位於荃灣荃新天地2 地下有個區域叫一門町市場，裏面有好幾間日式餐廳，今次我哋第一次入嚟，試咗一間叫「東京街」。 呢間餐廳主要都係食壽司，刺身，同埋各款飯丼，仲有拉麵烏冬。 餐廳設有自助吧，有茶水飲斟，仲有沙律菜同埋生果（橙） 都可以任食。 我嗌咗個「切角魚生飯」 $78，可以另加套餐ABCD選擇，我加咗個最貴嘅D餐，都只係另加$20，咁就可以有埋湯、沙律、蒸蛋同埋一杯嘢飲。 三文魚份量都頗多 件件都夠厚，仲有幾件吞拿魚，兩隻甜蝦，同埋蟹籽。整體刺身都較新鮮。 蟹柳沙律 味道調得非常好，看似平凡，食落先甜美味。 呢個蒸蛋，味道唔算差，不過啲蛋似乎蒸得比較耐，唔夠滑。 麵豉湯正正常常，不過不失。 套餐跟一杯嘢飲，自由選擇。

今日為慶祝特別節日，嚟到九龍香格里拉再次幫襯晚餐buffet。 環境氣氛依然充滿中式風格。 食物款式種類依然繁多。甜品水準很高， 也是本人至愛😋 各款飲料 任斟 （蘋果汁 西瓜汁 橙汁） 隔離仲有各款乾果 乾梅，似乎其他buffet都冇呢類，幾特別。 基本刺身都有（三文魚 帶子 赤貝 八爪魚片 仿鮑魚片...） 波士頓龍蝦任拎，仲有小龍蝦 青口 蜆螺 長腳蟹等。 芝士焗薯味道良好，仲有花膠鵝掌炆得好腍好入味。 最鍾意佢嘅是日燉湯，已飲左兩碗😋 食埋最後甜品同雪糕，滿載而歸。

為提前慶祝情人節❤️，睇咗好幾間餐廳，最後決定嚟到元朗大樹下東路，位於村內嘅一間特色泰國餐廳，環境佈置十分獨具特色，好有氣氛，及舒適寧靜。👍 地方非常寬敞，室內室外間隔各具特色。由於室內一早已經滿座，所以被安排在室外用膳。 可以帶啲寵物進場。🐶 味道也色香味俱全，我哋嗌咗幾款餸菜，款款都非常美味😋，擺盤也有心思。 馬拉盞通菜，味道濃郁，好正宗，帶有點辣。 嗌咗串燒拼盤，雞牛豬，燒得剛剛好，點埋個沙嗲醬配料，味道一流。 烏頭魚要等20至25分鐘，條魚size唔細，肉質滑嫩，非常新鮮，味道酸酸辣辣，係正宗嘅泰國口味。 呢間餐廳不論環境氣氛還是食物質素，都非常好，絕對值得推介及再次光臨。

放假同家人出嚟逛街，經過銅鑼灣 知道牛大人原來有長者優惠👴🏻，帶住家中長老，就去一試！

大約七點嚟到，雖然滿滿是人，但只係等了一兩分鐘就有位👍

是次我地嗌左個最抵食既套餐$248，未加一，長者$148，超抵。

選擇雖然比起另外兩個套餐少，但都足夠。材料頗新鮮，有四款肉類，雞 牛 豬 羊，最基本選擇都有👍 亦有海鮮魚蝦蜆，最鍾意啲蜆夠新鮮又大隻，任叫任食任飲😋
Like 社交平台 仲可以每人送一杯 近期熱門鴨屎香檸檬茶，正。

叫左個蕃茄湯底，估唔到味道咁濃郁，似用咗好多蕃茄去熬製出嚟咁，酸酸甜甜 好鍾意呢個味道👅。


除咗手機點餐，外圍仲有各款蔬菜 丸子 粉麵 飲品 任拎。


估唔到仲有新鮮手打牛肉漿，海鮮漿，墨魚漿...


最鍾意呢度有花生同芝麻湯圓，加落火鍋度，好特別。


最後每人仲有一個雪糕或台灣仙草甜品揀。


台灣水蓮 非常爽口。

突然想食日式料理，所以黎到尖沙咀厚福街呢間鉄火堂。 餐廳環境尚可，空間不大，但總算舒適。 見到餐牌有個二人套餐$398，被吸引了，於是就點了呢個套餐。 首先第一道：麵豉湯 （味道不錯，夠熱） 再來第二道： 迷你蟹籽沙律（味道清新，青瓜絲特別幼細，爽脆清甜，好喜歡呢種口感） 第三道：炸物小食拼盤（由於雞翼賣晒，所以改用炸芋丸，芋圓外脆內軟，味道不錯，雞軟骨冇特別，餃子皮有啲過硬同厚 味道一般） 第四道：刺身大丼飯 ，有16款配料，相當豐盛，包括有：珍寶赤蝦、厚切三文魚 、馬刀貝 、厚切油甘魚 、八爪魚片 、厚切劍魚腩 、厚切赤身、烏賊、芝士蛋籽、中華沙律、青瓜絲、碎蔥吞拿魚、帶子、蟹柳、北寄貝、飛魚籽。 （刺身整體味道鮮甜，幾款魚腩都甘香，可惜個飯太差，啲飯唔係鬆散粒狀，係一舊舊，似係冷藏再解凍嘅感覺，食落有啲硬，拉低了整體嘅分數🥲） 最後一道：甜品（雖然甜品size非常迷你，但味道很好，一款類似係冰凍士多啤梨有夾心cream，另一係焦糖布甸） ⭐️除咗啲飯欠佳，其他整體都良好。 員工服務態度不錯，有禮貌，上菜速度快。