成日聽到好多人話佢豆乳好正 但地點上唔係我成日會去嘅地方🫢 所以一直bookmark都未試 今次終於經過樂富廣場有得食啦🤩

🍧 鮮芋泥豆花 $32
 6”輕豆乳（無糖） $22 簡單嚟講 如果你鍾意豆乳 你就一定要試☺️
建議唔好食正餐 食左呢個甜品先😏
因為佢嘅芋泥豆花 係！超！足！料！🤩 本身豆腐花已經勁濃又滑 芋泥又係勁濃 食完飽到上心口🤣 成個甜品都唔會好甜 啱晒我😆
另外豆乳都係好濃 好重豆味 少少似日本豆乳個種👍

豆乳狂人 果然真係好狂🤭

🖐️🖐️超大力推介

阿華田BOBO $38
一杯有齊👉 麻糬、白珍珠、原味寒天
仲要用阿華田脆脆醬😧 成杯野就係又多料又濃華田味
個人認為唔算好甜 比想像中好
飲落有少少脆脆咬 白珍珠好煙韌 寒天口感爽爽地 似蒟蒻多啲 麻糬相對比較失色 口感唔算好突出🙈 但其他料搭救哂😆

呢個價錢份量 抵🤓

🖐️大力推介

🍗 究極邪惡鹹蛋黃 $50 一食落口就即刻愛上🤤 鹹蛋黃唔會好咸 好怕鹹蛋黃製品 食左2啖已經咸到唔想食😅 呢個完全唔會❗️ 老細話加左少少糖 中和返咸味 食落唔會咁辛苦 仲有面頭嘅指天椒粉🥹 少少咸帶點辣 完全係perfect match😆 食左幾舊都唔會有種咸到想飲水嘅感覺 又唔會覺得溜口 加上本身炸雞粉薄juicy 鹹蛋黃醬多 諗唔到唔食嘅理由😎 🍗 酸忌廉洋蔥味 拼左一粒蜂蜜脆脆味 $48 酸忌廉洋蔥又係必食❗️ 之前我都有個post超級推介過😍 呢個味真係好特別 而且好足料 醬入面好多洋蔥 幼蔥新鮮切起 一拎上手已經充滿蔥味😆 今次老細叫我試下蜂蜜脆脆味 有少少改良 更好食 所以就拼左一粒俾我試下🤭 雖然係蜂蜜 但食落唔會好甜（因為我好怕好甜食物🙈）亦唔係一pat蜜糖 蜂蜜醬調得好好 同炸雞好夾😍

東京淺草大熱嘅蒙布朗 希慎都有得食啦😆
睇住啲抹茶栗子蓉吱落雪糕筒好治癒😍

🍦生榨和栗抹茶蒙布朗 $78
食落其實有啲失望🙈
雖然抹茶蓉味道好濃 但食唔出栗子味 同埋食食下 覺得抹茶濃到唔係甘 係苦澀😖 不過啲抹茶栗子蓉好多 幾足料 食落都幾溜 建議2人分享～
下層有雪糕 cream 蛋糕 紅豆蓉
雪糕食落味淡 冇咩特別😕 如果雪糕大少少就好🤣
其他配料都係不過不失

總之食落冇想像中咁正 試一次就算了😐

食完一次之後 呢間任食手切牛肉餐廳 絕對係必食火鍋之一🤩🤩
餐廳裝修好有舊式風味 好似去左8,90年代咁😆 店員態度都好有禮貌👍

🍲 CEO套餐 $398
有齊哂👇👇
手切穀飼牛板腱
手切極品封門柳
手切安格斯三角肩肉
手切極上牛小排

一坐低就俾左前菜：炸午餐肉 燒賣 雞粒 全部都係新鮮炸起 熱辣辣 雖然好食 但建議留肚食牛肉🤣

然後就上招牌麻辣雞煲
幾足料 仲有埋豬皮 豬大腸 豬肚 味道唔錯👍 當然我都係冇食哂啲豬皮豬大腸🤣 都係留肚

到重點邊爐🤩 叫咗沙嗲湯底 好足料 好重花生醬同沙嗲味 同牛肉好夾 建議試呢個湯底👍

牛肉方面 我都唔記得叫左幾多碟🤣 總之就係不停叫不停車不停淥不停食
個人最鍾意封門柳 因為油脂相對少 但食落唔會好嚡 重牛味😆
牛肩肉同牛小排食落油脂平均 入口滑啲 自己都叫左好多嚟食🤤
牛板腱會普通啲～

除左牛肉 佢都有其他配菜 例如振興牛丸 手包雲吞韭菜餃 鵝腸 菜類菇類 絕對係好多嘢食揀🤓

飲品除左一般茶類汽水 仲有特飲巨峰梳打 蜜桃梳打 呢啲飲品出面叫都唔平 淨係叫呢2杯飲都夠哂🙈

最後仲有個芋圓糖水送🤩 有芋圓 涼粉 紅豆 晶球 用料唔馬虎 味道亦絕對唔俾出面差🫣

呢個價錢有咁高質嘅手切牛肉食 仲要高質火鍋配料 飲品 真係好抵食😋

🖐️🖐️超大力推介

再一次到訪平價西餐廳🤩 上次食午餐 真係非常抵食🙈
今次食晚餐 有12款set dinner揀（最後有餐牌）都係抵又好食🤭

🍝 黑松露雜菌意大利飯 set dinner 配湯/熱飲 $112
呢個上次午餐都食過 啲黑松露醬超級多 今次都係🤣
食到最底完全唔會乾爭爭 黑松露味濃👍
啲蘑菇炒得好香 雖然係簡單嘅配搭 但已經好好味🤤

🥩 美國安格斯肉眼牛扒薯菜 $238
叫左7成熟 雖然上到枱唔算好7成🙈 少少過熟
塊扒比想像中好食😍
食落冇渣 咬落好香牛味 油脂分佈平均 食落唔會柴 真係估唔到又幾高質🤭
黑椒汁冇乜特別 我拎咗嚟點薯條食🙈

🍟 炸薯條配芝士肉醬 $42
上次食千島芝士薯條非常出色
今次試吓芝士肉醬～
肉醬偏重肉味 蕃茄味相對較淡
肉醬非常足料 食到最後仲剩好多🙈 而且好膩 建議二人細食唔好叫🤣
個人覺得🙋‍♀️千島醬芝士>肉醬芝士
有時候想平少少食個西餐 呢間真係好選擇👍 （午餐仲抵🤣）加上餐廳唔算係鬧市 環境相對會比較靜 傾下計都係唔錯嘅選擇😆

🖐️推介推介

之前旺角新開咗一間米線 一直好想試下 經過個陣發現好多人排隊😵‍💫
最後過左一排見少人左先食🤣 都排左大約10分鐘左右🙈

米線一上枱都幾有驚喜 一個個銅鍋🤩 幾有新鮮感～ 而且新鮮煮出嚟熱辣辣 望落雖然細細碗 但食完都幾飽👍

🍜 酸酸辣辣銅鍋米線（+蘿蔔 雞肉） $52
充滿酸菜嘅米線～ 唔係食開嘅麻醉辣味 食落幾夠酸味 辣味唔突出 唔太食得辣嘅都可以試下😏 米線配菜都幾多 足料👍
蘿蔔同雞肉冇咩特別 雞肉食落都幾多 呢個價錢抵食😛

🍜 農鄉番茄泡椒銅鍋米線（+金菇 腩肉 竹笙 牛肉） $79
本身鍾意泡椒 好食 好香 而且辣而不油 仲好開胃🤩 但我唔太鍾意加番茄 一係就齋蕃茄湯底😂 總之就係覺得2個唔夾🙈 但湯底係唔錯嘅 唔係齋用茄膏煮出嚟👍
餸方面冇咩特別出色 都係咁上下🤣

🍗 唐揚炸雞件 $25
呢個一定要試下/ 當米線餸叫！
炸得好香口 粉唔厚 食落幾有汁 有少少似屯門天水圍個間小鍋米線嘅南乳雞件😉

個人認為旺角太子區域太多高質素米線 呢間唔算特別出色🙈 如果想試啲非四川味/清少少嘅米線 都可以試下👍 而且地點都幾方便易搵～

🖐️試一次無妨～

非常不起眼嘅牛魔王邊爐🙈
餐廳係油麻地百寶利上面 冇燈箱冇廣告
咁啱碌ig見到佢 見到好多款牛任食 男朋友係超級牛魔王 所以就膽粗粗試下🤩

🍲 究極和牛放題 $246 （需加一）
不論你有幾多人去食 一入座就會俾一盆牛肉你 有哂咁多款牛肉～ 最平嘅一級肥牛 牛板腱會比較多 個人認為係想填飽你 等你唔洗再額外加牛🤣
雖然我哋只係2個人食 但我哋戰鬥力唔惹小🤭 額外再叫左4次和牛 金錢展同牛舌🤓
牛肉質素中上 我自己幾鍾意封門柳同金錢展 食落有咬口 牛味濃👍另外牛舌薄切爽口 和牛油脂分佈平均 食落都算入口即融
除左牛之外 仲有好多配料揀 有灣仔水餃 幾款菜+丸+麵食 仲有鵝腸 青口 蝦（咁啱個日去冇蝦🥲）比較特別嘅係有鴨胸～
飲品同雪糕方面幾有驚喜🤩 好多種飲品揀 有汽水 茶類 韓式飲品 雪糕有好多味揀 我自己食左幾杯da dino🤤

餐廳座位都幾鬆動 唔會覺得逼同焗 以呢個價錢同食物質素+款式 我覺得牛魔王+一大班人可以一試 可encore👍

🖐️大力推介

之前見到呢間餐廳有大阪燒蛋糕 一直好想食 不過好多時食完晚餐都好飽 個肚放唔落了🤣
最近佢出左烏冬餐牌 一於晚餐就試下佢～

叫食物個陣先6點半 一撳個餐牌已經冇咗雞扒同牛肉😅
得返兩個 就係蝦同雞叉燒 所以就揀咗呢兩個

🍜 香煎虎蝦蕃茄湯烏龍麵 $68
真係冇咩好形容🙈 好普通嘅蕃茄蝦烏冬
蝦係雪藏蝦 冇咩蝦味 不過份量幾多 有5隻
湯底幾濃蕃茄味 烏冬幾索湯 但口感係冧 唔煙韌 我唔鍾意冧烏冬😖

🍜 炙燒慢煮雞叉燒咖哩湯鳥龍麵 $68
呢個好味啲 雞叉燒幾特別 食落雞肉嫩口
湯底正常咖喱味啦🙈 都係冇咩特別

🐙 大阪燒（章魚）$108
對呢個好有期望 因為比較出名🙈
食落都幾足料 仲有菇粒 口感多啲
不過個醬有少少咸 落少啲會好啲🙈
味道上唔算有驚喜 比較普通大阪燒味 有少少期望與落差🤧

除咗食物質素麻麻哋之外 餐廳上菜嘅時間都要改善🥲 叫左食物半個鐘先到齊 （大阪燒有講左即叫即做 要等 但連烏冬都係）
最sad係第一個烏冬之後 另一個烏冬等咗10分鐘左右先到😅 搞到第一個烏冬都凍晒 湯又索乾哂 食落更差🥹

希望佢會有改善啦🙈

返工叫外賣個陣 見到有得叫🤩 

即刻好興奮就落單🤣

🍕分享套餐（2-4人） $428

有2個pizza + 3個冬甩
我揀左至尊意大利辣肉腸同食肉獸 我自己鍾意食肉獸多啲 味道多層次少少😆
pizza餡唔算好誇張嘅多 我自己仲覺得有啲少🤣 食慣左港式pizza勁多餡🙈 但咁樣令我更專注個餅底 本身個pizza都幾多芝士 好香濃 個餅底唔厚 食落勁有煙韌感😍 食到個餅邊仲正🤩 勁好咬 帶有少少脆脆地嘅口感 好正🤤

食完pizza就到爆醬冬甩😎
一整開件冬甩就爆哂啲醬 果然冇改錯名🥹
個冬甩唔會好油膩 食落好軟熟😍 凍左都唔會乾 又唔會成口油
如果有淨冬甩 我都一定會買🙈
每隻醬嘅味都好正 唔好問我邊隻味好啲🤣

呢間果然係人氣pizza店😍 完全係必食+必定要encore‼️

🖐️🖐️超大力推介