Aria位於蘭桂坊加州大廈24樓，居高臨下，環境好靚好舒服，啱晒同伴侶或者朋友過嚟食返個brunch ！佢weekend有半自助式brunch提供，自助區選擇好多，海鮮有生蠔，大大隻龍蝦，長腳蟹，鮮蝦，同蜆，仲豐富過酒店自助餐😝另外仲有好多沙律同意大利特色小食，好似意式生牛肉，唔同嘅芝士， Parma Ham，千層麵，焗茄子，真係超豐富呀😃選擇多得你食物質素都好好，海鮮好新鮮，尤其係個生蠔同龍蝦，食到停唔到口！ 如果食完咁多前菜都唔夠喉嘅話，仲可以加幾十蚊要多主菜，今日我就試咗佢個芝士pizza😍芝士味超香濃，新鮮焗製，餅底卜卜脆，仲要好大份，兩個人share都得🤣 最後仲有甜品任食，有水果，幾款蛋糕，同佢自家製嘅Tiramisu同埋雪糕，全部質素都好好。加上呢度食嘢唔限時，可以慢慢食慢慢chill，加埋杯白酒，真係可以坐幾個鐘🤣 食物質素高，坐低又舒服，推介俾大家試吓👍🏻

呢間係銅鑼灣嘅Omakase店鮨本，評價都唔錯，今晚同朋友有機會嚟試到兩位年輕師傅嘅手勢。又真係幾好喎！餐廳環境乾淨企理，得12個位，同一般鮨店差唔多。omakase價位$1280, 有5品小菜，壽司10貫，玉子燒，湯同甜品，算抵食👍🏻 小菜方面，佢嘅鹽燒平貝令我印象非常深刻！好大件平貝，包住紫菜食，啖啖肉啖啖鮮味，好高質👍🏻👍🏻 壽司嘅舍利酸度適中，飯唔散，估唔到師傅年紀輕輕，但係呃壽司嘅技術咁好咁成熟👍🏻👍🏻 佢哋嘅食材當然係每日新鮮運到，全部都好鮮味，尤其係個海膽，超新鮮超甜！而且刀工非常好，刺身厚切，唔使驚食唔夠🤣 服務方面，兩位師傅都非常了解嗰日嘅食材，幫我哋好仔細介紹每一食物，非常親切有禮，大家仲可以叫返Sake同師傅一齊飲杯添！總括嚟講今餐嘅用餐體驗非常滿意，值得推介大家嚟試吓👍🏻👍🏻👍🏻

上星期去旺角新世紀行街，見到本身帝京酒店自助餐位開左殿大喜屋，之前已經食過佢地尖沙咀分店知道有質素保證，所以又試下佢地新開嘅旺角分店😁 價錢同尖沙咀一樣，都係300幾蚊任飲任食2小時，算係十分公道😊 可能因為餐廳前身係自助餐，所以自助吧個位超大超多野食，真係同自助餐有得比😨 除左standard嘅冷盤前菜甜品，自助吧仲有好多熱食，例如熱湯，炸物，蒸點心，最驚喜㑖連蒸魚都有，無諗過放題會有得食🤣 至於放題食物，亦都係qr code落單，刺身壽司卷物全部先黎一round😌 必點海膽軍艦，因為餐廳用嘅係高質北海道海膽，而且好新鮮，絕唔會因為任食而比cheap野你，食到停唔到每round都要叫d🤭 另一樣回本選擇當然係食甜品同雪糕，雪糕當然有貴野haagen daz同movenpick，而且仲有好幾款韓國日本雪條，鐘意食甜嘅你記住留肚！

荃灣呢間開左幾個月嘅asok thai餐廳，雖然已經開左幾個月，但日日爆滿排長龍，今日早左放工終於有機會同朋友試下😀 餐廳裝修好靚，modern現代風，亦有唔少打卡位，食物就走fusion泰式路線，都幾有新意。 Asok Thai小食拼盤🧆($178) - 2個人乜都想食，一定係食拼盤，呢個小食拼盤有成6，7樣野，都幾抵食😋 私心推介免治豬肉串同雞棗，2樣嘅肉都打到起膠，少少彈牙，有泰國香料一齊煮，好好食！ 煙燻無骨雞🍗($198) - 呢個有驚喜，估唔到咁大份原隻上！上枱時淡淡煙燻味，切開好有肉汁，雞肉仲好嫩，雞胸都唔會鞋，而家調味剛好唔洗點醬汁都好味👍🏻 烤虎蝦黑松露蟹肉炒飯🍛($168) - 黑松露配蟹肉當然唔會go wrong，值得一讚係炒飯炒得好乾身粒粒分明😋 上面仲有2大隻烤虎蝦，鮮味十足！

今日朋友仔話想搞搞gimmick，去間有特色嘅餐廳，上網search見呢間餐廳可以同水母一齊食飯，好特別，就去試下順便打個靚卡😁 餐廳主打西餐，有a la carte menu亦到有set menu。我地2人想試多d唔同野，所以叫左一個$488嘅arctic set再散叫少少野。Artic set都幾扺食，套餐包左沙律，餐湯，主菜，飲品同甜品，絕對係非常豐富。超推介套餐入面嘅蟹肉龍蝦湯，超香濃嘅龍蝦海鮮味，店員會用熱壺倒落湯碗上菜儀式感十足👍🏻👍🏻 散叫嘅我地加左個忌廉冬陰功意大利粉($228)🍝，海鮮種類好多呀舖滿哂個意粉😆 而且全世界野都煮得啱啱好，意粉al dente，掛哂d汁，冬陰功唔算太辣，味道啱啱好😇 總括然而，呢間餐廳除左有水母睇夠gimmick之外，食物都無令人失望，好適合情侶黎浪漫一番架❤️

天氣凍番dd，又係時間打個邊邊🤣 今次同幾位靚靚好姊妹一聚，除咗食物之外都想揀間打卡度高嘅餐廳。呢間荃灣嘅別忘了個名好有詩情畫意之外，內裡裝修仲有女仔最愛嘅粉紅色櫻花樹，好似好浪漫咁，食環境都開心😁 餐廳係台式火鍋吃到飽性質，我地叫左澳洲M7和牛 120分鐘吃到飽套餐，加一後300零蚊，價錢唔算貴。牛肉必食M7 牛胸腹，牛味濃郁！湯底可以揀鴛鴦鍋，我地揀左椰子雞同芝士牛乳鍋，2樣都無揀錯，椰子雞好香椰汁味，食所有野都唔洗點醬料，牛乳鍋就比較清啲，有淡淡芝士味幾得意。 其他火鍋配料可以到出面自助吧慢慢拎，standard嘅大部分都齊哂。我反而最想推介嘅係佢地嘅甜品同飲品list，水蛇春咁長真係唔會試得哂😨 飲品當然叫左珍珠奶茶同台式綠茶，甜品就毫不猶豫叫左綿綿冰同窩夫，幾樣都無令我失望，大家有機會去食記住留肚食甜品呀！

天氣無啦啦又凍番，除左打邊爐之外，最好嘅選擇就係唯住個火爐燒肉😋😋😋 呢間安平燒肉之前已經食過，性價比幾高，300幾蚊就已經有M5和牛任食👍🏻 同普通燒肉放題餐廳一樣，餐廳出面有自助吧，同飲品任飲。呢間係台式燒肉店，所以自助吧有櫻花蝦滷肉拌飯，櫻花蝦好香，唔鐘意食飯嘅我都食左一大碗🤣 燒肉嘅食材就係QR code落單，想回本當然就要叫和牛啦！先黎一round牛肉，呢款和牛唔算太肥，唔會成口油，但我最like佢牛味好濃，牛魔王必點！另外仲有牛小排，雖然唔係和牛level但都值得一試！ 其他qr code落單任食食物仲有好多款豬牛雞，海鮮，蔬菜，台式小食飲品等等，真係勁多選擇，樣樣食少少，都飽到捧住個肚走。最後仲有甜品，有雪糕或者芋圓揀，完美結束一餐😁

今日夜晚又OT🥲 8點幾放工好想食餐勁嘅慰勞下自己，諗唔到食咩最好就係食放題，乜都有得食想食乜就叫乜🤣 呢間荃灣大鴻輝入面嘅滿屋放題有幾個價錢選擇，由200幾到500幾都有，我地今次就揀左最經濟嘅A餐食。 入到去就即刻覺得無選擇錯，因為無論你揀咩價錢嘅套餐，出面嘅自助吧都係任飲任食，咁梗係最平嘅A餐最著數😏 未嗌野前先食左自助冷盤同炸物，拎番2罐野飲，而甜品同雪糕就留番最尾慢慢嘆😁 番埋位用QR code落單，即使食A餐，都好多選擇，特別係刺身同各款壽司卷物。最happy嘅係呢個套餐都有海膽手卷食，實在係回本之選！熟食方面都有唔少選擇，鍋物炸物燒物和食等等，最推介蒜茸燒生蠔，生蠔唔算細隻，舖上滿滿蒜茸，值得一試😊 食到最尾當然要出去掃番一round甜品雪糕，甜品櫃好多原件蛋糕，但我就留肚食多幾款雪糕，因為佢地有haagen daz同movenpick 😏 食多幾杯真係回哂本！

香港西式餐廳好多選擇，但專做墨西哥菜嘅就唔算多。今日朋友帶我黎旺角呢間樓上bar，餐廳有indoor同outdoor seating，裝修都幾有格調。佢地專做手工墨西哥菜，可以試到平時少食嘅菜式😀 Quesadilla (Chicken) 🥪 - 墨西哥餡餅，我揀左雞肉，入面有芝士蕃茄牛油果醬等等配料一齊烤焗，芝士半溶好香濃😋 Mix Skewer 🍢 - 串燒拼盤有雞肉同豬肉，肉質燒得啱啱好，熟哂但keep到肉汁同嫩滑口感。 Grilled cutterfish 🐙 - 見每枱都必點燒八爪魚，我又跟風叫左🤣 一大串八爪魚鬚用惹味調味粉調味粉燒，帶點炭烤味，八爪魚鬆口感彈牙，食唔停口😄 Beef Cheek Ragu 🍝 - pasta類我地揀左牛面頰捲麵，牛面頰係慢煮左4小時以上，非常之淋同索哂d湯汁，捲麵口感煙韌，掛哂d汁😇 Margherita Pizza 🍕 - 呢個芝士蕃茄pizza中規中矩，值得讚嘅係個餅底非常薄脆，好似餅乾咁，唔會太滯👍🏻

呢間人氣嘅酸菜魚專門店登陸青衣啦！急不及待要同朋友試下😊 店舖用左少女好like嘅tiffany blue仲主色，非常之新潮，好適合打卡🤣 以下同大家推介最欣賞嘅2道菜！ 姚姚酸菜魚🐟 - 當然即試佢地嘅招牌酸菜魚😁 2人份都勁大盤，店員上菜時有提示可以先飲湯，再慢慢食魚。湯頭果然鮮甜，再有好香濃嘅酸菜味，非常之開胃，我地叫左少油，所有飲多d都唔怕😋 麻辣香鍋🍲 - 香鍋不嬲都係我favourite ✌🏻 今次我地自選左5個餸，包括牛柏葉，雞軟骨，重慶酥肉，魚片頭同埋寬薯粉。薯粉當然係必點嘅，索哂香鍋嘅味同汁，入哂味！重慶酥肉好有驚喜，肉條炸得香脆，無睇錯係連花椒子一齊炸，所以好惹味，食到停唔到口😄 午餐時間去的話仲有午巿套餐選擇，都係$70-90一個餐，非常扺食架！