路過見到外賣有九折 唔想等位，所以試一試 海南雞飯（大） 份量幾足，一個女仔會食唔晒。雞皮太厚，但唔算多肥膏。好多雞啫喱，所以有啲漿口，雞肉好滑，但雞味唔算好濃。整體嚟講係質素唔錯嘅海南雞。 不過油飯令人好失望，香味唔足，而且係爛飯，亦冇好似坊間咁加足乾蔥、乾蒜或豬油渣增加口感。 跟飯有經典三種醬汁，做足本份。隻豉油同平時食開嘅黑豉油唔係好似，質感比較稀。 加$8可以有個湯 本身想叫肉骨茶，但已經賣晒 不過南瓜蘿蔔湯都唔錯，入面有一嚿豬肉，幾舊紅蘿蔔同埋南瓜肉，口感濃厚夠味足料 個油飯實在太扣分，整體嚟講唔算太抵食

趕時間又見其他鋪要等位 所以入去快速食一餐 叫左個一人餐 $88 包一個主食、小食同飲品 豬頸肉一人份量，唔算入味，亦都冇醬料提供，跟住上嘅醃菜味道普通。不過豬頸肉雖然烤過但唔會乾，外皮香脆，加返少少分。但整體嚟講唔太值得試。 生牛肉河粉賣相普通，一團糟。不過落單嗰陣可以揀走蔥、走芽菜、走蒜、甚至走金不換，幾貼心。 青檸同辣椒跟住上，但我個青檸乾到一滴汁都擠唔到出嚟，索性成個檸檬掉落去。湯底普通，牛骨味唔重不過有香料味，我幾鍾意佢有蔥絲同時有埋蔥粒，多啲口感亦都多啲蔥香味。 牛肉算有牛味，大概係凍肉舖$58-78磅嘅質素。 朋友嗰碗生牛肉河賣相好啲，而且啲牛夠生，呢樣好重要。 整體嚟講不過不失，唔會專登去食。

由上水只此一間食到喺旺角鬧市開分店， 咁多年黎食鳳鳴居都冇覺得退步， 只係覺得人越來越多 同行三人都叫咗招牌醉香雞米線， 朋友第一次食，本身對雞米線冇乜特別期望，但最後完全被驚艷到 湯濃、酒香、雞滑，配料紅棗木耳大大嚿唔孤寒。作為忠實fans，基本上覺得係冇缺點，如果硬係要挑剔嘅話就係米線麵質唔算特別好食，不過湯底材料搭救，所以完全唔介意。 辣豉油爽脆鵝腸 我係鵝腸腔，不過呢度小食鵝腸冇乜特別，唔夠油香，只能講係合格，口痕可以食下。 不過食飯時間二人或以上真係等好耐先可以入座，建議早啲嚟、遲啲嚟或者自私嚟

講到快靚正嘅嘢食 餃子一定係其中一樣 趕時間路過見到呢間分店乾淨企理， 即刻衝入去叫兩碗餃子 餃子算大隻，餃子皮唔算太厚，如果可以薄多少少就完美。湯餃子跟咗個狀元九鼎湯，味道唔錯，飲完無口渴。不過餐廳冇提供菜甫，反而提供左其他唔係太夾嘅辣醬，好彩餃子都夠味，唔點醬汁都得 韭菜餃 睇得出韭菜非常新鮮，但就唔算嫩，所以食落稍微有啲多渣，但整體來講韭菜同豬肉味都幾出，值得一試 雲耳椰菜餃 有驚喜，所有配料嘅比例可以話係啱啱好，口感好，椰菜雲耳同豬肉嘅味道都非常出，成件事好平衡。美中不足係有一兩隻餃子入邊有啲筋同肥肉，不過整體都好食 順帶一提 其實入坐嗰陣有見到下午茶，但覺得唔吸引

自從疫情之後， 所有商場同舖頭都收得好早。 秋風起夜晚行過旺角想食啲暖野， 見呢間開得咁夜就試吓。 上菜速度都算快，姐姐服務都ok。 椰子雞湯米線 有椰子味，香味甜味俱備，入口順滑，雞嘅膠質有煲出嚟，唔會好稀，亦都唔會太稠太漿口搞到嘴唇痴立立，我認為濃稠度啱啱好。除咗雞之外有基本配料，唔會咁悶。唯一美中不足係落咗椰絲，我唔係咁鍾意飲湯時食到。不過飲晒成碗湯都無口渴，值得一讚。 黑蒜雞湯米線 黑蒜係養生之選，朋友初起感冒決定當佢食療。蒜味唔算好濃，食完都冇話特別口臭，容易入口，但略嫌個湯鹹咗少少，所以朋友都冇飲晒。

首先隻雞係霉既，雞皮完全無彈性，而且份量唔多，呢個價位出返去買海南雞大把質素好過佢。其次個雞飯係爛既，糊到不得了，好似小朋友粥仔咁，食泥咁既感覺，而且最重要既雞油香味同其他調味係欠奉，配搭既醬汁同醃菜只能講不過不失。 椰子雞湯反而合格，但要加錢，細細碗但入邊都算足料，有兩舊雞髀肉同大量椰子片。入口偏鹹少少但湯底算係濃厚，少少稠（杰） 總之總括而言，個飯$49完全唔值，個湯又要另外加錢，其實去好幾間出名嘅海南雞店，差唔多嘅價錢都已經包埋碗湯。

每次經過都必定見到排長龍， 不過去貨速度快，所以每一次都忍唔住排 缽仔糕：正正常常，無乜特別 芝麻糕：太硬，膠質太重，有芝麻味，但都係芝麻卷好食啲 紅棗糕：略嫌紅棗味唔夠出，比較彈牙，但我個人就比較鍾意煙靭啲嘅口感 抹茶糕：有驚喜，抹茶味比我想像中濃，而且夠煙韌，可以一試 椰汁紅豆糕：最出色，香甜煙靭，椰汁味同紅豆味都幾出，紅豆泥好幼滑 椰汁馬豆糕：有大大粒豆增加口感，椰汁味都好出，但比較起上黎椰汁紅豆糕好食啲 買太多，最後擺咗喺雪櫃兩日都keep到個口感

中伏！ 行過本身想試同Godiva合作嘅新蛋糕， 不過見到呢個脆脆朱古力批特價， 個樣又靚靚仔仔，成個面鋪滿朱古力粉， 所以忍唔住試下，點知有伏 講真，五十幾蚊個批，唔應該期待啲乜野。 但成件事真係超！級！唔！夾！ 個蛋糕一打開個陣好香朱古力味， 但一切開見到舊麻糬已經覺得伏伏地 舊麻糬係帶少少黃色，好強彈性， 無個種軟糯煙韌既口感， 唔知係咪因為木薯粉落得太多。 而且唔似係坊間落牛奶既配方， 可能只係木薯粉加水，所以勁重粉味。 好似擺左冰皮月餅塊皮入去個餡度當麻糬咁。 提早體驗中秋月餅輪迴 出事嘅唔止舊麻糬，仲有個餅底， 話明係批，我本來期待可能係曲奇底或者脆餅底， 點知係酥皮底 酥皮底其實冇問題，酥皮底都可以好食㗎嘛！ 但佢絕對唔係好食嘅酥皮底 好似幾塊濕咗益左既酥皮疊埋， 食落去好似濕紙巾咁， 我一開始以為自己食錯左包住蛋糕個塊紙 總括而言，朱古力味係夠，蛋糕亦算濕潤，係合格嘅brownies蛋糕體，但其他配搭出晒事。 好地地整返個簡單布朗尼蛋糕其實就合格。

好想食漢堡 但葵芳無乜選擇 唯有試下shake shack 結果令人超失望 叫左兩個ShackBurger 兩個都濕漉漉，個包無烘好超級冧， 又無搽牛油隔住內餡既汁， 好似食係水度撈出黎既餵魚麵包咁， 個漢堡包一上碟已經係散既， 食到勁輪盡 同cookie dpt 合作既朱古力雪糕 得個甜字、好漏，朱古力味唔夠 留返啲錢直接買曲奇好過 薯條一般般 芝士醬唔夠香，又太濃稠，薯條插落去好易斷 而且掛唔到個醬 開心果奶昔 味道的確好香，好重開心果味 唔會好甜但有少少膩 一個人飲會好漏

嚟到一日三餐 悅和豉油雞一定係必點既 豉油雞飯（$69） 睇餐牌價錢偏貴少少，不過實物份量好足，都ok。係鹹味比甜味重既豉油雞，豉油味好香，比左雞脾位，雞肉好滑，雞皮唔會太冧，依然彈牙。唔會話好食到空前絕後，但值得一試。 乾炒牛河（$66） 味道普通，油份多，入口油味比香味重，無乜豉油味，牛肉亦都比較韌。見到有人推介乾炒牛河，但只係普通貨色，呢個質素黎講好貴。 賞花杏仁露（跟餐$6） 嚟得一定要叫嚟打卡，不過我呢杯花瓣唔夠多，而且開得比較稀，但味道係合格既，可以試下。