去台灣旅行其中一樣一定要食既一定係車輪餅，因為佢地既車輪餅好多口味之餘仲要好足料，超抵食！可惜唔知點解香港真係好少車輪餅賣，就算有都係d好普通既味⋯⋯咁啱今日去開誠品，見到有車輪餅賣，仲要有鹹味既車輪餅，一定要試下！佢哋口味唔算多，不過鹹味都有三款！今次就揀咗鹹牛肉蛋同芝士薯仔試下。可能因為今日係平日，所以車輪餅係整定，呢個有少少失望，不過拎上手仲好熱就算啦~車輪餅都幾大件，摵開中間都算多料！車輪餅皮帶少少脆，鹹牛肉蛋味唔會好鹹，加埋蛋就啱啱好，不過蛋如果可以滑d會更加好食！至於薯仔芝士，薯仔就好足料，反而芝士分量可以再多d,同埋佢地既車輪餅係比較淡味，咁啱我係買俾小朋友食，所以覺得ok，不過鍾意重口味既可能一般般啦～總括嚟講佢地既車輪餅都唔錯，價錢尚算ok,不過記憶點唔夠，唔會令到人覺得好驚艶～

香港有一間拉麵係專同卡通人物做crossover，唔知係咪因為見到多人排隊，所以呢間拉麵最近都開始crossover 卡通人物，今次係最近人氣急升嘅水怪！見到有幾多多人去就跟住去試啦～ 為咗避免人潮，選擇咗平日三點去，人少啲唔使等位。佢哋本身嘅裝修都好日式居酒屋感覺，而家加咗好多水怪嘅裝飾，真係好適合打卡🩷 一場嚟到，當然要試吓佢哋嘅Crossover Menu，可惜最想試嘅章魚燒同埋辛辣中華冷麵都冇🥹只可以試其他嘢 黑松露雞白湯拉麵 湯底幾香，隱約都食到黑松露味但唔算濃，不過個湯幾濃雞味，都幾好味嘅。 日式慢煮西班牙黑豚肉包 為咗可以俾小朋友食，所以就走咗芥末醬，個包份量有啲細，不過豚肉味道都幾OK，食落去肥而不膩，調味剛剛好，如果有埋芥末醬應該都幾惹味 紅豆餅配白桃烏龍茶 本身係衝着顏值而叫嘅，點知比我想像中好食。個餅食落都幾香，平時嘅紅豆餡都比較甜，但係呢度嘅甜度拿捏得啱啱好，加上白桃烏龍茶中和，成件事好夾 雞蛋布甸 佢係嗰種好厚實嘅雞蛋布甸，食落去每一啖都好濃雞蛋味，同平時食到嘅布甸唔同，感覺都幾真材實料，其他生果都好甜，小朋友食得好開心 除咗限定Menu之外，我哋仲嗌多咗個拉麵 呢個牛骨湯拉麵真係幾濃牛味，牛肉都幾嫩滑，質素都唔錯。店員標榜佢哋嘅湯底係冇落味精，就算食完成餐飯都冇好頸渴，相信佢哋響湯底都用咗幾多心機，值得一讚 總括嚟講呢間拉麵嘅食物質素幾好，如果係希望靠Crossover增加人流其實又唔需要，反而價錢平啲都做到相同嘅效果因為我地咁樣都四百幾蚊，就算好食都未必會成日想嚟食 而家個感覺有啲兩頭唔到岸，因為除咗甜品造型特別之外，其他食物真係比較少造型，如果fans為咗打卡而去，可能會有少少失望。建議下次真係再做Crossover嘅話，可以考慮響食物造型上面再加啲心思，咁樣應該會有更加多noise，吸引更加多人注意呢間餐廳

講起黃豆製品你會諗起咩？豆漿？豆腐花？豆乳狂人話你知，原來黃豆可以千變萬化，整到好香濃既豆乳！ 兩年前豆乳狂人荃灣店開果陣，已經試過佢地既豆乳，自此就會間唔中過黎買黎飲，因為真係好香濃！今日帶小朋友經過，不如就買多幾樣野食試下，睇下其他野係咪都ok先！ 一去到就已經排長龍真係好誇張呀！估唔到佢地生意真係好唔錯👍🏼佢哋有個大玻璃窗，可以睇到生產豆乳嘅過程，感覺佢哋對自己嘅豆乳都好有信心。 佢哋個Menu好多選擇，今次我哋買咗五樣嘢返屋企食： 黑芝麻奶蓋 個樽外型好特別！面頭係黑芝麻奶蓋，鹹鹹甜甜咁，奶蓋下面係豆乳同埋黑糖珍珠，平時一般手搖飲品店用牛乳做底，估唔到而家用豆乳都夾！黑糖珍珠都幾煙靭，第二日先飲都冇問題 牛油果吉列蝦青瓜絲粢飯 呢個粢飯真係好多料！糯米包住牛油果、吉列蝦、青瓜絲、肉鬆同埋油炸鬼，加埋沙律醬估唔到又幾夾，不過食落有啲漏，兩個人食就啱啱好 滋潤之選 一碗有齊芋泥、芋圓、西米、桃膠！芋圓幾有咬口，食落都幾飽肚！佢地d桃膠都幾大粒， 加埋椰奶同黑糖一齊食真係可以當一餐！ 8.6特濃豆乳（凍） 呢個係買俾小朋友飲既！佢有得選擇有糖同無糖，好細心🩷不過就算有糖都唔會好甜，所以就揀咗有糖。佢哋嘅豆乳真係好濃郁，同出邊嘅豆漿比杰d，聞落去都有好香嘅黃豆味。 多芒楊枝甘露 呢碗楊枝甘露真係好多芒果🥭！而且芒果超甜，小朋友係咁追住食！楊枝甘露甜味啱啱好，啲料都好足，絕對值呢個價錢。 有咁多人排隊都有佢嘅道理，因為佢哋啲嘢食全部都好足料，加上座位都幾多，而且裝修都幾靚，幾啱年青人響度打卡食糖水。

K11 art mall 地庫有好多小店pop-up，所以有時間都會去望下，睇下有無特別野~今次一去就俾一堆「精靈球」吸引住，講緊既係呢間店首創既可頌球，佢地真係同精靈球一樣咁大嫁! 當日一共有五款口味，一堆堆咁排响櫥窗度，感覺好可愛! 忍唔住買咗個番屋企試，另外見到焦糖蘋果個樣好靚仔，一於就帶晒佢地番屋企試下啦~ 個可頌球拎上手好重手，感覺好足料，原來佢係用牛角包包住蛋糕，聽落好似好難想像，咁食落到底係點呢?
牛角包皮幾鬆脆，因為唔係即食，所以將佢放落煎pan輕輕烘過，即刻香味出咗黎!本來驚入面蛋糕體會比較乾身，不過又ok wor~朱古力蛋糕幾濕潤，而且加埋朱古力榛子醬好正，同牛角包皮都幾夾，不過都幾飽肚，兩個人share一個啱啱好之後就係焦糖蘋果tart啦。本身對佢唔係好大期望，但反而食落幾出色! 焦糖香味好足，而且甜度剛剛好，而蘋果仲保留住少少脆度，食落好fresh，一d都唔漏~不過個tart真係有d貴，如果佢平d我應該會encore多幾次

除咗可頌球同撻，佢哋啲蛋糕望落去都幾吸引。不過如果d撻既價錢回落少少應該會更多人幫襯~希望店家會考慮下

最近呢間麵包店都幾紅，唔止响唔同既網上平台見到佢身影，而且仲短期內開咗好幾間分店，真係來勢洶洶! 可以响呢個時勢擴張咁勁，真係要試一試佢! 今次去咗近鵝頸橋分店，去到見到短短一條街已經有三間麵包鋪，真係好誇張。今次黎到主攻開心果味既食物，因為之前已然打聽過呢度有好多唔同開心果產品，而且價錢唔貴，當然要試下啦!今次買咗三款產品，分別係開心果巴斯克蛋糕、麻糬開心果布甸同開心果法式泡芙首先係開心果巴斯克蛋糕，佢好香芝士味，同開心果好夾，唔會五相搶走對心既味道，而且中間仲係好soft既質感，呢個價錢真係好抵食!

諗住蛋糕好食，其他野唔會差得去邊，點知我錯啦……麻糬開心果布甸係我食過最難食既開心果product! 已經唔係講緊有無開心果味，而係味道真係好難食! 本身個包凍食個texture得個淋字，最大鑊係充斥成個布甸包住杏仁粉既味道，個味完全搶過晒其他味! 又話有濃濃開心果味既? 係咪個師傅落錯料?我地成家人夾硬食咗一個，頂唔順要掉咗另一個…… 最後係開心果法式泡芙，本身對佢無咩期望，果然不出所料，個cream得色素，完全無開心果味可言，cream亦都唔係特別滑，泡芙係淋既，真係唔好浪費quota了。
三樣產品有兩樣都唔掂，只可以講呢間麵包鋪真係水準好唔穩定，就算比其他新式麵包店平都唔會列入考慮之列啦

突然好想食過韓燒，經過旺角創興廣場見到有$168韓式燒肉放題，咁抵當然要去試吓啦！ 呢個價錢其實同以前嘅漢陽苑差唔多，不過佢哋嘅質素比起漢陽苑高啲🥰一坐低店員就放低咗九宮格俾我哋，九宮格包含咗牛豬雞等嘅肉，啱晒打卡🩷 佢哋係用QR code落單，一收到order就會即刻拎出嚟，完全無拖單嘅情況 而佢哋嘅食物選擇有四五十款，以依個價位嚟講算係選擇多，當中比較推薦雞同埋牛舌，我哋都不停encore～ 除咗燒肉之外，佢哋都有唔同嘅韓式泡菜同熱盤選擇，食肉食到厭可以去拎下菜食，幫助消化之餘又唔會咁漏。 最正嘅係佢哋嘢飲有足足三個櫃，好多選擇，食完正餐都唔夠喉，仲可以任拎雪糕杯添！ 雖然肉質唔係最上盛，但係以呢個價錢嚟講算係冇投訴，想平平哋過吓口人食韓燒都係一個好選擇。 服務方面店員好醒目，見到個燒烤盤開始燒燶就會主動過嚟換過個新，完全唔使我哋叫，值得一讚👍🏼 最後埋單每人$168加一，食到好飽

呢間麵包店間唔中都有人介紹，不過好少機會試，咁啱今日有時間，就過去睇下啦！ 可能因為已經七點幾，所以去到有好多款包都賣晒，咁就選擇兩款先啦。 開心果瑪德蓮 細細一個賣$26，價錢黎講真係有d貴，不過佢貴得黎唔係好香開心果味，開心果碎係淋既，入面既開心果內餡係甜得黎唔濃味，如果鍾意開心果嘅就唔使嘥錢買啦。 美式皇家伯爵鬆餅 相比起開心果瑪德蓮，呢個鬆餅感覺好好多，食落去都有伯爵茶嘅味道，不過牛油味就欠奉啦，好普通嘅一個鬆餅

做完嘢去食晏，咁啱經過K11呢間台灣菜好吸引，咁啱佢另外賣有八五折優惠，諗住買個外賣返公司食。 本身諗住嗌set lunch食，不過見到佢哋有新款，係開心果Menu ！於是就叫咗個包同埋杯嘢飲 特製墨汁鹽酥雞刈包 佢係即叫即整嘅，大約等咗10分鐘到，一打開望落去有少少失望，因為比較細，不過味道幾OK ！佢個醬係好惹味嘅辣汁，雖然令到返公司有一段時間，但係都仲保持到鹽酥雞個脆度，值得一讚！ 開心果鮮奶加奶蓋 我真係好鍾意開心果，所以一見到就即刻想嗌！以餐廳嚟講呢杯嘢飲唔算貴，而且都算幾濃開心果味，而且奶蓋都算濃郁，不過個開心果糖漿有少少甜，略為減咗少少分。 價錢嚟講係有啲偏貴，不過而家咁貴租都預咗，雖然佢啲嘢食幾啱我心水，但係如果冇外賣八五折可能唔會優先考慮呢間。不過值得一讚嘅係店員知道我響度等我刈包，會先俾咗杯嘢飲俾我慢慢飲住等，算係幾細心。

有留意開開心果關注組，知道旺角有一間茶飲賣開心果嘢飲，咁啱經過旺角就過嚟試吓啦。 一睇Menu有啲嚇親，因為杯開心果厚椰奶都真係有啲貴，不過實在太鍾意開心果啦，都要試吓 等咗大約5分鐘到就有啦，個杯新設計都幾靚，好有日本漫畫feel，不過味道就好普通啦，開心果味唔出，咁覺唔夠濃郁，無論係開心果同埋夜奶味都係，以呢個價錢嚟講就真係唔係好抵啦，市面上有更加好嘅選擇。 最後想提嘅係個店員好奇怪，明明整好咗都唔會叫你，要自己望住杯嘢飲整好未

響日本返嚟，仲係好掛住日本啲嘢食，於是就想帶埋小朋友一齊去食日本嘢啦！咁啱見到呢一間餐廳啲裝修好靚，於是就揀咗佢哋~我哋揀咗櫻花樹旁邊嘅榻榻米，因為有小朋友，坐榻榻米就唔驚佢哋會跌親；另一方面係可以坐響櫻花樹旁邊食嘢真係一秒去到日本呀！佢哋嘅選擇都有好多，今次就叫咗鴨仔茶漬飯、鯖之味噌煮、北海道3.6牛乳鍋、番薯條、蕎麥麵同嘢飲，職員好醒目，見到我哋帶住小朋友，主動同我哋講食物減鹽，真係好貼心~

好快就上菜啦！最先上菜嘅係番薯條，炸出嚟一啲都唔漏，而且少鹽啱晒小朋友食😍跟住就係茶漬飯啦！就咁望落去會覺得茶漬飯好普通，但係佢個飯係鴨仔造型，淨係買相已經一百分，食落先發現佢嘅味好香，清清地，但係又唔會好淡味，加埋唔同嘅醃菜好好味呀！跟住就係鯖之味噌煮啦。鯖魚味道比較濃，不過配襯埋茶漬飯就好夾啦，而且份量都唔少，唔錯北海道3.6牛乳鍋好香牛乳味，濃得黎唔鹹，所以我地都飲咗幾啖湯佢地D豬肉都算多份量，三個人食都夠分。 蕎麥麵係專登叫俾小朋友食既，食落其實無咩特別，不過勝在價錢平份量足，四十幾蚊一大碗，晚市黎講好抵食!鹹度對小朋友黎講啱啱好，小朋友都好鍾意，一轉眼就食晒成碗!最後埋單400幾500蚊蚊落袋，講真以呢個環境黎講算係唔錯，而且無限時又夠人性化，所以都推薦有小朋友既家庭過黎呢度食野呀~