以前餐廳喺海光街，鋪位細細，唔係坐到好多人。 宜家搬咗嚟太古坊大好多，開揚好多。 宜家PCCW Tower附近開咗好多餐廳，人流好旺。 食完飯去附近買杯咖啡都好多選擇。 Roasted Suckling Pig Panini ($138) 星期六、日晏晝餐廳有做weekend brunch。 不過我同朋友都覺得份量太多，決定散叫。 偏食嘅我，落單嘅時候講定唔要烤辣椒🫢 三文治有豬肉片、蕃茄、沙律菜。 麵包外面烘到脆脆，好好味。 除咗三文治，仲可以揀兩款配菜。 配菜有好多選擇，有薯條、沙律菜、烤新薯、炒菇、烤蘆筍。 我就揀咗沙律菜 同 烤新薯，沙律菜已經有黑醋調味，新薯上面撒咗啲芝士碎，食完好滿足😋 Spaghetti Alle Vongole ($168) 朋友揀咗一個辣意粉，味道唔會太咸，辣度都岩岩好。 蜆嘅份量多，食到意粉有少少酒香，意粉保持有咬口，唔錯。 哩度嘅氣氛好岩假日嚟，幾舒服。 有時撞岩太古坊有市集的話，可以過嚟行下。 不過餐廳人手較少，成個鋪面，只有兩個職員，帶位、落單、收錢、上菜、執枱都係佢哋，職員唔一定可以即時回應客人，大家要有啲耐性🙈。

又係每月一次嘅中同飯局，好耐之前佢哋帶我嚟星街搵嘢食，宜家間唔中都會過嚟哩度食飯。 難得繁忙嘅市區入面，有一條靜靜哋嘅食街，又唔會太雜，人流唔多。 最緊要係，餐廳食物水準高😌 試過幾間唔同嘅餐廳，一啲都唔雷。 今日就要介紹下Oolaa Petite。 趁住夜晚8:00前有 happy hour，一坐低就叫咗杯白酒先🤣 平日餐廳都會固定有啲特別主題，而逢星期四係 Fijitas Nights。 Fajita ($150) Fajita 可以揀素食、牛肉、雞肉、蝦肉，想貪心啲牛肉 加 雞肉就要加 $20。 第一次食 Fajita，今次揀咗牛肉。 主菜用鐵板上，好香😍 但係有大量三色椒🙈，偏食嘅我將所有三色椒留哂俾朋友😝 夾餅會跟埋配料同醬汁，先將醬汁搽上夾餅，加埋牛肉一齊食，好惹味。 牛肉好淋，而且份量比想像中多，值得一試。 Crab Cake ‘Bites’ ($185) 蟹餅一共有6件，蟹餅炸得好脆口，而且一啲都唔油，再配埋微辣嘅沙律醬，食唔停口，一個人食哂一份都唔誇張。 必食推介 ❤️ Salmon Puttanesca Rigatoni ($180) 我哋太睇少哩個辣蕃茄醬😳 諗住西式意粉嘅辣，應該都唔會好辣啫。 上面嗰啲意粉無浸住辣蕃茄醬都還好，食到底，啲粗管粉吸哂啲辣蕃茄醬，對唔食辣嘅我，唔係好食到。 如果食得辣，一定要試哩個意粉。 意粉煮得好入味，粗管粉口感岩岩好，有咬口但唔會太硬。 其實成個意粉都煮得好惹味，會忍唔住一直食，但真係太辣🥵 Wild Mushroom Risotto ($155) 好在我哋仲叫咗一個唔辣嘅主食。 菇嘅份量好多，但唔會有菇嘅草腥味。 雖然係意大利飯，但唔會好膩。 同其他食物比，哩個飯會比較淡。 整體食物都唔錯，職員好有禮貌，會留意客人水杯，定時定候主動幫客人加水。 食物偏向濃味，預客人一路飲酒一路食，但唔會太咸，調味做得幾到位。 推薦大家嚟試吓👍🏻

喺星街食完飯，去附近太古廣場坐低飲杯嘢，繼續傾計。 見到哩間餐廳靜靜哋，有cake又有飲品，於是就入去坐低。 留意番餐廳有最低消費，每人要點一樣嘢。 五層朱古力蛋糕 ($120) Five-Layer Chocolate Cake 食飽飯，最緊要食一個甜品，哈哈。 喺menu上面見到哩個五層蛋糕，我哋幾個女仔都雙眼發光😝，即刻落單。 蛋糕朱古力味好濃，味道唔算好甜。蛋糕口感鬆軟，濕潤。 朱古力cream都好rich，上面再加埋朱古力碎。 好好味😍😍，係朱古力迷必食蛋糕!! Flat White with Oat Milk (Decaf) 因為時間關係，考慮咗好耐要唔要飲咖啡🤔 唔想影響睡眠質素，但係食蛋糕，配咖啡又係最夾😝 任性地叫一次，而且餐廳好難得有decaf豆，無藉口唔叫😌 咖啡好香，奶好滑，就算用oat milk，個拉花都做得好靚❤️ 咖啡推薦! Matcha Latte 朋友怕瞓唔著，唔敢飲咖啡，就揀咗一杯無咖啡嘅飲品。 奶一樣打得好滑，一樣都做埋拉花。 抹茶好濃，飲到抹茶淡淡嘅甘味，但無茶嘅苦澀，加埋奶，成個味道都好平和。 唔想飲咖啡嘅朋友，可以考慮下佢! 今次係食飽飯去，都唔係試到好多款食物。 下次要去試埋佢啲正餐。

趁住放假，搵番啲舊朋友一齊食飯。 已經好一段時間無去西營盤，有啲餐廳都換咗。 今日試下新嘢 A.O.M 😋 對哩個鋪位一啲都唔陌生，佢嘅前身係食西餐，半酒吧感覺嘅餐廳，以前都食過一次。 餐廳格局同以前差唔多，都係一入去就係吧格位，沿住走廊有幾張細枱，最後面有戶外位。 戶外位都幾靚，裝咗一把大嘅太陽傘，但叫職員無咁方便。 Lunch set 有兩款，西式或者日式。 西式的話，包湯 / 沙律、主食、一杯果汁；而日式就會有前菜、小食、主食，飲品就要另外加。 今次同朋友同樣都係揀咗日式。 珍珠米飯 + 明太子玉子燒 + 燒汁牛肉漢堡 + 蒲燒北海道帆立貝 ($135) 稻庭烏冬 + 辣味三文魚 + 燒汁牛肉漢堡 + 香脆日本竹莢魚 ($135) 日式午餐擺盤好靚，每樣都做得精緻。 個燒汁漢堡好 juicy，唔會有好多肥肉。 漢堡本人調味唔係好咸，點埋燒汁一齊食，味道岩岩好。 帆立貝就稍為乾咗少少，但都可以接受。 竹莢魚炸得鬆脆，但又唔會食到成口油👍🏻 最緊要係無乜骨🐟😂 成份午餐都整得好食，不過份量唔算多，男士可能唔夠食，要加小食。 餐廳空間唔大，二人枱喺吧枱對面，就有啲逼，加上條走廊係所有客人同職員嘅必經之路，所以感覺有啲繁忙。 職員服務唔錯，可以好快回應客人，會定時定候幫客人加水。 不過記得要預先訂位，見到有啲walk in 客都無得食。

自從開咗airside之後，真係少咗好多去mikiki。 雖然airside有好多選擇，而且一定有位，但係有時想食得經濟啲，就會去返mikiki 😛 今日哩間餐廳係同事曾經食過，覺得唔錯極力推介 ❤️ 午餐包餐湯，同時可以用優惠價叫餐前小食、飲品 或者 甜品。 和風吉列豬扒蛋包飯 ($83) 和風カツオムライス 蛋包飯有兩款可以揀，日式炸雞 同 吉列豬扒，不過前排病咗，仲戒緊口，無得食。 只好睇住朋友食🥲 蛋包飯醬汁可以揀野菌咖哩汁 或 洋風完熟蕃茄汁，朋友揀咗咖哩汁。 咖哩汁係日式咖哩，職員一放低份午餐，已經聞到好香嘅咖哩味。 醬汁濃稠，試咗一啖蛋包飯點咖哩汁，好好食😋 咖哩汁少少微辣，但小朋友應該都可以食到。 吉列豬扒都好多片，算厚身，睇落炸粉厚薄適中，唔會好厚。 朋友食後感大讚個蛋包飯好食，而且份量好大份。 溫泉蛋芝士波隆拿肉醬意粉 ($73) チージーボロネーゼに温泉卵 午餐嘅餐湯係無得揀嘅，所以就算叫意粉，餐湯同樣係麵豉湯 🥣 叫哩個意粉，係俾個溫泉蛋吸引，不過肉醬意粉偏向濃味，混合埋一齊之後，已經俾蕃茄醬遮蓋咗個味道，唔係好食到蛋香。 肉醬入面有好多菇，但係洋蔥就偏生，再炒熟啲就更好。 而意大利粉口感煮得岩岩好，麵好彈牙。 泡沫咖啡 カプチー 白咖啡 フラットホワ 午餐加$15可以叫 $40以下嘅飲品，已經涵蓋咗大部份嘅咖啡。 雖然menu上寫可以免費轉脫脂奶，但係落單嘅時候，選項只有脫脂奶，無全脂奶揀😅 轉植物奶就加$4，升級做燕麥奶。 咖啡水準都唔錯，咖啡唔係好濃，但奶夠香。 以優惠價嚟講，算係唔錯。 餐廳舖位唔算好大，大約坐到25-30人，枱與枱之間嘅距離唔會好密，算係坐得舒服。 可能餐廳門口位於商場外面，人流唔算好多，唔洗等位就可以入座。 食物出餐速度都幾快，食完lunch夠哂時間返公司。

以前已經好鍾意哩間咖啡店，就喺舊公司附近，每日經過都聞到香噴噴嘅咖啡☕️🥹 鰂魚涌太古坊分店上年話2023年底會開幕，一直等到2024年頭終於開咗🥹🥹 原本話新年期間照常營業，點知年初二經過嘅時候無開🥲🥲🥲 講咗幾個月終於成功可以喺太古坊分店食到個 brunch🥲 Mushroom Soup ($50) 哩個係西營盤分店無見過🤔，唔知道係咪太古坊店限定呢🥣 叫蘑菇湯的話，會跟兩片酸種多士🍞 蘑菇湯好濃稠，蘑菇好重手😋😋 湯好香，但唔會有蘑菇嘅草青味，調味做得好好👍🏻 Avo Toast ($95) 上次試過 half & half，今次就淨係要牛油果🥑 牛油果一樣鋪到滿滿🥹🥹 落埋少少檸檬汁，好清新，好開胃。 麵包同樣烘到鬆脆。 牛油果多士同 half & half 比較，相對會容易啲進食，啲蕃茄會好唔聽話碌走哂🤣 Flat white (Oat Milk) ($35) Latte (Oat Milk) ($45) 咖啡無論喺西營盤分店，定太古坊分店都一樣出色。 暫時哩間咖啡店都仲係我嘅 top 1 咖啡店☕️😌 除咗西營盤同太古坊，大坑、灣仔、中環、蘇豪都有分店，推薦大家去試下👍🏻 西營盤同太古坊分店都係pet friendly，可以帶埋毛孩一齊歎咖啡🐶🐱

以前已經好鍾意哩間咖啡店，就喺舊公司附近，每日經過都聞到香噴噴嘅咖啡☕️🥹 Half & Half ($95) 哩個係心大心細人必食😌 鍾意食牛油果，又鍾意食蕃茄芝士的話，叫哩個 half & half 就無錯。 可以一次過滿足哂兩個願望❤️ 麵包底係咖啡店主打嘅sour dough，烘到鬆脆。 牛油果同蕃茄芝士鋪到滿滿，好好味🥹 Sourdough toast with butter ($25) 唔係好肚餓，叫一份 toast 覺得太多，但又口痕想食啲嘢，可以叫哩個酸種多士🍞 加$15可以追加果醬。 一份多士有兩大片，可以滿足到唔係好餓但又想食少少嘢嘅你。 Flat white (Oat Milk) ($35) 咖啡難得用燕麥奶都唔洗加錢👍🏻 飲過好多次，水準都好穩定。 咖啡好香，奶打得好滑。 就算用燕麥奶，個拉花都拉得好靚❤️ 咖啡店有戶外位，係pet friendly，方便大家帶埋毛孩一齊歎咖啡🐶 推薦👍🏻

新年快樂，新一年大家都要身體健康❤️❤️❤️ 今日去試新嘢，後來先知道原來灣仔、將軍澳都有分店。 咖啡店裝修好開揚，主要係白色同淺啡色。 氣氛好舒服。 店鋪位置比想像中大，可以坐到差不多30人。 除咗咖啡，仲有正餐同甜品。 今次因為時間關係，只係買咗杯外賣咖啡，下次會試埋佢啲蛋糕 🍰 Flat white ($45) 咖啡有唔同嘅咖啡豆可以揀，我就揀咗nutty。 加$5可以轉燕麥奶。 咖啡好香，奶打得好滑。 咖啡溫度都岩岩好 👍🏻 咖啡店樓上有gym，買完咖啡上去行咗個圈。 Gym唔算好大，但係要用嘅機都有齊，算夠用，而且地方好乾淨。 不過場內無cardio機，主要係做weight training。 Join PT plan 仲可以配合埋餐廳健康飲食餐單。 經過可以去參觀下 🙂

好早之前已經bookmark 咗哩間餐廳，有一次約得成飯局想去試，但係餐廳位於蘇豪區，咁岩嗰日落大雨，當時臨時決定轉陣去商場食。 今次再約飯局，終於成功食到🥰 一早訂位，唔洗等位，即刻可以入座。 餐廳好靜，星期五晚，蘇豪區，只係坐滿一半左右。 FINI'S Famous Marinara (12”) ($188) 所有薄餅都可以揀12吋或者18吋。 餐廳嘅招牌薄餅，係一個素薄餅。 蕃茄醬底、有牛至草、芝士、蒜頭、羅勒。 Bar枱有3款醬汁可以揀，用嚟點pizza食。 有蒜蓉牛油、辣椒油、沙律醬 (ranch dressing)。 不過個薄餅本身已經好好食，唔洗點醬都好好食。 個蕃茄醬好濃味，蒜頭焗到軟身，配埋濃味蕃茄醬薄餅，好好食。 Mac N' Cheese ($178) 擺盤好靚，中間有一個蛋黃。 所有意粉都可以揀一人份量，或者係分享size。 其實問完職員都唔係好get到究竟份量差幾遠😅 不過我哋最後揀咗一人份。 個意粉唔係做得好杰身，所以食落唔會好漿口，唔會好膩。 調味唔係好重，食到好濃車打芝士味。 我哋問職員拎咗鹽同黑胡椒，加埋落意粉仲好食。 FINI'S Popcorn Shrimp ($155) 其他食物味道比較淡，對比下爆谷蝦就有啲咸。 不過個醬汁好好食，係四川麻辣沙律醬，好惹味。 哩個小食送酒就岩哂。 Side Chopped Salad ($75) Classic Shoestring Fries ($85) 叫一個正常份量嘅沙律就會太多，所以揀咗side。 不過side的話，就只有Chopped Salad。 薯條就係幼薯條，份量都幾多，成籃滿哂。 薄餅醬用嚟點薯條仲好食過點薄餅🤪 除咗個蝦比較咸之外，其實食物味道都唔錯。 一般酒吧餐廳嘅食物調味都好重手，預你送酒食，但係哩度調味唔會好重手，就算唔飲酒都唔會覺得好咸。 成餐飯，不停有職員嚟斟水，基本上飲到一半，就好快有人refill。完全唔洗叫人。 埋單嘅時候見到，原來係12%服務費，唔怪得服務咁好，斟水斟得咁密 😅

去airside次數多到，就黎可以幫佢代言🤣
今日哩間餐廳用實木傢俬做主題，風格同How to live有啲似，啲枱櫈全部掛哂價錢牌。
午餐menu好多款式，全部午餐都包餐湯，亦可以加錢升級加飲品。



芝士澳洲和牛漢堡 ($158)

個漢堡超級邪惡🥹🥹，個漢堡扒整到好香口，好juicy。
如果想同人一齊share，可以落單嘅時候要求切半。
漢堡包入面有啲配料唔想要，都可以落單嘅時候註明。仲可以升級加配料，想佢變成終極邪惡漢堡，可以加鵝肝😈
配菜嘅薯條係蕃薯條🍟


Relish All Day ($158)

哩個全日早餐好豐富。
有炒蛋、粟米、忌廉菠菜大啡菇、香腸、煙肉、燒菠蘿、沙律菜、紫薯餅。
炒蛋係用日本蘭王蛋，炒得好香好滑。
想再豐富啲可以升級轉黑松露炒蛋或者芝士炒蛋。
第一次食全日早餐有咁多食物，份量好大，份量多到食唔哂。
每樣食物都好好食，尤其係個燒菠蘿，出面有一層焦糖，燒到好脆，正😋
紫薯餅入面有栗子，甜甜地，都好好味。



西京燒比目魚伴炒野菜•香草烤新薯 ($188)

覺得漢堡同全日早餐太邪惡，可以揀燒比目魚。
比目魚無雪味而且燒得好靚，外皮燒到香脆，仲有薯菜伴碟。
同其他食物份量比較，相對魚嘅份量就會細啲，但女仔食絕對夠哂。


山葵野菌忌廉汁軟殼蟹意粉 ($158)

第一次試wasabi意粉。
又ok喎，我自己唔係好鍾意食wasabi，好怕佢個陣攻鼻嘅感覺。
但係加咗落忌廉汁之後，中和咗陣wasabi味，有少少似honey mustard嘅感覺，有淡淡嘅wasabi味，但一啲都唔攻鼻。
反而令到個忌廉汁無咁膩。
軟殼蟹炸得好香口，食落唔會成口油。
做得唔錯。


總結每份午餐都做得好好，好精緻，味道唔會太咸，幾好。
空間好大，坐得舒服。
份量、質素同價錢成正比，而且相對無airside cafe咁貴。
上菜速度算快，職員有禮貌。
推薦👍🏻