香港嘅拉麵店之中 會keep住幫襯、食得最多嘅一定係台風 一如大部分拉麵店 地方較狹小及只有吧枱座位所限 每次去都預咗要排大約15-30分鐘先入座 證明真係好多捧場客 台風每間分店嘅menu都有少少出入 而沾麵得灣仔店係全日供應 旺角店限日間供應，荃灣店就每日限量售完即止 所以如果想食沾麵就要留意番時間喇 今次晚市嚟荃灣食 估唔到居然仲食到沾麵 真係超難得 好開心🤩 食開台風都知 呢度嘅份量大份兼足料 配料嘅叉燒份量超多 拉麵麵條較粗身 口感煙韌 濃厚嘅沾麵汁充滿住豬骨及魚介味 每次食都超滿足 另外 好鍾意店舖熱鬧嘅氣氛 店內播放住日本動漫歌 牆身又有超可愛嘅壁畫 相當有氣氛 重點呢間係良心黃店 一定要支持💛

基本上無論係午市定晚市， 鉄火堂都總係大排長龍， 除咗香港人素來鍾情食日本嘢， 多人支持一定有原因！ 今次係平日午市嚟食， 拎完飛等咗大約15分鐘入座。 午市魚生丼自選5款配料，包味噌湯， 只係$72，真心好抵食！ 而且選擇夠多，客人可按個人喜好揀選配料。 不過亦因為個個客都揀自選餐， 午市比較多單製作需時，要耐心等候食物。 壽司飯口感軟硬適中， 醋嘅比例亦剛好。 魚生份量唔算大片，但勝在夠新鮮！ 總括而言，鉄火堂食物質素好好👍🏻 以呢個價錢嚟講真係超值！ 而且仲係良心黃店💛 絕對值得支持💪🏾

九龍城出名係泰國菜餐廳嘅集中地 而且仲要係泰國人主理 當中比較抵食同性價比之選 會推介九龍城街市熟食市場嘅泰苑小食 週日午市去食 11點幾入座唔算多人 不過埋單嗰陣12點幾已經座無虛席 午餐食得簡單D 一碗湯粉+小食+凍飲 青木瓜絲沙律份量十足 味道亦好正宗 同喺泰國食嘅真係差唔多 味道略為偏辣🌶 建議唔食得辣嘅落單時嗌少辣或走辣 酸辣海鮮湯金邊粉🍜 有我至愛嘅冬蔭公做湯底 湯底唔會太辣 唔太食得辣嘅朋友應該可以食到 海鮮配料包括蝦、青口、鮮魷、蟹柳 餸菜同麵底份量都幾足料 仲要只係$42 真心抵食 泰式黑咖啡&泰式凍咖啡 泰式特飲嘅特色係味道偏甜 咖啡帶有一種獨有嘅焦糖香味 咖啡味唔重 奶則會選用煉奶 飲落別有風味 總括而言 呢度雖然環境欠奉 但食物質素唔錯 泰國人主理味道夠正宗 價格親和 絕對值得一試再試

以前通常去開台灣旅行先會食吓鼎泰豐 既然暫時冇得飛 唯有喺香港食過住口癮先啦 最後選擇咗週末晚市到V City店 8PM拎飛 等咗大約半個鐘入座 用餐時間限時75分鐘 餐牌都係預期中嘅菜式 兩個人點咗4款小菜 冷盤揀咗醉雞 食落有淡淡嘅酒香味 雞件肉質嫩滑 值得一試👍🏻 小籠包 $66/6件 份量偏細粒 外皮搓得唔夠薄 內裡餡料嘅豬肉肉質好粗嚡 而且一上枱即刻食只係微暖唔夠熱 令人失望 紅油菜肉抄手係呢餐比較值得推介嘅菜式 餡料嘅菜肉切到好幼細軟綿 搭配帶微微酸辣嘅紅油醬汁非常夾 唔食得辣都會OK 葱油拌麵都係預期中嘅味道 麵條唔算幼滑 食落葱油唔夠香同偏淡口 另加豉油調味就差唔多 用餐時間有限時 但上菜速度都尚算快 但如果朋友相聚想慢慢嘆下或傾吓計就太趕喇 由於食物份量全部都細細碟 兩個人食四碟嘢 其實唔太食得飽 連埋茶水加一 埋單300鬆啲 整體性價比一般

夏天天氣熱辣辣特別想食日本嘢 喺外賣app見到呢間小店就決定試試 食物選擇都幾多 最後叫咗個雜錦魚生丼同章魚小丸子 章魚小丸子一客有六粒， 粒粒都好大粒！ 外賣送到嚟都keep到表面香脆嘅口感， 配上傳統嘅燒汁、蛋黃醬同紫菜絲， 整體味道都唔錯！ 如果裏面粒章魚大粒d口感就更加好喇。 雜錦魚生丼都算幾大碗，份量十足。 切粒嘅魚生份量都算多，食落都幾新鮮！ 珍珠米嘅軟硬及醋嘅份量適中， 配上流心溫泉蛋，撈飯食都唔錯！ 整體嚟講，呢間日式小店都算幾抵食， 食物質素亦唔錯，值得一試！

喺數碼港返工 附近餐廳選擇唔多 加上疫症爆發以嚟都減少咗出外用餐 外賣便當絕對係唔錯嘅選擇🍱 有唔少同事都推介過呢間以自助販賣機形式購買嘅日式便當外賣店 平時如果1:30pm後walk in 好多時d便當已經沽清 所以都建議whatsapp或網上預訂咗先 每日下晝2點開始就可以預訂定翌日嘅便當 直至取餐當日早上10:30am就截單 錯過咗就要walk in碰碰運氣喇😉 餐盒包裝精美 紙套設計附帶手挽 省卻使用外賣膠袋 而且餐盒亦選用環保紙物料 減少對環境嘅破壞 值得一讚👍🏻 今次試咗三文魚便當 餐盒賣相十分討好 食落三文魚口感嫩滑 非常好味 日本米軟硬適中 配菜亦同樣好食 重點係食物冇乜味精 絕對好味又健康，值得推介👍🏻 期待下次再試下其他便當😋

由去年開始基本上已經習慣咗 無論去邊區食嘢都會打開黃藍地圖 盡力支持下D黃店 嚟開旺角區想食吓街頭小食 就搵到呢間專食滷水涼拌小食嘅小店 小店位於Moko天橋落去花園街位置 店舖同貢茶相連分拆出兩個舖位 元朗鬼巴士綠色招牌好易認到 呢排武漢肺炎肆虐 店舖有提供消毒洗手液俾客人食嘢前使用 A餐 可選: 生腸/脆腸/反腸/紅腸 + 雞腎 + 墨魚 由於一直都唔知脆腸同反腸係咩 所以次次都揀生腸 店員會剪好哂一舊舊用盒裝住方便客人篤黎食 好過傳統一串串用竹籤串住 會食得比較論盡 生腸同墨魚口感夠哂爽 而雞腎相對偏淋，冇咩口感 不過搭配麻油、蠔油等醬汁 味道相當好食 另外亦試過B餐 B餐可選: 生腸/脆腸/反腸/紅腸 + 魷魚 + 牛柏葉 單購墨魚每串$15 生腸、鮮魷同牛柏葉口感都好爽滑 值得推介 香港食滷水涼拌小食比較出名嘅 仲有母子檔嘅肥姐同肥仔 同呢間元朗鬼巴士相比 鬼巴士嘅滷水味相對地唔夠突出 全靠醬汁嘅味道搭夠 不過佢嘅份量同口感都好好 而且切成細細件食起上嚟係幾方便嘅 加上係良心黃店，絕對會推介俾大家

呢間充滿文藝氣息嘅cafe 店內播放住日本民謠歌曲 環境好舒服 尤其鍾意牆上嘅倒吊乾花裝飾 令成間餐廳仙氣滿滿 下午茶時間冇乜客人 可以靜靜地用餐 而呢度嘅店員都好友善 特意提我覺得凍嘅話可以隨意調位 感覺好窩心❤ 食物份量唔多 適合輕食嘅女士 流心芝士漢堡 肉質好juicy 搭配蛋沙律及紅糙米飯 加上甜甜地嘅日式燒肉醬汁 味道好夾 另外，伴碟嘅配菜都好新鮮 岩鹽咖啡只限凍飲 飲落唔多覺有鹽味 咖啡果味較重 帶少少酸味 總括而言 以呢區嚟講 食物價錢唔平 對男士們嚟講食物份量可能太少 但食物質素唔錯 菜式亦有特色 充滿誠意 係值得支持嘅小店👍

荔枝角工商業區一帶有好多食店 不過主要以港式茶記為主 如果想食台灣嘢 除咗程班長之外 亦可以選擇阿土伯鹽水雞 荔枝角店位於D2 Place Two 3樓 下午茶時間商場同食店人流都較少 喺收銀處自助寫紙點菜，付款後等叫號碼 一人餐（雞胸+雞腿）$45 + 拉麪 $7 自選3款配料: 秋葵 + 鹵水豬耳 + 黑木耳 調味: 原味 辣度: 微辣 食落充滿台灣風味 鷄腿好嫩滑 而鷄胸就有少少嚡口 配料份量都幾多 醬汁好香好惹味 不過小心食完個口陣蒜味會久久不散 值得一提嘅係 呢間都係良心食店❤

李圓圓喺台灣好出名 之前去淡水都有專誠去飲李圓圓嘅珍奶 難得呢間過江龍開喺我公司附近 仲要係良心小店添❤ 絕對要支持一下💪 黑糖珍珠鮮奶 冰度及甜度固定咗 冇得自行調配 由於係現煮嘅珍珠 初初飲落去仲係熱熱地 珍珠有超濃厚嘅黑糖香味 而且口感煙靭 真係好好味 將珍珠攪拌5-6下同鮮奶一齊飲 甜度適中 唔會太甜 不過飲到尾當d碎冰溶哂之後 味道就會偏淡 之前都有飲過黑糖珍珠鮮奶2.0版 鮮奶比例會多D 奶味會更濃郁 下次要再試下其他有茶底嘅珍奶先