呢排終於感受到秋天嘅感覺，所以係時候係打邊爐嘅季節，今次介紹咗呢一間係新加坡嘅過江龍，除咗招牌嘅美人湯，佢哋嘅粉紅色裝修都係大家到訪過啲原因。

美滋鍋係一間喺旺角家樂坊嘅火鍋店，喺新加坡嘅過江龍，喺新加坡樂天餐飲集團旗下，係新加坡非常人氣，喺19年插旗香港，火鍋店以粉紅色為主題，湯底集多國特色，好似有日式Shabu-shabu、四川麻辣、台灣藥膳等。餐廳叫美滋鍋，係因為想打邊爐都可以食得健康，尤其係佢個招牌湯底係膠原蛋白養顏美容鍋，飲落去清甜養生。餐廳最吸引人，就係佢嘅粉紅色裝修，入到門口就見到一隻巨型粉紅色嘅啤啤熊，入邊都係以粉紅色為主，好啱打卡。餐廳空間感十足，枱同枱之間距離都闊落，環境夠乾淨，燈光夠明亮。枱底仲有叉電，櫃桶仲有紙巾，而火鍋爐都有抽風功能，吸走油煙。
而且入邊仲有室內兒童遊樂場，啱晒一家大小。餐廳係用平板落單，圖文並茂，非常方便，隔離仲有沙漏俾大家計時。
-
1️⃣ 醬料 💰20pp（👅: 8.5/10）
1️⃣ 小食 （👅: 7.5/10）呢度出邊會有自助區，分別會有醬料同埋小食，醬料種類有廿幾款，而且牆上面會有一啲推介嘅配搭，非常類似海底撈。我自己覺得花生味碟係幾好，另外依度有海底撈，我最鍾意嘅菇醬，所以成日會就咁匀來食。小食方面除咗有生果好似橙、火龍果、西瓜、哈密瓜，仲會有餐前小食，好似花生、雲耳、冬菇、涼拌青瓜，全部都係無限添食。
-
1️⃣ 膠原蛋白養顏美容鍋(鴛鴦鍋) 💰128（👅: 8.5/10）
酸菜魚鍋(鴛鴦鍋) 💰98（👅: 8/10）湯底方面，佢可以揀一個鍋、鴛鴦鍋或者四格，所以同海底撈好相似。我就揀咗鴛鴦鍋，一邊係佢招牌嘅膠原蛋白養顏美容鍋。店員建議煲滾左可以匀湯嚟飲先，湯底係奶白色，睇落去濃稠，可以見到紅棗、杞子、豆腐、香菇、松茸，入邊其實係花膠豬骨湯做底，仲用咗瑤柱、雞肉、雞腳、豬骨、豬手等多種食材熬製，飲落去好鮮甜，係鮮甜嘅雞湯味，帶少少藥材味，煲耐左膠質更加明顯，而且加水都係加返呢個湯，而唔係加水。啱晒女士滋補，又可以補充骨膠原，飲幾碗都唔會覺得口渴。而配料方面，豆腐入口非常滑。

至於酸菜魚鍋係佢之前新推出嘅，湯底用四川酸菜、指天椒、紅花椒、青花椒等材料長時間熬製，叫咗中辣，飲落去我覺得係譚仔嘅二小辣到小辣，所以唔食得辣嘅人應該要叫小辣，飲落去係酸味同埋辣味同時突出，唔係後勁嗰種辣，麻味就要飲多幾啖先會有後勁，唔好以為加水就冇咁辣，佢其實會越煲越辣，花椒味會更加出。入邊嘅酸菜份量都幾多，而且食起上嚟都夠酸。另外佢嘅生魚會分開上，店員建議淥15秒就得，魚肉比較厚身，入口偏實小小，不過算小小滑溜，無骨，浸15秒已經好入味。

而呢個鍋非常入味，無論係淥肉類定係其他食材，都可以食到酸菜魚湯嘅味道。
-
2️⃣ 精選牛肉拼盤 💰288（👅: 8/10）牛肉拼盤分別有五款牛肉，有安格斯牛小排、安格斯封門柳、美國牛板健、巴西牛舌、美國牛丁，店員仲會倒水入去乾冰，打卡一流。
除左美國牛丁建議淥40秒，其他淥8秒就可以。

牛肉全部都夠新鮮，當中最鐘意係安格斯牛小排，油花分佈平均，入口係最軟嫩，食落油脂甘香，帶小小牛味，齒頰留香。

至於封門柳咬落係有嚼勁個種，肉味係最濃一款。

牛板腱算係牛味同油脂平均，比封門柳嫩腍小小，帶嚼勁。

巴西牛舌夠薄身，咬落爽彈，食落小小肉味。

️肥牛丁好似骰仔牛，係有咬口個種，部份會有筋，食落油脂好突出，我自己略嫌油脂太勁。
-
3️⃣ 餃子綜合盤 💰98（👅: 9/10）餃子綜合盤有自家製鮮蝦水餃、韭菜餃、蝦卷、豬卷，每隻餃好飽滿好足料。

當中最鍾意係韭菜豬肉餃，呢度既皮都算薄，似雲吞皮，入口嫩滑，食薄去韭菜味突出，入面既豬肉好似醃過咁，非常入味，係我食過數一數二好食既韭菜豬肉餃。

珍寶鮮蝦水餃內餡一樣紮實豐滿，入面有粒粒蝦肉，咬落夠彈牙，食落鮮味十足。

蝦卷同豬肉卷係長條形餃子，入面既餡料一樣係好飽滿。食完覺得佢係比火鍋耽誤既餃子店。
-
4️⃣ 丸子綜合盤 💰98（👅: 8.5/10）
丸子綜合盤入面有蝦丸、牛肉丸、墨魚丸、豬軟骨爽肉丸，全部都係手打。

最鍾意係墨魚丸，真係咬到一粒粒墨魚，非常彈牙，食落鮮甜，如果係芝士版應該更加好食。蝦丸同墨魚丸一樣咁彈牙，有蝦肉本身既鮮甜味。

軟骨爽肉丸係豬肉丸，滑身得黎有軟骨爽口既口感，食落豬肉味香，調味得宜。
-
5️⃣ 炸響鈴(半份) 💰25（👅: 8/10）炸響鈴夠大條，咬落都算酥脆，擺落呢兩個湯都好入味，唔會太油膩。
-
6️⃣ 鮮准山(半份) 💰19（👅: 8/10）
鮮准山夠新鮮，入口爽口，而且都算入味。
-
7️⃣ 自制水果紅茶 💰25（👅: 8/10）飲品有三款，女朋友叫左水果茶，可以無限添飲，茶壺幾靚，飲落幾香，有水果味但又唔會太甜。
-
8️⃣ 竹蔗茅根 💰25（👅: 8/10）我就叫左竹蔗茅根，可以無限refill，飲落去清甜解渴，唔會太甜，店員都好主動refill，真係好抵飲。
-
🌟整體我覺得呢度嘅模式好似海底撈，無論係醬油定係湯底方面，不過食物質素比起海底撈都要高質，無論牛肉、餃子、丸方面都係比海底撈好食，當然佢個價錢都會比海底撈貴，偏中高價既火鍋。另外餐廳粉紅色為主題，好打卡，而店員服務方面幾好，今日會主動refill飲品，亦都會主動加湯。而且餐廳開到12點，我係平日夜晚去，唔算滿座，有人10點幾入嚟Walk in食都得。我7:30食到差唔多10點，都冇俾人趕走，所以係可以慢慢食嘅一間火鍋店，可能假期會多人啲就有時間限制。

同埋聽講佢有好多唔同嘅優惠，例如喺OpenRice 定位有六折到八五折嘅優惠，聽講分享同女性朋友用餐嘅相去FB/IG 會有免費特上牛魔皇拼盤，同埋逢星期一到訪美滋鍋，女士可獨家獲得Moon lady特飲同綠野仙蹤蔬菜拚盤1份，計埋優惠，係好值得到訪嘅一間火鍋店。
-
👅味道: 8/10
🍴環境: 8/10
💰消費: $300-400 (服務費: 10%)

從來都冇寫過一篇負評，因為出食評就係諗住介紹我覺得好嘅餐廳，平時食到覺得唔好食嘅餐廳會直接唔介紹，因為唔想可能係自己口味唔同既原因，令到餐廳連平反、進步、改善嘅機會都冇。 不過對於服務唔好嘅餐廳，我冇咩容忍度，因為唔想大家入到去中伏，幾好食嘅餐廳，冇服務嘅話，都係唔值得回訪。 話說今年諗住買月餅，其實我本身都買咗五、六間，女朋友諗住買月餅俾我屋企人，最尾就揀咗呢一間，因為呢間中菜點心本身都有啲想食，而且有見過Hailey介紹。同埋見到佢嘅口味去陳皮豆沙，幾特別嘅月餅口味，同埋估計我屋企人應該會鍾意呢種傳統月餅，所以最後就揀咗呢間。 於是我哋就喺8月26號星期五夜晚去攞月餅，因為見到佢喺IG 8月3號出嘅post係寫11點至7點可以攞月餅，佢email上寫嘅都係一樣時間，咁我哋就諗住七點前攞完月餅就可以攞俾屋企人，不過我哋18:30去到餐廳嗰時見到嘅係相中情況。 餐廳一個人都冇，而且熄咗燈，因為餐廳冇門口，只係用一個帶圍住，心諗email唔係寫七點？點解會閂咗門？跟住睇到OpenRice話餐廳係收六點，就一頭霧水。於是我哋即刻打佢IG同埋email上面嘅熱線，但係冇人聽，當刻覺得好似被愚弄，如果你餐廳收六點，點解你IG同email上面係寫七點，但一個人都冇，而且又冇人聽電話，呃咗一個特登嚟攞月餅、諗住即日送俾屋企人嘅人黎中環。 我當刻好嬲，所以就喺IG出咗Story tag餐廳，不過餐廳冇回應過，而我女朋友都有喺佢哋嘅IG post問，而且有出email問究竟餐廳係開幾多點。 餐廳當晚就回覆咗我女朋友，不過餐廳第一次回覆我哋只係道歉同埋地四個人提供一個tea tasting event，其實我唔想受佢哋恩惠，因為我只係想來攞月餅，如果接受咗佢哋嘅tasting，咁我係咪應該再出story同埋食評去反映真實情況。 不過餐廳始終冇正面回覆我哋究竟幾多點可以攞月餅，所以之後我哋回覆我哋唔得閒去tasting，重新再問一次係咪當時OpenRice上寫嘅營業時間(10-6)先係攞月餅嘅時間。(因為發覺佢哋係呢件事之後，喺OpenRice上寫嘅營業時間偷偷地改咗做10-7。) 之後餐廳回覆我哋嘅係，營業時間係10點到7點，6點係last order。 雖然我仲好嬲點解餐廳冇解釋點解七點前去到係冇人，亦都冇解釋點解電話冇人聽，但我女朋友選擇再相信佢一次。 所以喺9月1號我再次嘗試去攞月餅，當日我6:40去到餐廳，但我見到嘅情況係一樣:餐廳一個人都冇，而且都係比條帶圍住，分別只係入邊啲燈仲開緊(其實我冇留意到究竟燈有冇熄，只係睇返相先至第一次有熄，第二次無熄。而喺佢哋門口場上寫嘅營業時間一樣係10點至6點。 我再次感到俾人玩弄，嘗試打電話去熱線，都係冇人聽，餐廳已經喺電郵回覆咗係可以七點前攞月餅，咁點解今次又係一個人都冇？我見到條帶下邊有一盒月餅，唔知係display定係就係我嗰盒月餅，但我當然唔敢入去攞，因為佢已經用條帶圍住，我入去會俾人誤會我去偷嘢。 攞唔到月餅，我當然好嬲好失望，女朋友當刻都唔想再俾機會，出咗個email俾餐廳，想取消訂單同要求餐廳退款，直接買另一間月餅。 之後當晚我女朋友就收到電話，係餐廳嘅經理打嚟，佢話睇相見到燈未熄，係其實入邊仲有人，只係喺入邊埋緊數，又話其實都有顧客同我哋一樣，嚟到餐廳見到燈未熄，就行入去，結果就搵到埋緊數嘅佢哋，就可以攞到月餅。所以佢叫我哋下次攞月餅可以出email通知佢哋先，咁佢會安排一個人喺餐廳，或者直接打佢呢個經理嘅電話。 我女朋友當刻被說服左，所以心諗就算，唔再退款，但我真係冇辦法忍受。最後我喺星期六嘅晏晝去攞月餅，結果我要三顧草廬先可以攞到一盒月餅，對於餐廳嘅回應同做法好失望。 第一，我點樣判斷餐廳係收咗定係仲開緊？淨係靠有冇熄燈？但你已經用條帶圍住間餐廳，咁我理論上係唔應該入嚟，其他顧客夠膽入嚟，但我唔夠膽，咁點解你唔解開條帶，俾多啲訊息大家餐廳係未關門？見到呢條帶，同埋一眼望晒餐廳一個人都冇，我正常嘅理解就係餐廳已經關門。 第二，你都識講有其他顧客都係同樣情況，咁點解你唔直接安排一個人坐喺counter坐到七點？即使你唔安排一個人喺出邊安排交收月餅，咁點解你個熱線喺六點到七點係冇人聽？咁個熱線作用係咩？埋緊數就可以唔聽電話？如果個電話六點到七點係冇人聽，點解你唔喺email或者IG post度寫清楚？ 第三，我哋第二次寫email要求退款，你先直接打電話回應，咁點解唔係第一次就回覆我哋，話可以直接行入嚟餐廳入邊搵埋緊數嘅你哋，即使餐廳嘅門口俾條帶圍住，又或者係第一次就俾經理嘅電話我哋？ 第四，我喺出呢一篇食評嗰時，見到OpenRice嘅營業時間偷偷地改咗去七點，係因為心虛？想我死無對證？但我一早影咗相，喺餐廳嘅門口係寫營業到六點。 其實我唔係要求有咩補償，我只係想餐廳第一次就正面回應我，同埋喺交收月餅嘅過程做得好啲，email同埋IG嘅指引清楚啲。如果IG post或者email寫六點餐廳就關門冇月餅交收，咁我就唔會平日特登過嚟。即使個月餅幾好食都好，我都已經對呢一間餐廳完全失望。

大家平時食Omakase通常都係食壽司，但大家有冇食過雞、豬、牛、甚至係蟹嘅Omakase？今次介紹嘅呢間新餐廳，就係用新鮮食材，為大家提供唔同主題嘅Omakase。山喺銅鑼灣一間新開嘅日本菜餐廳，主打唔同主題嘅Omakase，主題按食材劃分左六個，分別有雞、黑豚、和牛、海之幸、魚同蟹，當中以蟹為最受歡迎嘅套餐。而餐廳係以日本山林為主題，裝修用上柔和嘅淺色木系，令人感覺舒適，而且係餐具、擺盤、石燈、玻璃都係同用色配搭一致和諧，一入到去就感受到喺日本餐廳嘅氛圍。
-
🦀 蟹 Omakase 💰1388pp
今次叫咗佢就係最高人氣嘅蟹 Omakase，套餐係用咗特選毛蟹、松葉蟹、鱈場蟹、大閘蟹等時令靚蟹，用唔同嘅炮製方式，烹調唔同嘅蟹料理，總共有9道菜。
-
1️⃣ 先付け - 毛蟹柚子啫喱 （👅: 8/10）第一道前菜係人手將北海道毛蟹拆肉，上面再鋪上用魚膠粉同埋蟹醋做嘅柚子啫喱，蟹肉咬落去有少少肉汁，食落去鮮甜，加上柚子啫喱，食落去酸甜，幾開胃。
-
2️⃣ 前菜 - 雲丹明太子白海老 （👅: 8/10）之後係用明太子伴白海老做下層，上面再加上明太子同埋鱘魚子，白蝦用咗富山灣產白蝦，咬落去比較腍，帶黏口同膠質，海膽食落去唔算醒，加上千島湖鱘魚子同北海道明太子既鹹香味同小小辛香，鮮味十足。
-
3️⃣ 吸い物 - 蟹岀汁 （👅: 7.5/10）之後嘅湯汁係用利尻昆布同磨成粉既蟹殼淆成，再加入蓮藕粉、木棉花、松葉蟹肉，飲落去係清甜，好暖胃，蟹肉份量算慷慨，令到口感更加豐富。
-
4️⃣ お造リ- 季節刺身三味 （👅: 7.5/10）之後既係季節刺身，分別係牡丹蝦、深海池魚、帆立貝，攞上枱嗰時仲有乾冰煙霧效果，非常打卡。

帆立貝夠厚身大粒，咬落爽口，食落清甜。深海池魚入口軟稔，食落魚味算濃。牡丹蝦一樣夠大隻，入口帶膠質。
-
5️⃣ 揚げ物 - 釀上海蟹蓋 （👅: 8.5/10）之後係一個炸物，用上大閘蟹同松葉蟹兩款蟹肉，入邊再加洋蔥，甘荀，冬菇做調味，上邊嘅係蟹醬，夠熱辣辣，咬落去係啖啖蟹肉，外酥內軟，而且加上冬菇、洋蔥碎、甘筍碎，鹹甜得宜，口感同味道層次豐富。
-
6️⃣ 箸休め - 季節雪葩 （👅: 7.5/10）之後係一個間場既柚子雪葩，加上少少檸檬皮，香氣濃郁，食落去酸酸甜甜，清爽唔會太甜，清新一下味蕾。
-
7️⃣ 燒き物 - 燒鱈場蟹拌雲丹鱘魚子  （👅: 8/10）之後係一個燒物，上枱嗰時店員會攞上陶器甖，打開嗰時可以見到係一個用藁草煙燻既菜式，打開個時聞到好香嘅藁草味，入邊分係一個，北海道鱈場蟹腳同加上海膽燒製嘅蟹腳，一邊可以食到原味蟹腳嘅鮮味同濃郁既煙燻味，另一邊加上火炙海膽同鱘魚子醬，加上熟悉既鹹香味，味道層次感增添唔少。
-
8️⃣ 食事 - 蟹粉拌烏冬 （👅: 8.5/10）最後嘅食事係一個用松葉蟹芡既稻庭烏冬，另外上一個大閘蟹煮成既蟹粉，蟹膏份量唔少。倒入去烏冬再攪勻，烏冬非常掛汁，咬落煙韌彈牙，每一啖烏冬都掛滿左蟹醬，食落去係啖啖蟹粉香味，鹹香味突出，再加上蟹肉絲，鍾意蟹粉嘅你一定會鍾意。
-
9️⃣ 甘味 - 無花果椰子雪糕拿破崙 （👅: 8/10）最後以一個甜品做作結，由前五星酒店既甜品大師製造，係一個入邊係椰子雪糕忌廉、上邊係無花果嘅拿破崙，拿破崙咬落去算酥化，配上輕而不膩嘅忌廉，食落有淡淡既椰子味，唔會太甜，兩者一齊食，忌廉融化係酥皮，非常滋味。
-
🌟整體以蟹做主題嘅Omakase，呈現方式幾新鮮，食物菜式整體都夠新鮮，當中比較有驚喜嘅係釀上海蟹蓋同蟹粉拌烏冬，不過如果大食嘅人，可能呢個套餐會有啲唔夠。
每一道菜店員都會好細心介紹，環境上都坐得幾舒服，喺銅鑼灣嘅鬧市入面，如果可以坐到吧枱，就可以欣賞到師傅既烹調過程，同埋可以同師傅有更多嘅交流，不過吧枱嘅位置偏小。下次可能會想試吓黑豚或者魚、蝦。
-
👅味道: 8/10
🍴環境: 7.5/10
💰消費: $1388 pp (服務費:10%)

大家可能認識Gordon Ramsay，不過大家又知唔知佢嘅師傅Joël Robuchon？佢係全世界攞得最多米芝蓮星星嘅主廚，被稱為法國料理之神，而今日介紹嘅就係佢旗下、喺每個國家都差唔多攞到米芝蓮星嘅連鎖法國菜餐廳。L’Atelier de Joel Robuchon喺一間喺香港連續攞咗11年米芝蓮三星嘅法國菜餐廳，由2012年去到今年，亦都曾經係亞洲50最佳餐廳，可以話係香港最具代表性嘅高級 fine dining 法國菜。

被稱為法國料理之神既主廚Joël Robuchon，曾坐擁35顆米芝蓮星星，佢曾經教過Gordon Ramsay。主廚其實喺13歲嗰時係立志成為一位神父，所以之前喺修道院幫啲修女煮餸，佢覺得依個係神嘅召喚，所以係15歲嗰時就立志想成為一個廚師，喺佢38歲就打破咗最年輕攞米芝蓮三星嘅紀錄。雖然主廚過咗身幾年，但佢呢個傳說都係一直延續，餐廳採用食材搭配優秀，服務頂級，提供一個一流嘅FineDining體驗。

餐廳可以透過電話預約，依家亦都可以喺網上預約，基本上如果係星期六日，要兩三個月前預約，平日可能可以執到一個月嘅booking，訂位個時就要比訂金，每人500。餐廳喺置地廣場，可以喺置地廣場3樓上4樓，喺地下其實都有專屬嘅升降機去到。餐廳有分L'ATELIER同LE JARDIN，前者喺法文係解工作室，後者係解花園，前者其實係坐喺一個Bar Counter，有大概30至40個位圍住個開放式廚房，後者就好似正規 Dining Table，大概有8至10張枱，真係可以望住平台花園嘅座位。我自己鍾意前者，因為佢可以望到廚師嘅製作過程，氣氛比較親切但又不失高雅，而且可以叫到一份特別嘅Menu後者就比較有空間感，枱與枱之間距離充足，隱私度十足。餐廳同平時嘅米芝蓮餐廳好唔同，一入到去就可以見到招牌嘅紅色同黑色做主調，時尚簡約但有格調，配上幽暗嘅燈光，突顯光猛嘅開放式廚房，雖然冇好似香港其他樓底好高、空間感好大嘅華麗法式格局，冇好浮誇嘅水晶燈、銀器，但佢就係帶有時尚感，平實又摩登，就連防疫嘅隔板都係用紅黑色。

呢度嘅廚師都係着返黑色，襯返呢一個環境，呢一點非常之細心。

如果你係慶祝生日或者特別節日，可以要求預約一個蛋糕。
-
1️⃣ Lunch Menu 💰690/790/990呢度嘅餐牌有兩款，如果你係坐吧枱就會有第一頁，佢係一個Special Tasting Menu，將佢10幾道嘅招牌菜用small portion呈獻，價錢方面都會平啲，大約二百幾至三百幾。至於其他Menu就坐邊度都有，Set Lunch Menu有3個價位供選擇，個分別就係一個係揀前菜或者湯，一個係一個前菜一個湯，最後一個係有兩個主菜，全部都會包甜品加咖啡。另外會有A La Carte Menu、signature tasting menu、dessert menu 同drink menu。

今次我介紹嘅係Set Lunch Menu同Special Tasting Menu，Set Lunch Menu入邊嘅前菜同主菜會成日換，如果食唔到想食嘅招牌菜可以喺Special Tasting Menu度揀，基本上呢兩個Menu可以試到八、九成嘅招牌菜。
-
1️⃣ Bread basket （👅: 8.5/10）呢度嘅麵包籃可以話係咁多間餐廳份量同種類最誇張，因為佢有接近10款麵包，例如有brioches、法包、croissants、sourdough、咸火腿麵包棒、果仁包、comté cheese bread、baguettes等，見到令人心花怒放。

麵包每個比較迷你，食落去麥味唔算突出，係有少少鹹香味加上豐富嘅牛油香，略嫌油膩左點。

咁多款最鍾意迷你牛角酥、芥末煙肉包同芝士包，牛角酥算鬆化，牛油味重，咸火腿麵包棒咬去脆口，食落有鹹香味，芝士包一樣食落有鹹香味。呢度嘅牛油係室溫，食落去有鹹味，係我最鍾意嘅牛油，因為佢會令到麵包嘅味道昇華，不過呢種牛油最出色嘅係喺petrus。

記住唔好食晒呢度個麵包，因為要留肚食之後嘅嘢，麵包可以打包，店員喺你走嗰時打包俾你。
-
1️⃣ Amuse Bouche （👅: 8/10）七月份嘅Amuse bouche係西班牙凍湯配日本日本士多啤梨，會將茅屋芝士雪凍成一粒粒好似雪糕咁嘅形狀，上枱個時有煙霧離漫嘅效果，真正嘅入口即化，舌頭嘅溫度令到芝士溶化係個口入邊，加上士多啤梨凍湯，食落去酸酸甜甜，非常開胃，真係啱晒夏天。
-
Appetizers
1️⃣ Le Caviar Imperial +💰280 （👅: 9/10）
前菜首先介紹佢哋嘅招牌，係經典蟹肉魚子醬配上龍蝦湯啫喱，呢一款間中會係lunch Menu見到，不過就一定會喺speical tasting Menu見到，店員介紹佢會有三種嘅呈現方式，我好好彩第一次就食到佢最經典嘅呈現方式，就係係一隻大嘅白碟，另一個係用一個透明杯，最後一個係會用一個魚子醬小盒，上面就會鋪滿魚子醬。菜式底層係龍蝦湯啫喱，中間挖空放入阿拉斯加蟹肉，鋪上魚子醬後加金箔點綴，之後再加上椰菜花忌廉同香草蛋黃醬，一入口質地細膩， 單品嚐魚子醬鹹鮮味重，龍蝦啫喱咬落爽滑，食落係香鮮，阿拉斯加蟹肉入口軟嫩，食落鮮甜，配角椰菜花忌廉帶小小清甜，不過當三層一齊食，層次分明，三重口感，味道層次豐富。一般食魚子醬嗰時會覺得魚子醬個味道會蓋過一切，不過呢度係用阿拉斯加蟹肉加上龍蝦湯啫喱，啫喱會稍微中和左魚子醬嘅味道，所以食起上嚟冇咁鹹，蟹肉會吸收魚子醬嘅味道，各種食材配搭起嚟，配合得天衣無縫，唔會相互搶大家風頭，味道非常之順口，會一啖接一啖，齒頰留香，真係會想將隻碟舔乾淨。

如果要挑剔就係魚子醬菜式無提供貝殼湯匙，而係用金屬湯匙，因為用普通材質匙羹可能會破壞魚子醬嘅味道。
-
2️⃣ Le Foie Gras （👅: 8.5/10）呢一個前菜喺Special tasting Menu都有，唔係用Foie Gras Terrine呈現，而係以Chicken Galantine 嘅方式上菜，雞肉同鴨肝經過慢煮，入口係偏硬身，食落去本身有少少油膩，配上黑松露醬同埋沙律，可以中和一下鴨肝既油膩感。
-
Hot Soups
1️⃣ Les Crustaces +💰120 （👅: 9.5/10）
呢一度可以話係全間餐廳我最鍾意嘅菜式，喺Special tasting Menu都有。呢個法式馬賽魚湯係用上日本松葉蟹、龍蝦同海鮮餚成，旁邊伴以脆米蝦球同墨西哥辣醬。龍蝦湯飲落去鮮甜，又帶龍蝦嘅鹹香味，濃烈到非常衝擊，如果唔鍾意重口味嘅人可能會覺得太鹹，但我就會忍唔到一口接一口咁飲。入邊仲有唔少嘅龍蝦肉粒，咬落去結實，入面嫩滑，不過龍蝦湯嘅味道比起龍蝦更加重，濃到好似係用十幾隻龍蝦餚成，係我香港飲過最濃嘅龍蝦湯。

隔離嘅炸蝦球咬落香脆，不過對比起龍蝦湯就比較普通啲。
-
Mains
1️⃣ Les Spaghettis +💰150 （👅: 8/10）第一道主菜係呢度嘅招牌龍蝦意粉，呢度招牌菜反而係用最簡單直接嘅方法去表達。

意粉幼身，煮到Al dente，咬落去彈牙，不過可惜唔係手工意粉，龍蝦汁用黃酒、蝦膏去煮，質地比較輕身因為冇用忌廉，食落去有龍蝦鮮味，意粉唔算掛滿龍蝦汁，因為醬汁質地比較稀，加上魚子醬，層次豐富左，不過我覺得龍蝦湯個味會再濃啲，重口味嘅我覺得醬汁味道比較淡啲，而龍蝦肉用咗一隻波士頓龍蝦，夠厚身大嚿，咬落去彈牙，生熟程度啱啱好，食落鮮甜，我覺得龍蝦肉做得比龍蝦汁出色。
-
2️⃣ La Caille +💰100（👅: 9/10）呢一樣招牌菜係世界各地好多robuchon嘅分店都有，係一道鵝肝釀走地鵪鶉，份量唔少，有三塊鵪鶉胸肉同一隻鵪鶉腿。

鵪鶉腿既外皮夠薄身，咬落夠脆，入邊嘅肉夠粉嫩，咬落去係偏紮實帶爽口，夠juicy，肉汁鎖左係肉入面，因為係free range鵪鶉，每日有段時間可以走地，肉帶小小羶味，不過醬汁食落去偏甜，同鵪鶉非常之夾。

但呢度菜好食在於廚師將鵪鶉胸去骨，釀入鵝肝mousse，慢煮之後再煎香外層，絕對係心機之作，加咗鵝肝嘅鵪鶉胸，鵝肝夠肥美，煎得外層香脆，咬落柔軟，因為鵪鶉胸肉偏瘦，一肥一瘦，兩者相輔相成，味道非常之夾，口感更豐富，唔細心啲食根本分唔出入邊係有兩種食材，係兩者平衡得非常好嘅一道菜色，因為法國菜最主要嘅精髓就係平衡。
-
3️⃣ Le Porc Iberique （👅: 9/10）呢個係用西班牙黑毛豬，用鐵板煎到半生熟，店員話呢一種係最高級嘅黑毛豬，因為佢係食食橡果，因為佢係medium rare，咬落去好嫩滑，而且肉汁夠多，食落去豬肉味道突出，油脂唔會話太重，好食嘅程度絕對唔會輸比牛扒，即使係隔離嘅蘑菇，都比預期中好食，尤其係下便嘅粟米粥，第一次食非常有驚喜，有啲似芝士但係係粟米嘅味道。
-
🥔 Mashed Potato （👅: 9.5/10）主菜都會配Robuchon最出名即招牌薯蓉，大廚研發呢一個薯蓉係試咗廿幾款薯仔，最後決定用一款喺法國北部出產嘅La Ratte薯仔，直到宜家都係用呢一種薯仔，因為佢口感絲滑，帶好似栗子嘅香味。

入口非常幼滑，完全唔會見到任何粒粒，入口都係無顆粒感，係食過最綿密既薯蓉，好似食緊mousse咁，但又保持適當嘅濕潤度，牛油味道非常濃，每食一啖好似食緊幾盒牛油咁，但食落去又唔會覺得膩，反而係想一啖一啖食晒佢，但佢嘅薯香同埋奶香係平衡得完美，無論食幾多次都係覺得好有驚喜，雖然佢嘅食譜已經大為廣傳，用四種材料同50分鐘就做到，但佢嘅技術就唔係個個都做到，絕對係人生食過最好食既薯蓉。
-
Special Tasting Menu
1️⃣ Le burger 💰340（👅: 8.5/10）呢一份係一個鵝肝牛肉漢堡，牛肉用上鹿兒島和牛，漢堡大細恰到好處，一人一件啱啱好。

未食已經聞到鵝肝嘅香味，睇落去冇咩特別之處，一咬落去非常香口，麵包有烘過，軟硬適中，鵝肝夠肥美，咬落去係軟嫩無筋，而且多汁牛肉係非常粉嫩，咬落去juicy唔乾身，食落去肉味重，整體係好juicy，因為份量唔多話所以食起嚟唔算好膩。

薯條係將薯仔手切成比較細條，配合返迷你漢堡，不過食落去就比較普通，因為唔夠脆身，可能因為薯蓉太出色，配搭薯條嘅係薑味茄汁，不過食起上嚟都冇咩驚喜。
-
Dessert
1️⃣ Le Chocolat （👅: 9/10）第一款甜品係榛子醬朱古力慕斯配伯爵茶雪糕，第二次先食到，不過幾有驚喜。甜品嘅外型好似玻璃球盤景，打碎上面嘅朱古力就可以食。

朱古力慕斯入口即化，夠creamy，食落味道濃郁，朱古力味道一直停留喺口腔，久久揮之不去，加上焦糖化左既榛子醬、朱古力脆脆同埋附近嘅果仁，口感非常豐富，最有驚喜係個雪糕食落去伯爵茶味突出，可以中和一下朱古力嘅濃郁。整體所有組合都好夾，層次豐富，鍾意朱古力既人絕對推介，不過如果一個人食晒就會覺得有啲甜，適合同人share。
-
2️⃣ La Pomme （👅: 9/10）Lunch Menu上面嘅甜品，我最鍾意嘅一款，係燴蘋果配雲呢拿雪糕同蘋果酒雪葩。

Apple Tatin絕對係一個好考技術既甜品，因為需要將蘋果切到一片片非常薄身，蘋果咬落去非常軟身，食落去蘋果味道濃郁，酸甜交集，蘋果肉食落清甜，蘋果白蘭地酒雪葩絕對將蘋果嘅香味倍添層次，加上雲呢拿雪糕，整體唔會太甜，平衡得非常之好，如果要挑剔就係餅底偏硬少少。
-
3️⃣ La Framboise （👅: 8.5/10）呢個甜品係開心果慕絲配紅桑莓雪葩同脆脆，翠綠色嘅開心果慕絲呈半圓形，上面放咗紅色嘅紅桑莓，隔離仲有紅桑莓雪葩，顏色分明，賣相唔錯。

開心果慕絲咬落厚身，入口香滑，不過食落開心果味道唔算突出，反而杏仁味比較突出，上面嘅紅桑子食落去比較酸，幾適合中和一下主菜嘅濃味。

紅桑子雪葩酸味都幾突出，唔係個個可以接受，不過如果唔鍾意食甜嘅甜品，咁呢個就會好適合。
-
4️⃣ Petite four （👅: 7.5/10）七月嘅Petite four係馬卡龍同咖啡朱古力，我覺得兩者都比較甜，朱古力嘅咖啡味幾重，不過馬卡龍比起朱古力更加甜。
-
La Carte Des Desserts
1️⃣ Le Soufflé 💰220 （👅: 9.5/10）
跟住就揀咗喺La Carte既甜品，全部都係$220一份，我就叫咗呢度嘅招牌Soufflé，即叫即焗所以要等20分鐘。Soufflé整到好完美，熱辣辣要趁熱食，外表夠滑溜，冇任何裂紋，夠高身，外層咬落去脆，入面入口即化，非常軟綿蓬鬆，擺係口腔會溶化，極輕身輕盈，空氣感十足，入邊係夠濕潤，但又唔會過分嘅濕潤，口感拿捏得啱啱好，食落朱古力味道濃郁醇厚，同時蛋香味重，朱古力唔會過甜，都唔會死甜，亦都唔會話有好重苦澀味，係絕對可以接受嘅苦澀味，隔離嘅朱古力sorbet可以中和一下多餘嘅甜味，整體係我食過最好食嘅梳乎厘，香港可以同佢匹敵嘅應該只有petrus同somm，如果鍾意朱古力嘅人絕對要試。
-
2️⃣ Le Chocolat Sensation 💰220 （👅: 8.5/10）上面嘅係一層好似紙咁薄嘅朱古力薄片加上朱古力粉，下邊嘅係朱古力雪糕，再加上cream同朱古力脆脆，又係另一款朱古力嘅甜品，朱古力唔算太甜亦都唔會太苦，因為朱古力味道會同入邊嘅cream中和。
-
Drinks
1️⃣ Cappuccino （👅: 9/10）呢度既咖啡會有餐廳個名嘅拉花，非常適合打卡，咖啡上面有啲泡，入口厚身幼滑，夠creamy，飲落去咖啡味道夠香，帶有少少甘甜，苦澀味唔重，唔算好苦澀，如果覺得苦，可以加上另外嘅自家製焦糖醬，咁落去別有一番風味，或者可以同Petite four一齊品嚐，互相中和。
-
2️⃣ Chocolate （👅: 8.5/10）唔可以睇小呢度嘅朱古力，因為佢係用66% Valrhona 製成，望落去色澤比較淺，奶嘅比例比較多，質地唔算好濃稠，都唔會掛杯，入口一開始有泡狀嘅口感，飲落去飲到可可味，帶有少少甜味，不過同時有果酸味，唔會太苦有回甘，雖然唔重，朱古力有奶香味不過唔會太甜，唔會話甜到好涸喉，係水準之上嘅熱朱古力。
-
🌟 Robuchon 係四月換新主廚，係澳門天巢Robuchon分店既主廚Chef Julien Tongourian 黎香港坐鎮。所以呢兩次用餐食物質素出品穩定，保持水準。前菜方面最有驚喜係龍蝦湯，因為佢係我香港飲過最濃郁，可以同佢匹敵既只有文華扒房，而佢個招牌菜魚子醬前菜將三者平衡得非常之好，令人拋開有魚子醬一定好鹹嘅概念。主菜方面龍蝦意粉我覺得意粉如果變做手工口感更佳，同埋飲完龍蝦湯有對比，醬汁唔夠龍蝦湯濃郁，至於招牌既鵪鶉就可以食到佢同鵝肝嘅完美融合，無論味道上定係口感上，配菜嘅薯蓉更加唔使講，robuchon甚至令到佢可以成為主角。而甜品最鍾意當然係佢嘅招牌soufflé，因為佢係一樣好難做到完美嘅甜品，香港做得唔錯嘅就只有robuchon 、petrus同somm，三間同為香港嘅高級法國餐廳，不過佢嘅lunch Menu嘅甜品都有驚喜，尤其係朱古力同埋蘋果塔，每一樣菜式或者甜品都會有一個元素令你有驚喜。食過兩次嚟講，佢嘅招牌菜出品好穩定，絕對受得住米芝蓮嘅榮耀。

飲品方面，如果你係叫Special Menu嘅話，咖啡同茶要另外加錢，大約都係60幾蚊一杯，但我會覺得好值得，因為佢哋嘅咖啡同朱古力質素，唔會比出邊嘅Cafe差，連飲品都咁講究，絕對符合米芝蓮三星餐廳嘅質素。

Lunch set menu，以米芝蓮三星嘅餐廳黎講，性價比好高，因為如果唔加錢嘅話，$1000唔使就食到，兩次都加咗錢食招牌菜嘅我，就差唔多人均1000，晏晝已經可以試到招牌tasting menu嘅大部份招牌菜。

雖然lunch Menu會不時更改，不過special tasting menu同A La Carte menu就可以四季都食到。四個月內食左兩次，我諗我要休息吓，因為等緊佢秋冬季嘅Menu，最想試嘅係佢秋冬季先有嘅栗子湯。每一年嘅Menu可能都會有微微嘅調整，不過主要嘅招牌菜式都會保留，彩色都係偏向法國菜糅合左少少日本元素。

Robuchon行既係係平平實實嘅法國菜，就好似佢既裝修風格一樣，食物方面都係化繁為簡，每一道菜色唔會話太過複雜，都係用少少配角去襯托一個主角，唔會有好花巧嘅擺盤同埋好創新嘅呈現方式，你係食得出自己食緊啲咩嘅食材同味道，唔會好似食緊分子料理咁，喺係細節盡顯功架嘅路線，由佢嘅多款麵包，到每一道菜色，都可以睇到廚師花好多心思，令到你喺每一道菜色都會有一啲記憶，因為法國菜就係講求唔同食材之間嘅平衡，唔會話互相爭做主角，係你聯想唔到兩樣有關係嘅食材，擺落口竟然係同一件事，個樣就係法國菜嘅精髓。當然如果要挑剔robuchon，就係佢擺盤上嘅精緻度同埋菜式創新個方面。

同caprice比較，大家都係好着重玩層次，從中搵出平衡，不過caprice可能會比較創新小小，好似將現代健康嘅哲學擺落去法國菜，即使用上海膽、魚子醬呢一啲嘅食材，食落去唔會好似一般法國菜咁「重口味」。至於PETRUS都係喺傳統上但有少少創新，喺法國菜融合少少日本菜元素，提供客人驚喜嘅海鮮菜式，但又無法國菜嘅油膩感。而robuchon相對係比較傳統、穩陣啲，主打嘅係一致同穩定，但其實喺唔同季節下、唔同嘅主廚、唔同食材下都可以保持風格一致，絕對係佢呢一個連鎖餐廳去到邊個國家都可以攞米芝蓮認證嘅關鍵，每一間法國菜各有風格，各有所好，因為每個人嘅接受範圍都唔同，所以好難定奪邊一間係香港之首。服務方面，店員好詳盡講解每一道菜色，無論係每一道菜式嘅食材、佢嘅食法、菜式用嘅食材等，值得加分嘅係我女朋友第二次去嗰時係有啲趕時間，因為食法國菜閑閑哋可以食三個鐘，佢唔知可唔可以提出上菜快啲嘅要求，不過佢就喺Special tasting menu個到見到話”If you have a time constraint, please let your waiter know when you place your order”，所以佢就同職員講，結果真係上菜速度比我同其他朋友快，無論係主菜定係甜品都比我哋快上，所以最尾可以趕上食完甜品就走，唔知其他法國菜餐廳可唔可以咁做，不過呢一間米芝蓮三星嘅餐廳就做到，唔止係食物出色，服務都係點對點。而且店員會留意客人嘅用餐進度，會調整上餐速度，但又保留適當嘅空間，唔會好似某啲餐廳咁長期有職員望住我哋食飯咁。而基本嘅細節都做到，好似菜式同菜式之間都會換一次餐具。另外每次服務員都會幫客人打包麵包，但佢留意到我同女朋友去食同一籃，而我朋友同佢媽媽係食另一籃，佢識得主動將兩籃麵包分開打包，係非常細心嘅舉動。聽講餐廳嘅sommelier非常專業，對於wine List同pairing非常熟悉，不過呢兩次都係食晏晝，同埋唔係特別日子，所以就冇試到酒，下次可能係好機會。另外如果慶祝生日，可以訂枱個時預留佢哋嘅招牌朱古力榛子蛋糕，而且店員會主動幫你影相。

環境方面，L'Atelier行時尚型格吧枱嘅路線，雖然佢冇好似petrus嘅海景，佢都唔係五星級酒店嘅餐廳，不過我係坐吧枱位，所以唔需要好注重禮儀，可以好似平時喺酒吧咁邊食邊傾偈，亦都可以同店員交流，而且可以觀看到上餐同埋廚師料理嘅過程。而餐廳嘅廚房抽風做得非常之好，因為喺吧枱位，但完全問唔到廚房傳出嚟嘅香味。另外我覺得吧枱呢度影相唔錯，因為每張枱都有獨立嘅射燈，因為有好多法國菜餐廳可能注重氣氛，所以燈光就唔算充足。

總結呢兩次嘅用餐體驗都唔錯，可以喺休閒嘅氣氛下品嚐到米芝蓮三星嘅法國料理，出品穩定，喺一場味覺同埋視覺嘅享受、一餐色香味俱全既法國盛宴。雖然主廚Robuchon已不在人世，但佢嘅精神同埋創造菜式都會廣為流傳、流芳百世。
-
👅味道: 9/10
🍴環境: 8/10
💰消費: $780-1000pp (服務費: 10%)

唔知大家鍾唔鍾意食壽喜燒，之前介紹過香港最難book嗰間壽喜燒，原來依家都有網店專賣壽喜燒嘅外賣，如果唔想成日食白果，買返去屋企壽喜燒都係唔錯嘅選擇。

厚福和牛屋係一間日本牛匠岩手牛壽喜燒專門店，用上用優質豐盛嘅食材，食材來自日本岩手縣既黑毛和牛，而且有岩手縣農場授權證書。

店家用嘅係岩手縣和牛，而且係新品牌和牛，牛匠岩手牛其實係岩手縣最歷史悠久嘅和牛牧場，用五年時間研發嘅和牛，因為係東北部有豐富食材同埋優質嘅水質，而且牛匠岩手牛規定要用岩手縣生產既粟米、岩手米、酒粕、澱粉粕等日本傳統食材做飼料，唔係用外國進口既黃豆、粟米、小麥等，再肥育長達32個月，所以呢度出產嘅牛肉夠出名，曾連續四屆係日本肉品大賽榮獲綜合肉品冠軍優勝殊榮，係最頂級的黑毛和牛和種，牛匠·岩手牛好適合用嚟壽喜燒。店家所有套餐都係用牛匠·岩手牛，不過價錢不變。客人仲可以選購日式壽喜燒不粘鍋。

黑毛和牛仲係A5威士忌黑毛和牛片，因為日本東北部盛產威士忌，牧場喺日常飼料會加入威士忌粕，令和牛油脂更濃郁香味，而且牛匠岩手牛好罕有，每年只生產1000隻，每月只生產約80隻。以前只作日本內銷，香港由2020年尾先開始引進。

如果訂購個時，係12點前落單，就可以即日送貨，消費滿HKD1000可享一般地區免費送貨，大概係三至六點就收到。
-
1️⃣ 竹 套餐 日本A5 牛匠•岩手 黑毛和牛壽喜燒套餐 二人前 💰999
呢個套餐入邊有A5牛匠·岩手黑毛和牛片8塊、和牛油脂、野菜盛盒、自家制壽喜燒汁1枝同日本無菌蛋2隻，另外仲有一個烏冬。套餐會用兩個木盒，分別裝住野菜盛盒同黑毛和牛，每片都係獨立包裝。如果係當晚食用，放入冷藏雪櫃直到用餐時取出即可。
-
1️⃣ A5牛匠·岩手黑毛和牛片（👅: 8.5/10）
2️⃣ 自家制壽喜燒汁（👅: 8/10）
3️⃣ 日本無菌蛋（👅: 8/10）店家有提供教學片教你點整，方法係關西風既壽喜燒整法，最大分別係呢度無落砂糖。預熱個爐之後放入和牛脂肪，再落京蔥爆香到金黃色，之後就可以放和牛同倒入少量壽喜燒汁，煮到自己鍾意既生熟程度就可以點已經搞均左既生蛋汁，之後可以靠剩低既壽喜燒汁去煮野菜同和牛，唔夠汁個時再加。和牛顏色夠粉嫩，油花分佈均勻，入口軟腍，唔會有筋咬落韌，食落有牛味，油脂唔小，油脂比牛味重啲，不過食幾塊唔覺得膩。壽喜燒汁鹹甜適中，淡淡嘅甜味，唔會話蓋過牛味，加上橙黃色既蛋汁，令到牛肉滑入喉嚨，食落有蛋香味，都可以中和一下和牛既油脂。
-
4️⃣ 野菜盛盒（👅: 8/10）野菜盛盒入面有京蔥、豆苗或皇帝苗、大白菜、冬菇、日式燒豆腐、芝士竹輪、蒟蒻結、油揚 ，係2人份。所有蔬菜都洗得好乾淨，而且排得好整齊，食落去新鮮，當中最鍾意芝士竹輪、油揚、日式燒豆腐，蒟蒻結、油揚同大白菜就非常入味，吸盡壽喜燒醬汁。
-
5️⃣ 烏冬（👅: 8/10）另外仲有讚岐烏冬一份，又係非常入味，咬落去煙韌，唔會話太腍。
-
🌟整體我覺得係屋企壽喜燒唔錯嘅外賣選擇，因為牛肉質素唔錯，人均500就已經食到好飽，如果唔想排隊，又或者係屋企慢慢燒嚟食，絕對係唔錯嘅選擇。
-
👅味道: 8/10
💰消費: $999 (服務費: NA)

如果鍾意打卡或者鍾意Cafe嘅你，應該有聽過mamaday，一直以來都係有好多好評嘅cafe，原來近排佢去開咗一間兄妹店，一樣係主打創意料理。GoodDay BadDay係一間主打創意料理嘅cafe，係Mamaday嘅兄妹店，啱啱開業無耐。menu上主打特式意粉、pizza、沙律、炸物、小食、甜品等，啲名都夠晒盞鬼，好似「唔好抱咁大期望蒲燒鰻魚蛋包飯」、「又係黑松露比薩…好開呀」等。位置上好方便，因為喺尖沙咀嘅加連威老道樓上。餐廳有兩層，用色上有強烈對比，環境上幾打卡，因為有啲仿名畫作或者係名人嘅繪畫，有好多藝術元素，餐廳算光猛，枱同枱之間距離足夠，空間感十足。-
1️⃣ 薯薯。。。。。條 明太子 💰45（👅: 7.5/10）薯條嘅醬可以揀明太子或者黑松露，我就揀咗明太子，薯條份量幾多，但呢個明太子基本上淨係見到明太子，見唔到有加沙律醬，所以非常足料，如果鍾意明太子嘅人就會好鍾意，不過如果可以加番啲沙律醬中和一下小小醒味會更好。
-
2️⃣ 唔算基本嘢——海洋生物沙律 💰122 （👅: 7/10）沙律入邊嘅配料好豐富，有炸蝦、炸帶子、蟹籽、蟹柳、生洋蔥、蕃茄仔、覆盆莓、藍莓等，調味用上芝麻醬同埋芝士粉，沙律份量都幾多，唔似一個前菜，食落新鮮，口感豐富。
-
3️⃣ 求其是但乜都炸啲啦 💰98 （👅: 7.5/10）其實係一個炸物嘅拼盤，入邊包括有天婦羅蝦、炸魚、雞翼、薯條，雞翼食落去都算啖啖肉，食落去有少少調味，炸魚咬落去都幾脆，入邊都算滑，係鱈魚個種，薯條可以點沙律醬或者蕃茄醬，食物整體炸得幾香口，即叫即炸，夠熱辣辣。
-
4️⃣ 點解個個都叫軟殼蟹比薩架 💰138 （👅: 7.5/10）Pizza大細大概有八到九吋，係薄底pizza，
上面有一大隻軟殼蟹，配料方面除咗有芝士，入邊仲有一層薯仔，加上蟹柳、菠蘿，配上千島醬汁，芝士嘅拉絲效果就唔算好勁，因為係原隻軟殼蟹，所以要特登切開佢先可以同Pizza一齊食，咬落都算脆，Pizza餅底都幾脆，食落去除咗芝士味道都算突出，仲好明顯食到入面好似薯蓉嘅口感，不過因為加咗薯仔所以比較飽肚。
-
5️⃣ 有蟹GO又有蟹肉的蟹蟹蟹意大利扁面 💰138 （👅: 7.5/10）呢個意大利扁麵配料入邊有蟹柳、蟹鉗、蟹膏、蟹籽，意粉咬落去都算彈牙，加上菌菇，食落去口感豐富，因為有蟹膏，所以唔使落調味都好足夠，鮮味十足，蟹肉都有唔少，整體食落去唔膩。
-
6️⃣ 唔好抱咁大期望蒲燒鰻魚蛋包飯 💰168 （👅: 7.5/10）
+ 💰28升級原條鰻魚蛋包飯用上日本雞蛋整，上面既鰻魚夠大條，好吸晴，肉都幾多算肥美，食落無咩細骨，蛋既生熟程度算啱啱好，幾滑身，飯就比較黏身同濕，食落去燒汁嘅味道突出，我覺得蛋包飯比起鰻魚更加出色。
-
7️⃣ 美利堅合眾國草飼牛扒 💰168 （👅: 8/10）肉既生熟程度可以揀三成、五成、七成，我就揀咗三成，睇落去顏色都算粉嫩，帶有少少血水，咬落去都算軟腍帶有嚼勁、無筋，食落肉味算濃，幾juicy，芥末醬味道有啲搶，所以唔使點都得。除咗牛扒，仲有兩大塊蝦片、一個有木魚碎喺上面既烏冬，配上芝麻醬，隔離仲有份量好多嘅沙律菜，可以消滯，不過我覺得份量太多，而且會同前菜既沙律重覆，雖然配料上有少少唔同。牛既份量唔算多，只係個盤大。
-
8️⃣ 蜜汁香茅豬頸肉 💰136 （👅: 8/10）至於豬頸肉隔離都係一樣配上沙律、蝦片同埋迷你烏冬，豬頸肉充滿蜜汁同香茅調味，加上洋蔥絲炒，咬落爽口、唔會韌，肥廋適中，有小小既焦香，幾JUICY，食落去有蜜汁既甜味，帶有小小香茅味，非常入味，加上甜酸辣醬，食落更加開胃。
-
🍹 非一般一般檸檬果皮烏龍茶沙冰 💰56（👅: 8/10）茶底用上烏龍茶，而唔係紅茶，飲落非常清新，茶味均勻，沙冰夠凍，唔會好甜，仲有小小檸檬皮既甘香同薄荷葉嘅香味，解膩解渴一流。
-
🍹 73.5%朱古力最好味 💰48（👅: 8/10）飲落去朱古力味濃郁，質地唔算濃稠，加上忌廉，夠creamy，CAFE黎講算好飲既朱古力。
-
🍹 擺烏龍嘅lychee 💰48（👅: 7/10）一樣係用上烏龍茶底，加上肉桂粉，飲落去唔甜，都係清新解渴，不過荔枝味唔算突出，檸檬果皮烏龍茶沙冰會更出色，不過上面既荔枝果肉好食。
-
🍹 What-so-ever Waffle 💰86（👅: 7.5/10）窩夫有四大塊，份量都唔少，咬落去偏紮實，不過加左麻糬，同平時食好脆既窩夫唔同，係帶小小煙韌。味道上窩夫係冇咩味道，靠同士多啤梨或者雪糕一齊食，士多啤梨帶酸味唔算好甜，雪糕偏硬身，帶小小鹹味。
-
🌟 咁多嘢食最鍾意嘅係牛扒同埋豬頸肉，飲品上最鍾意嘅係烏龍茶冰同埋朱古力，價錢方面以Cafe嚟講係偏貴啲，味道上我會鍾意mamaday多啲，不過餐廳有兩層高，位置方便，經過都可以試吓。
-
👅味道: 7.5/10
🍴環境: 7.5/10
💰消費: $250-400pp (服務費: 10%) 

唔知大家鍾唔鍾意聽本地band?呢隊Band我係幾年前好鍾意，每個月出嘅新歌都會係咁聽，好似時差、天地會，呢排佢地仲開咗間新嘅Cafe。OHM係一間喺深水埗、由本地Band Kolor、Kosa等人合資主理既cafe & bar，以「日啡夜酒」模式經營，日頭係一間Cafe，夜晚係一間cocktail酒吧，仲係一間寵物友善Café。餐廳除咗主打手沖咖啡、多款特色Cocktail，，仲有提供小食同埋西餐主食，Cocktail仲會以佢哋歌曲命名。

餐廳可以Walk in，亦都可以網上訂位。 裝修行霓虹燈Cyber風，以灰色黑色為主調，同平時嘅Cafe好唔同，夜晚嘅霓虹燈就會亮起，門口嘅招牌已經係霓虹燈，透過玻璃仲見到入邊霓虹燈嘅醉、醒，因為呢度主題係日頭飲咖啡飲到醒，夜晚就飲酒飲到醉。所以呢度四點就會由白光轉做霓虹燈，六點就唔會再供應咖啡。呢度嘅咖啡師其實都係調酒師。2樓可以提供包場，仲會定期舉辦活動好似調酒班。餐牌首先係嘢飲Menu，呢度嘅Cocktail Menu 係由酒精濃度低至高咁排列，有9款雞尾酒款，另外仲會有一款隱藏嘅Cocktail，每個月會用Kolor嘅一首歌作為Cocktail。

嘢食方面唔算多，煮食有多少、意粉、沙律，仲有幾款小食。另外仲可以見到店舖有售賣kolor嘅碟同紀念品。
-
1️⃣ 秘製微辣焗雞翼 💰45（👅: 7.5/10）雞翼$45有五隻，外層炸得都算脆，咬落去肉都唔算鞋，不過食落去辣味就唔算突出。
-
2️⃣ 厚切完美平衡叉燒 💰65 （👅: 8/10）叉燒嘅外層燒到小小香脆，入邊我覺得係比較肥啲，咬落小小厚實帶嚼勁，算juicy，食落唔會太甜。
-
3️⃣ 黑松露薯條 💰70 （👅: 8/10）黑松露薯條係人氣小食，上面既係厚厚既巴馬臣芝士碎條，加上黑松露蛋黃醬，薯條係粗身、波浪形個種，炸得夠香脆，夠邪惡，如果巴馬臣芝士個芝士味同個醬既黑松露味再濃啲就更好。
-
4️⃣ 慢煮澳洲穀牛脷 💰80 （👅: 8/10）牛脷都算厚身，咬落去係比較爽口嗰種，而唔係腍身，帶有小小嚼勁，食落去有小小鹹味，唔會過重。
-
5️⃣ 牛油果青蘋果蟹肉沙律多士 💰80 （👅: 8/10）呢個多士係用上酸種麵包，上面係牛油果同青蘋果蟹肉沙律，上面仲有啲花瓣做點綴，牛油果切到好似花既造型，入口好Creamy，食落新鮮，青蘋果蟹肉沙律足料，入口綿滑，食落甜甜酸酸，夠清新，因為有wasabi所以有小小芥辣味，略嫌多士偏硬啲。
-
6️⃣ 明太子蟹籽意粉 💰115 （👅: 8.5/10）呢個意大利麵有大量既忌廉，加上明大子、蟹籽，店員提醒呢個share會比較好，一個人食會有啲濟。
因為有好多忌廉，所以意粉非常creamy，食落夠濃味，有奶味，忌廉汁入邊有唔少明太子，食落帶小小辣味，意粉都唔會太腍或者太硬，偏腍但保留有少少咬口，整體食落幾飽肚。
-
7️⃣ 蒜香大蝦橄欖油意粉 💰125 （👅: 8/10）呢個意粉用上蒜蓉、辣椒乾、橄價油、大蝦，比起忌廉意粉，呢個應該係炒既意粉，所以意粉比較乾身，大蝦咬落去算爽彈，食落新鮮，食落去會有少少辣，食到橄欖油同埋蒜香味突出，幾惹味開胃。
-
🍸 半首歌 💰120（👅: 8.5/10）餐廳每個月都會製作一杯新Cocktail，用上kolor既歌名，呢個半首歌上面係焙茶奶蓋，下面係
好易入口，唔重酒味，
奶蓋夠creamy，
飲落去除左飲到焙茶味，仲會有啲酸酸甜甜的味道，解膩一流。
-
🍸 Ocho chocolate old fashioned 💰128（👅: 8/10）呢杯係店員介紹嘅打卡飲品，飲品首先會有個玻璃罩蓋住，因為用即烤嘅咖啡豆，打開就會有煙燻嘅效果，酒用上Dewar Whisky去取代Bourbon Whisky，煙熏味幾重，飲落去酒味比較重，杯出邊仲有啲朱古力同埋爆炸糖，配搭幾特別，可以中和一下酒味。
-
🍸 Passionfruit Oolong Tea Punch 💰108（👅: 7.5/10）呢度嘅cocktails Menu會以酒精濃度由淡到濃咁排列。用上冰泡烏龍茶、檸檬同熱情果混合而成，濃度係level 3，所以係幾易入口，飲落去幾清新，烏龍茶味都算突出，帶少少酸甜就唔會太甜。
-

🍸 熱情果茉莉茶梳打 💰68（👅: 7.5/10） 會聞到好香嘅熱情果味，飲落去係熱情果嘅酸甜味，加上小小茉莉茶味，唔會太苦。
-
🍸 冷萃咖啡配檸檬汽水 💰68（👅: 7.5/10）
-
🌟整體而言，以Cafe同酒吧餐廳黎講，食物質素算唔錯，最出色係明太子忌廉意粉，小食如果再惹味啲重味啲更好。餐廳唔會播背景音樂播到好大聲，幾岩一齊嚟飲下酒傾吓計食下野。餐廳日頭同埋夜晚都幾適合影相打卡，2樓仲可以有vip房適合包場，會有酒會活動，有時都會有live music show。店員都好用心介紹菜式同飲品，服務唔錯。如果你係KOLOR FANS，更加要嚟支持吓，有可能可以捕捉到KOLOR成員。 -
👅味道: 8/10
🍴環境: 8/10
💰消費: $150-250pp (服務費: 10%)

米走雞係一間人氣雞煲店，佢隨左有大家平時食開既麻辣雞煲、仲有佢地既招牌黃金芝士雞煲，夠哂邪惡。米走雞有3間分店，如果係觀塘分店特別叫米走雞Live，係因為佢會有Live Band，而且仲可以點歌，可以一邊食一邊聽歌，夠哂chill，不過可能之前因為疫情關係就無左Live Band。-
🥫 醬湯費 💰18/位（👅: 7.5/10）點完單之後店員就會羅調味盆黎，有六款調味，最基本既葱、炸蒜、蒜蓉、芫茜、辣椒同麻醬，唔算多不過都有蓋幾衛生，可以按自己既口味調配。
-
1️⃣ 火焰麻辣雞煲 (中) 💰198（👅: 8/10）
雞煲有分小同大，分別適合2-3人同4人。上次試左芝士雞煲，今次就試火焰麻辣雞煲。

上枱個時候好吸引，因為佢會落玫瑰露之後點火提香，不過今日個點火效果就冇咩，可能佢支火槍唔夠火或者酒落得唔夠多。之後店員就會幫手撈下啲雞，令到辣汁比較平均。辣度方面今次叫左中辣，食落去唔止辣，後勁既麻都好足夠，帶小小一開始既甜味，非常有層次，麻得過癮，唔會太鹹。中辣相對於譚仔嘅小中辣，所以唔算食得辣嘅人，只可以叫BB辣。成個雞煲全部都係雞髀肉嚟，而且份量好多，所以大家就唔使同人爭，平時會揀淨啲雞胸，雞煮到唔會過熟，咬落肉質算嫩滑，啖啖肉，夠入味，當然最入味係洋蔥同芫荽。不過食完雞煲只可以加普通雞湯，如果食辣既話之後就會唔覺得辣，如果可以加麻辣湯或者加辣會更好。
-
2️⃣ 鮮炸響鈴 (半份) 💰32（👅: 8.5/10）呢度嘅嘢食好處就係可以叫半份或者全份，半份嘅炸響鈴就係三件。炸響鈴夠晒大件，灼一兩秒就可以食得，咬落香脆，浸落湯底更加好食，唔會有油溢味。
-
3️⃣ 竹笙墨魚滑 (半份) 💰53（👅: 8/10）因為想試多啲唔同嘅餸所以都係叫半份，半份即係四件墨魚滑。呢度嘅墨魚滑比較特別，佢係將墨魚滑釀入竹笙入邊。竹笙咬落幾爽口，吸收晒啲辣湯，非常入味，而墨魚滑咬落彈牙，好滑身，食到淡淡既墨魚，係真材實料，唔會話食到好粉，即使淥耐左都係咁彈牙，有雙重嘅口感。
-
4️⃣ 哈哈蝦中寶 (半份) 💰63（👅: 8.5/10）哈哈蝦中寶其實就係蝦滑，但呢一個份量非常之大份，係預你成舊咁落，咬落去好爽口有嚼勁，入面仲會有原隻鮮蝦，啖啖肉，非常足料，食落新鮮，入面仲會有唔小蟹籽、芹菜，蟹籽脆卜卜令到口感更加豐富。
-
5️⃣ 手切霜降牛頸脊 (小) 💰258（👅: 8/10）雖然係小，但係份量都幾多，厚薄適中，牛肉咬落算嫩滑軟腍，帶小小嚼勁，食落去牛肉味都算濃郁，有小小雪花，不過油脂唔多，始終佢唔係肥牛，不過唔肥膩。
-
6️⃣ 翡翠苗 (半份) 💰28（👅: 7.5/10）翡翠苗唔算係好常見嘅火鍋菜，夠晒翠綠，全份來講根本食唔晒，食落去夠清脆爽口，同芝士嘅湯底異常地夾。
-
7️⃣ 咸檸7/咸檸樂 💰24（👅: 7.5/10）
-
🌟食物黎講，麻辣雞煲夠麻辣，芝士就夠特別。餸方面有幾樣幾特別，好似鮮炸響鈴、哈哈蝦中寶同竹笙墨魚滑都係必點，水平都係中上，食物好在可以叫半份，兩個人黎食都可以試好多。-
👅味道: 8/10
🍴環境: 7.5/10
💰消費: $721 (服務費: 10%)

香港嘅拉麵同沾麵我都食得7788，好食嘅我都已經介紹咗，不過今次嘅呢一間唔係拉麵、亦都唔係沾麵，喺香港第一間嘅日式撈麵。 Kokoro係一間喺灣仔新開嘅東京過江龍撈麵專門店，有別於傳統嘅拉麵或者沾麵，主打嘅係日式撈麵まぜそば，呢一種撈麵其實係源自名古屋既拉麵料理，而唔係台式料理，靈感來自台式肉操乾拌麵，係冇任何湯底，淨係靠配料同埋醬汁，按照名古屋人既口味改良，係煮好既麵上放上海苔、蒜蓉、韭菜、蔥、辣肉燥、生蛋黃等配料，深受當地歡迎。 麺屋こころ最初係2014年喺東京大田區開業，店主以台灣拌麵形式，全店主打乾麵，開舖第一年就已經獲得日本媒體既拉麵新人賞，小店更加有人龍，仲係日本全國開設分店，近年仲係泰國、新加坡、歐美等地開店，今次係香港第一間分店。餐廳用嘅係日本配方，主打自家新鮮手製麵條，麵條都係用全麥去製作，所以麵條食落去有麥香。撈麵都係有日本大廚親自操刀，因為老細欣賞來自東京嘅師傅，欣賞佢對煮嘢食嘅專注同熱誠，食物可以保持到一貫水準，希望可以將日本嘅味道帶比香港。 撈麵口味有九款可以揀，最招牌一定係全料東京撈麵，以粗身太麵為基礎，加入自家醬油、香油、肉燥、九條大蔥、韭菜、海苔、滷五花肉、流心蛋等配料，層次分明，再順序加入黑胡椒同特製香醋汁，香濃鮮味。比拉麵稍貴，但值得一試。
如果係星期六日晏就時間都要排隊，我個次係大概三點半去食就唔駛排，不過入面都接近滿座。 餐廳以白色、金融色為主調，枱同枱之間比較逼啲。 店舖入面有三幅由日本著名女書道家MAMI繪製嘅作品，將日本書法同街頭塗鴉融合一齊，道出「仁、義、禮、智、信」五個字，食撈麵時可以欣賞下富有現代感嘅書法作品。 睇過餐牌有八款撈麵同一款拉麵，分別有正宗全料東京撈麵、叉燒撈麵、原味東京撈麵、鹽味撈麵、明太子忌廉撈麵等，香港店有獨家限定既柚子鹽味撈麵，每款撈麵都有分M/L 大細，價錢由$79到$109，另外仲有迷你丼飯同小食。 - 🍜 正宗全料東京撈麵 💰99/109（👅: 8/10） 呢個撈麵係店舖招牌，全料即係所有配料都有，有日式慢燉叉燒、溫泉蛋、辣肉燥、溏心蛋、紫菜、蔥花、韭菜、竹筍、紫菜碎、生蒜、鯖魚粉、小麥麵，非常足料。撈麵有兩個大細，M係150g，而L既喺220g， 撈麵有店舖嘅建議食法，每張枱都有一張，有四種食法，首先將蛋黃整散、醬料攪拌撈勻，食咗三份一之後就加黑胡椒，再食多三份一之後就可以加Kokoro秘製香醋，最後食晒撈麵之後就可以加飯，並撈勻變食肉燥飯。 呢度嘅自家製麵條係粗身太麵，比較粗身，咬落去都算煙靭彈牙，唔會話太硬身，食落去有麥香味，將材料撈勻之後，入口口感豐富，食落去味道濃郁，麵條非常掛汁，醬汁有啲似沾麵嘅魚介湯，夠惹味，因為有辣肉燥所以帶少少辣，加咗蛋黃所以質感比較黏滑，入口更滑溜，略嫌味道偏重啲，不過撈麵就係要重口味。 慢燉叉燒設成一粒粒，咬落去幾軟腍嫩滑，而且有肉汁，食落去豬肉味重。葱嘅味道都算突出。溏心蛋就岩岩好，係半熟狀態，食落有醬油味。特別一讚係依度嘅筍非常鮮甜。 加咗黑胡椒之後，胡椒嘅香味都幾突出，而且同撈麵幾夾。 之後加咗Kokoro自家製海帶醋，佢嘅酸甜味令到本身嘅鹹味中和左，食落去更加清爽，夠開胃，無咁膩。 最後可以要求店員加飯，呢度嘅一份其實係一個豉油碟嘅大細，啱晒已經食到好飽嘅我，淺嘗一下第四種食法，將肉醬撈埋啲飯入面，絕對係日本正宗嘅食法。 - 🍜 24月熟成芝士撈麵 💰99/109（👅: 7.5/10） 呢個撈麵用咗24個月熟成嘅芝士，芝士用上巴馬臣芝士，芝士因為溫度已經溶咗，有拉絲效果。因為麵條都係一樣係粗麵，所以掛汁能力強，食落去芝士味道濃郁，感覺好似食緊芝士意粉咁，唔似食緊日式撈麵，所以相對全料撈麵會比較膩。所以店員有另外上一個玫瑰露果醬，可以代替本身嘅昆布醋，食落去係甜甜地，稍微中和一下膩感。配料方面同全料撈麵有啲唔同，最唔同嘅係有炒香左嘅菇菌，食落去同芝士都幾夾。 - ☕ 烏龍茶 💰9（👅: 7.5/10） 烏龍茶飲落去味道清新，食呢個咁重口味嘅撈麵解膩一流。 - 🌟整體來講，呢間係香港暫時唯一一間既日式撈麵，所以非常值得一試，而且味道同喺日本食到嘅差唔多，夠正宗。如果食厭咗拉麵沾麵絕對可以試吓，不過呢度嘅味道偏重一啲，有啲人會覺得太鹹。價錢方面合理，因為佢大細適中，而且仲有得揀大嘅份量，大食嘅人都可以食得飽，唔飽就可以試佢第四個食法加飯。 - 👅味道: 8/10 🍴環境: 7/10 💰消費: $100-150 (服務費: 10%)

呢排可能疫情關係，除咗好多時都買嘢返去食之外，仲多咗網購，我就買咗唔同嘅代購同埋甜品蛋糕。今次就試咗酒店嘅蛋糕，而且個蛋糕仲攞過獎。

今次我買嘅係港島海逸君綽酒店嘅蛋糕，佢入邊嘅Harbour Grand Café出品唔少睇得又食得嘅蛋糕，喺網站訂購仲有外賣自取優惠，蛋糕方面有10幾款，當中仲有我今次想試嘅有2019年度香港國際美食大賽金獎既焙茶柚子朱古力慕斯蛋糕、另外仲有好打卡嘅獨角獸士多啤梨蛋糕，仲有限間限定既榛子朱古力蛋糕，其他嘅仲有低糖草莓蛋糕、D24榴槤忌廉蛋糕、大吉嶺茶配檸檬柚子蛋糕、香橙柑香雲呢拿蛋糕、紅絲絨忌廉芝士蛋糕、白朱古力草莓撻、巴斯克芝士蛋糕、芒果拿破崙蛋糕、百利甜酒咖啡焦糖蛋糕等，如果喺屋企食嘢食到悶或者想慶祝都好適合。

今次我係喺OKiBook Shop網上訂購蛋糕，佢係一個搜羅左唔同酒店品牌同埋唔同供應商嘅特色產品網站，可以以較平嘅價錢去買唔同嘅蛋糕、住宿套票等。
-
1️⃣ 焙茶柚子朱古力慕絲蛋糕 💰278（👅: 8/10）
呢一個蛋糕係酒店嘅招牌因為佢係，2019 年度香港國際美食大賽攞咗金獎，上年可以見到佢朱古力嘅裝飾，非常用心，朱古力嘅外層非常光澤，好似鏡咁。

一切開個蛋糕就可以見到有好多層次，最上面嘅係朱古力醬外層、cream、柚子醬、焙茶mousse 、最底層嘅蛋糕。

蛋糕入口細緻軟綿，食落去味道主要係朱古力，中間會食到有柚子嘅味道，焙茶味道我覺得冇咁突出，最底層蛋糕唔太食得出，可能因為mousse嘅比例比較多，整體味道夠清新，層次非常豐富，唔會覺得膩，朱古力係唔甜嗰種，帶小小甘苦，我諗大概係70%濃度嗰種，所以蛋糕整體係唔甜。
-
🌟整體我覺得呢個蛋糕唔錯，蛋糕入邊非常有層次，如果鍾意食朱古力或者柚子既人應該會鍾意。


-
👅味道: 8/10
💰消費: $278 (服務費: NA)