朋友喺屯門返工，話喺青龍頭豪景花園入面有間街坊酒樓，有泊車優惠，所以黃昏沿住青山公路吹下海風跟手喺大八方食埋飯，坐窗口卡位望住青馬橋，咁chill好過北上😝 海派蒜泥白肉 - 白肉肥瘦相間，好有心機咁一片一卷，最特別係中間有個蒜泥沙律醬，呢個真係未試過 京汁前蹄 - 唔好以為細細粒冇乜肉食，點知原來係骨細，啖啖爽口彈牙，再加上個京汁醋香帶辣，真係一道稱職嘅開胃前菜 古法羊腩煲 - 用黑草羊切件，唔係平時一舊舊咁，本來諗住咁大件會好膩，但係可能醬汁唔係好濃杰嗰種，唔止唔咸仲帶有藥材嘅香甜，加上羊腩皮彈膏爽肉軟淋，好容易就食咗一件，非常滿足😌配角冬菇、冬筍、馬蹄同枝竹恰如其分地飾演出色嘅綠葉，$388一煲仲要跟一碟碧綠唐生菜烚下烚下，性價比非常高👍 椒鹽白飯魚 - 經理介紹啲白飯魚好大條，不妨試試，又真係估唔到咁大條，係食到有肉😂😂，加上用椒鹽，堅香口 浦東鴛鴦蝦球 - 浦東係名，同煮法冇乜關係😅 蝦球一半用沙律芥末醬，一半係咸蛋黃，好食但未到驚喜 麻辣風味雞 - 辣到唔係好食到，所以未能評價 一行四人，叫過龍食唔晒要攞走，羊腩煲d配角同汁第二日撈麵，回味無窮😆 埋單先醒起因為掙扎叫鷓鴣天麻湯定杏汁豬肺湯，點止直頭唔記得咗叫，下次一定要補返，仲要試埋片皮鴨同燒風鱔😋😋

呢輪成日嚟D2睇戲，上星期行過見到大叔拉麵排晒長龍，大叔個樣又得意，心入面已經bookmark咗，今日睇完戲未夠5點，一於一償心願衝去搵大叔。 餐牌好簡單，幾款拉麵、小食同飲品，但係都有選擇困難症，樣樣都想試吓，可能因為環境好有日本拉麵屋嘅氣氛，當自己去緊旅行😂 慢煮雞肉濃白湯拉麵，雞肉經慢煮，軟滑有肉汁，可惜只得三片唔夠喉，白湯即係濃雞湯，湯甜唔膩，飲完一啖又一啖 鹽燒鯖魚，乾咗少少 炸廣島蠔，一客有4隻，唔細隻，熱到爆但仲好juicy，炸得啱啱好👍 櫻花蝦炸豆腐，又係炸得啱啱好，豆腐外脆內滑，加埋出面包住咸香櫻花蝦同紫菜醬汁，明明好熱都好心急係咁食😂

環境chill chill 地嘅泰國餐廳，食物fusion得嚟味道又正宗，就算疫情前嚟旺場到要限時同埋枱又細，為咗同朋友chill下都又諗起Moroko。 平日7點到，一坐低提示用餐時間90分鐘，又係要坐二人細枱，心諗又咁爆？最後食到last order 全場只坐咗一半，雖然冇催我哋交枱，但係因為枱細，每上一道菜都會拿拿臨清咗佢，食得有啲急，其實係咪可以安排坐四人枱濶落d呢😓 柚子大蝦沙律，叫咗少辣，酸酸辣辣清新開胃，不過蝦就冇味 帶子蟹肉酥盒，逢親見到餐牌有蟹肉必定兩眼發光，帶子下面塞滿蟹肉，口感豐富有鮮味，大滿足！ 泰式拼盤，有蝦餅、雞翼、豬頸肉⋯⋯樣樣 都又凍又亁，十級後悔因為懶而叫佢😓 雙色芒果糯米飯，芒果唔酸唔甜唔香，又唔算多汁，可能唔當造？好彩唔酸，所以係食到嘅。糯米飯軟糯，椰汁香甜，藍色嘅係蝶豆花，總算為芒果彌補返d分。

Bookmark咗木玥巷好耐，今日終於有機會試啦，星期日兩點幾都仲要等位，好彩等咗10分鐘左右就有位啦。 QR code落單，menu唔多選擇，好容易就睇齊有咩食，又有相片參考，好快決定到食咩啦。 鹽酥雞安格斯魯肉飯：見到幾乎枱枱都叫鹽酥雞，一於跟風，白飯可以加$10轉安格斯魯肉飯，本來覺得濃味嘅魯肉汁會蓋過安格斯嘅肉味，安唔安格斯都只係綽頭啫，點知一啖之後不得了！秒間愛上😍，安格斯嘅牛肉味依然濃郁，配上濃味魯肉煮法，居然能互相扶持相親相愛！相反，見到鹽酥雞比較大粒，期待外表crispy內裡juicy, 可惜第一啖已經拉出一絲絲柴咗嘅雞肉，確係有啲失望，但係之後又有幾件雖然做唔到爆汁效果，但就冇再亁爭爭，呢方面有啲出品唔穩定咁。 蜂蜜冰地瓜：只係凍嘅地瓜切片淋上蜂蜜，係我諗多咗所以期望高咗少少🫣 招牌水果茶（西柚）：超大杯！酸酸甜甜又少少澀，有解渴解膩嘅功效👍 下次一定要試吓紅燒牛肉麵😋

三年冇得出去食飯，終於今年公司團年飯可以拉大隊去鯉魚門食海鮮🦞老細book咗龍騰，係一間比較舊式嘅海鮮酒家，室內環境撲實不華，第一印象已經覺得老實唔劏客。 墨魚刺身，生鮮爽口，墨魚鬚比較硬所以再加工椒鹽炒，炒過即刻變得爽口（唔記得映相）。 牛油蒜蓉焗蝦，極度香口但又唔覺熱氣，連蝦殼蝦頭都食埋。 上湯焗龍蝦煎米粉底，每人半隻龍蝦用刀叉食好爽，但估唔到主角係煎米粉，大家爭住encore。 一魚兩味：炒球和炆頭腩，炒球食到塊魚皮啖啖骨膠原，個炆頭腩同平時出邊酒樓唔同，炸過再炆，所以有外脆內軟嘅效果，讚👍 酥炸生蠔，同事點名要食，炸漿薄身，蠔有蠔味，可以連食3隻都唔覺漏。 薑蔥鮑魚煲，一開蓋香噴噴，不過食落味道冇想像中入味，又或者已經食到好飽食慾開始下降。 另外叫咗上湯浸菜心和招牌生炒骨，唔記得映相。 甜品有脆麻花同木瓜，人均大約$600連海鮮，大滿足🥰

一直想試蘇山雞飯但長沙灣店有d吊腳，好彩喺太子開咗分店，終於可以試吓啦😋 唔係海南雞飯專家，見到獅城芽菜走地雞飯用肥嘟嘟芽菜，唔使再睇其他就呢個！肥嘟嘟芽菜爽口冇腥味，秒殺！雞用走地雞，所以運動多muscle就結實啦，但就嚡口唔夠滑，雞味都冇乜😪。但係碗雞雜冬瓜湯又加返分喎，清甜冇味精，大大碗都一秒KO. 原來雞只係配角😆 忍唔住加多份咖央鮮牛油多士，咖央唔夠香，但多士烘得夠鬆脆。 餐廳闊落舒適，手機落單，出餐流暢，可以再嚟試吓個招牌海南雞。

無論內內外外都勁有日本居酒屋嘅氛圍，連員工嘅親切友善嘅態度都令客人食得好開心，真係好似去旅行咁唔使諗咁多一於食食食，所以一間餐廳嘅成敗在需要台前幕後一齊經營嘅。 少少不便嘅係用QRcode落單，因為食物唔係普通大路名稱，睇大餐牌圖文並茂之餘要喺手機搵返喺邊度，呢part用咗唔少時間，好彩店員都好幫手，後來指住大餐牌問返點落，算慳返啲時間😝 必食人氣No 1 甲羅燒，3個人叫咗一個赤鬼，一個原味，店員先上一份燒之前俾大家映相，再攞去燒，估唔到燒之後份量都幾多，我哋加添多幾次梳打餅先可以ko晒啲蟹羔。蟹羔濃郁香口，如果食得辣（其實唔算辣），赤鬼少少辣可以中和蟹羔嘅膩，絕配👍 明太子雞翼：好味但唔算特別 鰻魚玉子燒：都係好味嘅，不過我鍾意中間少少moisture 感 極上壽司盛盒：件件魚生都鮮甜，當然唔會有驚為天人感 唐揚炸八爪魚：外表平平無奇，入口就知係好嘢，八爪魚爽口彈牙，用唐揚炸好夾 海老天反卷：海老鮮甜，反卷唔實但唔散，兩者口感好夾 三文魚腩壽司：新鮮但冇特別 磯燒岩手蠔：好大隻好肥美，好想問可唔可以生食唔燒得唔得 食物、環境、服務真係做到賓至如歸，希望黑門水產可以保持落去，咁我哋可以耐唔耐止下日本癮☺️

母親大人食素又想打邊爐，我想食肉又想打邊爐，上網搵到美滋鍋有素湯底，因為係逐碟計唔係放題，所以想食咩可以各自叫👍👍 鴛鴦鍋：長生松茸野菌湯 + 維他命C蕃茄粟米湯，松茸野菌湯勁有菇菌味，唔係－陣up味嗰隻，真係煲出野菌香，讚👍。蕃茄湯係蕃茄濃湯，如果食蔬菜類比較啱，食肉嫌有啲蓋過肉味。 另外上壼素湯自行加湯，呢個位都非細心方便素食者。 呢度環境舒適衞生，全店粉紅色系，啱晒同女仔嚟慢慢傾慢慢食，下次一於試椰子雞湯😋

路過見到個餐牌幾豐富，尤其係配上新鮮水果幾令人眼前一亮，可以減輕食港式大早餐嘅罪惡感😂 榨菜肉碎通心粉：食通心粉要撒大量胡椒粉，可惜佢哋隻胡椒粉唔夠香辣，如果可以加幾滴麻油就very good 啦。通心粉唔係坑紋嗰隻，有少少厚但都爽口彈牙，榨菜肉碎冇乜特別。 太陽蛋餐肉拼多士：多士脆口夠牛油，太陽蛋係燶邊，讚👍 埋單$35，抵食過大x樂

8點先收工，忽然好想食點心，諗起屋企附近有間豪隍深受街坊支持，一於一支箭飛去食。去到門口哥哥仔提示仲有5分鐘last order，9點要離座，驚我叫唔切食唔切，放心，我好肚餓，一定趕到😂 叉燒腸粉：唔差又唔會嘩一聲嗰隻，我鍾意嘅腸粉要薄、滑同有靭度，呢度算薄、普通滑、冇靭性，已經預切好，趁熱一啖一件感覺到誠意。 點心拼盤：兩粒蝦餃，2粒粉果，1個叉燒包、一個流沙包。蝦餃好大隻，不過蝦唔爽口，反而粉果唔錯。另外叉燒飽同流沙飽啱啱蒸好又細隻，所以好軟熟，包同餡比例啱啱好，好滿足。 9點前飲多幾杯鐵觀音就走啦，唔好阻住職員收工呀嘛。