日日home office，真係屈到個人好悶，點都要揾日出去食飯見吓朋友。 星期五嚟到尖沙咀喜來希肉，估唔到咁多人！又話經濟唔好生意差嘅？！好彩我哋一早訂咗位，叫做唔駛等。 兩個人叫咗三款燒肉同一個海鮮大醬湯，燒肉分別係喜來烤肉，牛護心肉，同辣五花肉。喜來烤肉薄切，油脂均勻，調味料甜甜哋。牛護心肉嫩滑，油份不高，肉味較重，啱晒牛魔王嘅我！食得韓式烤肉，又點少得烤熟五花肉之後用爽脆生菜夾住嚟食丫！肥係肥d，但真係抗拒唔到囉！ 所有配菜、泡菜、同爐邊蛋都係可以無限次refill，真係唔覺唔覺食好多！ 我哋最後仲叫咗個海鮮大醬湯，有蟹有蜆，加埋濃濃嘅大醬湯，幾飽都食晒成碗飯！

馬鞍山近呢一年新增好多食肆，其中東南亞都競爭最激烈，有泰國菜、越南菜、星加坡菜等等，最新加入嘅就有Mee lemongrass. 餐廳位置喺五期天橋旁邊，面口大大個招牌，好易揾！ 受疫情影響，加上係下午茶時段，無乜人。下午茶選擇非常之多，大大話話有成十幾款，我就揀咗個肉骨茶，加黑糖珍奶。 肉骨茶相信係馬來西亞配方，湯頭較深色較黑，而且飲落有淡淡藥材味，仲見到有d杞子喺湯入面！肉骨茶當然唔少得排骨，一字排骨炆到好淋，輕輕一咬可以撕出肉絲，旁邊嘅豆卜同枝竹就吸收晒藥材湯嘅味道！ 黑糖珍奶係我估唔到佢整得咁好飲！佢用膠杯裝住，方便客人飲唔晒可以帶走。黑糖珍奶嘅琥珀顏色非常吸睛，飲到濃濃嘅牛奶味，但黑糖又唔太甜，配埋彈牙嘅珍珠，好飲！我一路食嘢嘅時候發現餐廳有一部分做外賣飲品，都有唔少人嚟買架wo ！我見到佢仲有好多款飲品，好似十勝牛奶紅豆、芝士奶蓋乜乜乜等，下次行過就算唔食嘢都可以食翻杯！

疫情影響下，近排真係好少出去。不過困得喺屋企太耐，個人都有啲情緒化。終於等到weekend 就同朋友去放鬆下。中環唔似得平時咁熱鬧，不過寧靜嘅中環都有佢嘅吸引力，感覺好似慢咗落嚟，同平日步伐急促嘅中環好大對比。 The Roundhouse Taproom 主打美式酒吧菜，手工啤酒、ribs、homemade、roasted chicken、sausages、macNcheese、fries 等等，全部都係送酒菜。 我哋叫咗combo, 可以揀2款主菜2款配菜，遇啱佢做緊買一送一，勁抵！既然佢買一送一，我哋就試晒所有主菜，包括beef brisket, pulled pork, homemade sausage 同roasted chicken，配菜方面，我哋就一樣都係每款要d，有mac&cheese, coleslaw, 同potato salad. 最好食嘅我個人覺得係pulled pork，豬肉味道濃郁，一絲絲嘅豬肉加埋BBQ汁真係無得彈，送酒好啱！Beef brisket 都好惹味，燒到半熟嘅腩肉，外層被粒粒黑胡椒粒包圍，食落去質感好軟身好淋滑，加上少少黑椒辣味，好刺激！燒雞外脆內軟，雞肉係剛剛好熟，所以即使係雞胸位都完全唔會鞋口。最後個homemade sausage 真係推薦一定要試！用咗一半牛肉一半豬肉製成，質感比一般豬肉腸實凈，咸道亦到較重，一路食一路飲，唔覺唔覺飲晒成杯酒。配菜一啲都唔馬虎，Mac&cheese 同potato salad 都好好食，齋食配菜都好滿足。

呢排見到好多人讚石門呢間餐廳，今日抽時間嚟試吓。 午餐menu 有多款選擇，日式西式都有，包埋餐湯同飲品。 餐廳地方唔大，以淺色為主調，有d似家庭式經營嘅感覺。 餐湯係蕃茄忌廉湯，睇顏色就已經見到個湯有幾濃郁，味道較酸，但好處係幫到你打開胃口，迎接之後嘅主菜。 主菜我叫咗香煎厚切豬扒配薯菜，一上枱嘅時候我真係呆咗！點解咁大碟嘅？ 厚切豬扒足足遮蓋咗大半隻碟，而且真係好厚切，可能有1 - 2吋！最誇張係配菜都極大份！d翠玉瓜勁大件，我估計拼翻埋一齊嘅話，分分鐘有兩條翠玉瓜伴碟！加埋d薯條，真係齋食薯菜都飽呀！ 講翻主角厚切豬扒，咁厚嘅豬扒要煎熟但又保肉質嫩滑真係好考廚師嘅功夫。佢都做得唔錯，豬扒唔「鞋口」，食落去感覺到廚師冇加太多調味，不過豬扒本身肉味都夠。 飲埋餐茶，食到飽晒，都係$120，大件夾抵食！

鮨月 好耐無出動食好西，過年前嚟到灣仔月街呢間日本菜，地方唔大，貪佢人少少夠安靜。食omakase 絕對要坐吧枱，因為咁樣先可以慢慢欣賞師傅嘅手藝。先嚟一個安康魚肝配北海道海膽，雖然師傅建議一齊食，但個人覺得分開食可以有雙重享受！ 魚肝嘅油香質感一流，海膽鮮味濃郁！係正嘅！之後嘅縞鯵刺身係全晚最驚喜! 薄切刺身配酸汁，魚肉爽口，酸汁帶出鮮味，完美！再嚟就係北海道厚岸蠔同帆立貝，加上燒帶子群邊，呢三款就不過不失啦，帆立貝口感比較實，厚岸蠔肥美肉厚，都叫做唔錯。 中呑拿魚腩醬油漬配赤大根！toro 同赤大根一向係我嘅至愛，toro魚油夠香，肉質又夠淋滑。赤大根成朵花咁又薄又爽口！ 手握壽司代表就有鱸魚配柚子胡椒、連子鯛配梅子同埋黑鯥魚配海苔，款款都好特別，喺出面好少食到嘅魚，味道由淡至濃咁上枱。赤蝦，松葉蟹膏係濃味嘅代表，蝦肉大隻又爽口，最後大呑拿魚更加無得輸！ 燒物方面有大刀魚，雞肉棒，天婦羅蝦🍤 同明太子釀青椒。非常之鐘意大刀魚，燒得好香，魚肉好滑！第一次食明太子青椒，估唔到又幾好味wo! 最後甜品係紅豆士多啤梨雪糕，呢餐都算大滿足！

聖誕節前夕去咗間優質西餐廳食飯，價錢相宜，食物有質素，推介一下。 前菜我叫咗個白酒煮青口，估唔到前菜都咁大碟，一個人份量，但夠兩個人食。 白酒汁清香，配上煙肉嘅濃烈煙燻味，係正嘅！ 主菜叫咗個澳洲M7和牛肉眼扒，雖然澳洲和牛唔及日本和牛油脂咁豐富，但牛肉味一d都唔輸蝕，而且無咁油膩。牛扒係炭燒嘅關係，所以外層比較乾身，但內層肉質一樣嫩滑。五成熟，保留肉汁更多。 雖然gravy 汁唔多，但其實根本唔需要醬汁都好好食。我個人就鐘意加少少法式芥辣，少少甜，增加牛肉味道層次。 最後甜品亦做得好，apple crumble 外層鬆脆，入面嘅蘋果又唔會太甜，非常滿意！

臨近中秋，早晚都涼咗少少，當然又係圍爐嘅時間啦。 今日食呢間係新加坡過江龍，美滋鍋。成間餐廳都係以粉紅色做主調，一行入去又有一大隻以花製成嘅熊仔做裝飾，好適合一班閨蜜去打卡。 湯底有多款選擇，我哋揀咗美容鍋，因為無咁熱氣，又可以飲啖靚湯。 湯底非常好飲，濃郁得嚟唔會太喊，而且飲得出雞湯味，另外因爲湯底中有瑤柱，所以有多份鮮味！ 我哋叫咗好多嘢食，醉雞、牛肉、蝦卷、蝦滑等等。 醉雞酒味唔算太濃，不過配合翻個湯底，又出奇地好食，加上雞肉嫩滑，都唔錯！ 牛肉其實有多款選擇，我哋食嘅係牛小排，肥瘦均勻，食落又有牛肉味。 脆脘魚片又係真心推介，薄薄魚片鮮味十足，而且好抵食！配合有瑤柱做湯底嘅美容鍋，鮮味提升！ 蝦卷係一個幾特別嘅材料，我第一次食。佢外型係好似春卷咁嘅。初頭見到有d懷疑個皮會唔會洽到散晒，試過先知原來係好似雲呑皮咁，不過又相對彈牙。 值得一提嘅係醬料非常多，而且有餐前醃菜任食，又有生果，真係好鬼正！部份飲品仲無限添飲！好鬼抵呀！ 不得不讚係究極好嘅服務，職員除咗上菜時會幫我哋整齊排好d食物、又會得閒就嚟幫手去咗湯底嘅肥油，每次都好有禮貌好有笑容，真係第一次俾服務費俾得咁開心，咁滿意！

石門站酒店中菜廳翻新後第一次嚟食晚飯，餐廳翻新過後有種華麗又神秘嘅感覺，長型飯廳，加上流線型天花設計，更加拉長咗飯廳嘅空間感。 廣東人食飯多數鐘意飲碗湯，我哋都唔例外，叫咗個例湯，足料，係老火湯嘅味道。 飲完湯之後就先嚟個蝦乾肉崧炒涼瓜，涼瓜爽口味甘，但又唔會太苦，我喜歡蝦乾鮮味加咸香嘅混合。 之後嚟個虎斑兩食，一碟炒球，一碟炆頭腩。比較少餐廳會用上蘆筍做炒球，多數用西芹或西蘭花，但我欣賞佢用蘆筍，一來鮮甜爽口，配上魚肉厚肉淋滑，互相配合，加強口感，同時亦令到成碟菜矜貴好多！ 另一碟炆虎斑頭腩亦都非常出色，魚肉先炸過之後用紅蔥頭、蒜、蔥等配料同特調醬汁去炆，味道濃郁，同炒球形成強烈對比！一清一濃，相映成趣！

我其實唔算係甜品愛好者，係心情低落時或者有壓力嘅時候會想食少少。而對於甜品嘅喜好比較單一，只係鐘情焦糖味嘅任何甜品。 今日經過大王東街，見到呢間雪白亮眼嘅舖頭，無多餘嘅裝潢，簡約歐式設計風格，以灰白為主，配以巴黎鐵塔，花藝等小擺設，簡單美。 講翻主角，基本上主打一種名為 Dacquoise 嘅甜點。職員介紹呢款甜點其實係macaron 嘅姊妹，同樣以杏仁做出鬆脆嘅外層，不同之處在於dacquoise 係外層較厚身，而最特別嘅地方係佢內層係軟綿綿，有d似日式輕蛋糕嘅質地，但又唔係蛋糕咁黏稠，係外脆內軟，充滿空氣感嘅質地。呢款甜點嘅外層已經令我好驚喜，估唔到入面嘅cream 一樣咁高品質。 我試咗兩款口味，分別係brown sugar mochi同 mixed berries。 無焦糖可選，所以我揀咗brown sugar，食落去簡直係驚為天人！brown sugar 絕對唔係死甜，係食得出有brown sugar 嘅香味，cream 因爲雪過嘅關係，口感實浄，好似食雪糕咁，中間有粒原味麻糬，正好中和 brown sugar 嘅甜，好好食！ 之後我忍唔住即刻再開埋件mixed berries，個cream 同樣出色，有啖啖莓味，而且係真水果嘅香甜而唔係食用水果化學劑嘅味。個人覺得如果先食mixed berries 再食brown sugar， 味道由淡去濃會更能享受兩款口味！我下次會再留意一下！ 100分入面我會俾99分，差一分究竟係d乜呢？我覺得係店舖實在太早關門，食完飯過嚟已經關門，買完先去食飯又怕d cream 會溶。好彩職員都俾幾包乾冰我，等我可以順利帶翻屋企，同屋企人分享咁好食嘅甜品！

一日三餐出街食，每逢到月尾都係有d手緊。唐記絕對係糧尾恩物，講真，廿幾蚊買到個飯，喺香港地真係絕無僅有。 我最愛唐記嘅鳳瓜排骨飯同咸蛋肉餅飯。鳳瓜排骨飯有種好獨特嘅香味，即使隔住個盒都會聞到！久不久就好想食下！ 排骨夠大粒厚肉，蒸到軟硬度適中，唔會太勒，鳳瓜唔會甩皮甩骨。另外咸蛋肉餅飯都係好高質素，咸蛋黃會出油，蛋黃油香混合白飯本身已經好送飯，再加埋肉餅，成個飯食晒真係好合情合理嘅！ 我仲叫多咗點心，金錢肚，入味而且炆得夠淋，一碟有成7-8件，$18都係好抵食！ 抵食已經係好吸引，仲有翻一定水準，$100唔駛兩個人食到飽，仲唔係糧尾不二之選！