以前做所有嘢都要一班人，一齊食飯、一齊玩、連廁所都要約埋一齊去。好抗拒一個人食飯，其實冇乜大不了，呢個心理關口，相信長大咗就會明白架喇。其實一個人食飯又有咩好怕喎？仲有好多好處架。

1, 快

食得快，好世界。一班人食飯有以下步驟：約時間、等齊人、決定食乜、等位、等落單、等大家食完先走得，你睇吓花咗幾多時間喺度等？一個人食飯就可以完全免卻呢個煩惱，最快紀錄係15分鐘可以做完以上所有動作。

2, 唔使排隊

當你見到餐廳門前一大班人，唔使慌唔使亂，通常一個人都唔需要等位，直接「一位唔該」就可以華麗轉身，施施然行入去食飯！分分鐘食完出面班人都未入得。

3, 食咩我話事

今日想食車仔麵？但同事/朋友唔想，又被迫去食韓燒。同一大班人食飯要合群，有時要迎合大家，明明唔想食都要食。自己食飯自己話事，按照心情揀餐廳，我鍾意食中西日式都可以自己決定。

4, 冇錢銀瓜葛

有時食飯夾埋一齊俾錢，肯肯定會有一次半次，唔記得俾、俾少咗、追唔返，一個人食飯就絕對唔會發生喇！同同事朋友唔會有錢銀瓜葛，一家唔會傷感情。仲可以自己控制budget，出咗糧食豪啲，月尾喇喎，麥記茶記又一餐。