銅鑼灣食完晚飯，想食簡單唔使排隊的甜品，即時諗到去人和荳品食豆腐花。去到即有位坐，餐牌其實都可以唔使點睇，最基本豆花、煎魚豆腐、炒麵都好食。 今日只係想食甜品所以只叫左豆腐花，兩個人叫左3碗share食，叫完即刻上即刻有得食。 薑汁豆腐花 ($18) 花奶豆腐花 ($18) 芝麻糊豆腐花 ($18) 個人最鍾意配花奶，因為豆腐花加花奶滑上加滑。其次薑汁豆腐花夠classic，芝麻糊就普普通通，食落同多多沖的差唔多。 快坐快叫快上快食快走，又快又平又正的首選。

鋪頭座位唔多，而且很多外賣，上次中午一點半來到要排隊45分鐘，今次星期日6點半來到竟然唔使排隊，不過由於外賣多，坐低落單後等左超過20分鐘先有得食。 蘿蔔腩肉小鍋米線(小小辣) $41 本身唔食得好辣所以叫小小辣就夠，腩肉份量多係每次必點，蘿蔔煮得夠淋。湯底是帶甜的酸辣湯，可能唔係個個鍾意甜味，但係我喜歡的口味。 松花蛋 $22 同普通皮蛋分別不大，醬汁唔係好附到落啲蛋到，感覺蛋還蛋汁還汁，可以跳過試其他小食。

餐廳宮廷式佈置，環境一流，我們被安排入座坤寧宮，座位舒適寛敞。 餐牌也別出心裁，以「傳哀家懿旨」點菜。前菜四小碟，有花生、中華沙律、涼拌飽魚、蕎頭。 雍穆公主花膠雞湯鍋 ($298) 花膠雞湯底足料味道濃，就咁飲都唔錯，跟湯底半隻雞都算大隻，來到是半熟的，可自行淥熟不會太老。 加拿大象拔蚌刺身 ($688) 象拔蚌刺身，鮮甜新鮮 手切封門柳 200g ($228) 酒香陳年花雕浸牛肉 ($148) 蟹黃餃 ($98) 鴨血 ($58) 桂花蚌 ($128) 娃娃菜 ($38) 整體食物新鮮，部份款式都幾特別，不過價錢不算抵食。其中有插曲是當晚有朋友生日買了蛋糕，到上蛋糕時見蛋糕款式簡單以為時店家送的，再問之下發現是調換了其他枱的蛋糕，好彩未切，否則就食左人地個蛋糕。

下午來到依然很旺場，不用等位，但keep住有人流進出。由於旺場關系，店內環境非常嘈吵，不過街坊地區的茶餐廳唔好咁多要求。 榛子醬西多拼薯條 ($42) 味道正常，粗薯條不錯 芝蛋牛肉漢堡 ($38) 外表平平無奇，但食落有驚喜，漢堡內的流心蛋咬落配埋醬汁好好食，推介! 避風塘生炸脾 ($35) 生炸脾生得脆，但略嫌有點乾。雞脾避風塘食法創新，炸蒜稍咸。 街坊區難得的冰廳，餐牌款式非常多。多選擇而菜式多樣有創意，難怪旺場。

小店在一田內，吧枱open kitchen一目了然，缺點是油煙頗大。 餐牌簡單，款式不多但實而不華 牛舌芯 (切上 ) 套餐 $148+$30 此店牛舌在關注組上甚出名，到晚上經常售罄，今天中午來成功食到。份量不少，厚切上配點鹽味道已很出色，難怪不少人推薦。此價錢有此份量絕對是抵食。 牛板腱 (200g) 套餐 $108+$30 對比牛舌，牛板腱就普通質素。由於牛板腱沒有切上，發現小缺點是把刀唔夠利，都切得好攰下。套餐沙律、麵豉湯、飯意粉或薯蓉是可添加的，另外亦包一罐汽水，套餐份量不用添加已好夠飽。

經常排隊的熱門餐廳，星期六下午6點來到，餐廳已滿座，另有兩枱等候中。餐廳門外有放座椅讓人坐著等候，坐在外面已聞到pizza香，愈等愈肚餓，天氣熱還好等了大概20分鐘就可以入座。 由於見到pizza都幾大個，兩個人只係點了一個pizza一個小食。 藍芝士蘋果薄餅($178) 應該是餐廳最出名的薄餅，是未試過的配搭，當然要一試。藍芝士的味道不是想像中濃烈，鹹香鹹香加上甜甜地的焦糖蘋果，出奇地配合，配料雖然簡單，但味道新鮮而不會突兀，而且薄餅底烤得香脆同時又有口。 香烤黑椒雞翼($58) 雞翼烤得有蜜糖焦香，脆外皮有黑椒味點綴，是不錯的雞翼。 另外有店員推介的蜜糖啤酒，甜甜地，配芝士令味道更突出。

肥仔銘是其中一間出名食沙爹牛麵的茶餐廳，本人其實對沙爹牛麵不是特別偏好，但經過見不用等位就不妨一試。 餐廳有定好麵餐款式，一場來到當然要試試沙爹牛肉麵，麵餐原本配火腿煎蛋、牛油方包，但見對面枱的熱香餅幾吸引，就問問店員可否更換配搭，答案是可以加$2轉，一個餐要滿足兩個願望。 沙爹牛肉麵轉拼熱香餅及凍飲($41) 沙爹牛肉不是非常濃郁，但我覺適中，公仔麵煮得軟硬剛剛好。對於我來說，熱香餅比沙爹牛麵更吸引，熱香餅揸上牛油，按自己喜歡甜度加上糖漿，正！一鹹一甜非常搭。

奉命到西環買海味，未食野經過隨便選了這間越南餐廳。下午茶時段唔多人，餐廳環境幾清靜，坐得幾舒服。 下午茶套餐選擇都幾多，各式湯粉、撈檬、飯、炒粉、法包都有，由於唔想食太飽，揀左生牛肉湯粉。 生牛肉湯粉($38 下午茶) 湯粉賣相不錯，睇錯湯底算濃，可惜飲落太鹹，不知是否鹹味已蓋過其他味道，基本上只飲到鹹味試唔到有牛骨湯的牛味。牛肉正常，河粉是滑溜的。下午茶套餐價錢是抵食，但湯底真的太鹹，食完要飲番好多水。

唔知幾時先可以再去旅行，懷念台灣的芋圓，食完飯又想食番碗甜品，就來到這間長期要排隊的人龍店，7:45來到取票等位，要等40張枱。取完票去附近商場行下，8:30返到來已截止取票，最後等到9:15終於有位。假日如果想堂食真係要早點取票，相信8點後到已經食唔到。 冰芋圓4號($45) 配料有芋頭、紅豆、珍珠、芋圓及刨冰底。芋頭夠粉，其他配料亦保持水準，刨冰底黑糖味剛剛好，唔會淡亦不會過甜，當係懷念一下台灣的味道。

睇YouTube見到介紹，決定來試一試佢。 麵底款式都幾多，除了正常會有的麵款，仲有其他較少有的瀨粉、銀針粉及台灣麵。配餸選擇也不少，亦有一些出面較少有的款式。 三餸車仔麵 普通三餸麵是$38，但叫左三款都要加錢的餸，分別是招牌豬頸肉(+$6)、墨魚春卷(+$2)及魷魚鬚(+$2)，麵底選了瀨粉，加埋野飲一共$57。 豬頸肉表面燒得香脆，魷魚鬚正常水平。墨魚春卷幾特別，見YouTube介紹時是放在碗內的，現時已改為分碟上唔會比湯浸淋，即時改進值得一讚。湯底選了少辣汁，湯底正常無特別，配餸較出色。