講明係麵控NANA又點會唔鍾意食譚仔！！特別係譚仔三哥！！一個月起碼食兩次以上😎每次譚仔同譚仔三哥出新湯底都要第一時間衝過去試💓今次係煳麻湯底 以NANA嘅理解就係將煳辣mix麻辣😍兩個咁好食既湯底撈埋一齊會變成點？究竟會唔會正正得正呢😆想g就睇埋落去啦✨
-
魚爽肚芥末魚籽鱈魚滑豆卜煳麻湯 $42
首先一定要講吓湯底先啦！第一啖湯飲落去有好大陣煳辣湯既味道 然後隨之而來嘅就係麻辣湯底嘅麻🌶一開頭可能會覺得煳辣味會冚過麻辣味 但越食你就會覺得越麻😆然後就會覺得兩個湯底非常之夾！！絕對唔會伏 推薦一試😎
然後就講吓佢兩個新嘅餸：魚爽肚同芥末魚籽鱈魚滑豆卜！唔爽肚食落冇腥味 同佢個名一樣 都真係幾爽口 但體積偏小 可以話係一啖一粒 NANA個人就係一般呢個餸😉

鱈魚滑豆卜嘅口感係幾豐富 上面係平時食開嘅蝦滑魚滑既口感 而下面就係豆卜 但講真個句 芥末味真係要好認真咁品嚐先會識到少少芥末味🤨所以如果驚芥末味好濃嘅朋友仔就唔使擔心啦😙 -
香烤芝脆豆腐餅 $16
每次有新小食NANA都會想試！但呢個豆腐餅就好失望啦。。😢第一次覺得三哥譚仔嘅嘢係唔鍾意😫首先上枱嘅賣相已經唔吸引 感覺好鬆散 而且佢著名嘅麻辣汁又好少。。口感上就同賣相一樣 好散 冇可能成舊夾起嚟食🥶然後芝士味係食唔到咁制 成個味道就好似蠔仔餅但冇蠔仔 唯一優點可能就係個煎底都香脆 但都比較油膩。。一句講晒唔太推介🙂 -
蜜桃乳酸 $15 （跟米線+$11）
以NANA既記憶 呢一杯特飲好似唔係新品🤣蜜桃味同乳酸味夾！唔會過甜 都算清新 而且入邊有兩塊蜜桃 幾好食💖- 整體來講新湯底非常滿意😆✨✨會再想去食 係喎NANA係叫左二小辣！友人叫中辣！兩個辣度同平時其他湯底嘅差唔多😎而新品小食就。。。睇返上面既評價。。。
-
評分時間✏️
環境：3/5
味道：4/5
服務：4/5
價錢：4.5/5

OK又係酸菜魚哈哈☺️💓今次食既酸菜魚仲要係NANA覺得係「大佬級」🤣🤣因為佢真係專食酸菜魚 冇其他主食！咁專注仲點會唔係大佬級專業呢😆講到咁 係咪已經大概估到NANA點樣評價佢haha💓💓💓
-
廚十三老壇酸菜魚 $300 （2-3人份量）
+$28 寛粉
影出黎好似表示唔到佢成盆酸菜魚係幾大碟！！係呀係要用個「盆」字🤪🙌🏻形容下就係放左落枱佔左成張枱既3/4 然後你基本上成餐飯都睇唔到你對面個朋友個碗入面食緊咩😂😂😂然後 佢個賣相大家都睇到有幾正！流哂口水好有食慾🤤！
首先講下佢個湯底 酸度鹹度都適中！唔會話飲完好辛苦 仲要係愈飲愈想飲😳但講真 成個湯底都比較油 可能要隔一隔油先再飲 感覺會冇咁heavy!!配料方面：酸菜、辣椒、花椒、豆腐、蓮藕片等等！好豐富！！亦同時令到成盆酸菜魚口感味道層次提升✨✨

最後！！主角出場！！酸菜魚本魚🐟首先又要讚下佢係無骨啖啖肉的魚！之前NANA講過酸菜魚要係無骨先至夠正夠爽！魚冇腥咪好滑好嫩！係會食完一舊又一舊 同湯底亦十分之夾💓 另外再講講 另外加既寛粉 其實就係水晶寬粉 食酸菜魚一定一定要有水晶粉 因為佢會吸哂湯精華 好入味！其實都係呢盆酸菜魚既唔滿意之處就係冇粉水晶粉底 呢個位少少失色呢😿
-
整體來講係好滿意呢「盆」酸菜魚 湯、魚、配料味道賣相都好好😙而且份量的確夠3個人食（尤其係女仔！）如果佢包埋少少水晶粉就真係100分啦✨🙌🏻
-
評分時間✏️
環境：4/5
味道：5/5
服務：4/5
價錢：3.5/5

喂！又係呢間「灰狗」？？（想知點解叫灰狗可以睇返上幾個post🤣）係呀又係呢間泰國嘢🇹🇭✨咁短時間翻食緊係有佢原因啦🤰🏻～
-
泰式沙嗲豬頸肉 $88
呢碟豬頸肉同平時出去泰國餐廳食既唔同！就係多左兩串多士同小拌菜✨賣相很OK呢💖首先講下主角豬頸肉 肉質夠淋唔會好難咬 但炭燒味略嫌唔夠 姐係唔夠惹味！冇個種令人食完一舊又一舊🤔多士都夠脆 但就唔太掛汁 食極都有少少乾身😶‍🌫️所以NANA就一般呢碟豬頸肉啦！ -
薄切三文魚配泰式辣汁 $128
「友人表示有驚艷到！！」第一道前菜就係呢個三文魚 友人食第一舊立即雙眼發光！因為佢冇諗到咁開胃！酸酸既泰式辣汁配上新鮮既三文魚刺身 再加埋小蒜片 係無比既夾🔥（哈哈好似太誇張）總之係一個好正既開胃前菜 NANA十分推介！！！ -
鮮蝦炒金邊粉 $138
本身係意粉同金邊粉之間選擇 最後都揀左泰式啲既金邊粉！但NANA覺得應用揀意粉呢⋯因為金邊粉偏乾偏淡 撈埋辣椒都冇太大幫。。🙁所以一般唔太推薦 -
蒜蓉包 $28
呢個蒜蓉包賣相吸引 但食落唔夠鬆軟甚至有啲偏硬 而且蒜蓉味唔太出唔太濃 普普通通～🌝 -
泰式奶茶千層蛋糕 $78
唔知係咪主食食得太多濃味既野 覺得呢個泰式奶茶奶茶味唔夠重 只有淡淡嘅奶味 如果比NANA揀都係會揀返椰子千層蛋糕 因為入邊有啲椰子肉！ -
Coco Shake $62
上次都有飲呢一杯椰子沙冰 再叫就梗係有佢嘅吸引力！椰子好濃好香 而且入邊有椰子肉！推薦推薦！💓 -
整體而言都係最鍾意個三文魚🤤🤤🤤今次食㗎其他嘢都普普通通一般一般 下次再試其他🤫
-
評分時間✏️
環境：5/5
味道：3.5/5
服務：5/5
價錢：3.5/5

NANA除左食之外就係鍾意飲啦哈哈！夏日熱辣辣無理由唔飲返杯冰凍既手搖🥤爽一爽佢！今次NANA就帶大家飲「小黑糖」聽個名都知佢拿手應該就係黑糖！🤎
-
小黑糖曲奇珍珠鮮奶 $36（半糖）
聽到又黑糖又曲奇仲要鮮奶 就知呢杯野唔簡單 係一定唔會難飲既組合😎的確！飲落好夾！但就一定預左偏甜（即使叫左50%糖 都係偏甜🤰🏻）但就可以接受既甜度 又未至於起痰👍🏻 -
首先講下口感 加入曲奇令成杯野飲既口感直線上升 每一啖都會有輕微既咬口！而黑糖珍珠方面 好明顯飲得出有黑糖既味道 咬口亦足夠（NANA甚至認為可以再淋少少！）最後鮮奶方面 奶夠濃 似係選用4.3/明冶既奶！令到成杯飲唔更順口💖👍🏻 -
絕對會有下一次！而且會想試返佢既招牌黑糖珍珠厚奶或者有茶底既系列😚

上個post NANA就帶大家食左川菜！咁好食就唔好停啦今次食埋酸菜魚同片皮鴨😍仲有小龍包！呢間稻成其實NANA都食過唔止一次！每次都捧住個肚走🤰🏻
-
稻成酸菜魚 $238
連稻成自己都講「好食 不止酸菜魚」就知佢地對自己既酸菜魚幾有信心！的確！名不虛傳💁🏻‍♀️都真係好唔錯既 首先講下啲魚 魚塊夠滑 完全無骨（酸菜魚冇骨好重要 可以啖啖肉！）而且唔會有腥味！然後個湯唔會過酸亦唔會過鹹 辣度可以自己揀（啱晒食唔到辣既寶寶😍）酸菜芽菜金菇等配菜夠多 食到底仲有可以不斷夾！唯獨一樣不足係入面冇薯粉/水晶粉底 連加錢都冇得加 呢個位有啲失望🥲但整體來說 酸菜魚好食必食之選！ps上枱時會有個蠟燭係底保持溫度👍🏻👍🏻👍🏻 -
稻成皮片鴨 $208 （半隻）
邊個鍾意食片皮鴨既舉手🙋🏻‍♀️因為稻成皮片鴨絕對可以滿足鍾意食片皮鴨既你！！鴨皮好薄好脆！！食落唔會覺得好膩 包埋落薄皮再加醬真係十級享受～☺️而鴨肉都會有！照顧到鍾意食皮加肉既大家😍呢個真係十分推薦大家！！ -
炸銀絲卷 $38
睇落係咪好似炸饅頭呢～錯啦！佢係銀絲卷 同饅頭不同在於入面有一層層既絲卷 好重椰子味好香 出面好脆入面好軟！NANA認為比炸饅頭更好食🥰 -
稻成小龍包 $ 48
小龍包食上海菜/川菜就一定要叫架啦🤪呢個小龍包湯夠多 味道亦不錯 就同出面既小龍包一樣 不過不失 想食都可以叫的😚 -
整體來講我比稻成既評價都幾高 除左覺得酸菜魚入面可以有水晶粉之外 都冇咩好挑剔！服務態度都好不錯👍🏻

Pizza雖然好邪惡但間唔時都會好想食🍕有冇人有同感🙌🏻呢間《The Pizza Project》NANA一早就已經bookmark左好耐！聽講佢堪稱全港最好味嘅手工薄餅店🤩所以前排就去到試下佢啦！結果同預期一樣都係超水準的哈哈💯
-
見到網上好多人都係會試佢個《Project Tasting Set》既套餐$195@1人 所以NANA同兩位友人都叫左呢個套餐✨由於我地3個人就會有：
【1款Gnocco Fritto、1款Antipasti、3款Pizza、2款甜品】
（其實我地三個女仔聽到叫3個pizza都知會食唔哂🤣最後都真係要打包哈哈哈）
-
Carbonara Pizza 11‘
呢個卡邦尼Pizza好似就係The Pizza Project既Signature🍕✨外貌好看、味道好食！都唔怪得佢咁受歡迎💯每一塊pizza上面都有煙肉包住一粒鵪鶉蛋 再加上爆多的芝士同蕃茄醬🍅不講係視覺上定係口感上都好有衝擊💨再講講佢既pizza皮好香脆 個pizza皮雖然冇芝心邊 但都好脆口 絕對可以令你食埋佢既魔力⚡️ -
Nouja Spicy Salami Pizza 11’
睇呢名都知佢會辣辣地！唔食得辣既朋友就要留意下啦👀NANA係得辣既所以都覺得呢個pizza很不錯 但就相對上都會比較heavy 因為每一啖都會好多醬 好多芝士 再加埋上面個莎樂美腸 十分之極度邪惡啊〰️😈 -
Parma Pizza 11’
呢個Parma ham pizza係3個入面相對上冇咁重口味🤣起碼上面有啲火箭菜同冇極多醬汁〰️唔想食咁heavy又想食pizza就可以揀呢個啦✨但Parma ham都係偏鹹個種！整體都ok 但如果得兩個quota就未必揀呢個啦😗 -
Truffle Gnocco Fritto
黑松露酥炸麵團（好似話似係餃子既物體🤣）入面有滿滿得松露芝士 好香！麵團亦好香脆 但NANA覺得同pizza皮好似 食左呢個再食pizza就略嫌太飽太濟 -
Mozzarella Fritta
香脆芝士條 係可以拉絲個種🙌🏻作為前都幾開胃 為之後既邪惡pizza打個靚底🤣點埋個青醬感覺就會更清新 很不錯呢🍃 -
Pici Tiramisu
我諗呢個甜品又係必叫既(?)NANA本身就唔係tiramisu既fans！就咁食覺得可以再濃啲同再濕潤啲🙈但整體來講都係好食的啊！ -
White Chocolate Mousse
唔知係咪因為食完咁多heavy既野之後 都想食返啲酸酸甜甜既甜品 所以NANA覺得呢個白朱古力藍莓mousse好食過tiramisu🤣蛋糕好濕潤 藍莓醬酸酸甜甜 作為一個完結既甜品滿分💯 -
整體來講呢個係一間好抵食好高質會回頭嘅手工薄餅店😆🙌🏻環境昏暗服務態度滿分！好適合一班朋友chill住咁食💯加上呢間Pizza店冇加一服務費 $195食足咁多野！真係要捧住個肚走🤰🏻期待下一次到訪呢✨〰️

唔知由幾時開始大家都好似留意多咗川菜 不論係酸菜魚水煮魚水煮牛總之係辣嘅嘢 NANA都好喜歡呢💖今次係一間西營盤嘅川菜小店 大概都係食麻辣嘢米線面啊等等！
-
川味手撕雞 $58 （送飲品）
首先講吓佢嘅賣相的確好唔錯！大大碟手撕雞份量極度足夠 包你可以送晒成碗飯😚味道方面辣味係足夠嘅 雞亦唔會太鞋 整體評分屬於中上 但就未至於十分驚喜 如果突然間想食川菜都可能會考慮😎👍🏻 -
麻辣豬肚絲 $18 （跟餐）
同樣地豬肚絲個份量都係極多 如果係一個人食應該可能會食唔晒🤣咩都方面覺得唔夠辣 麻都冇乜 而且都比較偏鹹！整體分數合格～ -
抄手麵 $40
一聽到抄手麵NANA第一個感覺以為個湯底會係紅色 好辣咁既樣 點個湯底係清湯 當堂失望左！食落好清淡 抄手有好多隻 但就體積偏小 唔似平時出面食既紅油抄手 反而麵質就成碗麵最出色既一個位 似係手攪麵啲fd 所以除非想食個麵質 如果唔係都唔會再叫😼 -
整體來講呢間川菜小店 係止川菜癮既一個選擇 但我相信附近一定會有最好食既選擇😗

上次講咗龍蝦金邊粉同三文魚之後就一直都未得閒出埋下半部份🤣其實下半部份仲精彩💯獨特生菜包、黃金咖喱蝦、飲品⋯😻😻😻
-
黃咖喱蟹肉海蝦配印度煎餅(+$28) $228
一放上枱已經聞到好大陣黃咖喱香味😛今次嗌呢個黃咖喱就未有嗌飯 但有印度煎餅都好夠🤣（因為黃咖喱就係撈飯神器 ）首先講吓佢個印度煎餅 兩大塊$28性價比一般般 但其實三個人食份量都夠既 夠熱夠脆 同其他煎餅一樣都係比較油！但點黃咖喱真係絕配💯 黃咖喱有足夠嘅椰味（NANA個人覺得椰汁味係泰國菜來講係非常重要！）所以呢個黃咖喱係夠香的 加上上面有少許嘅蟹肉 增加左成碟餸嘅鮮味 而海蝦方面 size偏細 勝在夠彈牙
-
泰式辣醬粉皮生菜包 $108
首先真係要講下呢個生菜包食嘅時候 係極！度！唔！方！便！（如果你係男/女神第一次約會就唔建議你食呢一個啊🤯）因為佢係會一路食一度漏⋯啲泰式辣醬好似洗手咁🙂

味道方面其實唔錯 生菜包加塊粉皮係絕對有獨特性同新鮮感👍🏻而泰式辣醬都有為生菜包增添獨特嘅味道 所以如果你唔嫌麻煩嘅話都可以一試😂 -
招牌椰子千層蛋糕 $78
上次就講咗斑蘭千層蛋糕味道一般般 可能就係因為呢個椰子千層蛋糕嘅影響 呢個椰子千層蛋糕入邊有粒粒嘅椰子肉 非常有咬口 加上椰子味濃 係一個非常唔錯嘅千層蛋糕💯值得一試！ -
Coconut Shake $58
呢杯椰子奶昔係NANA既推薦飲品✨椰子味足夠 好清新 甜度適中 好適合食完一道菜 飲一飲 到下道菜😛 -
Pink Journey $62
呢杯沙冰入面有士多啤梨、蘋果汁、青檸汁 就咁聽成個組合都非常清新 好fresh✨〰️飲落甜度都可以 絕對唔會有啲奇怪嘅味道🤣 -
整體來講呢間新潮既泰國菜真係唔錯 環境、食物都係一個中上的位置 絕對會有下一次😛

麵～又係麵～究竟NANA係有幾鍾意食麵🤣呢間元祖沾麵其實NANA都食過幾次 每次都會見到好多人呢 證明呢間沾麵都有一定的實力哈哈！而且佢湯可以任加 食完仲可以加木魚湯清下味蕾 最特別既係 佢地會係你落單後比個漏斗計時器你 上面寫住：若超過20分鐘都未有食物 全單即享9折🤣✨（但今次都係準時到 所以9折冇緣哈哈哈 - 特製赤蝦沾麵 $99 雖然係呢間沾麵店食過幾次 但幾乎次次都會叫龍蝦/豚肉魚介湯🐟所以都未試過呢個赤蝦湯🦐咁就首先講下個湯啦！一放落枱已好大陣赤蝦味 聞落同龍蝦湯差唔多 但食落的確比龍蝦湯淡！但整體來講都夠鮮味 湯入面都有數粒肉粒 進一步增加湯的鮮味！湯用石鍋上 所以十分夠熱 但就有點黏底！而且凍得好快 再加上沾麵本身凍上 導致食落少左熱辣辣既感覺🧊 麵食方面 肉有3塊有炙燒既味道 尚算惹味😽配料有：紫菜、半隻流心蛋、荀、青檸🫒不得不承認 青檸令到沾麵的味道層次上升 而且更開胃😋麵質軟硬適中 唔會太過黏口 亦夠彈性！麵條掛湯能力足夠 合格成為沾麵的麵底😎 - 整體來講沾麵、沾面湯底都不錯！絕對可以成為想食沾麵時的選擇✨服務態度又不錯：會不斷加茶（因為要收$5🙂）、想加沾麵湯時反應也很快！

由於今次食呢一間「灰狗」（友人獨特叫法🤣源自於佢嘅千層蛋糕上面嘅狗仔餅乾 再加上佢英文名前有個灰字 所以就變左灰狗啦🐶）餐廳環境不錯 以暗灰色為主 有種西餐既感覺 適合同朋友們聚餐的好地方💯
-
泰式原隻龍蝦炒金邊粉 $298
一放到上枱俾佢嘅賣相吸引住 即使係食緊其他嘢都忍唔住放低同佢影幾個 close-up!!😻同個名一樣真係原隻龍蝦上 但其實實質龍蝦肉只得幾粒 龍蝦份量偏少🤌🏻 由於我哋仲嗌左好幾個餸 所以都唔係第一時間就試到佢嘅味道 但隔咗一陣再拎起啲金邊粉嘅時候 竟然仲會出煙‼️金邊粉味道不錯 酸酸甜甜 粉質亦夠淋 唯獨芽菜份量還比金邊粉多🙂整體來講呢碟餸性價比不高 但味道不錯！ -
薄切三文魚配泰式辣汁$128
作為前菜佢嘅份量味道都達致高水準‼️NANA覺得好好味呢～超級開胃 三文魚配蒜片再配泰式辣汁 係冇得輸！值得一試💯 -
斑蘭千層蛋糕 $78
Greyhound出名嘅一定係椰子同斑蘭千層糕！！NANA兩個都有試（椰子味在Part 2）比起椰子味 斑蘭味就比較失色啦🤥因為斑蘭味唔濃 就咁食落好似椰子味 只係變咗綠色..真係要好認真咁試清楚先食到斑蘭味 佢嘅千層蛋糕水準一般 千層皮可以更薄 比某千層蛋糕專門店的水準差一點點 但如果餐後真係好想食千層蛋糕就建議可以試其他味道😗