四方正宗重慶麻辣火鍋 (6/9) 星期一 晚上7點 特式：呢間火鍋店位於土瓜灣區既橫街窄行，該區較為舊及老化，平時好少有外人嚟搵食，不過而家有左土瓜灣站就會方便d。火鍋湯底都算正宗重慶，食物比較特別同有特式，招呼人性化，有人情味，所以多數都係街坊幫襯。 食物：湯底，藥膳湯底冇得輸，麻辣就因個人口味選擇，食得辣應該會好鐘意，但我叫小辣都辣到爆。 大部分小食味道都正常，算好食，但偏辣，亦無得揀辣度。 牛肉唔係急凍肥牛，但又未到手切牛級數，但任食，性價比已經極高。 海蝦好新鮮，好大隻，仲去埋蝦槍蝦線，都係任食，回本位之選。 鵝腸/脆鯇/鱔片都好新鮮。 試左幾款蔬菜類，全部都新鮮，推介皇帝菜，萵筍，鮮淮山，粟米，蘿蔔。 丸類都做得唔錯，首推，墨魚滑（好食過出面個d好多），牛丸都好食牛味重。 仲有好多特式食品，鮮黑柏頁（推介），牛胸爽（推介），魚卜（推介），豬黃喉（推介），豬腦/牛鞭/牛波子唔驚就試。 飲品：無包任飲，散叫，價錢正常，唔算太貴。 環境：普通，全場得4張4人枱2張2人枱，都迫迫地，平日唔算太多人，7點前去都唔洗等位，但建議book位。 服務：樓面態度好好，但唔夠人做野，見佢地都忙，但上菜唔算太慢，但感覺有人情味。 價錢：三個人食任食，再叫左4支啤酒埋單1000蚊，性價比唔錯，唔算貴。

膠得喜 (5/9) 星期日 下午1:00左右 特式：佢地既花膠絕對係賣點，有厚有薄，有成塊有碎上，睇自己需要同價錢，任君選擇。食set lunch會包一碗花膠湯同飲品，不過要飲花膠特飲就要加錢。 食物：花膠雞泡飯-都有幾多碎花膠，雞肉正常，唔算太滑溜，花膠雞湯底幾好，夠味又唔太油，清清地幾滿意。 花膠扒椒鹽豬扒飯-塊花膠扒夠厚，加埋d椒鹽，令到本身無乜味既花膠扒更好味，豬扒正正常常，都幾鬆軟，但飯量太少。 飲品：有幾款花膠特飲選擇，花膠杏霜好味，同花膠好夾，花膠薑味奶茶就麻麻，無花膠味，無奶茶味，薑味蓋過晒。 環境：普通，得4~5張4~6人枱，唔算太迫，星期日下午都唔算太多人，唔洗等位，又唔爆場，所以唔迫。 服務：似家庭式經營，得一個人負責煮，一個樓面，但樓面態度好好，可能因為人唔多。 價錢：兩個人食set lunch再加特飲埋單大約200蚊，性價比唔錯，唔算貴。

肉搏食堂 (29/7) 平日下午2:00左右（星期四） 食物： ⁃慢煮牛肉盛丼，睇個樣生，但食落un到一個點，完全唔掂。 ⁃火炙牛肉，除左香料粉味，其他咩味都食唔到，同樣un到無人有。 ⁃吞拿魚刺身，仲衰過爭鮮。 ⁃朱古力曲奇特飲，除左隻杯特別之外，杯野飲仲特別，特別難飲。 環境：環境正常，但枱好細張好窄，平日晏晝2點後至晚市前唔洗排隊。 服務：服務態度都正常，有禮貌。 價錢：兩個人埋單大約300左右。

阿甘蝦餐廳 Bubba Gump Shrimp Co. (21/6) 星期一 下午1:30左右 食物：佢地既招牌菜係炸蝦/炸魷魚圈之類，做得好出色，完全唔油，又炸得夠香夠脆，不過好明顯係用急凍蝦，d蝦無乜鮮味。 飲品：有好多特飲/Cocktails選擇，味道正常，特別在有d飲品係會飲完送埋隻杯比你拎走。 環境：十分舒適，地方又大，如果坐啱位仲可以係山頂俯瞰香港島。 服務：非常好，好nice，但要用英文落order，因為d侍應大部分都係外籍人士。 價錢：兩個人埋單大約500蚊，係山頂旅遊區，加埋view & services，唔算貴。

泰金國 平日下午2:00左右（星期四） 食物： ⁃燒牛肉果然係招牌菜，好食，但記得同姐姐講要5成熟，如果唔係太乾就唔好食。 ⁃無骨鳳爪沙律，好食，口感好清爽。 ⁃豬頸肉沙律，太多香料，就咁叫燒豬頸肉會好d。 ⁃蒜蓉包，推介，熱辣辣，蒜蓉夠香，包夠脆。 ⁃炸香葉炒雞，好食，d炸香葉好香口，但雞件就太多碎骨。 ⁃冬陰功，無乜料，香料就多到暈，唔推薦。 ⁃沙冰試過幾隻味都唔錯，但如果口渴就揀其他，有排等佢溶。 環境：櫈唔好坐，枱與枱之間好窄，平日晏晝2點後至晚市前唔洗排隊。 服務：第一二次食d姐姐態度都ok，但對上個次唔知係咪佢地已經做旺左定係因為大約2點，佢地都落場食緊lunch，態度就麻麻。 價錢：食過幾次，每次都叫唔同野+叫埋特飲，兩個人埋單都係大約350左右。

常滿百家菜 平日（星期五）食午市點心放題 食物： 湯羹粉麵類 - 無乜點食，淨係試左兩款湯羹，唔掂，得個咸 甜品類 - 榚正常，但偏淋身，其他糖水唔掂，感覺真係得糖同水 點心類 - 蒸點心麻麻，蝦餃蒸到淋晒，但奇趣地下面d蝦又ok爽口。牛柏葉碎濕濕。燒賣算比較好。鳳爪排骨正正常常。炸野都係偏淋。 小食類 - 油炆筍無味。茄子正常。青瓜海蜇頭出嚟比率係95%青瓜。醉雞正常味，但刀功一流，切到超薄片，完全無咬口。叉燒勁乾勁鞋。 環境：多人，迫，枱與枱之間好窄，平日晏晝都超多人。 服務：無乜服務可言，成個場得兩個阿姐，做到氣都無得唞。 價錢：96蚊位加一係抵玩既，兩個人埋單211

野朗Stone (14/8) 星期六下午1:30左右 食物：百零蚊可以食到原條燒牛舌係唔錯舌尖位比較爽口，一直落去會越食越冧滑。 (建議如果唔鐘意食太熟就慢慢少少咁切開嚟食，如果驚太生就早d先切開晒先，因為塊鐵板都凍得幾快） 薯蓉一般，KFC咁上下。 環境：只有bar枱位6~7個，唔好坐，大部分時間都要排隊。 服務：快餐店感覺，無乜服務可言。 價錢：埋單大約130左右。