上次食腸粉覺得唔錯，今次試粢飯，好失望。 d飯粒好鬆散，握得唔實。油炸鬼好淋。d肉鬆炸菜是酸的，唔知係調味奇怪定壞左。食左一半就唔敢食，扔左，希望唔會肚痛。 另外叫左盒生菜，正常唔錯。

老字號魚蛋店，但完全好失望。排長龍以為味道很好，但食完覺得不值得排隊，先不論價錢，魚蛋味道普通，是凍的。 排到買左串小魚蛋，臨離開前突然想要多串大魚蛋，呀姐態度串串要人重新排過。 沒有下次

想食熱熱既面，叫左豆乳雞烏冬，但上到黎個湯唔熱係溫溫地only，雞件咬入去係凍，唔知係煲得唔夠滾，定係呢碗面既特色黎。 味道正常，係同我預期中食完暖粒粒既希望有落差

跟左一日旅行團黎左呢間大伏餐廳，忍唔住要黎發番篇劣評。 入到唔使等位，因為跟本無其他客人。 叫左個338套餐二人餐： 燒鵝例牌 老火湯 任選2款小菜 -金銀蛋白菜 -椒鹽海生蝦 兩碗瀨粉 食到勁躁既一餐。 個湯溝水咁淡到無味 碟鵝肥到hihi，我本身都中意少少肥既燒鵝，因為貪有油香，但呢碟肥野真係搞唔掂。鵝皮淋晒，而且睇鵝皮就知佢係兩隻唔同鵝，揀啲難食又肥位拼出黎就叫例牌。其中幾舊食落仲勁so, 完全無鵝味。應該係我人生食過最難食嘅燒鵝。 椒鹽海生蝦，蝦肉就唔算霉。但啲椒鹽好似攞嚟裝飾咁，勁少又唔脆，d 蝦食落無味，懷疑佢唔記得落鹽。 瀨粉質地正常，但煮瀨粉個湯又係無味。清水瀨咁 金銀菜係正常叫入得口。其他咁多碟都勁難食。 當我地食左一半，都聽到隔籬枱個呀婆話有一碟小炒咸到唔食得，叫佢重炒，又聽到佢靜雞雞咁話：個湯咁鬼難飲唔好飲晒quota. 姐係唔係我地呢枱黑仔，而係整體真係好難食。

平時甚少去九龍灣食野，今日放假正好周圍行下。 Search 到呢間0負評西餐廳，梗係即刻要入去試下有咩咁巴閉啦！ 本身想叫個2人餐，有湯、有蒜蓉包、有前菜、有扒、有飯、有野飲，幾抵食！ 但實在太想試吓佢出名嘅豬手，所以唯有散叫。 豬手皮勁脆，肉質又唔柴，我好鍾意食佢嗰個酸菜，可惜唔係太多。個芥末醬都好好味，唔夠仲可以問他們拎，佢哋勁nice。 不過豬手味道稍清淡，我呢d 重口味人士，就覺得可以再濃味少少就正🤏🏻 但Cp 值黎講講簡直完勝好多其他店 另外，佢嗰個牛肝菌鵝肝意大利飯真係好好味。我不嬲都唔係好鍾意食意大利飯，不過我想講佢個意大利飯我諗我下次去都係會叫佢！！！牛肝菌實在太香🤩🤩🤩味道啱啱好，一入口勁surprising！ 由於佢啲份量都係大大份，所以食到最後我哋都勁飽咁樣，兩個人先$398。抵到不得了

呢間平民日本丼飯一向都好多人食 時不時都有食開佢早餐同lunch.又平又好味， 個早餐仲好豐富下架 平時都係食佢個烏冬A餐。今日晏就就想食下滑蛋牛肉丼飯。又多牛肉又夠晒多汁，仲有金菇Tim. 送埋野飲先45 蚊。 唯一係如果d飯硬番少少就好了。依家啲飯好淋，食落好似翻煮咁。日本人最重視既就係d飯粒粒分明。唔知係知係個飯煲唔得定落太多水，改善一下就無敵了。

一家大細食開年飯，今次簡左格格府，貪佢有特色，環境又好。 年初四，7點到步，全場只有三圍，座位舒服鬆動，環境清靜，岩晒驚嘈雜既朋友。 一入去就好有古代感，清朝服飾放係門口位置，係可以著黎影相架！裝修擺設都有心思，同出面中餐明顯唔同。 我地一行10人，訂左個8人餐加多2份蝦球同湯，另外仲叫多碟水煮魚，份量足。 前菜係五福拼盤有肴肉、醉豬手、酸青瓜、麻油木耳、胡麻醬雞絲。當中最好食係木耳同豬手。 黃金大阿哥蝦球，原來單價要加97蚊一隻！一上已經好香蛋黃味，大大隻而且新鮮熱辣辣，非常香口夠味，對得住呢個價錢。 菊花豆腐湯望落真係幾靚，朵花浮下浮下咁，而且味道唔錯。 松子桂花魚，酸酸甜甜，外層香脆，內裹嫩滑。 水煮魚麻香味濃，同樣以桂花魚入鐉，無骨又夠滑。重點係佢有大量芽菜同薯粉，吸晒d 麻辣味，好好食。我地叫左中辣，辣度可以接受，而且麻得好過癮。唯一要挑剔既係薯粉可以稍稍再淋身少少同入味少少。 蔥油炸子雞一啲都唔鞋口，外皮香脆，水準都係高於預期。 至於紅燒小元蹄，份量一啲都唔小，佢會幫我地切開晒一嚿嚿，方便入口。元蹄嘅肉質好淋易入口，肥而不膩。 高湯浸菜苗都正常水準。 格格府炒飯聽聞幾好食，反而食落有啲不足，飯粒確係炒到好乾身，粒粒分明。但係味道可以再濃郁少少。可能因為前幾道菜味道都好濃烈，呢碟飯就顯得有啲清淡了。 最後嘅甜品係桂花酒釀丸子，都係一個唔錯嘅選擇黎嘅，唔會死甜，清清地，幾好味。 全程嘅服務都唔錯，該換碟嘅換碟，加茶既加茶。 如果一定要抽一樣嘢出嚟講，就係上菜上得有點過快，前面幾碟都未食完，就已經上另外一樣了，好似有少少趕咁，不過其實都係小小問題姐。 重點係以呢個質素來講，價錢得宜，環境又好，服務又唔錯，食物又精緻。十人份量 set dinner 加水煮魚，包埋加一都係51xx。有得食有得睇有得玩，相信好多出面嘅餐廳都做唔到，下次一定會再嚟。

不嬲都好中意食米線既我，前排睇左個咩咩香港最好食的九間米線，而呢間老羊就係其中之一，咁我當然要黎試下啦。

由於我食米線之前，已經係戲院食左一大盒爆谷，成個口都係個陣甜到膩既味，好想快d 食番d 鹹食平衡下。

好彩老羊都幾近apm，行一陣就搵到，入去個陣唔算多人，因為個陣都成4 點，無人食晏，所以我就霸左個梳化位了。

餐牌上唔係好多野簡，不過呢間野咁出名食羊，就當然叫番個羊肉米線試下啦！

米線仲有分大碗細碗，其實我個陣岩岩食左好多爆谷，已經飽飽地，所以同男朋友叫左個大碗米線share 兩份食，再加個口水雞。

口水雞先上，份量唔多，廿幾蚊算係咁啦，食入口唔係太辣，好似微微有陣酒香味，好味道架。不過，如果你食慣極重口味既，可能就唔係好夠濃啦！但呢個價錢同質量都算幾好！

再上就係米線啦，真係無諗過佢咁大碗bor! 米線軟硬剛好，羊肉切得細細咁，連皮，味道過得去。最讚讚就係個湯啦，清清地又不失羊香味，感覺無咩味精，健康又好味。

食緊途中仲幫碗米線影左張相，打算為佢寫食評，男朋友笑我使唔使咁著緊呀！但我覺得如果呢d 好味道既地方，再唔幫手宣傳下，到時捱唔住租價，汁鬼左我米無得再食🤤嘻嘻

而且價錢又唔貴，一碗大碗米線加碟口水雞都係七十幾蚊，我覺得胃口唔太大，正正常常兩個女仔一定夠食架！

呢張相係食食下中途影，都仲有好多😋

今次要講既呢間潮品係我開左account以黎第二次值得我打的一篇食評既餐廳。

我總共食左兩次，我先講左我第一次食既經歷先啦。當時潮品仲係新開有6x折，係我朋友話想試。我一向食開旺角雞煲，而且天后咁遠又見openrice 咁少評，都係勉勉強強地去試下。

果陣我一入到間野。嗯...一陣伏味。因為成間野咁大，得一張枱係有客💀我心諗🙄

我地叫既係椰子雞煲，望住白雪雪既湯底，講真食開麻辣雞煲既我見到真係口都淡埋。直到我呷左一啖椰子湯😱一個驚為天人。好啦可能因為個陣我係第一次食椰子雞煲，比較孤陋寡聞掛，但入口真係好好味😂

我地個時三個女仔叫左一碟牛，一碟牛丸，一碟響鈴，一盆雜菜，仲有一碟老闆盛讚既鵝腸

牛係唔錯，唔係出面薄薄個種肥牛，有番咁上下厚度架，望落顏色都幾靚咁。而且加上個湯底好好味，當時我地係完全無點鼓油的。

至於鵝腸。嗯我個人唔中意佢爽爽既口感，但論味道黎講，的確係人地講個句：好有鵝味。因為口感問題我食左一啖就停左，而對面個兩個女人就盛讚佢點樣好味。如果食開鵝腸既朋友可以試下😚。

至於牛丸，我一望落個價錢其實真係唔平，但個肥呀叔講到好好味咁就即管試試。woow係唔錯既。一分錢一分貨，係我食過既牛丸入面，都算係最好食個批架啦！

跟住！出場既就係我最愛既響鈴！好正好正呀，係即炸架（我男朋友話：有咩可能即炸呀！）🙄唔緊要，我堅信佢係即炸既就得了，因為一眼望落佢同平時個d 唔同架！浸一浸吸晒d 湯汁👅正正

仲有可能個陣新開，餐廳比較少人，肥阿叔全程Stand by ，一見到我哋有咩需要就即刻過嚟幫手，幾乎全程都係 serve 我地，加湯換碟個d 直頭聲都唔使出。仲主動教我地煮幾耐d 雞先最好食，好有人情味🙈
。
。
。
事隔4-5個月後既今日，我先有機會同男朋友食多次，真係等到頸都長埋🙄

一入去，光景已經變晒。8點鐘左右，幾乎全場爆滿，我地被安排係最最最入既一個轉角位既最入入既一枱☹️️通常個d 位 都係俾人嚴重忽略的嗚

因為我強烈要求，今次都係叫左響鈴同牛丸😍
仲有牛，魚頭，桶蠔（肥呀叔推薦）

過多一陣我發現佢d 員工得閒無事就會行入呢個轉角位，留意下我地有無需要加下湯加下茶水，幾乎都係自動波，完全唔使你大叫：靚姐，加湯呀唔該！（然後等.....）
連換碟都係自動換左三次😂😂😂雖然係好小一個動作，但對於當時成碟魚骨既我黎講，真係加晒分。

講番野食先，響鈴一如既往地好吃😍😍😍👅👅👅我男朋友之前講開，（響鈴呢d 普通野可以有幾好食🙄)，到佢食完都不得不講左句: 嗯。又真係幾唔錯既。btw 響鈴最好快d 食，因為一開頭配既湯底係最好味，後尾加湯又落其他料，又食左d 椰子就會無頭幾啖咁正咁重椰子味。

之後就係好有牛丸味既牛丸，水準一樣好😌就算貴少少都要再食😝

牛，一樣。

魚頭，係唔錯但呢個價錢如果再好味d 就好了。

桶蠔有6隻，一上枱已經好香海水味😍我之前未試過打邊爐食桶蠔既，所以唔知要落幾耐先食得。我地問左個呀嬸，佢話要起碼十分鐘😮😮😮但我地心諗要咁耐家咩，雞都係六分鐘就食得啦喎！ 之後肥呀叔過黎巡個陣我再問多次，佢話3-4分鐘就得家啦！果然4分鐘撈起佢岩岩好👅👅所以都係個呀叔可信d 😂😂😂

又係正正的一餐！兩個人埋單545，雞煲黎講唔算好平，但比起任食個d 質素真係好大出入。

雖然影左好少相，但都po 下啦科科！

本身想去滿堂樂食嘅，但太多人嘅關係，係去左隔離嘅上海飽餃店啦！！😀 中午時段，舖頭內面都幾空，可能因為晏就無咩人食包同餃子😝 係門口見佢個蔥油餅賣相唔錯，一入去就叫左一個，仲叫左碟鍋貼同小籠包，同豆漿。 蔥油餅真係好好味架！！😁其實我本身就無點食過蔥油餅嘅，可能未食過覺得特別好味🙈，之後仲追加左一份tim😈 熱辣辣嘅上籠包一上枱就覺得佢個賣相唔夠靚仔，嘻…😶 夾左一舊點醋入口😲😲😲😲😲😲好好味嘅小籠包！d湯汁爆出黎個下係最正架！😗😗 之後就食鍋貼啦，可能因為前兩樣太好味，餃子就反而無咩特別🙈🙈🙈不過不失啦