星期日晚同朋友睇完戲，想搵個舒服嘅環境食下野，傾下偈，即時醒起Alchemy ORIGIN。始終係商業區，又係周末，所以餐廳人流冇平時咁旺，不過對我地黎講，成個環境就好舒服啦！
之前飲過佢地嘅咖啡，諗住咁夜，唔飲咖啡住，改飲朱古力，點知店員話所有朱古力類6點幾已賣晒，唯有下次再試啦。上次試過冷泡咖啡，係正嘅，今次試Espresso Tonic。

—Espresso Tonic—
咖啡果酸香郁，混合Tonic水一齊，意外地夾，幾醒神。—烤雞菠蘿漢堡配檸檬醋醬及焗薯—
份量頗大。麵包香軟，烤雞厚肉又大塊，調味香濃，有肉汁，配上菠蘿、蕃茄、生菜，層次豐富，加埋檸檬乳酪醋醬，都幾開胃，而配料係焗薯。分別喺荃灣同鰂魚涌嘅分店都食過法式西多士，本身打算再回味下，但又想試下新野，所以今次甜品決定點另一款。

—生酮Tiramisu 卷蛋—
卷蛋嘅質地好濕潤，包住豐厚、順滑嘅cream，一入口已經食到好香濃嘅咖啡味，唔錯。—牛油果青瓜蕃茄沙律伴芝士配檸檬醋醬—
清沙律清新、新鮮，牛油果夠大粒。檸檬醋醬非常開胃，不過唔夠多，我之後再問店員拎，佢哋都非常友善，再拎俾我。建議喺落單時，喺選項可以點額外嘅醬。

Espuma曾經係我經常幫襯嘅餐廳，因為餐廳會因應唔同時節，推出唔同精選菜單，所以成日都會保持到新鮮感。不過呢幾年冇喺港島返工後，就少左過黎，今次同港島區嘅好友慶祝生日，想環境靚而食物又有質素，第一時間就諗起Espuma。Espuma真係好適合打卡，景色開揚，可以居高臨下望唔同嘅建築，包括有百年歷史嘅聖母無原罪教堂、禮賓府等等，日景同夜景都別有一番風味。望住中環靚景享受美食，真係好chill。我哋點左Dinner Set，有齊前菜及餐湯、主菜同埋飲品。前菜及餐湯：芝士松露醬薄多士 + 巴馬風乾火腿季節沙律 + 南瓜忌廉湯
芝士松露醬薄多士有驚喜，估唔到咁鬆化同埋香口。而沙律同埋個湯都唔錯。主菜：香烤美國安格斯肉眼扒
我地要左7成熟，juicy得黎肉質夠軟腍。配菜同埋薯蓉都好好味。主菜：西班牙式脆皮豬腩卷配蘆筍
份量十足。只要一切，就聽到清脆嘅聲音，未食都知塊豬皮好香脆。一入口，皮脆肉香，油脂豐腴唔肥膩，值得推薦。甜品：西班牙炸油條 
我地追加左甜品 — 西班牙炸油條。Churros係西班牙嘅經典，表面鋪滿肉桂糖，再dip埋朱古力醬，大啖咬落去，熱辣辣，好香口，成個配搭真係好好食！飲品：招牌水果茶
每次黎都會飲呢個招牌水果茶，果香清甜，消消膩。甜品：百利甜酒竹炭戚風蛋糕．伴海鹽芝士奶蓋
食飯嗰日，適逢就黎萬聖節，餐廳都有佈置左萬聖節飾物，增加氣氛。不過，重點係餐廳推出嘅百利甜酒竹炭戚風蛋糕．伴海鹽芝士奶蓋，好好味呀～

戚風蛋糕非常軟熟，而蓋面嘅海鹽芝士奶蓋滿瀉，入口帶少少咸香、芝味，配埋微甜嘅蛋糕，好有新意。

有接近一年嘅時間冇嚟到西貢，難得趁平日放假，約埋朋友去café食早餐傾下計，之後去行下山。記得之前喺Deer Coffee嘅前身食過brunch，質素唔錯，所以打算嚟食多次懷緬下。點知嚟到舖面，原來已經轉左另一間café，見門面同店內嘅裝修都好有格調，所以試試。 店鋪裝潢清新，而且係pet friendly，有齊室內外座位，整體環境令人舒服。店員好親切，同佢地傾左幾句，先知原來呢度嘅老闆係前café嘅員工，上一手唔做，而老闆本身都好鍾意呢個舖位，所以就承接左。老闆們都係好有禮貌同埋笑容滿面嘅後生仔，希望佢地可以努力經營，做自己想做嘅野。
蜜汁雞扒炒蛋多士呢度嘅蜜汁雞扒真係大推！雞扒大塊厚肉，最驚喜係做到皮脆肉嫩，仲好juicy。炒蛋滑溜，鋪喺脆卜卜嘅多士面一齊食，好味呀。而沙律用左自家調配嘅沙律汁，酸酸食食，開胃。 蘑菇牛角包炒蛋蘑菇炒得乾身焦香，而牛角包焗到香脆，將蘑菇同炒蛋夾喺包入面，大啖咬落去，口感豐富。 明太子雞翼餐牌寫明呢款小食需要20分鐘製作。當我地食完兩份多士、牛角包後，小食剛剛好登場。漲卜卜嘅雞翼入面包住滿滿嘅微辣明太子，雞翼表面焗到好香口，面明太子味道唔錯，唔會好咸，幾惹味。 Espresso tonic第一次飲Espresso tonic。先呷一口，咖啡甘香，攪勻後再擠少少青檸，有氣嘅咖啡帶點點酸，感覺幾得意。 焙茶拿鐵綠茶拿鐵飲得多，但焙茶口味就真係第一次試。泡沫細緻幼滑，焙茶香郁，沖調手勢好好呀，值得一飲。

YADLLIE PLATE 可以話係我其中一間最鍾意嘅韓式餐廳之一。久不久就會過嚟幫襯，每次嘅水準都keep得好好。之前嚟親都係晚市,，人頭湧湧，今次係大約下午3點入座，過晒午餐嘅繁忙時間，所以環境靜靜地，坐得好舒服。水冷麵
一向都對冷麵冇咩興趣，但朋友話天氣熱想食下凍野，又想食麵，於是點一客試試。食完之後，即時對水冷麵嘅印象up up up！麵條非常彈牙，而湯汁係少少酸酸甜甜，好開胃，食落非常透心涼。所有材料加埋看似好簡單，但加埋一齊就好好食。驚喜二重奏呢個驚喜二重奏果然夠「驚喜」。每次黎都有點到炸雞，但今次想試下從未點過嘅食物，見到呢道菜除咗有炸雞，仲有埋牛扒添。先講牛扒，出乎意料咁好食。牛扒擺喺熱石上慢慢煎熟，視乎時間，鍾意熟啲，就可以由佢燙多陣。牛肉肉質好腍，冇渣，質素都幾高喎。至於炸雞，我覺得呢款同餐牌上一碟碟嗰款唔同，呢款就冇落咁多粉醬去炸，調味係唔錯，但肉質就比較乾身啲。滷水五花腩  & 農家鮮泡菜本來擔心兩個嘅食量有限，咁大份滷水五花腩未必食得晒，點知，我哋太低估自己嘅戰鬥力，最後係一件不留。因為我好鍾意泡菜包肉連埋沙律菜食，所以特登點咗一客農家鮮泡菜。泡菜味道唔會死咸，又唔會太辣，好爽脆。滷水五花腩入味，味道唔會太濃，就咁食都已經夠味。店員事先講明，醬汁偏咸，建議唔洗蘸咁多。塊肉蘸上特別調配嘅辣醬，用沙律菜包住，再加一片泡菜，一啖擺晒落口，真係好好味！香蕉沙冰 & 海鹽焦糖沙冰
天氣咁熱，點都要飲返杯凍飲。兩款沙冰味道唔錯，特別係海鹽焦糖，微咸但又滲住焦糖嘅香甜味。

荃灣燒味外賣之選 今天買咗非常經濟嘅燒味外賣， 分別係海蜇手撕雞飯$48同埋雙拼飯$38 ， 全部跟還例湯， 性價比高！ 另外，我見佢個二人餐都好吸引，有唔少菜式，份量應該多到兩個人都唔會食得晒，決定下次會再encore試試。 講返今次，我叫嘅係海蜇手撕雞飯， 手撕雞非常嫰滑，肥瘦適中， 雞味濃， 連埋香郁嘅芝麻醬同芝麻，真係忍唔住一啖接一啖。 另一盒雙拼飯我叫咗燒肉同熏蹄飯， 燒肉肥瘦適中， 燒肉皮食個陣仲脆卜卜， 肉質一d都唔鞋，而且調味適中，唔會太咸！ 熏蹄切得一片片， 好薄， 咬口非常好， 豬皮食落去好有彈性，Q彈彈！ 豬皮部分有好重骨膠原， 中間係有少少脂肪， 但一d都不肥，有種入口即化的感覺！ 例湯夠火喉，又足料。成個飯盒，以咁嘅價錢同質素，性價比真係幾高！

自從第一次幫襯過Alchemy之後，就對佢念念不忘喇。咁啱去開太古坊，知道嗰度有新開嘅分店，實在太開心!星期六嘅早上，未算太多人，餐廳地方非常寬敞，而且裝潢有格調，座位都好舒服，落地大玻璃採光度十足。今次點咗兩份主食、一份甜品同一杯咖啡。 主食：青醬忌廉雞肉長通粉 青醬味道好Fresh，通粉嘅韌度亦煮得啱啱好。值得大讚嘅係，雞胸肉份量多而且非常軟腍，完全唔嚡口，一塊接一塊地好快就食到清碟！ 主食：炸魚卷配希臘乳酪醬 炸魚熱辣辣、脆卜卜，魚肉好嫩，配襯爽脆嘅沙律菜，中間再落埋Greek Yoghurt，成個wrap嘅口感唔錯。 甜品：法式西多士配自家制雜莓醬 上次食完個多士後，一直好想再試。表皮微脆內軟，蛋同埋牛油味香，蘸埋酸酸甜甜嘅雜莓醬，真係好好食。 飲品：冷泡咖啡 冰凍嘅咖啡用樽裝住，即使飲唔晒，都可以成樽拎走。飲完嘅樽可以自留循環再用喺其他用途，唔洗浪費。另外一個杯裝住大大粒嘅冰波。鐘意濃或淡又好，只要將啲咖啡倒落冰波度，就可以慢慢嘆住冰凍嘅咖啡。最重要係，冰波夠大粒，唔怕好快溶左，所以喺餐廳慢慢坐慢慢食，都可以keep住飲到凍啡。咖啡嘅果味好香郁，帶點微酸。附送嘅卡仔，俾你知道呢杯咖啡嘅故事，好細心。

我同朋友今日去咗荃灣逛街，中午肚餓就去左沙咀道嘅炯記餐室試咗佢哋嘅炯記二人套餐，真係好好味啊！ 佢哋嘅鹽焗手撕雞真係唔錯，雞肉好嫩，配埋啲鹽焗味道好正。 豬手都好好食，啲冬菇醬皇好香濃，豬手都煮得好腍，好滋味。 鹽焗雞腎同酸辣雲耳都好出色，酸辣味道好開胃，雞腎都煮得好嫩，好多汁。 招牌太子鵝油撈麵就更加冇得頂，麵條彈牙有口感，鵝油味道好香，無論食幾多次都係咁正。 飯同湯都唔係普通嘅飯同湯，絲苗白飯飯粒飽滿，日靚湯都好濃郁，湯底都好鮮甜，令人食完之後都好舒服。特色飲品凍檸茶同凍檸七都好好味，清涼解渴。 餐廳嘅設計簡約大方，座位好舒服，環境好舒適。總括而言，炯記餐室嘅炯記套餐系列係值得一試嘅好滋味，而且經濟實惠，保證食到飽，下次一定會再去食。

難得夾到老公星期六一齊放假，所以陪佢朝早飲返杯佢最愛嘅咖啡，同埋嘆返個精緻嘅早餐。每次經過Espresso Alchemy，都俾佢落地大玻璃、簡約嘅裝修格局、慢活嘅氣氛吸引到而望多幾眼，今次終於有時間嚟試下。 朝早10點嚟到，其實已經差唔多滿座，但大家都係細細聲傾下偈食下野，環境都幾放鬆。成間店充滿濃濃咖啡香氣，令人醒神。諗緊點咩野主食時，環顧咁多枱，大部分都點咗法式西多士配自家製雜莓醬，所以最後決定點Mocha、一個Alchemy 如心全日早餐同埋法式西多士配自家製雜莓醬。 Mocha 先呷一口Mocha，豐盈嘅泡沫打得好滑，咖啡味香郁，之後再慢慢滲出朱古力嘅甘香味道，有水準。Alchemy 如心全日早餐 呢份全日早餐真係好足料，滿滿一大碟。 先講滑蛋方面，熟度剛剛好，蛋味重。而煙肉同埋腸仔表面煎得好香脆，唔會好咸。因為我好鍾意食蘑菇，所以好欣賞呢度嘅炒雜菇，調味適宜，好快掃清晒。 另外，牛角包都幾鬆脆，有層次。其他材料仲有焗薯、車厘茄、牛油果同埋哈密瓜。我同老公share食完成碟之後，都已經開始好飽。 法式西多士配自家製雜莓醬 就算幾飽，點都會食得落呢個法式西多士，因為真係好高質，好好味。厚身西多士各面蘸滿蛋漿後再慢慢煎，外面少少香脆，而入面就好鬆軟。而自家製雜莓醬同樣出色，味道酸酸甜甜，好開胃，值得下次再嚟食過。

好耐無出街堂食喇！難得約朋友出街，大家都好掛住喺日本食拉麵嘅回憶，所以今晚就揀咗食拉麵，懷緬下。晚飯時段，都多人喺門口排隊。叫得鬼金棒，舖頭入面真係放咗好多日本鬼面具同棒棒做擺設。設有吧枱，可以近距離睇到廚師煮麵、預備材料等程序。 我哋點咗兩款拉麵，一款要麻辣，另外一款無辣。 增量叉燒麻辣味噌拉麵我哋叫咗增量叉燒，另外辣度係少辣小麻。先飲一啖湯，帶淡淡嘅麻辣香，非常濃郁。兩塊叉燒非常厚切，大啖咬一口，油香味濃即溶，而肉質軟稔，非常出色。增量粟米筍份量多，有火炙過，所以食起上嚟，份外焦香爽口。拉麵麵身彈牙，掛湯一流。炒豆芽菜味噌拉麵 另外點了一碗炒豆芽菜味噌拉麵。湯底帶着濃濃的豬骨味，喝上去感覺豐厚，濃稠。叉燒無增量裝咁大舊，但都係咁好味。芽菜炒得剛好，爽口無草青味。每啖麵都夾雜芽菜，一軟一脆嘅口感，開胃得很。另外，亦追加咗一份味玉，即是流心蛋。流心蛋好出色，值得一試。鮮橙紅嘅蛋黃呈半流心狀態，蛋味甚濃，而蛋白部分好軟滑，好味道！

有一段時間沒有到荃新天地逛街了，經過商場時，見到新開的pickabowl，款式好吸引，既可以點套餐，又可以選擇DIY套餐，一於試試。 看著色彩繽紛的刺身、肉煩及蔬菜，即時食指大動。 選擇困難症下，索性點已set好的套餐，不用慢慢逐款選，快靚正。點了3款外賣，分別是A.經典三文魚、D.慢煮天多利雞及I.夏威夷四重奏。 A.經典三文魚 配菜組合就是和風，即有烤南瓜、玉子燒、炸豆腐、四季豆、毛豆、配自家制醬油。 先講主角三文魚，用醬汁拌和的三文魚，滑嫩新鮮。選了半糙米飯，半糙的效果令到米飯更有咬口。 一大口吃，有齊晒三文魚、雜菜、玉子燒及炸豆腐，正～ D.慢煮天多利雞 配菜組合就是蛋黃，即有菠蘿、青瓜、蟹籽配蛋黃醬。 雞胸肉淋上印度醬汁，肉質不會太鞋。加入大量爽脆的青瓜，整體味道清新。 I.夏威夷四重奏 材料非常豐富，分別有辣味三文魚、經典吞拿魚、泰式熟蝦、牛油果。配菜組合就是彩虹，即有蕃茄、青瓜、甜椒配自家制醬油。 雖說是辣味三文魚，但只是微辣，頗惹味。我向來不是吞拿魚愛好者，但這個經典吞拿魚用上日式醬汁醃過，帶少少紫菜芝麻，味道又不錯。而蝦肉頗彈牙，不過泰式汁可以濃少少。 選了黃薑椰菜花和半糙米飯。黃薑椰菜花味道清淡，爽口，減少澱粉質嘅飽肚感。