之前人氣嘅銅鑼灣cafe 再係佐敦重開！ 外表勁有歐洲小屋嘅感覺，入到去都好靚好有格調~ 主要菜式都係用好有代表性嘅地方命名，就咁睇個menu都覺得好得意(≧∀≦) 雖然係Cafe但係食物嘅種類都幾多元化，有健康嘅選擇亦都有肉類炸雞等等~ 期待下次再去！ Price 💵 Paris —— $88 (Herbed egg salad, Sourdough, Mesclun Greens) 蛋沙律睇落好似用咗好多沙律醬，但食落都好清爽！(本人好怕太口重嘅沙律醬) 加上酸種麵包做底，唔會有膩嘅感覺~ 仲有勁多沙律菜，我覺得好加分（＾ω＾） San Francisco —— $108 (Roasted Vegetable Quiche, Mesclun Green) 分量好夠啊，仲超足料，每一啖都有唔同蔬菜，蛋嘅部份唔會太乾~ 唯一想改善就係唔想食到西芹( ͡° ͜ʖ ͡°) Panama Butterly —— $72 一個比較複雜嘅飲品！ 但好清甜同解膩~ 一開頭相嘅時候係熱飲嚟嘅，好似蜜糖紅茶咁，去到冇咁熱嘅時候甜味會越嚟越重~ 凍咗之後飲仲會有紅酒嘅香味！ 超特別，未試過呢類型嘅嘢飲^o^ Honey Cinnamon Latte —— $50 覺得有玉桂味唔太夠，有比奶味同甜味蓋過，不過蜜糖嘅甜味我覺得好足夠，整理你講奶味好粥都合格！ Cornflake Strawbeery Cake —— $58 個人覺得呢個士多啤梨蛋糕好推薦！上面有少少脆脆地嘅粟米片，蛋糕嘅部份好軟熟唔乾，士多啤梨仲好甜添，忌廉嘅部份都唔係死甜，突出士多啤梨本身嘅甜味~ 甜品叫得過！ 推薦值: ⚜️⚜️⚜⚜⚜️️/5 好耐都未比滿分啦~ 環境同野食都好好！非常用心嘅Cafe~ 📍 佐敦閩街1號地舖 -Useful tags for you 💓 #tthkfoodie #tthkcafe

之後去嘗試嘅一間靚靚西餐廳，個人覺得氣氛高級又浪漫，夜晚仲暗中帶情調，好適合約會或者嘆吓飲杯Cocktail(о´∀`о) 食物質素當然冇失望~ 仲要每一個小菜加$48就可以，最啱兩個人share！ Price 💵 French Edible Crab Risott —— $258 蟹味濃郁，仲食到啖啖蟹肉！份量十分充足！兩個人分享都得 French Fries with cheese —— $48 正常發揮嘅炸薯條，芝士醬都幾濃郁 Fried Mixed Mushroom —— $48 蘑菇好重牛油味，加上少少香草嘅味道，用嚟轉換口味都唔錯~ Apple Crumble with Vanill —— $68 過嚟呢度食飯嘅一大原因！ 靚靚嘅甜品果然好難抗拒~ 而且成件事勁有儀式感，打開之後嘅煙仲有陣陣嘅蘋果香草味~ 玉桂味超重！ 比較正宗嘅apple crumble 💕 Margarita —— $68 Kopi Teh —— $68 呢邊嘅Cocktail都比較酒味劇烈，如果唔習慣嘅女生就要留意(°▽°) 但撇除呢樣野味道唔會失望，其中第二杯咖啡味嘅Cocktail幾意外！ 超濃郁嘅咖啡味( ^ω^ ) 推薦值: ⚜️⚜⚜️⚜️️/5 整體而言地方靚環境唔錯，食物質素都有保證，但比較深印象嘅係甜品同Cocktail，有返晚市之後嘅幾好選擇！ 📍 荃灣青山公路407-411號金荃大廈地下B鋪 -Useful tags for you 💓 #tthkfoodie #tthkrestaurast

留係香港其間不停揾有咩新地方可以行下食下野🎀 位於饒宗頤文化館入面，第一印象好似入咗一間法國小屋嘅感覺( ´∀｀) 舒服又不失典雅~ 係文化館影完相就順便過嚟可以享受到法式休閒 ! 因為當日坐滿曬人，就無影到太多嘅境照~ 不過野食質素係有保證架😜 Price 💵 麵包🥯 麵包份量都幾多，喺法國硬身麵包，牛油加咗少量嘅黑松露，等待嘅時間都唔會太肚餓 香煎鵝肝配鴨批 ——— $188 鵝肝都幾大份，以前菜來講，兩個人share都可以~ 鵝肝入口即溶，非常濃郁，煎香部份小小脆口，口感唔錯~ 鴨批係冷盤，兩樣一齊食最好食😋 蟹肉意粉配南瓜汁 —— $238 南瓜味好濃好突出！意粉偏向creamy口感，唔會太重口味，相對上比較淡口~ 蟹肉係用嚟增加味道嘅層次~ 蟹肉加上意粉咁食先係最好食嘅配搭~ 寶雲酥焗羊扒配羊肉腸 —— $298 冇諗過原來係咁厚咁大舊！ 好彩只叫了一份肉唔係一定食唔晒~ 肉質好嫩都容易切，非常juicy ! 加上隔離嘅鹹忌廉同黑醋汁，好有法式風味~ 推薦值: ⚜️⚜️⚜⚜️️/5 朝早嘅文化館會比較影相靚啲，夜晚來會比較浪漫🌹 整體來講除咗地方偏僻少少之外，係幾值得推介嘅一個好去處 -Useful tags for you 💓 #tthkfoodie #tthkrestaurast

一上到去好有氣派嘅裝修，同時都好有泰國風情嘅感覺~ 不論係兩人享受獨處定一大班朋友聚會都好適合~ 新派美味老虎蝦 —— $198 一餐飯嘅開始就由燒老虎蝦，唔係非一般嘅煮法，燒着料理酒再淋上大蝦上面，勁有趣味嘅表演~ 酒味唔會太重但有提升蝦嘅鮮味，醬汁同蝦嘅味道好夾~ 泰式生蝦 —— $118 生蝦夠鮮甜同新鮮，配上蒜頭片同辣野，超開胃嘅前菜！ 椰青冬蔭功湯 —— $128 依款冬蔭功湯比起正常嘅無咁重口味，配合返椰青嘅味道，又不失冬陰功令人上癮嘅酸味同辣味無諗過兩者會咁夾 ~ 入面仲有青口同蝦，用足料海鮮煲岀來架！ 椰香紅咖喱 ——— $108 雖然 咖喱偏向稀身，味道一樣濃！ 配上烤薄餅，完美嘅泰國夜當然要有咖喱啦！ 🌝 烤薄餅 —— $28 豬勁肉炒飯 —— $108 炒飯好夠火喉，用咗泰式醬汁來炒，配上煎豬頸肉，兩個人分食都剛好！ 椰汁紅豆冰 ——— $42 味道較淡不太推薦 芒果沙冰 —— $68 有濃郁嘅芒果味！ 成功解膩！重點係飲完一大杯都唔會覺得太Heavy~

中環威靈頓街成日都有啲裝修高貴又好食嘅餐廳，多謝大佬介紹咗一間好餐廳俾我💕 @ 一入去就見到酒吧枱，俾人有一種Modern嘅感覺~ 服務員態度好好一入到去就有被好好招待~ 而且想每一道菜都有介紹，聽完之後更加覺得係精心炮製嘅美食！ 我地一人叫咗一個Lunch set, 中價位嘅價錢可以享受一餐高級嘅法國fusion set ~ 值得一試！ Price 💵 Lunch set - $328 每個set都包括餐包，三個前菜，一個主菜 麵包雖然唔係主角但係都好食！ 係脆口嘅法國麵包配上獨特雞肝牛油，味道濃郁少少鹹鹹地，令人更加期待之後嘅菜式！ Tuna Salad, Tomatoes Soup, Tartare Burger, Pan Fried Sea Bass with Dill Cream 一場嚟到當然係加$38試晒所有前菜！ 最最推介就係鱸魚配刁草特製忌廉，用低溫烹調方式，魚肉特別嫩滑同鮮味，加上菠菜同埋煙肉令味道嘅層次更加提升~ 仲有藍鯨吞拿魚沙律，同埋生牛肉burger都冇令我失望~ 值得一提嘅係前菜嘅賣相真係好靚好精巧，果然係法國菜（╹◡╹） Uni & Scallop Risotto 帶子真係可以用鮮甜來形容，煎香嘅表面為肉質添上香味，配上加拿大海膽，海鮮獨有嘅鮮味亦都煮落飯入面，非常滿意嘅菜式~ Oyster and Clam Risotto 以香港艇仔粥做藍本嘅fushion菜，用咗日本廣島蠔做賣店，有風味得來而不失鮮味，再加上姜同蔥嘅味道都幾重🌝，真係好有港式嘅味道 Cognac Triple Chocolate Fudge - $98 呢份小巧嘅甜品完全滿足晒我想食甜野嘅慾望，細份但係每一口都係精華，朱古力味極度濃郁甜味亦都剛剛好，加上黑松露片嘅配搭，簡單得來又華麗嘅甜品! 推薦值: ⚜️⚜️⚜⚜️️/5 好適合同朋友約會嘅餐廳， 成餐飯大約兩個鐘頭左右亦都唔會有食完嘢就要走嘅壓力，不妨嚟呢度食個高級嘅lunch啦~ -Useful tags for you 💓 #tthkfoodie #tthkrestaurast

叫咗淚牛滿麵外賣，以為ot 都有好食嘅台灣菜做晚餐，點知超失望 淚眼汪汪麻辣牛展牛筋乾拌麵 -$115 成兜麵一啲味都冇。。有麻辣味嘅但無拌麵嘅味道，上面配菜同白烚無咩分別, 加了公司的豉油同辣油都可以接受，非常不滿意的晚餐🥲🥲🥲🥲🥲🥲🥲 老湯清燉牛展麵 —— $99 湯底有臊味。。。性價比超低。。。🥲🥲🥲 川流不息椒香麻辣牛肉麵 —— $98 還可以接受，但辣味好淡。。。牛肉不過不失，但不太厚，不值得90蚊。。🥲🥲🥲🥲🥲🥲🥲🥲 不會再叫這間外賣了

各位新年快樂！
新一年同大家介紹一間健康飲品甜品舖頭~ 位於旺角MOKO通常依家都會買珍珠奶茶或者去Cafe叫咖啡，有時都想休息嘅同時有更加健康嘅選擇~ 呢度嘅茶品都有唔同嘅功效同適合唔同體質嘅女仔~ 如果冇特別喜好嘅話都可以叫店員推薦俾你架~
飲品以外佢哋每日都有限定嘅甜品選擇，完美嘅行街休息點~

打卡friendly(*ﾟ∀ﾟ*)
Food /Dessert : 📸📸📸.5 /5
Environment : 📸📸📸 /5

Food 🍵

玫瑰荔枝慕絲 $48

有咩正得過一杯暖茶再加一件甜上心嘅cake, 荔枝味較重嘅慕絲蛋糕，外型超打卡able ~

士多啤梨千層批 $48

細細舊嘅士多啤梨拿破崙, 吉士醬唔會過甜，脆皮好食~

皇牌氣血茶 $38

有暖宮驅寒嘅作用，冬天飲就最適合啦~ 平時都唔會在意唔同花茶嘅配搭，最適合嚟緊Period 或者平時手腳冰冷嘅你~

士多啤梨MOJITO $38

士多啤梨茶嘅味道，唔會太濃郁，雖然顏色比較淺但係意外地士多啤梨味都好重~ 簡單健康嘅配搭~

推薦值: ⚜️⚜️⚜️️ /5

開始返工之後就好重視Happy Friday ~ 又介紹返一間又好食又有drinks 嘅 chill 地方！ 位於東涌喜來登酒店嘅附近~ 好適合鍾意喺室外飲酒嘅人，播住歌勁有氣氛仲望到海添（╹◡╹）

打卡friendly(*ﾟ∀ﾟ*)
Food /Dessert : 📸📸📸.5 /5
Environment : 📸📸📸📸 /5

Price 💵

Hawaiian Poke (吞拿魚他他) —— $148

吞拿魚刺身都幾新鮮，配料有洋蔥同蕃茄仲有其他蔬菜，個人特別鍾意生洋蔥嘅味道~上面仲配搭火箭菜，好似一道高級嘅沙律咁樣~

Pescatore (海鮮長通粉) ——— $168

用茄醬做底嘅意粉，用咗比一般細條嘅長通粉，個人覺得更加掛到多啲醬汁~ 八爪魚好彈牙，青口好有鮮味~ 而且影相非常打卡able ~ 推薦大家叫呢度意粉!

Al Fhungi Pizza —— $145

蘑菇pizza~ 放滿各種雜菌, 落重本有超多芝士！ 拉斯效果極好~ 唔好覺得剩係得蘑菇味道會好單調，芝士嘅鹹味加上蘑菇嘅鮮甜，再加上焗得剛好嘅餅皮~ 推薦！

Cabana Colada (Mango) —— $115

整體偏甜, 芒果味都幾重，酒味以cocktail 來講都算重~ 都適合女仔叫~

Peach Me —— $115

有小小藥水味，不過都唔太差，比較推薦Mango 味(°▽°)

推薦值: ⚜️⚜️⚜️️.5 /5
最主要都係地方比較難搵，不過如果想搵一個有證有私人空間嘅食飯地方呢度一流！食物質素都有保證~

📍 東涌怡東路9號T Bay地下12-15號舖

呢間Cafe成功營造出歐陸式感覺嘅感覺，雖然地方唔大，但都做到親和力高得來又不失雅典~ 在場仲有坐係地下嘅位置，無論你係想有fine dining 嘅感覺定係同朋友輕鬆傾吓都適合架！ 最喜歡當然係各款用心嘅擺設，不論係枱櫈餐具定係Menu，都係別有用心，勁打卡able ah ~ 打卡friendly(*ﾟ∀ﾟ*) Food /Dessert : 📸📸📸📸.5 /5 Environment : 📸📸📸📸 /5 Price 💵 一般我對Cafe嘅食物標準都會降低少少，不過呢度嘅嘢食同好食嘅餐廳有得比！ 好值得期待架~ 西班牙火腿水牛芝士薄餅 ——— $158 睇返相都feel到個個cheesy嘅感覺 ! 估唔到呢個價錢食到水牛芝士嘅pizza ~ 雖然Pizza唔大份，不過餡料充足，西班牙火腿同水牛芝士簡直係絕配！ 北海道海膽帆立貝幼蛋麵 —— $198 勁有意外嘅意粉！ 食過好多唔同嘅海膽意粉同搭配，呢個面係我食過最深印象嘅！ 喜歡海鮮嘅你一定唔可以錯過，帆立貝勁大隻煎得剛剛好，個人覺得一人分係夠嘅，上面仲有新鮮海膽做搭配，性價比你講算唔錯！ 燒烤醬手撕豬肉漢堡 —— $148 食肉獸嘅恩物，燒烤醬勁香，手撕豬肉好林好容易入口，加入burger入面勁夾，個人覺得醬汁稍為過多有小小heavy , 不過整體來講我都覺得好好食！ Sor berries ——— $72 Tropical Sunshine ——— $72 兩杯唔同味道嘅Smoothie , 莓味比較甜，另外一杯菠蘿味就比較清新，總括嚟講都係好好飲smoothie , 唔會太過水亦都唔會太稠，沙冰嘅部份拿捏得唔錯~ 都推薦大家試吓嘢飲嘅！ 推薦值: ⚜️⚜️⚜⚜️⚜️/5 樣樣野都讚到咁當然係滿分啦，勁推薦大家去！ -Useful tags for you 💓 #tthkfoodie #tthkcafe

喺觀塘工業區有一間好低調嘅cafe, 靠住高質嘅食物同飲品打出名堂！雖然躲在角落但係地方都幾容易搵~ 入到Cafe入面係水泥工業風嘅裝修~ 位置好闊落而且好乾淨！ 環境相當唔錯㗎~ 呢度菜式唔算多不過樣樣都好食！ 記得嚟到一定要叫杯嘢飲呀呢度嘢飲超出名！ 打卡friendly(*ﾟ∀ﾟ*) Food /Dessert : 📸📸📸.5 /5 Environment : 📸📸📸.5 /5 Price 💵 蟹肉蟹膏忌廉扁意粉 —— $108 啖啖蟹肉，而且蟹膏同忌廉完美融合，仲有我最鍾意嘅扁意粉ahhh ~ 價錢已有蟹肉來講性價比都高！ 美式煙燻燒豬肋腓配薯條 —— $268 影相睇落豬肋骨都幾細塊但係其實兩個人share都幾夠，切落去好淋唔會咬唔開仲要勁入味！有輕微嘅煙熏味道~ 薯條都係好傳統嘅美式薯條唔係麥當勞嗰啲(^O^) 紅火龍果沙冰 —— $58 藍梅蜂蜜沙冰—— $48 沙冰加咗冰凍嘅水果入去打，真材實料㗎！但係又唔會太足料，都係似飲品嘅 (對我來講係優點嚟㗎！有啲怕太飽嘅飲品hehe) 來到唔好諗一定要叫！ 推薦紅火龍果味！ 推薦值: ⚜️⚜⚜️⚜️️.5 /5 想簡單食一餐或者輕食都係唔錯嘅選擇~ 特別係嘢飲好jeng ！ -Useful tags for you 💓 #tthkfoodie #tthkcafe