，而且導師Pauline仲好有幽默感，而且菜式望落雖然好複雜，但其實比想像中簡單！

而情侶Emily及Eric就話因為平時無咩機會煮食，所以就嚟參加今次活動。佢哋認為活動安排細心，準備晒所有材料，而且導師講解清晰，簡直就好似簡易烹飪咁。

OpenRice 20週年慶祝活動陸續有嚟，想參與的話記得緊貼OpenRice Facebook以及網站：
https://www.openrice.com/info/or-20/special-experience/index.html