今次介紹既係我係香港最鍾意既台式飲品，店鋪標榜"糖度低於市面一般飲料約一半"，如果唔鍾意太甜成日叫半糖微糖既朋友絕對可以一試。 - 🍹 荔枝紅茶配桃膠💰24 (M)（👅: 9.5/10） 店鋪主打茶而唔係珍珠奶茶，荔枝紅茶非常消暑，因為比市場糖度小一半，就算叫正常甜都唔算甜，係淡淙既甜味唔係死甜，茶味濃，飲到小小荔枝香味，飲完完全唔覺得有好邪惡嘅感覺。 桃膠係一種養生保健嘅食材同中藥，可以話係平民版燕窩，因為食落口感都好似燕窩而唔係雪耳，膠質唔似硬膠個種感覺，比較黏D，會有淡淡既甜味，加落茶入面有豐富既口感，而且桃膠份量好多，飲到尾都仲有。 香港既台式飲品除左唇茶都無咩點見到有得加桃膠，但桃膠始終係中藥，唔可以食太多，如果怕身體唔可以咁補可以試下其他配料好似奇亞籽。 - 🌟唇茶係旺中，尖沙咀都有，近排仲係葵廣開左分店。 旺中店人氣高，每次去都有人排緊等緊，大概等5-10分鐘，鍾意健康D既台式飲品絕對可以黎試下。 - 👅味道: 9.5/10 🍴環境: 5/10 💰消費: $24 (服務費: NA)

今次介紹係假日一開門就排長龍既台灣小店，便當除左份量大份抵食，仲有台灣既味道，因為老闆曾經親身去台灣學藝。 - 1️⃣ 那個滷排骨便當 💰66（👅: 8.5/10） 豬扒成個便當咁大塊，豬扒好厚，做法係用台式滷汁，甜甜地鹹鹹地，皮小脆，豬肉味重，但肉質比較鞋，無咁JUICY，一定要連炸衣食，因為部份位置肉會同炸衣分離，豬肉唔係高級，係靠滷汁同做法加重個味，骨既部份唔算多。 所有便當有當日五款配菜，而我當日配菜係菜心、炒冬粉、雪耳炒野菌、溏心蛋、本日涼菜。 唔想要既配菜可要求走，份量都唔會馬虎，味量足夠送飯一流，飯係用珍珠米，有台灣既味道。 分量絕對食得飽，可要求小飯多飯，或轉沙律。 - 2️⃣ 鹽酥甜不辣💰18（👅: 7/10） 甜不辣有兩件，正常發揮，炸到脆，再加椒鹽，個人鍾意用滷汁調味既甜不辣多D。 - 3️⃣ 夜市人氣雞皮卷💰22（👅: 8.5/10） 雞皮卷非常好食，小小似台灣D大腸包小腸，但入面係雞肉，外皮脆口感豐富，雞皮油脂好足夠。 - 4️⃣ 那個黑糖波霸奶茶💰31（👅: 7.5/10） 珍珠奶茶唔錯，個人本身怕黑糖會太甜但呢個可接受，黑糖珍珠有令杯奶茶好飲左，有得揀紅茶/烏龍茶底。 - 🌟位置偏僻，近奧運站，但值得去試一試既台灣野小店。 建議1130/1730就到，假日1140到已經要排半個鐘到(第一批人已經入哂)，前面大概有八個人到。 1240大概人龍有20幾人，而且排隊位置好中陽光，中午會曬到正。 - 👅味道: 8.5/10 🍴環境: 6.5/10 💰消費: $80 (服務費: NA)

有去開韓國既朋友都會鍾意食吐司，今次介紹一間長沙灣賣吐司既小店，主打足料之餘仲IGABLE既吐司，掛住韓國吐司或者手痕想打卡既值得一試! - 🥪 脆炸軟殼蟹滑蛋吐司💰50（👅: 6.5/10） 未食之前已經聞到好香既炸軟殼蟹味，入口唔錯，比較香口，軟殼蟹同多士都非常脆，溫度足夠因為係即叫即製，食到啖啖蟹肉，脆口之餘仲好Juicy, ，吃到一半仲有蟹膏。 中間有滑蛋，綿滑既質感令個多士濕D同無咁濟，再加上生菜，中和返小小油膩感。 因為軟殼蟹夾係吐司上半部份，中間有滑蛋，所以如果一開始集中食哂軟殼蟹同滑蛋，後邊就會後勁不繼，得返多士同生菜，相對普通。 前面會好食因為非常足料，但後邊就會後勁不繼，相對普通。 - 🍮期間限定吐司 💰40（👅: 7.5/10） 期間限定吐司即係焦糖燉蛋加厚吐司。 吐司正常，表皮脆偏硬，冇落糖漿。 上面係法式焦糖燉蛋，口感軟滑味道出色，蛋味香濃，不過好易散，吐司要連同燉蛋一齊食，如果唔係唔夠味，個人覺得如果有落糖漿會更好。 - 🌟店舖係小店經營，堂食只有2-3個位，主要外賣為主，自己去個次前面得兩個人等緊，所以等左5-10分鐘就有(即叫即做) ，晚市較多人，可能需要等10-20分鐘。 係一間非常足料嘅吐司，住附近嘅人可以一試，就味道個人覺得未到要山長水遠嚟一試。 - 👅味道: 7/10 🍴環境: 5/10 💰消費: $50 (服務費: NA)

今次介紹係長居Trip advisor香港區酒店排名第一位既奕居，奕居最出名就係佢個無敵維港窗景，日頭可以望住個景嘆下午茶，夜晚可以望住個夜景食法國餐fine dining。 - 🍰Teakha x Cafe Gray Deluxe Afternoon Tea Set💰$480/2人份 （👅: 9.5/10） 茶莊英式下午茶，Upper house 同茶家合作， Sweets 有四款，Savouries 有四款，仲有一個 scone。 1️⃣Fig, red oolong gelee 鹹點黎講，個人最鍾意羊奶芝士米餅，好重芝士味，Goat cheese 個味道喺口腔久久揮之不去，但未必啱嗰個人食，視乎食唔食得羶味，味道幾有 surprise。 2️⃣Apple blossom verbena cured salmon 煙三文魚同紅棗包都正常發揮，但兩樣嘢擺埋一齊冇好特別嘅火花，味道唔算好鹹。 3️⃣Curried cauliflower 無咩特別，冇好重咖喱味，成個 set 最冇印象既一道。 4️⃣Nduja-tomato tartlet 味道酸酸，作為開胃可以，撻皮正常。 5️⃣Chestnut choux😍 雲呢拿味嘅泡芙，泡芙外皮一咬就溶化，同出邊食到嘅泡芙完全唔同，口感滿足。 6️⃣Chamomile and buttermilk verrine😍 小小檸檬味嘅乳酪，除左水果果肉之外，咬一個類似提子嘅果肉，但輕輕一咬肉汁就爆開，雖然得一粒但為乳酪加左唔小分。 7️⃣Milk chocolate chantilly 個人唔太鍾意呢個甜點，入邊嘅朱古力餡實在太甜，搶過晒其他所有嘢嘅味道。 8️⃣Matcha basque burnt cheesecake😍 個人覺得其中一樣好食嘅甜點，抹茶味同芝士味都足夠，外皮會有少少焦皮。 9️⃣Ginger scone😍 正常發揮，雞蛋味牛油味覺得唔夠，雖然話係蜜餞糖薑，但薑味都唔係幾食到，不過搭配佢自家製嘅醬非常好食，尤其係佢個 raspberry jam，Clotted cream 正常。 - 🌟 以五星級酒店來講價錢公道，300 内。食物黎講唔錯，因為有芝士蛋糕同 scone，一定食得飽。 最出色係佢窗外嘅無敵維港景色，以食到 tea 既地步黎講算係香港數一數二，而且好在啲 seat 非常適合影相，數落去可能係 ritz-cartlon cafe100 但近窗位冇咁好影相。 ❗Café Gray Deluxe將於12月31日結業，因為呢間餐廳嘅大廚要走，遲啲再開就會係風格可能完全唔同嘅另一間餐廳。 所以六日已經 full booking，想試就要 book 平日，但唔guarantee 到有window seat，服務員話book先會有priority。 - 👅味道: 8.5/10 🍴環境: 9.5/10 💰消費: $480/2ppl for set (服務費: 10%)

今次介紹一間泰國人氣芒果甜品店，喺泰國嘅分店超過20間，就算喺泰國都成日排長龍。 - 🍜 芒果冰磚 💰70（👅: 9.5/10） 一個刨冰出面鋪滿芒果肉，上面有一個芒果雪糕。 芒果采用水仙芒，自家農場種植，好清甜，冇纖維渣滓，每一啖都好Juicy，而且每一粒芒果都好大粒，食落好有滿足感。 芒果雪糕比較甜，比芒果仲要甜，味道比一般雪糕好食。 刨冰係椰奶沙冰，入口好重椰奶味，椰奶冰磨到好似絲咁幼細，一入口就化成椰奶水，係好特別嘅質感，係食過最好食嘅刨冰。 - 除咗刨冰之外仲配上一份細份糯米飯，椰奶同埋芒果汁。 糯米飯細細份過吓口癮，唔會覺得好濟，食下刨冰又可以食啖糯米飯轉下口味。 椰奶加落去本身刨冰椰奶味更重更好食，食厭咗椰奶味又可以加芒果汁。 照顧到食死一隻味覺得厭嘅人。 - 🌟甜品舖係同另一間泰國餐廳合併，會分開淨係食泰國菜或者淨係食甜品嘅人，環境算寬敝，食甜品店員會擺一樽暖水。裝悠以木、綠色為主，仲有大象、芒果等壁畫，適合打卡。 除咗招牌芒果冰磗，仲有其他芒果甜品例如芒果冰飲，芒果糯米飯。 星期六晏晝去都唔多人唔使排隊。 - 👅味道: 9.5/10 🍴環境: 8/10 💰消費: $70 (服務費: NA) =

今次黎到美食天堂荃灣，介紹我香港最鍾意食嘅米線。 我既TOP3米線其實都係荃灣呢一區，會覺得呢間係第一名係因為佢個湯特別出色，而其他兩間係餸比較出色。 - 🍜 四味(酸辣 腩肉 醬爆豬肉丸 雞肉) 💰62（👅: 9.5/10） 店最出色唔係個湯有幾麻有幾辣，而係酸辣湯。(建議大家叫酸辣唔好叫正常辣) 酸辣湯既酸辣比例大概係8:2，食落其實唔算辣，而且酸辣得一種辣度，所以唔食得太辣或者好鍾意酸辣既人可以一試。 呢種酸未到以前尖沙咀星林居個種酸到皺眉既酸，但就好夠味一啖接一啖，而且飲一啖湯就知佢個湯非常足料，唔同你慳; 每啖湯都會食到辣椒子同肉碎，再加上大量酸菜，基本上食哂米線個湯仲係好多料，會好想飲哂啲湯！ 聽姐姐話酸辣個湯先會咁多料，我就無試過正常辣，因為由我第一次食到呢家都只係叫酸辣。 雖然食一碗要5、60蚊，但份量同質數絕對值呢個價。 - 米線正常發揮，偏軟小小但唔會話太過淋，吸湯能力高。 腩肉本身帶小小辣，肉質偏瘦，如果鍾意食肥肉可能會覺得一般。 雞肉薄切一塊塊，唔會太榎，相對數量多，個人幾鍾意呢種雞肉。 醬爆豬肉丸數量雖然小，不過入面既餡好夠味，食落好滿足。 - 🌟環境係一張張圓枱，基本上都一定要搭枱食，每逢夜晚都會有一條5-20人既人龍，不過人流算去得快，平均10-20分鐘就入到。 通常會有個姐姐，幫排緊隊既人落地單，入座坐低後通常5分鐘內就會有得食。 MENU比較亂，酸辣會計一個餸，通常我都唔睇MENU價錢咁叫，直接叫想食既餸。 - 👅味道: 9.5/10 🍴環境: 6/10 💰消費: $40-70 (視乎叫幾多個餸) (服務費: NA)

呢間係我香港最鍾意食嘅拉麵 個人食拉麵第一會睇湯，第二睇麵，只要個湯煮得好，落公仔麵都好食。 呢間黑龍，係沖繩風味既拉麵店，將家鄉那霸市拉麵店「夢ノ弥」引入，湯底用上沖繩食材熬製十幾個鐘，連水都係用沖繩。 招牌黑龍豚骨拉麵，牛筋black拉麵 🍜 黑龍豚骨拉麵 💰88（👅: 9.5/10） 店主打豬骨湯底，非常濃稠竭身，比一蘭個種再竭，香港既豬骨湯黎講應該係最濃，鍾意濃湯底或者重口味就會非常鍾意食。 豬骨味重，係會想飲哂既豬骨湯，但因為重味飲哂要飲返啲水，店鋪另有提供清湯比客人稀釋個湯。 可加辣醬，唔食得辣可能會覺得辣，但辣醬唔係死辣，係為湯加分既辣。 麵質係細麵直麵，麵同湯好夾，非常掛湯，個人食拉麵鍾意食硬麵，硬麵沾滿濃湯食落去既口感非常滿足。 豚肉有兩塊，偏柴一啲同味淡，無特別加工， 但因為浸左落咁濃既湯，會加重返個味道。 流心蛋正常發揮。 配料除左紫菜，葱，仲有拉麵湯好小加既蒜頭，蒜頭擺落呢個豬骨湯入面，完全係錦上添花。 份量正常，由於麵掛湯，食完已經食左唔小湯，足夠飽肚，唔夠喉可以加麵食埋剩低既湯。 細麵直麵，非常掛湯 環境唔算闊落，好經典拉麵鋪bar枱加幾張枱，門口有一大盞日本燈籠，幾有日本風味。 除左黑龍豚骨拉麵，牛筋black拉麵同樣係店鋪招牌，不過個人唔太鍾意食牛筋所以冇叫。 店舖除咗有拉麵亦都有沾麵，沾麵同樣好食不過留返下次再介紹。 拉麵係一種好講個人口味嘅嘢食，個湯濃定淡，面係硬定遠，直身定曲身都各有所愛。 雖然個人好鍾意食濃湯直麵，即係偏向九州式嘅拉麵，但只要個湯食得出係落足心機去煮而且夠味，其實都唔會太介意麵質或者餸同配料。 - 👅味道: 9.5/10 🍴環境: 7/10 💰消費: $88-110 (拉麵,沾麵) (服務費: NA)