有朋友返嚟香港，諗住搵咗間Cafe可以輕鬆傾吓偈食吓嘢。之次已經試過呢間Little Fresh Cafe & Bar，一於再嚟一次，餐廳位於銅鑼灣耀華街3號百樂中心18樓1801室，位置方便，唔算難搵。 可能因為時間尚早，我哋去到嘅時候餐廳仲未有人，餐廳位置不算多，但枱與枱之間都算闊落，坐得舒服。 是日餐湯係洋蔥湯配蒜蓉包，洋蔥湯唔係一般忌廉湯而係清湯，飲落都好味。 Today Special係黑魚子蟹肉忌廉意大利麵，呢個麵煮得好好，麵煮至乾身帶着又香又濃嘅忌廉味，而且蟹肉份量不少，加埋少少魚子好吊味。 另外，嚟到呢間餐廳點可以唔試吓？佢嘅招牌菜，就係4天風乾12小時慢煮法式油封鴨，第一次食，味道都幾特別，肉質嫩嫩的，外層煎得很香。配菜搭配也不錯，有翠玉瓜西蘭花蕃茄仔和薯蓉。 總括嚟講，食物好味坐得舒適，值得一試👍

今日放假，約咗媽咪一齊去尖沙咀行吓街食吓嘢，喺OpenRice 搵到呢間居酒屋好多好評，就膽粗粗入去試吓😊 入到去餐廳分開兩邊，可以坐榻榻米或者枱凳兩種選擇。 ***吉列三文魚定食*** 呢個定食真係超抵，配前菜、味噌湯、溫泉蛋、御飯都係$88。吉列三文魚的吉列炸都好薄脆，而入面嘅三文魚好肥美，配上醬汁好好味，一定要試。而佢嘅溫泉蛋都做得好好，滑滑的好香蛋味。另外，前菜的沙律菜很新鮮，配試醬汁很開胃。 ***五雕刺身盛盒*** 呢個刺身拼盆不得了，佢啲刺身好新鮮好肥美，油甘魚、三文魚同拖羅，入口即溶。另外帶子、同蝦都好好味，份量都唔少。 ***牛油果漬*** 牛油果唔易買，一時太熟一時又太生，呢個就剛剛好，好creamy，而且同醬汁好夾。 ***蒜燒厚切牛舌芯，雞翼*** 牛舌芯燒得好香，一啲都唔韌。雞翼燒到有小燶邊，好香口。 ***冰菠蘿梳打*** 原條冰菠蘿上，有得食又有得飲，打卡一流。

呢排煲緊韓劇，放咗工就好想同同事一齊Hea下，飲杯嘢傾吓偈，於是就去咗呢間Chicken chiko。 入到餐廳唔算多人，坐得都算舒服，有幾耐就發現外賣嘅order好多，一個接一個。 炸雞嘅選擇都唔少，我哋樣樣都想食，就叫咗個四拼炸雞（甜辣味、車打芝士味、蜜糖牛油味和乳酪洋蔥）諗住可以每隻味都試吓，點知佢個份量超多，差啲食唔晒😆佢啲炸雞炸得好香脆，但又唔會好嚡口。最鍾意嘅係甜辣味，酸酸辣辣好開胃。另外，乳酪洋蔥炸雞味道都好特別，可以食炸嘢嘅時候都有一種清新嘅感覺👍 炸醬麵嘅麵質好煙靭，而且特別多醬汁，配料亦好充足，值得一試。 泡菜煎餅十分香口，香脆嘅外皮包着濃濃嘅泡菜，沾上搭配嘅醬汁，非常美味。 飲品方面，我哋揀咗士多啤梨梳打和柑橘汁，士多啤梨梳打除了賣相靚之外，亦很清新，搭配濃烈口味嘅韓式食物，特別解渴。 值得一讚嘅係服務員很細心有禮，所以整個晚餐過程都很滿意。

今日要喺佐敦上堂，所以就提前喺openrice搵咗間餐廳同老公二人世界。Plato Cafe & Bistro 喺九龍公園對面好易搵。 餐廳枱與枱之間有足夠嘅距離，可以輕鬆傾吓偈，坐得舒服😌 我哋點咗個$498嘅二人餐，有餐湯、前菜、兩個主食、飲品同甜品，性價比都高👍 ***椰菜花忌廉湯*** Creamy，仲有淡淡嘅椰菜花甜味，幾特別 ***酸忌廉煙肉薯條*** 薯條熱辣辣，配埋個酸忌廉醬都幾好味👍 ***芒果沙冰*** 呢個芒果沙冰真係不得了，濃濃嘅芒果味，下面仲有芒果肉，又夠大杯👍 ***香蕉朱古力奶昔*** 呢杯奶昔朱古力味不是太重，但好香嘅香蕉味，混合埋忌廉好香滑。 ***龍蝦汁波士頓龍蝦意大利飯*** 龍蝦好多膏，呢個飯份量好多，而且個汁都好濃好好味 ***炭燒澳洲肉眼牛扒*** 牛扒好有水準，我哋選咗五成熟，出嚟個效果真係啱啱好，充滿肉汁，而且塊扒都好大塊，仲有薯仔同沙律菜拌碟，下次一定都會再叫👍 ***日式芝士蛋糕*** 芝士蛋糕香滑濃厚，味道不錯👍 ***Movenpick 朱古力雪糕*** 估唔到是日甜品仲可以揀Movenpick雪糕😂 總括而言，呢間餐廳啲食物份量好多，就算再多個人嚟都食得飽。最推介係佢嘅主食同飲品，值得下次再encore😋

好懷念日本嘅魚生丼，同朋友講開，佢帶咗我去銅鑼灣永光中心嘅究極堂。聽講好似炮台山都有分店呢。 因為我哋預先有book位又約得早，入到去可以隨便揀位坐。呢度坐得都舒服，係同朋友食吓飲吓傾吓偈嘅好地方。 我哋叫咗幾款食物share，樣樣都好好味😋 *** 究極丼*** 朋友果然冇介紹錯，呢個丼飯好足料，有三文魚、油甘魚、三文魚子、海膽、吞拿魚蓉、帶子同埋蝦等。睇佢細細碗咁食落份量都好夠，啲魚生全部厚切，新鮮肥美，啲飯仲可以加隻生蛋黃落去撈，最後食到一粒飯都冇剩。 ***明太子什菌地雞薄餅*** 薄餅係脆卜卜嘅餅底，加上鹹鹹地嘅明太子同雞肉，都幾好味 ***海葡萄海藻青瓜沙律*** 第一次食海葡萄，口感好特別，好似一串串魚子咁脆卜卜，配上醬汁成個沙律味道好新鮮 ***炸芝士條*** 呢個芝士條新鮮出爐熱辣辣，仲可以拉絲，正 ***醬汁日本黑豚豬扒飯*** 豬扒炸到脆卜卜，但啲肉都唔會好乾，加上醬汁，味道不錯 整體而言，食物水準不錯，尤其推薦究極丼，魚生真係好新鮮，下次要再encore😉

疫情時個個都係廚神，有段時間成日會喺屋企整麻辣雞煲，都好耐冇食過喇。突然心思思想食麻辣雞煲，喺OpenRice見到呢間又有得打邊爐又有得食雞煲，就捉住老公一齊試試。 呢間餐廳性價比高，假日嚟都係$238 +1 ，一個價錢包火鍋雞煲任食，仲有任飲汽水和竹蔗茅根👍 一開始就上咗雞煲先，冇得選擇辣度，雞煲調校味道很好，麻麻香香的，而且雞肉很嫩，我哋食完都忍唔住再添咗一鍋。 點了胡椒豬肚湯底，餐廳先送上一碟極品肥牛，肥牛嫩滑重牛味，之後再點了幾次手切肥牛，一樣好好味😋 火鍋配料種類多，我選了三樣值得推介一下： 1，蝦滑，新鮮彈牙，食得出真材實料。 2，生猛海蝦名乎其實地生猛，肉質實而鮮甜。 3，吊筒雖然淥完縮細晒，但沾上辣椒豉油別有一番風味。 最後不得一讚嘅係有自助雪糕機，有朱古力和雲呢拿味，還有monchi、棉花糖、爆珠等自己加。我見隔離枱個小妹妹整得咁開心，我都唔執輸整返杯試吓😆 總括而言，呢個價錢性價比真係高，有雞煲有火鍋又任飲仲有埋雪糕，值👍

難得平日放假，約埋朋友一齊食個午餐鬆一鬆，朋友想試呢間位於太子嘅「賞島咖啡屋」。入到去坐嘅位置舒適。播住輕音樂，可以一邊食一邊傾吓偈，好chill😎 午市套餐共有8款，選擇都算多。套餐包沙律或餐湯，又有一杯嘢飲，呢個價錢都幾抵。 是日餐湯 ***蕃茄湯*** 蕃茄味濃郁，酸酸甜甜好開胃。 *** All Day Breakfast *** 呢個餐超豐富，顏色同擺位都好靚，令人食慾大增，食物有香脆鬆軟牛角包、花形嘅煙三文魚、炒啡菇、豬肉腸、漬車厘茄、溫泉蛋、新鮮嘅牛油果和沙律菜等，沙律菜加上黑醋汁，酸酸地，好開胃。成個餐可以慢慢食好耐，食完都真心飽👍 ***蜜糖芥末炸雞粒*** 加$38有炸雞粒，性價比很高，有新鮮沙律菜伴碟，炸雞新鮮炸起，配上醬汁趁熱食好好味😋 ***生薑燒黑豚豬頸肉和風冷烏冬*** 豬頸肉燒得好出色，有燶邊，食咗啖啖焦香，而且份量不少。冷烏冬又滑又煙韌，配上湯汁，正👍 ***芝士蛋糕*** 甜品芝士味香濃適合嗜甜的朋友，配上士多啤梨醬，味道不錯。 ***Honey Yuzu With Lemon*** 熱柚子蜜用壺上很有誠意，而且飲落有清香的柚子味，不太甜，我很喜歡💕 整體而言，這是一間與朋友相聚輕鬆一下的美味cafe，我下次會再來。

今晚同老公拍拖出去食下嘢，朋友介紹位於觀塘工廠大廈嘅Relish食西餐，因為book咗6:00，時間算早，所以可以任選位置，我哋揀咗靠窗口嘅位置。餐廳放住好chill既輕音樂座位舒適，係拍拖嘅好選擇。 我哋選咗兩個set dinner 落完單就有杯靚靚火龍果梅子梳打，酸甜開胃 前菜： ***原隻煙燻鶴鶉髀伴水果車厘茄田園沙律*** 鵪鶉髀好香煙熏味，鹹鹹地伴着沙律一齊食，非常開胃。 ***蘋果木煙燻帶子、日本枝豆、有機玫瑰菇、紅菜頭蓉*** 帶子煎得好香，配嘅紅菜頭醬汁清新，很配搭👍 ***干邑龍蝦湯*** 起初仲諗緊點解會上咗隻蝦係個碟度，原來即場加湯，龍蝦湯味道香濃，口感不錯 ***杜洛克黑毛豬胺伴焦糖菠蘿，野菌西蘭花苗•鴨油洋蔥烤薯仔*** 我哋按照介紹，選了七成熟，果然非常美味，豬胺保留肉汁，咬落嫩滑，食得出的靚材料👍 ***香烤野生虎蝦 •蟹肉蟹膏意大利飯*** 意大利飯芝士味濃，虎蝦新鮮肉質結實。蟹膏同蝦膏加埋蟹肉令成個飯十分美味😋 甜品： 是日甜品係咖啡蛋卷，我哋加咗每款$38轉另外兩款甜品😆兩款都非常值得試吓 ***焦糖千層酥配馬達加斯加雲呢拿吉士*** 千層酥鬆脆，加埋個香滑嘅吉士醬，真係好好味🥰 ***巴斯克芝士蛋糕配柚子醬*** 如果鍾意食芝士蛋糕嘅朋友一定唔可以錯過呢個巴斯克芝士蛋糕，香濃幼滑嘅芝士，食出滿滿嘅幸福感🥰 總括而言，如果大家想搵間有氣氛又好味嘅西餐廳，Relish絕對值得一試👍

今日係Happy Friday，約咗個朋友一齊去上環無敵家居酒屋放鬆食下嘢吹下水😌 無敵家喺上環地鐵站出行幾步就會見到大大個招牌 餐廳裡面有些日式居酒屋佈置，而且枱與枱之間都有一定距離，坐着傾偈唔會太壓迫，好舒服👍 食物種類都多，我哋叫咗幾樣食物，樣樣都好味，而且係即叫即製，熱辣辣上枱。 ***吉列北海道四元豚扒*** 呢個吉列豚扒真心好食，外脆內嫩，一食就知道喺用靚豚扒炸😋 ***牛油果軟殼蟹沙律*** 原隻軟殼蟹上，一啲都唔吝嗇，而且牛油果質地柔軟，熟嘅程度啱啱好，加上一些新鮮嘅沙律菜同蟹子，正👍 ***燒原隻北海道魷魚*** 燒魷魚十分香口，配上醬汁，非常惹味👍 ***豬軟骨豚骨湯拉麵*** 豬軟骨份量十足，拉麵煙韌，湯底除了有豬骨味，還有淡淡的粟米甜味。 ***燒日本餃子*** 餃子本身很多肉汁，而且師傅把餃子煎得香脆可口，一隻接一隻咁食，忍唔住再叫多碟😆 總括而言，餐廳食物味道不錯，性價比高，值得一試👍

今日一家大細12人一起到ION食自助餐慶祝生日，由6:30食到9:30，食得開心又坐得舒適😊 餐廳有多款熱食、壽司、刺身和甜品，全晚最欣賞係海鮮，有麵包蟹真係超正，蟹膏多又鮮味，而蟹腳也加得很快，但略嫌偏鹹。不過三百幾蚊嘅價錢，絕對係物超所值。 因為有屋企人生日嘅關係，餐廳很有心思地送咗一個朱古力小蛋糕，朱古力味濃濃的，好好味，影相打卡也很棒👍