大家都知我好鍾意食芝士蛋糕，之前介紹過好多間都係網店，今次介紹嘅係一間連鎖店，因為佢呢排新推出咗芝士蛋糕。Twinkle Baker Décor係一間出產世界各地嘅烘焙糖飾生產商，喺2011年開業，由2016年開始更加踏入蛋糕零售行業。店舖一開始將獨創茶餐廳口味Cupcake融入西式甜品，好似奶醬多、菠蘿油味cupcakes，變成人氣蛋糕店。之後一直努力破格，創出創意玩味、風格多變既原個蛋糕同件裝蛋糕，好似壽桃、小籠包、富士山等造型既蛋糕。店舖依家係香港有17間分店，分別係銅鑼灣、尖沙咀同旺角等鬧市，而且仲有網上商店，非常方便。 -
1️⃣ 芝你辛苦了．巴斯克奶黃夾心焦香芝士蛋糕 💰220（👅: 8/10）呢個係呢排先推出嘅新蛋糕，係一個巴斯克奶黃夾心焦香芝士蛋糕，而且有抗疫優惠，香港醫護同救護員可以有8折優惠，而大眾就有88 折優惠，折後就係$220。因為想個蛋糕有流心既效果，所以食之前放咗喺室溫大概半個鐘。可以見到蛋糕嘅外層係焦糖化表層，切開入邊可以見到非常流心嘅奶黃吉士醬，芝士蛋糕咬落去都算軟滑，佢唔係好濕個種，係比較乾身，但佢中間有流心嘅地方就比較濕潤，食落去芝士味道都算濃郁，而流心食落奶黃味都算突出，整體我覺得芝士味會比較突出。最後就係蛋糕下便面嘅曲奇酥底，咬落去都算鬆脆，有少少牛油味，不過芝士蛋糕好少配曲奇底，我覺得唔加反而會更好，因為淨係芝士蛋糕已經足夠。
-
🌟整體我覺得係唔錯嘅芝士蛋糕，因為好多分店，而且價錢唔算好貴，大細算適中，隨時都可以食到芝士蛋糕。另外店舖主打嘅蛋糕，造形都好精緻，打卡一流，如果好即興想買生日蛋糕，都係唔錯嘅選擇。
-
👅味道: 8/10
💰消費: $ 220 (服務費: NA)

有睇開我出po，就知我好鍾意食叻沙，叻沙係國民美食，就好似香港既雲吞麵咁。香港嘅叻沙我都食得七七八八，今次介紹嘅係一間隱世小店，其實就係喺小娘惹同一條街。 迷湯肉骨茶專門店係一間係2013年開店既新加坡菜餐廳，已經開業九年，一開始係由一對夫婦經營，呢個店主係六年前頂讓，夫婦將秘方傳授，店主再改良。店鋪瑟縮係隱蔽的巷仔，店舖得店主自己製作，所以店舖淨係主攻肉骨茶、喇沙同怡保雞，每個套餐每日賣90份。 喺馬來西亞嘅店舖，只會獨孤一味賣喇沙或者肉骨茶。但喺香港可能貴租嘅原因，買喇沙嘅舖頭通常都會賣埋肉骨茶。而呢度肉骨茶用上高級食材、配以二十幾種高級藥材同香料精心餚製，材料講究，絕對不含味精。每碗經幾個鐘文火製作，有養顏、補氣補血、提高血液循環既作用。肉骨茶有分星加波既海南派，馬來西亞既福建派同廣東派，店主話佢唔屬於任何一派，只係採集各派精華，去蕪存菁，經多番改進而成今日呢款口味。 店舖夠哂隱世，因為佢唔係大街，而係喺巷同巷之間。餐廳星期六日都休息，平時淨係做午市，只係得星期四會做埋晚市，始終一個人運作，規模比較細，由準備食材、買食材、製作、門面、清潔都係得一個人做。其實店舖喺疫情之後有成年冇開店，係前排好耐先開返，題外話佢係最早一批響應612罷工嘅黃店。 店舖比較細，最多只可以容納8人，環境上有啲侷促，晏晝時間差唔多係坐滿。 餐牌好簡單，第一頁就係兩款嘅肉骨茶套餐，第二頁就係兩款嘅叻沙。 - 1️⃣ 叻沙 💰70（👅: 8/10） 叻沙湯頭呈啡黃色，上面會見到有喇沙葉，同埋見到有唔小紅油，顏色上好靚，睇落好濃，聞落去幾香，飲落去味道係偏淡，椰奶味道偏淡，偏輕盈，蝦香味會出啲，入口算順喉不膩，質地唔係稠身個種。辣味悠長不嗆，辣度唔算好辣，唔食得辣嘅人都應該食到，因為有用椰漿去調教辣度，用椰香味同埋辣度去做一個平衡。整體係帶少小椰奶味既蝦湯底，唔算太鹹。 麵條方面係摻摻，有油麵米粉，油麵咬落幾滑，米粉咬落幾爽，兩者都掛汁唔見腍。 配料好豐富，有螄蚶、虎蝦、豆卜、鷄蛋、芽菜同魚片。 有兩隻大大隻連頭大蝦，大蝦因為去咗殼，方便食，咬落去厚肉結實，食落去豐富蝦味，仲可以啜到蝦頭香濃嘅蝦膏。 配料算正宗，因為有螄蚶，獅蚶係全熟，而唔係半山熟、紅噹噹嗰種，咬落去爽口，食落去算鮮甜無腥味。 至於魚片咬落去算爽口彈牙，豆卜食落去入味有豆香，而雞蛋蛋白入口嫩滑，蛋黃食落夠粉香。 - 2️⃣ 招牌肉骨茶套餐 💰70（👅: 8/10） 套餐分別有排骨、肉骨茶、飯、黑醬油同油條。因為嗰日冇大骨所以就叫左正常既排骨。 肉骨茶茶香色濃，聞到陣陣嘅藥材味，飲落藥材味濃，入口偏苦，有啲太濃，不過肉骨茶香充斥係口腔入面，因為依度冇落味精同鹽，只有多種藥材烹調而成，所以飲完都唔會覺得唔渴。 排骨夠新鮮，咬落肉質鬆軟腍身，入口即化，岩岩好離骨，帶小小肥肉，令到口感更加豐富，又唔會覺得油膩。 油炸鬼比較腍身，如果更脆會更好，黑醬油比較普通少少，飯就冇咩特別。 - 🌟食物方面，我覺得喇沙會比起肉骨茶略勝一籌，不過以同區來比較，我最鍾意當然係已經結業嘅小娘惹，另外蝦麵店同埋馬來亞春色綠野景緻艷雅我覺得個湯都會比呢間濃，如果鍾意食冇咁濃味既，咁啲間都係唔錯嘅選擇。見到店主堅持一人主理，唔諗住開分店，每日親自揀新鮮豬肉，而價錢又非常平民，係值得支持嘅小店。 星馬菜排行榜 (順序) Bibi Baba🥇 Rempah Noodles🥈 小娘惹 (已結業) 🥉 星洲總廚 馬來亞春色綠野景緻耀眼 蝦麵店 迷湯肉骨茶專門店 蘇山雞飯 蘇媽.蘇媽馬來西亞茶餐室 叻沙排行榜 (順序) 小娘惹 (已結業)🥇 Bibi Baba🥈 蝦麵店 🥉 馬來亞春色綠野景緻耀眼 Rempah Noodles
迷湯肉骨茶專門店
星洲總廚
蘇山雞飯
蘇媽.蘇媽馬來西亞茶餐室
拿督星馬大飯店
-
👅味道: 8/10
🍴環境: 7/10
💰消費: $70 (服務費: NA)

要數可以代表香港嘅美食，車仔麵可以話係其中一種，食過咁多間最鍾意都係銅鑼灣登龍街嗰間，今次介紹嘅係女朋友成日食嘅一間，因為佢算喺沙田區車仔麵嘅代表。 上車車仔麵第一間喺石門最多嘢食嘅京瑞廣場既一間車仔麵良心店，係一期地下近出入口位置，係2017年開業，以前出名貼滿晒連儂牆，呢家就變成menu，以前個會免費派口罩，主打平民車仔麵。 店舖入邊唔算大，喺疫情期間請更加少位，大概得八張枱，不過呢度裝修有啲似舊式大排檔，用上大排檔用嘅摺枱同圓摺櫈，裝住點餐紙既器皿都係仿懷舊既筷子筒同紅雙囍鋼嘜，上面既係街市紅罩燈，加上地磚、牆上嘅木牌餐牌，非常懷舊，而個麵吧好似鐵皮屋咁，隔離仲有睡吧。店舖都算乾淨。 呢度最低消費$30，麵底$13，分別有$9、$10、$11、$13嘅餸，有6款湯底同10款麵底，比較特別嘅湯底有胡椒豬肚湯、冬陰功湯，而比較特別嘅餸有牛面珠條、原件花膠、新鮮鵝腸、仿長腳蟹棒、辣鹹酸菜等。 如果有選擇困難症嘅人可以試吓招牌八寶，另外一頁有其他飯類同小食，由$30到$40幾蚊不等。 - 1️⃣ 陳村粉 冬蔭功 腩汁 💰13（👅: 8/10） 蘿蔔 💰9（👅: 8/10） 魚腐 💰10（👅: 8/10） 溏心蛋 💰11（👅: 8/10） 首先講個湯底，湯底係有少少腩汁底，腩汁有少小牛味。而冬蔭功係靠一匙既冬蔭功醬，食落去酸酸地幾開胃，因為加咗香茅粒，香味突出，唔會好辣，食完唔會口渴，不過重口味人士覺得可以再多一匙再濃啲。 而陳村粉有啲似厚切大塊既河粉或者腸粉，咬落幾爽滑，食落掛汁力強，配呢個湯幾夾，而且呢度份量都幾多，不過就比較難夾，因為比較碎。 蘿白得兩舊，不過夠大舊，咬落去幾腍、無渣，食落去清甜唔苦澀，配上呢個濃湯夠入味。 呢度既魚腐幾大舊，咬落去幾腍，入面仲會爆汁，食落有魚味、豆味。 溏心蛋流心程度係岩岩好凝固，食落去有蛋味，同埋有腩汁既入味。 - 2️⃣ 淨餸 腩汁 💰0（👅: 8/10） 豬皮 💰11（👅: 8/10） 牛面豬條 💰13（👅: 8/10） 豬皮咬落去係比較彈牙而唔係腍身個種，食落夠入味。 牛面豬條原來係牛腩，炆得夠腍唔難咬開，唔會好老，有小小筋位所以有咬口，食落幾入味，有牛味帶有小小油脂香。 - 3️⃣ 招牌蝦餅 💰40（👅: 8.5/10） 蝦餅有四大塊，即叫即整，上枱時熱辣辣，咬落去彈牙，夠juicy，會有汁爆出黎，入面有好多蝦肉粒，係真材實料，食落蝦味突出，略嫌比較油。 - 🌟整體我覺得依間車仔麵無論餸、湯底、麵底都唔錯，好食得來又幾特別，如果咁啱喺石門想搵嘢食，呢一間係唔錯嘅選擇，價錢正常唔算特別平或者貴，不過如果唔想啲嘢好快賣晒，建議唔好遲過中午嚟，因為晏晝之後啲餸賣晒得好慘。要挑剔嘅就係呢度冷氣唔算勁，夏天應該會比較熱。 - 👅味道: 8/10 🍴環境: 7/10 💰消費: $40-80 (服務費: NA)

我係個好鍾意食辣嘅人，以前好鍾意食麻辣，而家就好鍾意食酸辣，因為特別開胃，所以係呢一年試咗好多間唔同嘅酸菜魚，今次介紹咗呢間川菜除咗有酸菜魚仲有好多麻辣小食。 川婆婆係一間喺尖沙咀厚福街嘅川菜小店，喺2011年開業，總店只係做外賣。因為老細有次去四川旅行，食咗一間特色麻辣燙小店，覺得當地嘅小食非常好食，所以返到香港就萌生開店嘅諗法，所以就開咗呢間小店，係香港第一間麻辣燙店。開舖嗰時頭三個月都冇咩生意，到四個月來越多人食麻辣燙，要排隊先買到，瞬間變成尖沙咀橫巷既人氣小店。 店主係依10幾年選材不嬲都嚴格，口味從一而終，迎合香港人口味，所以配料上以清淡為主，不過不失香味。客人越來越多，不過就抱怨老細幾時開一間大鋪，因為冇冷氣咁食麻辣燙始終都有啲辛苦，所以最後2014年喺附近開多咗一間可以坐40個位嘅大鋪，嘢食都唔再局限麻辣燙同小食，仲有最正宗既九宮格重慶火鍋，湯底有好多款，好似有養生湯鍋底、麻辣鍋底、魚湯鍋底等。之後仲打破傳統火鍋店概念，推出磯燒燒烤，2019年係旺角開設超過四千六百呎既麻辣火鍋店，以粉紅藍為主調色，雖然之後結業左。 銅鑼灣分店係2020年疫市擴充，一樣有堂食座位，主打各式川菜料理，好似地道麻辣燙、水煮魚、手撕雞等等。招牌麻辣燙$42有三款餸，湯底每日新鮮熬製，用上22款香料秘製而成，仲可以揀紅薯寬粉、重慶火鍋粉等。另外酸菜魚、水煮牛肉用料十足，有芽菜、海帶、娃娃菜、蓮藕，送飯一流。除左麻辣湯底，仲有藥膳雞湯揀。 尖沙咀火鍋店主打招牌麻辣鍋，湯頭用上50斤牛骨、四川漢源大紅袍紅花椒同十幾種四川直送既香料熬製，順喉既辣，唔會搶走肉既原味。傳統重慶麻辣鍋會加入牛油，不過老細想減少油膩感，特意用啤酒取替牛油，令湯頭帶有鮮味，仲有湖南豆干及鴨血，特別入味。除左酸菜魚係店鋪招牌，獨創川菜小食仲有冷盤香辣粒粒花甲，靈感係黎自四川傳統缽缽雞，老細話係參考四川冷鍋串串，好岩夏天食用。 銅鑼灣店鋪唔算好大，不過差唔多一眼睇哂，唔會店員見唔到，坐落都算舒服。 呢度係QR CODE落單，可以睇到有唔同系列，有水煮、番茄、上湯、酸菜系列，仲有小食、粉麵餐、飲品，飲品都係川婆婆自家出品既冷泡茶，有桂花綠茶、荔枝伯爵紅茶、金鳳烏龍茶、玫瑰紅茶等。 - 1️⃣ 酸菜魚 💰73（👅: 8/10） 酸菜魚套餐可以跟飯，亦都可以少飯、走飯，辣度有BB辣、小辣中辣、大辣同埋菊花辣，我就揀咗中辣。上枱嗰時俾個酸菜魚嚇親，因為佢所有配料嘅份量都非常之多，可以睇到除咗有酸菜同魚之外，仲有大量辣椒、芽菜、娃娃菜、海帶、蓮藕片、蔥花，非常豐富，份量根本唔似一人份量。 呢碗酸菜魚係用三種酸菜做底，加上鮮雞、海南黃燈籠椒、小米辣椒、南瓜蓉等熬製，同埋四川老壇泡椒酸菜同檸檬汁，飲落去湯底充滿酸菜嘅味道，中辣食落唔算好辣，有小小辣同麻，幾開胃，不過我覺得酸味可以再重啲，食落去唔會太重口味太油膩，送飯一流。酸菜咬落去都算爽脆。 魚嘅份量都幾多，係用上生魚，夠新鮮，魚嘅口感唔算好滑都唔算好鞋，咬落去得一兩舊有骨，不過如果可以全部都冇骨會更好，食落冇腥味，都算少少入味。 其他嘅配料份量都好多，完全食唔晒，娃娃菜索晒啲湯，所以非常入味，海帶係偏粗身，味道都算突出，芽菜咬落爽口。 - 2️⃣ 飄香水煮魚 💰73（👅: 7.5/10） 水煮魚一樣同酸菜魚都可以揀飯嘅份量，辣度都係揀咗中辣。 水煮魚個湯都可以直接飲，雖然上面都係有好多乾辣椒，中辣都唔算好辣，都係小小辣同麻，唔算話太過重口味，我個人鍾意酸菜魚果湯多啲，始終有酸味開胃啲。 水煮嘅話咪突出魚嘅味道，份量同酸菜魚都係咁多，不過呢碗比酸菜魚感覺上油一啲。 - 3️⃣ 麻辣鴨血 💰32（👅: 7.5/10） 呢度既鴨血會連埋麻辣燙既湯，咬落去口感偏扎實，唔係勁腍勁滑嗰一種，辣味主要係來自佢麻辣燙嘅湯同埋上面嘅辣粉，不過食落去算係咁多款小食最唔辣既一款，而且鴨血唔夠入味。 - 4️⃣⃣ 麻辣凍豆腐 💰28（👅: 8/10） 凍豆腐同鴨血一樣，連埋麻辣燙既湯加上面嘅辣粉，豆腐係百葉嗰種，所以索湯能力絕對比鴨血高，食落去都有小小麻同辣。 - 5️⃣⃣ 麻辣魚蛋 💰12/6 （👅: 8.5/10） 麻辣魚蛋上面有好多麻椒粉，辣味主要係來自辣椒粉，因為佢冇湯，不過本身魚蛋有用個麻辣湯煮，可以見到魚蛋有啲深色有啲淺色，咬落去魚蛋係偏腍身，唔係好爽口好彈牙嗰種，不過唔會好粉，深色嗰啲特別腍，食落去夠麻，帶少少辣味，而深色嘅會特別入味。我試過尖沙咀同旺角分店，尖沙咀先會有深色魚蛋，係特別好食，係咁多款小食最辣嘅一款。 - 6️⃣ 麻辣牛柏葉💰18（👅: 8/10） 牛柏葉都係會有麻辣燙既湯加辣粉，麻辣燙嘅湯辣味唔算好重，主要都係靠辣粉，牛柏葉咬落算正常爽口，唔會太韌，食落去會比鴨血更加入味，不過有人話鴨血個湯重味啲，可以試吓將牛柏葉浸落去。 - 🍵 荔枝伯爵紅茶💰15（👅: 8/10） 飲落去幾清新，因為無落糖，所以無罪惡感，而且解辣一流。 - 🌟整體來講呢度嘅性價比好高，因為坊間好少一人份量嘅酸菜魚，絕對啱晒想過吓口癮食辣嘅朋友，而且佢嘅酸菜魚以一人份量來講係非常足料，唔係大食嘅人根本食唔晒。 小食方面好多都係以麻辣燙嘅湯加辣粉，所以味道都係偏向辣而唔係麻，如果係想追求有層次嘅辣度，咁呢度嘅小食可能唔啱你，但麻辣魚蛋都係我呢度最鍾意嘅小食，因為佢特別入味。 老細每日收工都會認真睇食評留言，根據客人要求同季節變化，變換一啲時令配菜。因為疫情關係，川婆婆都有推出特價嘅外賣餐，OPENRICE訂位都有折，係值得支持既小店，真係一個人都可以盡興。 - 👅味道: 8/10 🍴環境: 7/10 💰消費: $50-150pp (服務費: NA)

今次我介紹嘅係我之前識嘅聖誕大餐，依家介紹絕對唔會遲，因為呢一間餐廳水準穩定，會想食呢一間餐廳嘅Brunch，係因為女朋友一直都想食，而且佢個Brunch有90分鐘嘅free flow，非常吸引，再加上呢間酒店嘅名氣，令我非常期待。 SOMM 係一間休閒餐廳同埋酒吧，係香港置地文華東方酒店一間法國小酒館，前身係米芝蓮二星餐廳Amber既酒廊，上年酒店進行大裝修，將七樓改頭換面之後，改革Amber，就將酒廊區變成SOMM，定位為新派法式小酒館。SOMM意思係sommelier，即係同酒有關，所以餐廳最出名嘅係佢既酒，以休閒餐飲為概念，擁有香港最豐富嘅酒藏，供應超過 1,600 種香檳、葡萄酒同清酒，冠絕全港，並設有採用時令食材、風格簡明既餐單。佢個Brunch絕對係啱晒飲酒嘅朋友，除左包括頭盤、主菜同甜品，客人仲可以喺90 分鐘內任飲氣泡酒、葡萄酒型雞尾酒同汽水。SOMM 既Brunch仲提供升級選項，令到客人可以享用由侍酒師精選來自頂尖葡萄酒商既歐洲經典葡萄酒、風味鮮明大膽既新世界葡萄酒、各式香檳、清酒、紅酒白酒同只可以喺日本搵到既多款罕見精緻清酒。 餐廳嘅菜式都會根據季節而改變，用上最新鮮嘅食材，令到客人有一流嘅餐飲體驗。餐廳主要以日本食材結合歐洲既烹調技術，呈現出革新法式佳餚。食物方面以前由米芝蓮二星餐廳 Amber 副主廚Chef Mario Paecke 主理 (現為MARGO主廚)，呢家係由前米芝蓮二星餐廳Amber初級副主廚Terry Ho主理，堆出全新嘅brunch menu季節性餐單，絕對感受到佢嘅幹勁、熱誠同想法，質素絕對有保證。 餐廳位置係置地文華東方酒店七樓，一出lift門就見到餐廳，佢係同Amber、志魂壽司同一層。 餐廳裝修以高雅既酒紅色為主調，配合雕塑、木製傢俬同天花板，而酒吧位置設計靈感源自葡萄酒酒桶形態，中間設置一張半月型吧枱，兩邊就有正規嘅餐桌，再配搭豪華既葡萄酒色調梳化椅、訂制餐桌同展示左餐廳酒藏既特色牆壁，燈光偏暗，不過枱與枱之間距離充足，營造悠閒舒適、統一既氛圍。 - 🥂 SOMMkind of Special Brunch 💰818 呢一個Somm Brunch有三個唔同嘅package同價錢，分別係SOMMkind of Brunch $718、SOMMkind of Special Brunch $818、SOMMkind of Royale Brunch $1118，都係90分鐘free flow，只係包含嘅酒類唔同，我自己就覺得中間既$818已經足夠，因為有包Champagne、Bordeaux Red & White Wine、Sake、Seasonal Wine Based Cocktails、Fresh Juice同Coffee/Tea，$718無Champagne、Red & White Wine，而$1118就多左 NV Philipponnat Royale Champagne。 - 🥂 Champagne - NV Bruno and Christiane Oliver, Blanc de Noirs, France（👅: 9/10） 呢個香檳最記憶猶新，汽泡綿密，入口清爽，飲落去花香、榛子果香突出，同時間感到蘋果、梨嘅香味同小小酸味，口腔潔淨俐落，非常可口。 - 🥂 White - 2019 Château La Rose Bellevue, Blaye Blanc - Côtes de Bordeaux, France（👅: 8.5/10） 白酒比起平時嗰啲易入口，會聞到熱情果、杏、蜜瓜嘅香味，之後就可以感受到花香味，酸度適中。 - 🥂 Red - 2015 Château Cantemerle Les Allées de Cantemerle. Bordeaux France （👅: 8.5/10） 紅酒都係比起平時嗰啲易入口，入口柔順，夠飽滿，可以飲到新鮮嘅黑醋栗果香同奶油味。 - 🥂 NV Marquise de Leroy-Beauval. Cremant de Bordeaux（👅: 8.5/10） 傳統嘅sparkling wine，入口順滑，夠清新，酸度比較高，簡單不過足夠。 - 🥂 蜜柑汁（👅: 8.5/10） 本身以為果汁會包埋當造嘅日本蜜柑汁，不過原來無，但餐廳都free左一杯比我，飲落去非常鮮甜。 - 🥂 咖啡/茶（👅: 8/10） - 1️⃣ Appetizers（👅: 8.5/10） 三個Brunch都會包括6款前菜，前菜會不時轉，今次我嘅前菜有多款麵包、生蠔、蟹肉、牛肉他他、火腿。 另外佢仲可以加錢加招牌嘅Uni French Toast，不過網上評價好似一般，而且呢一樣嘢食感覺自己都可以整到出嚟，所以就冇叫到 - 🥐 Sourdough Bread、Seaweed & Sea Salt Lavoche & Panettone（👅: 8.5/10） 🧈 Bordier Unsalted Butter 、Seasonal Christine Ferber Jam、Nicoise Olive Tapenade（👅: 8.5/10） 呢度嘅前菜都會以sharing platter形式呈上，somm其中一樣出名嘅就係佢嘅麵包，平時嘅話會有招牌嘅Croissant、double chocolate layered brioche，有時仲會有Taggiasca Olive Feuillete 橄欖酥同Cinnamon Roll 肉桂卷。 不過今次呢可能適逢聖誕，或者咁啱轉左Menu，今期既麵包係Sourdough Bread、Seaweed & Sea Salt Lavoche & Panettone，可惜食唔到招牌牛角包、朱古力牛油麵包。 Sourdough Bread差唔多係每一期都有，咬落去外層煙韌有嚼勁，入邊軟熟帶有小小彈性，偏濕潤，食落去酸酸的，加上波地亞無鹽牛油有稍為中和佢嘅酸味，不過牛油唔算好鹹。當日嘅醬汁係紅苺同埋柚子，個人覺得最適合sourdough嘅係柚子醬。 Lavoche係一種薄片麵包，主要係用小麥麵粉製成，薄到好似薯片，咬落去口感都好似薯片，夠脆，食落去係紫菜海鹽味，比較適合配上Tapenade，係一種用olives、capers 同 anchovies 做成既醬，食落去鹹香味突出。 Panettone係三款入面我最鍾意嘅麵包，食落去甜甜地，而且佢入邊有提子粒，除咗令口感更加豐富，佢嘅甜味再度加強，但唔會覺得太甜。 麵包食唔晒係可以打包走，就算第二日翻熱都一樣咁好食。 麵包既Bordier Unsalted Butter 、Seasonal Christine Ferber Jam、Nicoise Olive Tapenade，聽講都係可以refill，不過麵包就唔可以。 - 🥐 Freshly chucked Christophe Gaboriau ‘‘ Spéciale De Claire” Oyster（👅: 8/10） 平時嘅前菜除咗麵包之後會有煙燻三文魚、兩款ham同兩款法國既軟同硬芝士，今次變左首先係生蠔，生蠔夠肥美，入口嫩滑爽口，食落鮮甜，會有海水味。 - 🦀 Kamchatka King Crab, Cucumber & Horseradish Salad & Iceberg Shells（👅: 8/10） 係一個一口大細既蟹肉青瓜沙律，入邊嘅皇帝蟹蟹肉份量慷慨，食落去啖啖肉夠鮮甜。 - 🥑 Polmard Heritage Beef Tartare, Fermented Jalapeño, Avocado, Lime & Sweet Potato Chips（👅: 8.5/10） 係一個牛肉他他上面加上牛油果，牛肉他他入口非常軟腍，完全唔韌，食落去牛味香濃，調味恰到好處，配上牛油果係清新嘅配搭，仲會有炸蕃薯片，令到口感更加豐富。 - 🥓 100% Belotta Pata Negra Shoulder Ham（👅: 8/10） 可能係肩膀，食落油份比較小，肉較少一啲，不過肉質纖維豐富，帶少少嚼勁 ，鹹香十足。 - 2️⃣ Japanese Pork Jelly. BBQ Sauce & Hakata Cabbage（👅: 9/10） 呢一個日式豬腩肉係餐廳嘅招牌菜之一，豬腩肉用上沖繩豬腩肉，係半肥半瘦，肥瘦適中，可以睇到一層肥肉一層瘦肉，層次分明，外表夠光澤，夠厚身，有少少煙燻香味，經過醃製再煎香，咬落去外層既皮夠脆，肉質非常軟腍嫩滑，差唔多係入口即化，唔會話overcooked，食落去夠入味，上面有少少五味粉，所以非常惹味，外層脂肪唔會有多餘嘅油脂，有油脂既甘香，但食落去唔會覺得油膩。 隔離嘅係燒烤醬，食落去係甜甜地，有啲似日式味增醬，不過因為豬腩肉本身都夠入味，所以我覺得唔使點太多，或者唔點都得，點左就可以一解小小膩感。 隔離嘅烤椰菜一啲都唔輸蝕，用上博多嘅椰菜，咬落去非常軟嫩，而且好juicy，味道唔會太重，夠清甜，不過佢嘅外層焦香味非常突出，加上五味粉令到味道更加豐富，如果覺得豬腩肉好滯嘅話，食一啖就可以抵消到。 另外佢仲有一個沙律，呢個味道就偏鹹啲，而且比較油膩。 - 3️⃣ Dry Aged Challans Duck Breast. Butternut Squash. Pumpkin Seed Praline & Duck Jus （👅: 8.5/10） 本身想叫呢度既吉列玉子三文治，不過佢轉左早餐先提供，於是就叫咗另一個招牌菜鴨胸。 用上法國 Challans 櫻桃鴨胸，經過一星期嘅乾式熟成，外觀上已經同平時見到嘅鴨胸好唔同，份量夠多，同平時大家見到茶餐廳嘅平價鴨胸唔同，切落去可以見到顏色粉嫩到好似牛肉咁，咬落去外皮有少少脆身，肉質夠結實彈牙，但一啲都唔會覺得韌，算係我食過最腍嘅鴨胸，而且入邊有肉汁，食落去肉味香濃，好似食緊燒肉咁。而鴨皮上面搽上甜甜嘅sudachi syrup，加上胡蘆瓜、花椒、南瓜子，食落去係鹹鮮味帶少少花椒既麻，好似麻醬，係個新奇既調味配搭。呢個鴨胸比起豬腩肉食落輕盈一啲，可能佢唔似豬腩肉有一半脂肪。 隔離嘅butternut squash入口綿密，食落去香甜，如果食鴨胸覺得滯嘅話，食呢個一樣可以中和到。 - 4️⃣ Abinao Chocolate Souffle （👅: 9/10） 呢個絕對係呢一間餐廳嘅招牌甜品，亦都係傳說中最好食嘅梳乎厘，呢個原本係舊Amber既熱門甜品，不過Amber 2.0提倡不含麩質同純素料理，所以呢款甜點就去咗SOMM，而且可以以平啲嘅價錢食到。梳乎厘源用Amber既原本製法，用85度Valrhona黑朱古力製作。 梳乎厘夠熱辣辣，絕對要趁熱食，上面係一塊杏仁朱古力片，同入面嘅梳乎厘口感形成對比，入口非常軟綿蓬鬆，極輕身輕盈，入口即溶，有足夠空氣感，口感拿捏得啱啱好，食落去入面流心有朱古力醬，朱古力味道濃郁醇厚帶甘甜，因為用上Abinao 85% Chocolate，朱古力唔會過甜，都唔會死甜，亦都唔會話有好重苦澀味，係絕對可以接受嘅苦澀味，係我食過最好食嘅梳乎厘，如果鍾意朱古力嘅人絕對要試。 隔離仲會有一個朱古力雪葩，入口感受到冰嘅密度，唔會太易溶，同樣朱古力味道都濃郁，有小小甘甜，食落去係清新而唔係覺得好漏，入邊仲有啲朱古力脆脆，令到口感層次提升，一啖疏乎厘一啖雪葩，一冷一熱，冰火交融，一消主菜既膩，絕對係完美嘅完結。 - 5️⃣ Banana Pancake （👅: 8.5/10） 香蕉班戟算係厚身，咬落去口感比較實在小小，似美式班戟而唔係空氣感個種日式班戟，入邊係比較濕潤，食落去蛋香味突出，再加上沖繩黑糖漿同埋焦糖香蕉，味道酸酸甜甜好開胃，胡桃令到胡桃嘅口感更加豐富，整體味道唔算好甜。 - 🌟食物來講，我覺得嘢食嘅驚喜程度係遞進，或者可能係因為我好少食酒店嘅餐廳或者fine Dining，前菜嘅份量絕對令人滿意，甚至如果唔係太食嘅人，食晒啲麵包已經飽咗一半，麵包當中我最鍾意嘅係Panettone，質素絕對係above average，我甚至有問店員有冇得refill不過可惜冇，同埋比較可惜嘅係食唔到去招牌嘅牛角包同埋朱古力。 之後有驚喜嘅算係牛肉他他，算係我食過最好食，其他前菜就唔算大驚喜。之後嘅驚喜係來自主菜，可能因為兩個都係招牌菜，平時我唔係幾食豬腩肉，不過呢個豬腩肉入味得來食完唔覺得肥膩，而鴨胸同平時食到嘅口感完全唔同，第一次體驗到呢一種鴨胸。 甜品當然係最滿意嘅一部份，佢嘅招牌souffle質感做到完美，朱古力味道又濃郁，呢一種要求高技術嘅甜品，確實喺第二度食唔到比佢更好。 雖然佢算係日式法式fusion，但佢唔會投入過多嘅創意，唔會接受唔到，始終文華都係主打比較傳統嘅菜式。不過令我最滿意嘅係佢個free flow package，我唔係成日喺餐廳度飲酒，不過呢一間嗰啲全部都好易入口，果香味比較重，以最平嗰個package為基礎，加多$100就可以試多幾款就好值得。 至於店員服務非常殷勤，會好主動介紹唔同嘅菜式同埋唔同酒嘅分別。餐廳唔算好大，不過枱同枱嘅距離充足，唔會話聽到隔離枱講嘢，坐得都幾舒服。不過如果你好着重餐廳嘅佈置同埋景色，咁呢一間可能唔適合你，因為佢係密封冇景色可言。不過用餐體驗滿意，因為我由一點幾食到四點幾都冇俾人趕走，雖然得90分鐘free flow，但用餐時間唔止90分鐘。 至於價錢方面連加一差唔多800人均，我覺得好睇攞邊間餐廳同佢比較，當然你可以話比多一兩百可以食到隔離米芝蓮二星法國菜Amber既lunch，好睇你想食法國菜定係日法fusion，另外佢都有早餐，如果你唔想比咁多錢，純粹想試吓水準可以試吓早餐，不過早餐就冇佢招牌souffle甜品，但我覺得兩間餐廳都係值得一試。 比起一般主打創意菜式嘅餐廳，SOMM絕對係腳踏實地既表表者，將簡單嘅菜式做好。好多人會攞佢同Amber比較，因為Amber經過改革，而且SOMM有唔少菜式都係受舊既Amber啟發同影響。改革後既Amber追求健康同可持續發展既烹飪理念，非常具前瞻性，不過客人食評反饋不一，不過相對SOMM就比較易令人接受。整體我諗我會再嚟呢一間餐廳，為咗佢嘅吉利蛋三文治同埋souffle。 - 👅味道: 8.5/10 🍴環境: 8/10 💰消費: $718-1118pp (服務費: 10%)

壽喜燒喺香港唔算係好主流既日本料理，香港可以食到壽喜燒嘅餐廳唔算多，如果大家鍾意食壽喜燒嘅話，應該一兩隻手數到香港出名或者好食嘅壽喜燒，今次介紹嘅呢一間，大部份人都覺得佢好食，不過個個都一定認同，佢一定係最難book既壽喜燒。 すき焼 森喺2017年係中環嘅荷李活道開業，餐廳主打關西風既壽喜燒，之後陸續喺卑利街同歌賦街開分店，喺中環總共有三間分店，因為老細兼總廚Mori san係一個日本師傅，姓Mori，所以餐廳就叫すき焼 森。Mori san喺日本已經從事日本料理多達二十幾年，今次係專程來港主理呢間すき焼 森日本料理。 餐廳出名除咗好食之外，仲係非常之難book位，即使有三間分店，都係長期Full Booking。 すき焼 森主要提供日本關西壽喜燒(Sukiyaki)、涮涮鍋(Shabu Shabu)同限定Omakase套餐，用上最優質既和牛同日本直送食材，呢度嘅師傅都係經過日本資深師傅訓練，還原最原汁原味既關西風壽喜燒。每枱客人都會有一位師傅負責席前烹調、介紹每一道菜食材同產地，絕對係周全嘅料理體驗。 咁大家究竟知唔知壽喜燒係咩？壽喜燒其實係起源喺日本江戶時代既關西地區，因為宗教影響，只有天皇先可以食肉，一般平民係冇辦法品嚐，所以農民會偷偷地殺畜，用農具去加熱生肉，すき指既就係鋤具。 之後受到西方思潮影響，變到人人都可以食肉，壽喜燒就開始普及，仲會搭配蔥、味噌、醬油、砂糖一齊煮，去除牛肉既腥味，仲會加蛋汁令到牛肉更加滑嫩。咁樣睇壽喜燒係來自關西，不過時至今日，壽喜燒其實已經有關西風同關東風，咁究竟兩個有咩分別。 關東風係類似打邊爐既做法，首先將醬汁味道調好，再將啲肉倒落去醬汁度煮，以鍋物式上台，不過又無shabushabu咁多湯。而關西就類似燒肉嘅做法，係汁煮、半烤半煮既做法，首先將塊肉係一個淺啲既鐵鍋煎香，再調味，醬汁唔會咁多，有啲餐廳仲會落糖，每一片牛肉獨立咁煎煮，所以肉味會比較集中，唔會去晒湯底入面。前者對烹調既次序同細節無咁講究，後者就好考驗師傅嘅技術。好似我上面講嘅壽喜燒歷史，正宗嘅其實應該係關西風壽喜燒。 因為關西風呢一種做法味道比較濃郁，有啲人會覺得太過重味，覺得太膩，所以餐廳用嘅滋賀縣既A4級別近江牛，而唔係用最肥嘅A5和牛，相比起尖沙咀用A5和牛既壽喜燒名店日山。不過近江牛其實同松板牛、神戶牛稱為三大和牛，係300幾個品牌牛肉之中脫穎而出，而且係有最耐歷史嘅牛肉品牌，甚至係和牛比賽羅過獎，一隻近江牛身價可以去到一千萬日圓。 餐廳會決定用A4級別近江牛，除咗係因為唔想太過油膩，Mori san話之前試過用日本唔同產地嘅牛做食材，不過整體都唔夠而家用嘅近江牛好。餐廳都堅持所有肉類，無論係牛定係豬，都唔用機器切割，全部都係人手一塊一塊咁切，因為係手切先可以保持和牛同豚肉既肌肉紋理，唔會破壞肉質入面既脂肪，令和牛同豚肉更加好食。Mori san表示餐廳嘅和牛同豚肉每一片都係鮮紅色，係燈光照耀下閃閃生輝，令人食慾大開，反而如果用機器切既話，色澤就會變得暗淡無光，賣相大打折扣。 之後就到最重要嘅book位，食呢間餐廳係唔可以Walk in，一定要book位，Booking喺每一個月嘅1號開放，你可以嘗試打電話，不過我自己試過打幾十次都冇人聽，網上有人話甚至打過過百次先有人聽，所以最穩陣嘅方法就係每個月嘅1號係佢開門嗰時排隊book位，會開放下個月嘅Booking。我係1月1號個時去book位，餐廳係12點開門，12點去到嗰時已經差唔多有20幾人排緊隊，排左九個字終於入到餐廳，有啲似interview，佢哋會有二月嘅form mark低你想book幾多號嘅咩時間，如果係食壽喜燒要講定，如果大家想食多啲種類嘅牛，建議book夜晚。原本我係book咗夜晚，不過因為疫情關係，政府禁晚市堂食，原本我以為冇得食，不過餐廳主動打電話俾我，話可以幫我轉做晏晝時間或者下個月，最後我就轉咗做同日嘅12:30食。 餐廳喺中環嘅蘇豪區，如果搭扶手電梯可以去到大館門口之後向上環方向行，餐廳其實喺PMQ隔離條街，可以見到對面有間dough bro。餐廳嘅門面唔算突出，冇好誇張嘅門牌，係黑沉色嘅門面，可以影得出餐廳嘅係靠地下一個楓木座地燈箱寫住すき焼森，同埋門口掛咗牌寫住すき焼森既布。餐廳有一道面積唔大既玻璃牆，可以睇到入邊室內嘅環境。 餐廳嘅環境裝修比較平實，以木做主調，裝修比較低調，配上淺黃色燈光，整體環境整潔，牆上有唔少日本瓷器工藝品作為裝飾，有幅實木手繪屏風，加上天花既圓球型同紙吊燈，似一間壽司店嘅格局。枱同枱之間距離適中，唔算太密，有分開散枱同埋吧枱位，位置唔算多，得大約24個位，有三張四人枱、兩張兩人卡位同埋八個吧枱位。因為餐廳係席前料理，所以坐兩邊都一樣，下面嘅枱坐落就會比較舒服啲，坐吧枱位就有食omakase既感覺。 呢個時間去到唔係座無虛席，心諗呢一間唔係Full Booking？咁係因為每個師傅會負責每一枱嘅席前料理，所以同一個時段我諗得三、四台左右。 每張餐枱其實搵唔到壽喜燒同涮涮鍋用既火爐，原來佢係嵌左入張枱入邊，有木板蓋住。 Menu非常簡單，晏晝會有Sukiyaki Set ($580) 同Lunch Set，Lunch Set分別有四個餐($180-290)。而夜晚除咗有Sukiyaki Set($680)、Shabu Shabu Set($680)，仲有一個Omakase Set($1480)。唔同分店個價錢會唔同。另外門面仲有一個外賣自取一人套餐，$480包括150g和牛、日本野菜、御飯或烏冬、漬物同赤面豉湯，一樣可以揀Sukiyaki Set同Shabu Shabu Set。 - 🥩 Sukiyaki Set 💰680 (Dinner Courses) 呢度既Sukiyaki首先有得揀牛或者豬，晏晝價錢係580，夜晚係680，分別就係食既部位有啲唔同，晏晝都係四片肉，一樣係A4近江牛，不過係兩片西冷、兩片牛肩，所以晏晝係食唔到肉眼同兩款唔同嘅牛肩、同埋晚市嘅前菜會比較豐富。另外聽講因為客人主要係食牛，豚肉存貨唔多，所以如果想食要喺訂位個市問吓存貨。題外話，係開店個時，晚市套餐價錢已經係680，即係四年間都冇加過價。另外夜晚佢仲有一個Omakase Set要1480，其實係dinner set再加上其他好似長崎縣生蠔、北海道海膽、牛肉刺身、備長炭燒鹿兒島A5和牛柳、昆布蒸赤睦魚等，會按季節而變。 夜晚Sukiyaki套餐包括前菜、茶碗蒸、四個唔同部位既肉、蔬菜、蛋牛飯同埋甜品，可以另外加$100多一份牛舌。 - 🥦 前菜 （👅: 8/10） 首先前菜係蠶豆、千葉縣菜之花同炸海老芋，呢度嘅前菜會按季節更換，抹擺盤同份量都精緻。 蠶豆、千葉縣菜之花都係冷盤，而炸海老芋係熱，菜比較清新，當中最出色嘅係炸海老芋，炸到外層夠薄，咬落脆身，入面軟糯，食落係芋頭嘅甜味，甜味夠天然。 - 🥚 蒸物 （👅: 8/10） 茶碗蒸都會按季節更換，之前係櫻花蝦蒸蛋，今次嘅茶碗蒸上面係松葉蟹肉、海藻同薑蓉，師傅提醒要撈勻嚟食。 蛋入口係嫩滑水滑，不過食到既唔係好重蛋味，而係食到蟹肉加海藻嘅鹹鮮味，鮮味十足，不過鹹鮮味會搶過蛋味，味道偏重，係同平時食到嘅茶碗蒸有啲唔同，如果想食到蛋味就唔好同上面嘅配料一齊食。 - 🥩Sukiyaki 呢度每一枱都配左一位師傅負責席前料理，而餐廳用既壽喜燒係來自岩手出產既南部鑄鐵，保溫之餘又唔會痴底。 食嘅次序係肉眼、西冷、兩款唔同嘅牛肩、牛舌，由肉味淡啲到肉味濃啲油脂感多到油脂感小。 師傅首先用蔥同埋牛嘅油脂爆香個鐵鍋，之後首先落一層糖，之後先放牛肉，呢個唔係一般嘅做法，師傅話唔係想令到啲牛肉甜啲，特登用日本比較低甜度嘅糖，係為咗想令到牛肉有一層焦糖化嘅效果，令到牛肉食落有焦香味。 師傅建議食咗原味先，之後再點蛋漿，食落會更加滑，不過呢個蛋如果想追加要加錢。 - 1️⃣ A4 近江牛 肉眼 （👅: 9/10） 第一塊首先係夜晚套餐先有嘅肉眼，係咁多個部位最肥嘅一塊，咬落去係咁多塊最嫩滑嘅一塊，肉質完全無粗糙鞋口既感覺，食落去係油脂非常重，肉味比較淡啲，同時食到醬汁嘅味道，因為醬汁鹹既味道比較重，有少少蓋過牛本身嘅味道，因為加左糖，除咗有少少焦糖嘅效果，仲令到牛肉多少少甜味。如果你鍾意食啲油脂重啲嘅牛，或者係入口勁滑嘅口感，呢一塊絕對係你嘅最愛。 如果覺得肉味太過澎湃，可以落蛋汁，口感會比較綿滑柔嫩啲，好似海綿嘅感覺，喺口腔入邊慢慢溶化，蛋香味出，不過牛味同埋醬汁嘅味道會比蛋汁中和咗啲，不過成塊牛肉就好似入口即融咁，好似食緊A5級數既牛咁滑。 如果唔想落蛋汁，仲可以用飯去送牛肉，將肉香、脂香、鹹香加落白飯，係完美嘅配搭。呢度嘅白飯都係可以任添，不過其實食完牛之後仲會有一個蛋牛飯，所以唔係特別大食嘅話，唔使加飯都夠飽，建議大家留肚。 - 2️⃣ A4 近江牛 西冷 （👅: 8.5/10） 西冷嘅大細帶過一隻手掌，兩塊加埋蔬菜啱啱好擺得入個鍋入邊。 西冷相對肉眼來講無咁多脂肪，咬落去係比較實淨一啲、乾身啲，但佢始終油花係非常之靚，夠多脂肪，所以入口都係非常之軟嫩無筋，食落去係油脂感比較少，不過同時間可以感受到牛肉味，肉味比較香濃，而且比較同醬汁夾啲，肉味出啲。 - 3️⃣ A4 近江牛 牛肩胛 （👅: 8.5/10） 4️⃣ A4 近江牛 上牛肩胛 （👅: 8.5/10） 煮牛肩嗰時可以睇到師傅每次落嘅糖同埋醬汁都係越來越少，因為本身個鍋已經有味道。牛肩比較上冇前面兩塊咁多脂肪，因為佢係屬於運動量比較多嘅部位，燒完明顯睇到係瘦啲同埋比較細塊。 咬落去唔似肉眼、西冷咁腍滑，牛肩因為有小小根，所以更加有咬口，不過筋本身都係好軟熟，帶彈性，比較乾身。食落去牛味重，比起西冷更加重，第一塊牛肩相對比較瘦一啲，第二塊比較肥一啲、嫩口一啲，兩塊幾乎都冇咩油脂香味。另外肉上面仲會有一條三葉，可以清一清口腔嘅油膩感。 - 5️⃣ 牛舌 +💰100（👅: 8.5/10） 日本牛舌係好難出口，就算出口買到，價錢可能都要5位數價錢，所以呢啲都係澳洲嘅和牛牛舌，一份牛舌有4片，所以兩個人加埋係8片，師傅會問你需唔需要加葱，我就加咗少少令到味道冇咁單一。 有兩片大塊啲係靠近中間嘅部位，咬落去比較嫩滑有嚼頭，另外兩片細塊啲就係牛舌近芯嘅位，落去比較爽口啲，兩塊都係比較薄身，牛味食落都偏重。不過牛舌對比起前面嗰幾塊肉冇咁多驚喜，可以選擇唔加。 - 🥗 野菜 （👅: 8.5/10） 食完牛之後就係野菜盛合，呢度嘅煮法係牛同蔬菜梅花間竹，所以唔會一口氣食太多牛而覺得好膩，野菜部分有大白菜、皇帝菜、三葉、冬菇、蒟蒻麵、蒟蒻條、麵筋、日本淡路洋蔥、豆腐同大蔥，所有蔬菜都係由日本空運過嚟。 係食完第一塊肉眼之後就會落蔬菜，首先係大白菜、豆腐、冬菇、麵筋，因為煮完牛之後，個鍋入邊仲有牛嘅油脂同埋醬汁，同埋已經焦糖化咗嘅糖，所以蔬菜食落非常香口，但係又唔會覺得太鹹太重味，帶有小小甜味同和牛既脂香。豆腐咬落有彈性，唔似食緊豆腐，麵筋係京都麵筋，口感有小小似魚腐，食落非常入味。冬菇咬落軟稔煙韌，菇味係壽喜燒汁加持下一樣濃郁，豆腐係傳統日本豆腐，咬落紥實，食落豆味香濃，加上壽喜燒汁令豆香同味道有所提升。 西冷會同春菊、蒟蒻條一齊煮，春菊姐係日本既皇帝菜，味道偏重，食落似唐萵，蒟蒻咬落鬆軟爽彈，一樣盡吸壽喜燒汁，非常入味。 洋蔥其實係煮西冷嗰時已經擺落去煮，煮佢嘅時間係最長，煮到佢透身同底面煎香之後就上菜。 呢度嘅洋蔥係用淡路島出品，淡路島一直都係最出名洋蔥，甚至有人話嗰度嘅洋蔥係全日本最甜。師傅建議洋蔥可以由外到內每一層咁食，洋蔥無煮到佢好老，食落唔會有渣，咬落係越咬越嫩，食落越食越甜越濃味，冇平時洋蔥嘅辛辣，除咗佢品質好之外，仲因為佢吸哂壽喜燒嘅精華，甜而爽脆，好似食緊平時既蔬菜咁，完全唔似食緊洋蔥，就算唔鍾意食洋蔥嘅人都會鍾意。 最後係蒟蒻麵，入口Q彈，一樣係吸收晒醬汁好入味。 - 🍚 御飯 （👅: 8.5/10） 呢個係用鐵鍋整嘅最後一道菜，利用鐵鍋入邊剩餘嘅精華，師傅首先會將牛肉粒炒香，再加蛋漿，最後擺上飯上面，牛肉碎都係近江牛，不過係切肉期間剩低嘅肉碎。 可以明顯見到蛋汁係半熟狀態，聞到好香嘅蛋香味，入口首先係壽喜燒汁既味道，之後食落去蛋有蛋香，而且好滑身，牛肉粒口感煙韌帶嚼勁，食落有少少牛味，不過就唔可以同前面嘅牛肉比，飯粒夠軟熟，加上鍋內既油脂香味，所以整體非常香口惹味。 如果唔想食蛋牛飯，可以轉烏冬，不過師傅話烏冬無咁掛汁，一般會建議客人食飯。 除咗蛋牛飯，仲有味噌湯同漬物，味噌湯飲落去比一般嘅味噌湯濃郁，我覺得係應該用咗赤味噌，所以味噌嘅香味直接入鼻，帶回甘，係我鍾意嘅味噌湯。 如果嫌味噌湯太重味，可以食隔離嗰碟嘅漬物，可以稍微中和一下味噌既味道。 - 🍮 甜品 （👅: 8.5/10） 最後嘅係甜品，今日嘅甜品係北海道牛布甸配新鮮士多啤梨粒，隔離仲有啲蕨餅，如果你係慶祝生日或者週年可以同餐廳講，佢會換上一個擺盤，用可可粉寫字，估唔到一間咁日式嘅餐廳都有呢個服務。 北海道奶凍入口非常順滑，夠creamy，食落去牛奶味非常重，唔會太甜，如果覺得太甜可以用士多啤梨中和一下。而蕨餅既黃豆粉恰到好處，有豆味香又唔會太甜，畫上完美句號。 - 🥃 Sata Kakutama 💰75（👅: 8/10） 餐廳本身會提供熱茶，飲品方面有純米大吟釀、純米吟釀、純米酒、清酒、燒酒、梅酒、香檳、紅白酒、啤酒、礦泉水、汽水果汁、咖啡茶，我就揀咗價錢比較實惠嘅梅酒。 梅酒入口清爽輕盈，果味恰到好處，飲落去酸味都幾突出，不過我覺得可以接受。 - 🥂 Suntory Whisky Soda 💰48（👅: 7.5/10） 入口清爽，味道比較淡啲，酒味唔算好重，聽講近江牛配獺祭好夾，下次會試吓。 - 🌟整體嘅用餐體驗非常滿意，首先講嘢食，我自己比較鍾意油脂重嘅牛肉，所以會比較想用A5既和牛，不過餐廳就驚客人會覺得太過肥膩，所以就用A5，牛肉嘅口感同味道雖然唔係我食過最好，但係師傅經驗豐富嘅烹調技術之下，滿足程度遠比用上A5和牛既日山好。而因為有蔬菜係肉同肉之間做間場，所以最尾係夠飽，但唔會覺得好油好膩。如果要挑剔嘅話就係醬汁味道係偏鹹，如果甜味方面可以再提升少少會更好。 環境方面，雖然個壽喜燒喺面前煮，不過呢度空氣流通，唔會好焗，唔會有好多油煙吹住自己，餐廳冇任何景色，如果對比有海景嘅日山當然會遜色。服務方面，師傅係完成每一道菜都會介紹，不過有時會好似急口令講嘢比較快，不過有時個別問食材方面佢都會解釋，有時食omakase唔係淨係為咗食好食嘅菜色，同師傅交流、對一種嘢食嘅認知加深，都係一個好嘅omakase 嘅體驗。 因為關西風壽喜燒對於師傅嘅技術更加要求高，淨係講火候控制點樣令到個鍋唔燶，食起上嚟冇苦味係非常之難，隨時都要睇住情況去控制大細火、糖嘅份量、醬汁份量、烹煮時間，所以師傅係絕對需要經過訓練先做都好食嘅壽喜燒，所以食完今次更加肯定我個人係鍾意關西風壽喜燒多過關東風。 不過呢一間同日本嘅始終有少少唔同，以日本好出名食壽喜燒嘅京都「三嶋亭」為例，佢一樣係落咗糖煎香左牛肉先再落汁煮，不過日本 負責料理嘅所謂師傅，係「女將」，喺日本係好常見，其實即係日本傳統餐廳或者旅館嘅經理，多為上左年紀既女將，女將做嘅嘢其實同香港嘅師傅或者廚師係一樣，都係需要對和牛同清酒有知識，仲要學習烹飪技巧，始終壽喜燒都係要識得控制溫度、觀察每塊牛肉嘅狀況、符合客人既要求，其實做嘅嘢同廚師、師傅冇咩分別。 另外唔同嘅地方，主要係關西風壽喜燒去到香港、台灣呢啲地方，比較鍾意用甜度低啲嘅糖去取代製作和菓子專用嘅盤糖，可能因為香港人唔習慣肉類配甜味，所以香港人唔習慣食比較甜嘅壽喜燒，好似今次呢間すき焼 森就係用呢啲冇咁甜嘅糖，所以鹹味比甜味更加出，但正宗既關西風壽喜燒，食落去就係要甜味突出。 至於值唔值得黎依間餐廳食，價錢上我覺得好值得，因為出邊買一個壽喜燒外賣餐，或者自己去買肉，價錢可能同呢度差唔多，但以烹調嘅技巧來講，我哋絕對唔夠師傅，冇佢煮得咁好食，呢度晚市人均差唔多800幾，有前菜到甜品都令人滿意，係一個精心準備嘅壽喜燒體驗，口味上絕對係適合香港人，如果係未試過壽喜燒，係絕對好值得嚟呢度試一次。當然如果你要攞呢一間同日本既壽喜燒比，當然冇得比，因為嗰度既牛肉更加新鮮更加高質，價錢上亦都比香港更加平，環境上都比香港嘅店舖大，但係未有得去日本嗰時，呢一間絕對可以一治思鄉病。如果要挑剔呢一間餐廳，第一一定係book位實在太難，如果準時喺1號排隊基本上係一定book到，不過打電話就唔知要試幾多次。第二就係呢度用餐嘅節奏比較快少少，有限時105分鐘，不過我覺得唔算好快，都唔係食到趕頭趕命，不過就唔會係慢慢食、任坐嗰種。第三就係自己個人鍾意食肥啲嘅肉，雖然整體味道比日山好，但如果依度都可以提供A5級既和牛套餐，可能會更加滿足，因為呢度嘅牛肉唔係我香港食過最好食最肥，如果對比自己食過咁多間日式燒肉，肉料理廣同Nikushou 既A5級飛驒牛更肥美。不過以香港嘅壽喜燒黎講，呢一間絕對地位無法動搖。 - 👅味道: 9/10 🍴環境: 7.5/10 💰消費: $700-900pp (服務費: 10%)

秋風起，除咗食臘味之外，仲係食煲仔飯嘅季節，上次介紹咗新界荃灣嘅煲仔飯代表，今次就介紹港島嘅代表，其實港島有唔少好出名嘅煲仔飯，今次介紹呢間仲要有米芝蓮必比登推介，除咗煲仔飯出名，佢嘅小菜同點心都係必食。 嚐囍係西環區人氣既街坊小菜館，舖頭連續三年得到米芝蓮推介，受到各大傳媒報道，晚市未開始已經見人龍，係港島煲仔飯必食嘅餐廳之一，深受街坊歡迎，同一樣攞到米芝蓮推介既坤記一樣喺西環，近排仲喺樂富開咗新分店。 餐廳主打煲仔飯，因為知道香港人講求健康、少油少納，所以佢哋嘅煲仔飯同小菜標榜冇落味精，同坤記一樣係以火山石炮製煲仔飯 ，以前佢哋係用炭火，不過始終用炭嘅成本比較高，攞牌就要用好多錢同時間，而且對控制大小細火嘅技巧要求好高，而且會令到成間餐廳都係炭味，最後就用菲律賓火山石放喺特別訂造嘅爐灶，可以有穩定而且高溫嘅火力，食客都唔會成身炭味。 而且師傅會混合泰國新舊米，多次嘗試邊一種米比較吸水，加上幾滴豬油，令到香味加倍。師傅一次過可以同時處理15個煲仔飯，高峰期可以一日賣300個煲仔飯。煲仔飯約有30款，好似有白鱔滑雞冬菇煲仔飯、臘味排骨煲仔飯、臘味滑雞飯、有創意既日式鰻魚煲仔飯等。 因為小菜隔離嗰間係同名嘅點心店，同樣獲得米芝蓮推介，老細曾經任職於陸羽茶室，亦都係潮江春做過，而且有50年點心經驗嘅師傅主理，所以對自家製嘅懷舊點心有信心，點心價錢都合理夠平民，即使食緊煲仔飯，都可以嘆吓一盅兩件，夜晚都一樣供應，如果唔係係小菜館堂食都可以買外賣，係廿四小時供應。因為西環嘅長者比較多，知道佢哋收入低但係又鍾意飲茶，所以點心店曾經喺朝早免收佢哋茶錢半年，餐廳都冇收+1服務費。 要講到點解會有呢間餐廳，店主因為後生嗰時喺另一區食過好食嘅煲仔飯，所以就有開業嘅念頭，而家餐廳已經開業10年，為咗滿足香港人唔同口味，所以係幾年前更加擴展通宵營業嘅點心店，而佢覺得兩間餐廳都同時可以比米芝蓮肯定係非常珍貴。其實店舖曾經差啲俾大財團高價買走，全靠良心業主保住佢個舖位，所以即使第一年上米芝蓮推介榜，佢都承諾一年唔加價，為食客提供大眾化價錢嘅嘢食。 呢度其實係可以book位，本身約咗朋友星期四去食，咁我前一兩日就打去book位諗住book 七點，打去個姐姐同我講七點book唔到 ，六點就book得，咁我就諗可能七點太多人唔比book位，咁就諗住Walk in，朋友大概七點就到餐廳，攞咗張飛係24號，但Number係叫緊10幾號，之後就發覺其實好多人都有book位，但其實book咗位都係要排隊，Book咗七點三可能七點九先有得入去，只不過個優先會比起walk in快，最後我等咗差唔多一個半鐘先可以入去。第一係因為我哋係三個人，去到後期其實有好多二人位，飛都嗌左好幾個Number，但三人位或以上啲人就完全冇人走，而且我係去到後尾先知原來可以接受搭枱係可以快啲入去坐，所以佢嗌嘅數字係係咁跳，變咗見到有好多遲過我哋嚟嘅 ，反而俾我哋更加吁入去坐到，其實安排座位方面都幾混亂，如果因為三個人以上既枱係食得耐啲，咁餐廳應該要考慮限時用餐去有效咁控制客人離座，從而令到book位嘅人可以準時入去，同時walkin嘅人都唔駛等咁耐，或者可以彈性咁安排二人位同四人位既比例。 環境來講，係香港嘅煲仔飯餐廳入面，佢算係座位闊落，地方夠整齊，而且全部座位都係室內，唔使坐街邊對住車既廢氣或者垃圾桶。 價錢以攞過米芝蓮推介嘅餐廳來講唔算好貴，冇因為出咗名而大幅加價，令大家可以以親民嘅價錢享受米芝蓮美食。煲仔飯大概有30幾款選擇，夜晚六點之後先供應。而點心方面係即叫即蒸，大約有40幾款，好似有山竹牛肉、腐皮尖椒、蘿蔔糕、馬蹄糕、黃金糕等。 - 1️⃣ 臘味排骨飯 💰90（👅: 8.5/10） 呢度最出名就係煲仔飯，以前都係用炭火煲，但由上年開始已經係用火山石，火山石嘅熱力比炭火恒定，而且更容易煲出金黃又香脆既飯焦。 煲仔飯係即叫即整，首先用煤氣爐將飯煮熟，喺加料嗰時再放上長形嘅炭爐，要等大約20分鐘，如果有叫到小菜或者點心，煲仔飯應該係食晒之後差唔多上，上枱嗰時店員會同時比一碟豉油你落，豉油份量其實唔算多，或者可能餐廳覺得咁多就夠。上枱嗰時因為呢一款有臘腸、潤腸、臘肉，未開蓋已經明顯聞到臘味嘅味道。 呢度嘅飯係用泰國米再溝米，係煲得啱啱好，夠乾身，真係做到粒粒分明，我同朋友都非常滿意，即使落咗豉油都唔會拎到濕咗，依然都係好挺身，食落係唔會過硬，而且有米香。 呢度嘅豉油係用臘味嘅頭尾煲製而成，豉油味都唔會過鹹，亦都冇令到個飯過濕，可能因為份量本身唔多，如果鍾意重口味啲嘅人會覺得依度嘅豉油唔夠味，咁當然香味方面唔會及江湖小棧，因為佢係有豬油。 臘腸嘅肥瘦比例適中，食落算甘香不過未到好有驚喜，不過份量都幾多，有成六七條，反而潤腸比臘腸更有驚喜，入面夠粉夠香，鹹香味足夠，不過兩者嘅香味都冇完全滲入係飯入邊，而排骨方面就偏肥一啲，唔算有驚喜。 飯焦方面都係可以成個起，係頭盔型飯焦，咁當然唔會淨係留飯焦到最後食，最好就係撈飯嗰時將飯焦整碎同飯一齊食，飯焦未去到金黃色，但係完全唔會燶，係整到啱啱好，咬落去脆口，食落去唔會有苦味，因為豉油唔算多，所以飯焦都唔會太重味，算係差唔多完美嘅飯焦。 總結來講，飯同飯焦都係冇咩好挑剔，要挑剔嘅就係啲餸，餸未可以完全將佢嘅味道完全滲入係飯入邊，尤其係臘味嘅油香無喺飯度食到。 - 2️⃣ 白鱔臘腸飯 💰90（👅: 8/10） 呢一碗同上一碗個分別就係將排骨轉做白鱔，因為聽聞白鱔係依度嘅招牌，鱔其實都係鰻魚黎。 白鱔肥美爽脆，肉質就正常嫩滑，食落冇腥味，會帶小小骨，不過份量偏小，得兩三個，三個人食真係一日一舊就無左，不過同樣味道就未算好突出，亦都冇將佢嘅鮮味滲入係飯入面。 呢一碗嘅飯同樣都係整到好乾身，不過睇佢飯焦就知道佢overcooked左，因為會見到有部份位置燶咗，而且起飯焦嗰時都比上一碗比較困難，淨係兩個煲仔飯水準就已經有分別，係咪代表佢水準唔穩定？因為有見過人哋話佢嘅飯好濕，不過今次我食就冇。 - 3️⃣ 椒鹽鮮魷 💰88（👅: 9.5/10） 雙併 椒鹽九肚魚 ＋💰30（👅: 9.5/10） 另外依度嘅小菜都好出名，所以就叫咗一樣小菜必食嘅椒鹽魷魚併九肚魚，聽講呢一個好受歡迎好容易賣晒，都係即叫即做，上菜時間都好快，上完點心好快就上到菜，所以食落口嗰時仲係熱辣辣，份量都好足夠一班人食，除咗九肚魚仲可以併其他好似茄子、豆腐、牛仔骨等。 首先椒鹽鮮魷熱辣辣，夠厚身，每件大小適中，咬落去係非常香脆，但佢個炸皮係完全唔厚，算係我食過最薄嘅炸衣，入面咬落去係彈牙，即使炸過嚟，食落去完全冇油膉味，而且唔會骨肉分離，可見佢個炸功係一流，而魷魚咬落去係非常之軟熟。 九肚魚同鮮魷一樣炸皮超薄，幾大舊不過唔會話一夾魚就斷開，咬落去係入口即溶嘅感覺，好耐未食過九肚魚都可以咁腍咁滑，外脆內嫩，食落去係鮮甜味，魚肉夠肥美，夠晒新鮮，香口惹味。 而無論係魷魚定係九肚魚都好明顯食到椒鹽味，但唔會話太重，調味係岩岩好，因為依家係出邊食到好多嘅椒鹽魷魚等等其實係冇落到椒鹽，淨係落一啲蒜或者辣椒就改個名做椒鹽，呢度有椒鹽味而且都唔會過鹹，呢一碟係我食過嘅椒鹽魷魚入邊，唔係第一就係第二。 - 4️⃣ 啫啫煲唐生菜 💰68（👅: 8/10） 食煲仔菜唔少得就係叫啫啫煲，因為想叫個菜，所以冇叫雞而係叫唐山菜，唐山菜上枱嗰時仲係碧綠色，無overcooked ，咬落幾juicy，有少少鑊氣，入邊有唔少嘅蝦乾，所以食落去有蝦乾鹹香味，幾惹味，整體唔算太鹹可以接受。 - 5️⃣ 咖哩金錢肚 💰25（👅: 8/10） 成個點心最出色就係佢個醬汁，個咖喱汁食落有黑椒味道，味道幾濃，有少少辣，非常惹味。金錢肚咬落去算軟稔，食落去夠入味，但最大敗筆就係舊金錢肚係凍，感覺上係未解夠凍或者蒸得唔夠。金錢肚入味不過蘿蔔就唔入味，好似金錢肚還金錢肚，蘿蔔還蘿蔔。 - 6️⃣ 黃金炸鮮奶 💰25（👅: 7.5/10） 之後就到酒樓唔常見既炸鮮奶，呢度一碟有四舊，價錢算平民，炸衣有啲厚，咬落去幾脆口，鮮奶入口滑嫩，咬落去算煙韌，食落去奶香味都有，唔會太甜，不過我覺得大圍小館或者同區嘅新興會更好食更香口。 - 7️⃣ 流沙千層糕 💰34（👅: 8/10） 另外仲試咗一個甜嘅糕點，千層糕上枱熱辣辣，咬落去夠鬆軟，食落去唔算好甜，不過蛋黃嘅口味算突出，但唔會搶過其他味道，食落係有鹹香味。 - 🌟食物來講，呢度最出名嘅煲仔飯，我覺得佢飯嘅質地係做到差唔多完美，而飯焦都係可以做到成塊起出嚟，但第一碗同第二碗個水準有分別，第一碗接近完美但第二碗就有啲overcooked，調味方面就正常，餸就冇乜驚喜，最有驚喜係潤腸，而且餸嘅味道油香無滲入係飯入面，整體都算係好食嘅煲仔飯。 點心方面就正常，不過我覺得點心會食到凍嘅金錢肚係唔太可以接受，即係佢未蒸得得或者未完全解凍，仲要呢一間點心係米芝蓮推介，凍嘅點心可以攞出嚟比客人食真係有愧於呢一個榮耀，我會寧願去同區嘅新興食點心，至少佢一定係熱辣辣。 而小菜方面反而係最有驚喜，呢一疊嘅椒鹽魷魚加九肚魚，可以話係我食過嘅數一數二，如果要同佢匹敵嘅，我諗我食過就只有深水埗嘅愛文生，所以嚟緊我會食多次愛文生睇吓邊個係香港第一。 總結係講呢一間係冬天食係幾適合，如果鍾意煲仔飯都可以一試，不過最推薦嘅係椒鹽魷魚同九肚魚，以食物水準係值得一黎。但唔建議Walk in排隊，一定要book位，同朋友嘅結論就係如果要排一個鐘多啲就唔會嚟食，因為呢度book左位都要排隊等，如果係半個鐘我就會嚟食， 一個鐘我寧願外賣個煲仔飯喺出邊食完俾返個碗佢，又或者淨係外賣個椒鹽魷魚。 另外餐廳應該可以諗吓點樣可以有效咁安排book位同排隊，因為我見到情況有啲混亂，book位個機制係會插係walkin既人，但book咗八點都有可能8:30先入得去，而Walk in方面Number係跳來跳去，原因除咗係當晚有好多兩人位，而3、4人位係冇人走之外，如果唔介意搭枱係可以坐先，所以我聽到有啲比我後Number嘅人反而比我入先，係我到後期先知道，我覺得店員如果有咁嘅安排應該要一開始講清楚或者寫明，因為我完全唔介意搭枱，只係想快啲入去有得食，我覺得係呢一方面店舖要改善下，因為嘢食點好食法，如果呢一方面做得唔好都係令人卻步。希望佢嘅煲仔飯同小菜好食嘅同時，其他方面都可以做得好，唔會辜負食客對佢嘅期望。 店主目標係將來開更多粵菜嘅分店，想建立一個良好嘅品牌 ，而家已經開咗樂富嘅新分店，算係將目標逐步實踐。一個人能力有限，雖然獲得推介，但食物質素都要保持到，而且要感激員工嘅努力同埋食客嘅支持，最簡單就係令到食客可以將嘢食食得乾乾淨淨。 煲仔飯比較：  煲仔飯飯焦:
🥇荃灣 江湖小棧
🥈西環 嚐囍煲仔小菜
🥉 筲箕灣 祥囍煲仔小廚

煲仔飯飯粒分明乾身:
🥇西環 嚐囍煲仔小菜
🥈荃灣 江湖小棧
🥉 筲箕灣 祥囍煲仔小廚

煲仔飯調味:
🥇筲箕灣 祥囍煲仔小廚
🥈荃灣 江湖小棧
🥉西環 嚐囍煲仔小菜

煲仔飯配料:
🥇筲箕灣 祥囍煲仔小廚
🥈荃灣 江湖小棧
🥉西環 嚐囍煲仔小菜
- 👅味道: 8.5/10 🍴環境: 7.5/10 💰消費: $150pp (服務費: NA)

唔知大家喺香港鍾唔鍾意食Omakase？我成日覺得要食到好食嘅Omakase，一定要喺日本，因為香港點好食都唔夠日本食材新鮮，但經過今次之後，我覺得Omakase除咗係美食嘅盛宴，仲係對每一道菜更加認識、令你更加愛上嘅過程。 Susoshu係一間尖沙咀新派日本菜餐廳，餐廳名全名係「寿司を食って、蕎麦で〆る。日本酒もある、長い名前のレストラン。」，其實係三個字既縮寫，分別係Sushi 、Soba、Shu，意思係食完壽司之後以蕎麥麵作結，仲有日本酒提供，所以餐廳係主打壽司、蕎麥麵同日本酒，令客人可以享受到日本居酒屋嘅地道美食。 餐廳有唔小食材由日本直送，好似和牛用上日本直送熊本A4和牛，菜式方面加入左創意元素，加上日本正宗嘅烹調細緻，加上夠多元化，好似有特色席前煙燻和牛、海天一色嘅寒天甜品。品嚐美食嘅同時，自己好似置身係日本咁，不知不覺渡過三個鐘時光。 餐廳裝修以木系為主，座位唔算多，大概可以容納到20個人，除咗座位，最吸睛一定係擺滿左唔同日本酒嘅酒櫃。如果係食omakase，建議一定要book吧枱位，因為咁樣先可以同廚師交流，可以近距離睇住師傅製作。 師傅好細心講解每道菜嘅特色同埋來源。 - 🍣 献立 💰1480（👅: 9/10） 呢個係餐廳嘅晚市Omakase套餐，以海鮮為主題，每三個月就會轉一次Menu，而呢一個set咁啱就係11月中開始，所以可以見到當造嘅白子，而且仲有餐廳最受歡迎嘅菜式，好似究極海膽、特製和王A4和牛壽喜燒、青森縣大間中拖羅、招牌蕎麥麵等一共十一款。 - 1️⃣ 海老他他脆筒（👅: 8/10） 第一樣係一個用紫菜做成既脆筒，麻雀雖小但係入邊有海老他他、自家製芝士、山葵漬、醃蘿蔔、壽司飯，最上面有一個炸蝦頭，睇落係一個迷你手卷，上面有個試管豉油比客人自己控制落既份量。 紫菜有用火槍燒過，所以咬落去非常脆身，連同非常酥脆嘅炸蝦頭 內餡食落無論味道定係口感上都非常豐富，芝士嘅味道特別突出，係幾特別嘅配搭，作為前菜幾開胃。 - 2️⃣ 白子天婦羅（👅: 8.5/10） 11月絕對係白子嘅季節，香港人可能未必知，白子其實係魚既睪丸，係日本係好常見嘅前菜小食，而且食落去有好豐富嘅蛋白質，仲可以美顏。平時食白子都係酸汁白子子刺身多，呢度除咗刺身仲可以揀天婦羅，所以就揀咗未試過嘅後者。 呢度白子都係最常見嘅鱈魚白子，白子嘅外層炸衣夠輕薄，咬落去入邊非常creamy，入口夠滑，好似食緊豆腐，夠肥美，食落完全冇腥味，因為冇刺身嘅酸汁所以冇咁開胃，但比起平時食嘅刺身更加香口，上面仲有啲蔥花同蘿蔔蓉中和一下油膩感，對於未能接受白子本身嘅口感可能會更易接受。 - 3️⃣ 呼子魷魚燒賣（👅: 8.5/10） 佐賀縣有一個地方叫做呼子，嗰度最出名就係出產魷魚，呢度就係用咗呼子魷魚，切成一條條，包住依個燒賣，入邊係用上日本黑毛豬肉既內餡，係用日本嘅材料整成嘅燒賣，上枱時連埋個小蒸籠一齊上。 魷魚咬落非常軟滑，夠彈牙，帶小小膠質，食落鮮甜，而黑毛豚肉比起魷魚更彈牙，食落豬味濃郁，比起平時嘅港式燒賣更有驚喜。 - 🍣 時令壽司四貫 壽司飯用上日本越光米，入口係有彈性帶軟黏，軟硬適中，食落有米香，再加左小小赤醋，突出魚肉既甘甜，唔會太有醋酸味。 - 🍣 愛媛縣蜜柑獅魚（👅: 8.5/10） 獅魚即係未成長既油甘魚，咬落去魚夠爽身，小小似食緊池魚，因為加左蜜柑所以多左小小甜味。 - 🍣 北海道秋刀魚（👅: 8.5/10） 秋刀魚係秋冬季既魚，咬落夠晒肥美，食落魚味比較濃郁。 - 🍣 青森縣大間中拖羅（👅: 9/10） 呢度嘅中拖羅做法同平時有啲唔同，用左鐵板燒既概念，首先會用火槍燒一燒鐵板，再用燒熱左既鐵板焫過拖羅嘅表面，令到佢多左一層焦香。拖羅係熟成左兩星期既吞拿魚，非常厚身，夠肥美，入口細嫩無筋，食落去除咗食到拖羅嘅脂肪，仲食到炙燒過嘅焦香，令到魚味更加突出。 - 🍣 火炙右口魚邊（👅: 9/10） 咁多件壽司最鍾意呢一件，可能因為佢係最重味，由淡到濃味最後一件嘅壽司。一般右口魚邊比左口魚更多油份，所以呢度用右口魚裙邊，師傅會用火槍直接火炙右口魚邊，將佢嘅油香迫出黎。擺入口係真正嘅入口即溶，帶有焦香，平時大家食左口魚可能有渣，但呢個係完全冇，喺口腔入邊係油香四溢，齒頰留香，加上去既蒜味醬油令到佢味道層次增加提升。 - 4️⃣⃣ 鮟鱇魚肝（👅: 8/10） 鮟鱇魚肝一直都好想食，不過平時係居酒居太多嘢想食，一直都眼闊肚窄試唔到。呢度師傅首先會用牛奶浸過魚肝再蒸，所以入口嗰時非常幼滑，夠creamy，即使係我唔太鍾意食內臟嘅人，呢個魚肝內臟味都唔算好重，而且冇腥味，配搭酸汁啫喱同辣蘿蔔蓉，可以蓋過內臟嘅味道，味道更加有層次，令佢變成一道我好開胃嘅小食。 - 5️⃣ 究極海膽（👅: 9/10） 終於嚟到今晚嘅主角，相信大家黎呢一間餐廳，唔多唔少都係為咗佢，係份量唔孤寒既招牌究極海膽。海膽用上北海道浜中小川赤海膽，師傅首先會用火槍燒一燒紫菜，擺上少少醋飯之後，將一整排嘅海膽覆蓋喺醋飯上面。海膽份量澎湃，色澤均勻。 本身我對海膽唔係有好大好感，因為喺香港平時食到嘅，好多一係鮮味海膽味唔重，一係有腥味，但呢個海膽真係入口即溶，口感幼滑，夠creamy夠濕潤，每一舊都好肥美夠晒飽滿，綿密不斷，留喺口腔嘅係海膽嘅鮮甜味，少少苦澀味都冇，濃郁可口，令人回味再三，另外即刻食仲食到紫菜嘅香脆，絕對係外脆內軟，係我香港食過最好食嘅海膽，食完會令我對海膽改觀，而且想搵香港好食嘅海膽。 - 6️⃣ 松葉蟹甲羅燒（👅: 9/10） 秋冬季要食嘅一定係甲羅燒，入邊有松葉蟹肉、蟹膏、鵪鶉蛋、味噌、蔥，啲面會係你面前用一個小火爐燒，幫你攪勻，喺隔離聞到香味不斷湧出。 蟹肉夠長，咬落去口感札實，食落新鮮，蟹膏香味有不過唔會重到蓋過其他味道，成個蟹味濃郁，食完好耐仲停留喺口腔，比例配搭得好好，味道層次豐富，係我食過最好食嘅甲羅燒。 - 7️⃣ 時令醋物（👅: 8/10） 食完咁重味嘅甲羅燒，餐廳俾咗一個時令醋物去清一清口腔，係一個用玻璃試管裝住既柚子醋啫喱，質地偏水狀，食落去酸酸甜甜，夠開胃，清新完味蕾，準備迎接下一個重口味菜式。 - 8️⃣ 特製和王和牛壽喜燒（👅: 9/10） 之後上枱嘅係一個餐廳其中一個招牌，係特製和王和牛壽喜燒，和王係用上熊本縣A4級嘅頂級和牛。 牛肉入口非常軟嫩，食起嚟牛味重，油香豐富，但唔會太膩，加上自家製嘅壽喜燒汁，更加滑身，加左特級松茸落去煮，蛋漿食落鮮甜帶焦香。驚喜嘅係呢個壽喜燒落咗少少山椒粉做調味，所以邊食邊感受到舌尖上的麻痹感，唔會淨係食到雞蛋嘅香甜，但又唔會有過火嘅麻辣感覺，非常過癮。下面仲有啲葛粉條，吸滿咗醬汁，連汁一滴不留咁清哂。 - 9️⃣ 櫻花蝦粉蕎麥麵（👅: 9/10） 喺香港要食到好食嘅蕎麥麵係非常之難，因為冇咩專食蕎麥麵嘅專門店或者餐廳，不過呢度蕎麥麵就係餐廳嘅招牌，餐廳喺午市、晚市都有供應蕎麥麵，不過呢個套餐嘅蕎麥麵係特別版，因為上面加咗櫻花蝦粉，師傅將曬乾左嘅櫻花蝦磨成粉。 日本鹿兒島直送既十割蕎麥麵，意思即係100%用蕎麥粉製作，冇用任何麵粉，咬落去偏硬身，帶煙韌彈牙，食落去蕎麥味重。 而蕎麥麵嘅湯汁係用蝦仔乾、魚仔乾、蟹仔乾、海帶、昆布熬成，食落去係鹹甜交集，鮮味十足，加咗櫻花粉入去，食落去係非常鮮甜，令到成個蕎麥麵都香口左，而且多咗少少脆口嘅口感，湯汁同麵條非常夾，好快就鯨吞虎嚥食晒，呢個算係我喺香港食過最好食嘅蕎麥麵。 - 🔟 夜空寒天（👅: 8.5/10） 呢個甜品絕對係依度嘅招牌，當初我留意到呢間餐廳嘅原因都係因為佢，外觀上成個藝術品咁，漸變色除咗好似海洋之外，睇落仲好似富士山。上面白色嘅係用咗喺Donki成日見到嘅「澪」氣泡清酒製成，下面嘅係用咗碟豆花加檸檬汁製成嘅寒天凍，要整成下邊好似海洋嘅藍色係非常困難，需要好多次嘅調教，因為喺黃光、白光嘅情況下顏色都會唔同，細心到連餐廳嘅燈光都考慮左，加上成個甜品都係用天然而唔係人造色素 ，呢個甜品值得佢咁出名。 因為前邊食咗好多好似甲羅燒、壽喜燒呢啲咁重味嘅嘢食，需要一啲清新嘅甜品解一解膩，呢個甜品係可以做到呢個效果，咬落去係大菜糕同啫喱之間嘅口感，夠Q彈爽口，食落去係帶輕微嘅清酒味道，如果冇飲酒嘅人就會食到，飲咗酒就可能食唔到佢嘅酒味，下面就會食到檸檬汁嘅少少酸味，夠清新，係一個完美嘅完結。 - 🍶 真澄💰70（👅: 8.5/10） 呢支係宮坂釀造真澄漆黑KURO 純米吟釀，入口淡華，飲落去係偏水果味，味道飽滿，同日本菜、海鮮非常搭配。 - 🍹果味梳打💰38（👅: 7.5/10） 飲落去係桃味，正常唔算太甜。 - 🌟 整體食物質素絕對係高質，當中最欣賞嘅係佢哋嘅蕎麥麵、壽喜燒、寒天、海膽、甲羅燒、火炙右口魚邊、大拖羅。 因為香港無咩專做蕎麥麵既餐廳，食完我覺得以香港質素來講嘅高質，下次會想係lunch Menu再試多次。
可惜當中得海膽可以單點，其他只可以係OMAKASE MENU食到，如果餐廳可以單點絕對會再試上面既菜式。

-
👅味道: 9/10
🍴環境: 7.5/10
💰消費: $1480pp (服務費: 10%)

米線相信係香港人嘅comfort food，之前介紹過主打酸辣既唯一雲貴川、葵涌隱世米線、fusion既十三姨，今次介紹嘅呢間係米線關注組薄有名氣，原來係以前荃灣好出名不過而家搬咗去九龍灣，再次證明荃灣係米線之城，九龍灣算近返工嗰邊但要搭車過去，上網睇好多人排隊所以特登避開高峰時間，今次終於有機會食到。

肥仔雲南小鍋米線係一間喺荃灣經營左18年嘅米線店，係上年九月因為疫情加上無良業主加租被迫結業，當時荃灣嘅街坊都唔捨得，不過店主兼大廚係今年一月喺九龍灣重開餐廳，仲由雲南小鍋米線改名做肥仔雲南小鍋米線，人氣不減，繁忙時間可以排成半個鐘，聽講連cloud都成日去幫襯。店主表示荃灣競爭大租金貴，而九龍灣嘅新店就方便廚附近嘅屋企人返工，啲舖位雖然細，不過啱晒家庭式經營。餐廳主打酸辣、麻辣小鍋米線，仲有紅薯粉同多款小食供應。

九龍灣嘅店舖位置比較偏僻，係屋苑商場入口嘅巷仔，比較難搵，我都搵咗成個字，而且會不定期休息，如果擔心摸門釘可以喺社交平台睇近況。

如果係平時晏晝會比較多人，而且外賣比較多，可能要等幾個字先入到去，如果想避開人流可以下午茶先去。

餐廳入邊係茶餐廳格局，環境算企理，提供嘅嘢食同以前舊舖一樣，湯底一樣係每天新鮮熬製。招牌化酸辣小鍋米線，配料方面有近50款可選，最多人揀嘅係腩肉同豬軟骨，仲有出邊少見嘅螺旋藻、墨魚頭等，米線仲有自製酸菜。
-
🍜 麻辣小鍋米線 小辣 💰32（👅: 8.5/10）
呢度米線嘅湯底係用上四十幾斤豬骨，每日新鮮熬製六個鐘，而辣可以揀麻辣或者酸辣，辣度分別有bb 辣、微辣、小辣、中辣同大辣，第一次食所以就揀咗麻辣小辣。

湯底飲落去味道濃郁，偏鹹少少不過我覺得可以接受，小辣嘅程度大概係譚仔嘅二小辣，唔算好辣啱啱好，唔會辣到食唔到米線同其他餸嘅味道，不過食內耐會有少少麻嘅感覺，唔會好確喉，非常惹味，湯底唔會好油膩，雖然佢係麻辣，不過入口係有少少甜味同埋有酸辣味，麻辣酸甜既比例大概係4:2:2:2，估計酸辣嘅話酸嘅程度會再多啲，依家嘅話就酸味味道適中，平衡得幾好，雖然飲落去有啲口乾不過我都飲咗唔小。

米線份量算多，幼身，咬落去算爽口彈牙，軟硬適中，唔會太腍亦都唔會太硬，索湯能力就正常。

湯底仲會有唔少肉碎，係瘦肉而唔係肥膏，食落去感覺應該用過五香花椒一齊炒，唔係單純落麻粉，配料仲有芽菜、韭菜、酸菜，唔會剩係得米線咁寡，配料同湯都好夾，同米線一齊食好惹味。
-
🍜 蘿蔔 💰0（👅: 8.5/10）
蘿蔔份量幾多，有四大舊，咬落去冇渣，夠哂腍，而且多汁，食落去清甜，而且可以索哂個湯。
-
🍜 腩肉 💰9（👅: 8.5/10）
腩肉嘅份量幾多，有成十幾塊，腩肉同平時食開嘅唔同，唔算係肥個種而係偏瘦，比較薄片，咬落去算有嚼勁，醃得唔錯，食落去入味，會食到五香同埋麻油嘅味道，帶少少辣味，係幾惹味，好似食緊薄片嘅牛肉但唔會太碎，略嫌肉質比較鞋口少少，如果大家想食好多脂肪嘅腩肉會失望，我自己就可以接受。
-
🍜 墨魚頭 💰12（👅: 8/10）
墨魚頭喺米線鋪來講都算係唔常見嘅餸，加上喺呢度嘅招牌所以就叫咗。墨魚頭比較大粒，咬落去爽口彈牙，有嚼勁但唔會好韌，食落去新鮮，有小小墨魚鮮味，同湯一齊食幾夾。
-
🍜 凍奶茶 💰7（👅: 7.5/10）
呢度嘅凍奶茶茶底一般，比較普通，不過怕辣都可以飲下 。
-
🌟米線份量都算大碗，價錢就係中價，有啲人覺得比較重味味精多，我就自己覺得可以接受，個湯可以飲吓不過唔會飲晒，湯底唔會太多油算幾溫和，如果係餸方面我覺得老闆娘同埋雲南小鍋米線會更出色，嗌咗小辣就唔算好麻好辣，下次會試吓中辣同埋試吓酸辣米線，以食物質素來講係值得再戰，如果喺附近返工我應該會成日食。
-
👅味道: 8.5/10
🍴環境: 7/10
💰消費: $40-60pp (服務費: NA)

今年聖誕唔算去咗好多同聖誕有關嘅餐廳，依家係因為佢有推出聖誕嘅下午茶，而又得女朋友歡心，所以就即刻訂位佢。 Vivienne Westwood Cafe係一間著名英國品牌開設既cafe，都係品牌第一間有供應主菜嘅餐廳。Cafe係2015年登陸尖沙咀海港城，跟住係2018年就搬咗去銅鑼灣，旗艦店地方仲大，平時行街成日經過一直都想試，今次終於試到。Cafe以品牌嘅故事同設計標記為靈感，主打精緻嘅三層架下午茶，仲有特別嘅All Day Breakfast、烤牛柳和素肉漢堡等。 銅鑼灣旗艦店有兩層，佔地3,000呎，門口已經見到一個大蛋糕櫃，賣好多款精緻嘅小蛋糕同埋甜品。上層嘅Cafe係由尖沙咀移師過黎，裝修大致一樣，白色嘅牆身延伸到用餐嘅地板，以時裝show後台嘅攝影棚為主題，加上唔少射燈，隔離仲有品牌logo嘅茶罐，非常型格。另一邊嘅設計係以茶室為主，有好似18世紀法國宮廷嘅牆紙，牆紙入邊嘅係倫敦一間博物館華勒斯典藏館。店內仲有一個大鐘，寫住worlds end，上面有13個數字，時針同分針係逆時針轉動，反映品牌嘅創意。餐枱都係以深棕色花梨木造成，整體裝修係英國復古宮廷風，同時間又有摩登嘅感覺，連餐廳嘅餐具都融入左品牌嘅招牌格紋元素，設計一致。而下面個層係品牌精品店，賣多款嘅名牌服裝同配飾。 我預先喺網上book左位，要求坐窗邊位，佢嘅窗邊位有三個，我去到嗰時得返一個，我個位其實個牆身都算靚，不過餐廳有個唔好處嘅就係呢度嘅射燈太勁，而且係黃光，而當初我喺官網睇到嘅相係白光，所以就好好奇點樣影到呢張相，會唔會係果一日陽光好好，不過因為佢喺商場入邊其實陽光係射唔到入嚟。之後下午茶到咗冇幾耐，可能因為就天黑所以商場最外圍嘅白光燈就著哂，我諗張相就係靠呢啲光，雖然唔係自然光，不過比起餐廳嘅黃光好好多。 - 🍰 Christmas Premium Tea Set 2021 💰$688/2人份 （👅: 7.5/10） 呢個係呢度全新推出嘅聖誕下午茶，有四款鹹點同埋六款甜點，有幾樣仲要係聖誕造型，另外加$198仲會有Free Flow 任飲葡萄汽酒 ，供應到今年嘅12月31號。 - 🫖 伯爵茶（👅: 7.5/10） 點左兩個都係伯爵茶，茶壺非常大，唔使refill都夠飲，茶壺設計同佢哋嘅杯碟一致，飲落去都有茶香，解膩唔錯。 - Savories （👅: 8/10） 1️⃣ 迷你火雞漢堡配紅梅果醬（👅: 7/10） 呢個漢堡比較硬身，同想像中有出入，我寧願食文華冇驚喜好普通嘅三文治。 - 2️⃣ 蟹籽意粉沙津 （👅: 8/10） 用意粉做沙律嘅鹹點第一次見，食落去都夠濕潤，味道唔算好重，有少少蟹籽嘅味道，唔算有驚喜不過係唔錯嘅鹹點。 - 3️⃣ 焗芝士車厘茄撻 （👅: 8.5/10） 呢個算係有驚喜嘅撻，因為一咬落去入邊嘅芝士會爆出黎，芝士味道濃郁，質地係好似芝士汁，而個撻咬落去都算鬆脆，再加上上面嘅車厘茄中和一下芝士嘅膩，整體味道口感有層次，味道平衡得好好，但食完唔會覺得好濟。 - 4️⃣ 英式鬆餅 （👅: 7.5/10） Scone有2件，配新鮮無糖藍莓醬同忌廉醬，鬆餅溫度係暖，咬落去唔算太乾或者太粉，不過食落去冇咩牛油香，藍莓醬同clotted cream都係每樣一樽，份量夠多搽Scone，輕盈不過味道就比較普通冇咩驚喜。 - Sweets （👅: 7.5/10） 1️⃣ 暖暖水果熱紅酒杯配黑車厘和朱古力 （👅: 6.5/10） 上邊嘅朱古力食落都算正常，不過下面嘅黑加倫子食落就似藥水味，食咗一兩啖就無再食。 - 2️⃣ 香橙法式焦糖燉蛋 （👅: 7.5/10） 法式焦糖燉蛋上面有個聖誕帽非常應節，上面嘅焦糖唔算特別薄同脆，食落有好少嘅焦香味，不過燉蛋嘅味道有啲太甜，入口都算順滑，不過唔係有驚喜、好想食晒嘅焦糖燉蛋。 - 3️⃣ 綠茶聖誕樹小蛋糕 （👅: 8/10） 無論係蛋糕定係上面嘅cream，食落都係充滿抹茶味，如果個蛋糕更加鬆軟或者入邊有流心會更好。 - 4️⃣ 覆盆子拿破崙星星蛋糕 （👅: 8/10） 拿破崙不過每一層都係星星嘅形狀，非常精緻，拿破崙咬落去都算鬆脆，raspberry食落有少少酸味，幾開胃。 - 5️⃣ 雪人馬卡龍 （👅: 8/10） 呢個係得一件嘅馬卡龍，外型係雪人，所以成個下午茶最聖誕就係佢，咬落去都算係外脆內軟，帶有少少煙韌，，食落去係小小雲呢拿味，不過味道唔算好突出，整體唔算太甜。 - 6️⃣馬卡龍 （👅: 8/10） 呢件馬卡龍就印有餐廳嘅logo， 同樣咬落去都算外脆內軟，夾心煙韌， 不過食落去味道偏甜。 - 🌟食物來講，鹹點比甜點出色，下午茶味道唔算有驚喜，都冇特別出色嘅鹹甜點，唯一賣點就係餐廳裝修算用心，同埋訂位比較容易，不過餐廳嘅燈光都係黃燈，要影到靚嘅相唔係咁容易，係要靠近夜晚開出嚟嘅商場白燈補救。 Afternoon Tea順序排行榜(綜合) PANO 🥇 Palco 🥈 The Peninsula Boutique & Café🥉 Tiffany Blue Box Café The Verandah Cafe Gray Deluxe (已結業) Butterfly Room Odea Madame Fu Vivienne Westwood Café 快船廊 Séan Café & Lounge - 👅味道: 8/10 🍴環境: 7.5/10 💰消費: $688/2ppl (服務費: 10%)