我一向都冇特別鍾意食海南雞，但朋友極力推薦天天海南雞 ， 一試就知出事 原來我唔係唔鍾意食海南雞，只係之前食過嘅海南雞唔夠出色，坐底就點左正宗海南雞&酸菜石斑， 海南雞賣相一流，配上3款醬汁、甜酸、鹹、雞蓉醬齊哂，可以單點一款醬或全部點少少食都得，雞香而滑，睇返介紹先發覺天天海南有監察貨源，確保食到嘅係健康有質素嘅雞，呢樣係值得堅持✊雞油飯好香，夠哂熱，食左2碗 酸菜魚食得多，但多數用嘅係魚味較淡嘅鱸魚，而呢度用嘅係石斑，效果即刻唔同，石斑厚肉，同酸菜夾得嚟又冇掩蓋左本身嘅魚味 飲品方面點左健康嘅竹蔗茅根馬啼薏米水& 凍恐龍美祿，恐龍美祿勁有驚喜，首先真係恐龍咁大杯，美祿粉同奶比例岩哂，面係大量美祿粉，食落好滿足，薏米水純天然，冇過多嘅調味

駕車經過紅磡，就試下紅磡區朋友推介嘅德懿屋，諗住買外賣返屋企食 飲品好多選擇，今次就揀左人氣推薦嘅珍珠奶綠&柳橙蜂蜜烏龍，珍珠奶綠珍珠彈牙，茶味香濃。柳橙蜂蜜烏龍消暑得嚟又健康，橙汁&烏龍茶好夾，2款味都飲到，係呢啲又熱又焗嘅天氣，嘆返杯凍飲真係好消暑 台式手抓餅係朋友話必點嘅，於是我買左邪惡惹味之選（煙肉、芝士、芝士醬），食落去好脆，餅厚薄適中，好大塊，包住煙肉芝士真係邪惡得嚟好好味，係車度已經不自覺食哂成件 留返個韓式風味 甜醬油雞飯返屋企食，打開個盒放得勁靚，有大量紫菜、泡菜、豆芽同青瓜等配料，咁就拌飯已到好正，我又突發奇想拎去炒，咦，又幾好食，雖然我炒到破壞左佢嘅賣相，但會更香口 依傢諗起又想再去食

夜晚係最岩傾心事嘅時間，入到呢間餐廳，聽到嘅歌機乎都係我係Spotify 讚好嘅歌單，輕快嘅英文歌，聲量剛好，烘托出氣氛，而又唔會掩蓋人聲 門口設有酒櫃，大概係放住店主嘅珍藏，店內吧檯附近吊住好大盞水晶燈，卻毫無違和感，時間尚早，卻已見有客人一人一杯大啤酒，提前暢飲 點了晚餐嘅自選套餐，頭盤係BB鴨蕃茄莎莎生菜包，鴨味香濃 ，配上脆口嘅生菜，食落好開胃，另外仲有意式炒大蝦薯仔，一開始以為真係得蝦加薯仔，事實係仲有其他配菜，色香味俱全，真係完全冇諗過咁好食 之後到蒜味薯仔餐湯，好creamy好滑，濃淡適中 主菜係黑椒羊柳，羊柳只留香氣，沒有羶氣，肉質嫩滑，配上醬汁，食慢少少都被搶 另一個主菜係英式啤酒炸魚薯條，講真，原本都係諗咪又係普通炸魚薯條，食完就知要炸好炸魚薯條一d都唔簡單，炸魚皮薄，完全冇粉味，外皮脆，入面嘅魚肉卻超級滑，配上黑椒真係估唔到咁正 呢間真係會再嚟食多轉

放工有時太攰，都冇心機煮飯，於是就留意下邊度有d性價比高嘅小菜食下，搵到呢間以川式小炒 個名叫麻甩妹，幾搞笑，詳細睇先知呢個麻甩口味係指四川風味，四川菜點都逃唔過辣，呢度嘅菜式都可以選擇辣度，由BB辣到大辣，你想幾辣就幾辣🤣 店舖唔算太大間，但感覺舒適乾淨 坐低之後發覺好多街坊嚟拎外賣，相信係買返屋企加餸，餐牌見到相當多菜式選擇 比較多人食招牌酸菜魚，今次就決定試下其他餸菜，因為多數招牌菜以外嘅菜式做得好食先最考功夫。點左魚香茄子、京蔥爆牛肉、孜然雞翼 京蔥爆牛肉個醬汁做得好惹味，大蔥中嘅蒜素可以提高免疫力，牛肉就可以補充鐵質，出街食一樣都可以食得健康 魚香茄子好入味，勁多肉絲，絕對落足料，送飯一流，孜然雞翼大大隻，炸得岩岩好，唔會太乾

夏天熱辣辣，有時唔想食煎炸類嘅食物，想食得清啲，打邊爐又驚會唔會熱氣呢？ 於是見到呢間有花膠雞煲，養生得嚟又健康，就決定一試 一心諗住嚟食花膠雞，但原來勁多火鍋配料選擇，有唔少海鮮例如脆肉鯇魚片、白膳片、蠔肉等，丸類、菜類、手切牛肉等，睇到花多眼亂，一班人食岩哂，但我同朋友2個人嚟，食唔到太多，就點左花膠雞& 手切頂級安格斯牛肉 火鍋當然唔少得整個靚鼓油去搭配，蒜、蔥、花生、辣椒等任人搭配 叫左2人份量嘅花膠雞湯，首先係要飲左個雞湯先，好鮮香，冇腥味，冇味精味，亦唔會太鹹，飲得出師傅的心機，煲好雞湯必須將血水徹底清洗乾淨，功夫都唔少，雞肉食落好滑，花膠大大舊，絕無欺場 我個人鍾意食啖雞，再飲啖雞湯 手切牛肉勁大碟，厚度適中，我本身好驚任食類型餐廳比d低質素嘅肉，只有高質素嘅牛先食到牛肉味，呢度嘅牛絕對高質

現代人愈來愈懶，想燒嘢食又唔想起爐，拎住燒之後總會有朋友燒燶哂，於是比我搵到呢間自助BBQ 嘢食全部都串好哂一串串，只需要放在自助爐度，佢就會自動旋轉，一定燒得均勻又唔會燶，一路傾計一路等佢自己燒完，就食得 選擇方面應有盡有，牛、豬、羊、雞、海鮮、丸、菜等等，最特別嘅係有雞蛋仔&棉花糖 燒到咁上下就要加d燒烤醬，避免燒得太乾，店舖提供大量調味料，有辣粉、孜然粉、燒烤醬等，燒多春魚燒好左之後就加調味粉，食落同在街檔賣嘅差不多，有部自助機燒得特別輕鬆 芝士腸要小心會爆汁，食得肉多可以燒菠蘿、好快就燒好，燒雞蛋仔好有驚喜，好容易就燒到外脆內軟，好好味 食飽仲有Häagen-Dazs 雪糕，揀左朱古力味&哈密瓜味，平時好少食哈密瓜味，食落清甜，仲有果肉

Burgeroom 嘅裝修好有格調,以輪胎、鐵桶及 大量人像油畫堆砌出工業風格,枱吧嘅設置好 適合放工去飲返杯 一睇餐單,只係漢堡都有幾十款,仲提供素食 漢堡,素食者都可以齊齊食,今次點左煙肉芝 士牛肉漢堡&軟殼蟹漢堡,午市仲提供套餐優 惠,加$30可配直薯條及飲品 飲品就揀左荔枝梳打&蜜桃梳打,好難得嘅係梳 打唔會太甜,明顯唔係加大量糖水,呢個值得 一讚,果肉係打碎左再融入梳打水,配漢堡就岩 哂 個軟殼蟹漢堡一出,OMG,勁大隻軟殼蟹,仲 要食落真係啖啖蟹肉,唔係一堆粉,煙肉芝士 牛肉漢堡就層層分明,清楚見到煙肉、芝士、 生菜、牛肉,芝士呈流心狀,蕃茄蔬菜好多汁 同新鮮,令到唔會食落太膩 漢堡已切好左一半,同朋友嚟可以一次過試哂 2款口味 薯條係粗薯條,可以自己拎芥末醬或茄醬搭配

搵住上水嘅朋友食午餐，發現上水有呢間一鳴屋台料理 店面似一間古式小屋，大大個招牌好易搵到，入面相當寛敞，卡位好靚，可惜嚟到卡位已經滿座，唯有等食客食完再影返張靚相補數。裝修都以木為主調，呢度嘅餐具都配合，以木筷、木匙羹為主 午餐有拉麵及日式便當🍱選擇，聽講晚餐有串燒，即係逼我搵日夜晚再嚟多次🤣🤣 今次叫左原條蒲燒鰻魚飯&一鳴豬骨濃湯拉麵 拉麵嘅叉燒係超級大塊，仲要係厚身，超級滿足，配料方面亦非常足料、滿滿嘅蔥粒&木耳絲，流心蛋放中間，加上唐辛醬，果然擺盤是一門藝術🎨 便當都係我見過裏面最靚嘅，除左原條鰻魚之外，仲有唐揚炸雞、沙律、飯及漬物，飯唔夠嘅話仲可以添飯，沙律開胃，炸雞夠脆 飲品就推薦乳酸梳打，但便當餐冇得揀乳酸梳打，建議加多啲飲品選擇 整體非常滿足

香港小食店一向係香港人嘅至愛，間中總會想篤返串燒賣魚蛋食，得知有間小店好用心做好呢啲小食，有朋友特別推薦法式陶瓷盤裝秘製瑤柱蘿蔔糕，我就決定買返份返屋企試下 店主好用心用冰袋包好，就算天氣熱d都唔擔心食物變質，一拎出嚟見到用瓷盤裝嘅蘿蔔糕，比起膠製嘅環保，瓷盤又可以重用，之後可以再整其他嘢食 蘿蔔糕面見到滿滿嘅瑤柱、蝦乾、臘味等材料。之後就要考驗我煎蘿蔔糕嘅功力啦。建議唔好切太薄，先燒熱煎鍋，再加油，等油熱左先放蘿蔔糕，每邊用中小火煎大約3分鐘，希望可以每邊都煎到金黃色，煎完就外脆外軟，蘿蔔好滑，可以按個人喜好搭配唔同嘅醬汁，個人喜歡搭配胡椒粉，更能帶出蘿蔔糕嘅香味 今次食左蘿蔔糕，下次要再試下其他嘢食😋

咁多人鍾意去泰國旅行，相信係因為泰國比生活節奏急促嘅香港人一個喘息嘅機會。泰然嘅裝修正正帶比人一種悠然自得嘅感覺。 一到午飯時間就坐滿哂食客，有午市套餐提供，但今次就想試下主餐牌嘅特式餸菜，於是叫左泰式豬頸肉生菜包& 招牌焗黃咖喱麵包軟殼蟹，飲品揀左椰青&西瓜芝士沙冰 椰青非常新鮮，椰肉香滑，椰汁清甜。平時多數係食泰式肉碎生菜包，比較少見泰式豬頸肉生菜包，決定一試。生菜好新鮮，亦有清洗乾淨，咬落脆口，係少有嘅餐廳重視生菜質素，豬頸肉放多少可按個人喜好，大大啖又得，淺嘗又得，但個人建議食生菜包唔好太斯文，一定要食到生菜包住肉先會感受到生菜包嘅魅力 招牌焗黃咖喱麵包軟殼蟹一見到就知道好適合鍾意打卡嘅朋友，大大個份量十足，咖喱同蟹好夾，配上麵包中和，最岩幾個人一齊食