新城市廣場係一個幾pet friendly的商場，其實我真係唔介意間餐廳唔pet friendly，因為明白餐廳都要顧及唔同食客。但唔該唔好扮係friendly其實hostile。 港島人少黎沙田玩，電話訂座時已問準帶狗仔入唔入得，員工當時回答係，「可以安排番坐近走廊位置」，點知誤會大了… 最後竟然係要將車仔連狗仔放出餐廳外、商場範圍，只可鄰近張飯檯？你當嗰件係喼定貨物？ 其實我真係唔介意餐廳唔比狗入，講清楚就得，沙田又唔係冇真正pet friendly餐廳，又唔係非食你不可。你講清楚我自然唔會帶佢黎，你亦唔駛驚比其他食客投訴。員工可能要加強培訓，下次唔好再同客講帶狗仔都入得，因為餐廳咁嘅處理手法其實好差，冇寵主接受到要咁樣置自己毛孩出餐廳外。 被擺開的毛孩焦慮忍唔住吠，要一邊快食一邊安撫佢，唔想佢吠影響其他食客，所以成餐飯食得好唔安樂，食完唔係好記得食左咩，淨係知人均差不多$200但個個都食唔飽。

驅使我寫下人生第一篇食評，係因為尋晚嘅用餐體驗實在美好🥰 但唔知點解得咁少食評，所以分享下感受啦 之前經過呢間餐廳，覺得啲裝修好fancy，所以就揀咗喺呢間餐廳同閨蜜慶祝生日，我喺OpenRice訂位註明係生日飯，唔知係咪因為咁，餐廳安排咗角落頭兩邊落地玻璃嘅木枱俾我，感覺好開揚，就算唔食嘢齋坐喺度傾偈都舒服 我同閨蜜都一致揀咗2月份限定既「西班牙橡果豚肉栗子蓮藕菇菌茶泡飯」，第一次食茶泡飯，要將茶倒落碗倒到7成滿，但我覺得自己應該鍾意就咁食多d🤣所以食剩2啖先倒茶。飯係蕎麥飯，煙煙韌韌粒粒分明，豚肉好淋身，但肉味唔算突出，蓮藕爽甜，但得一片，似裝飾用多d，如果比多一片感覺都已經會好好多。菇有幾種，令菇味更有層次，夾埋蔬菜絲同日式醬汁，成碗飯既味道好夾。食完我同閨密都話可以再encore多碗！唔係因為唔夠飽，份量其實好足，但就一啲都唔油膩，食完對腸胃冇乜負擔。 之前我打俾餐廳話想喺甜品碟上寫happy birthday 最後唔駛特別提佢地都記得👍🏻 做飲食，其實用心做，已經可以令人客好滿足😊