一個人食飯覺得尷尬？幻覺嚟架啫！其實一個人食飯都好閒啫，每間餐廳總有人一丁友，唔會有人特別注目嘅。不過如果真係覺得唔自在，開飯仔都有少少貼士醒你，等你食得安安落落，化尷尬為食量。
1, 座位要識揀
一個人霸住一張四人卡位，好彩嘅真係得一pair人，另一個都係搭枱，三對一當然唔好受，但大圓檯仲衰，分分鐘得你一個外人，感覺更加差。如果有吧枱，就一定冇死，冇的話，二人卡位都唔錯，因為坐你對面一定都係一個人，或者冇人。
2, 夠鐘開餐了
如果你有彈性食飯時間就perfect池啦，梗係揀2pm後先食，避開人潮仲可以嘆埋下午茶價錢，一舉兩得呀。如果冇，就一係早15分鐘，12:45pm即衝落街食，如果同全世界一樣都係1pm放飯，倒不如1:30pm打後先食啦。以上理論晚餐同樣適用。
圖：awnovel
3, 避開旺區
旺角、尖沙咀、中環、銅鑼灣等旺區，絕對等於一個人食飯重災區。因為呢啲區域肯定好多朋友聚會，撞到朋友覺得面懵？錯重點，其實冇位先係事大！又唔使咁灰嘅，旺區好處就係餐廳多，食唔到一間，咪食另一間囉！
