食過好多次，每次想食點心嗰陣都必黎豪隍，水準一如以往嘅好 豪隍蝦餃皇 佢一籠雖然得兩粒，不過就大大粒裏面啲蝦又爽口彈口份量十足，皮薄餡多，一大啖咬落去好滿足！食過好多間點心店嘅蝦餃，覺得依間整得幾好食，唔錯！ 豉汁蒸排骨 身為排骨愛好者，好驚食到啲咬唔爛又韌嘅排骨，但依個就唔會，豉汁味香濃，而且排骨口感好嫩一啲都唔會咬唔爛 甜奶炸饅頭 炸饅頭炸得夠透，裏面熱辣辣，點上煉奶真係非常好食😋 脆皮雞翼 物如其名，真係十分脆，新鮮炸起熱辣辣之餘每一啖咬落起都脆到卜卜聲，好驚艷，鍾意食炸野嘅人一定要試吓，值得一試 混醬腸粉 呢間嘅腸粉整得好爽口，唔會好似有啲舖頭咁蒸到一patpat 淋到一夾起就爛影響口感，佢係一條條都好分明完整，又爽口Q彈，點上甜醬好好味😋

睇見好多人推介依間米線店，標榜無味精又好味，就入去試吓係咪真係咁好食！ 花膠雞濃湯米線 花膠大大舊又多又足料，湯底無味精又養生，仲有杞𣏌同雲耳喺入面，食完飲埋湯都唔口渴。啲雞份量夠多唔會淨係得嗰兩三雞，而且口感好滑好嫩一啲都唔鞋又有雞味，好值得去食 吊你癮小鍋 吊你癮個味就夠過癮喇，未見到食物之前完全聯想唔到係咩黎嘅，一試之後就覺得好惹味，食落都重豆瓣醬嘅味，湯本身都比較濃稠，第一啖好驚艷又食到啲麻味，但呢個就唔建議飲埋啲湯，因為會好膩架。而料嗰方面就好足料，勁多雞柳，有舊大雲吞，仲有好多配料，都幾抵食架。

夜晚突然想食咖喱，咁就揾到呢間Gali，見食評都唔錯就入黎試吓。 佢係用QR code落單嘅 印度香蕉甜煎餅 $42 呢個價錢都唔算貴，份量都幾多有成4大塊，除咗個邊邊位啲香蕉餡較少，淨係食到個餅皮，不過個餡甜而不膩有香蕉味。 印度香料咖哩雞 $68 +芒果乳酪$13 +轉奶油烤餅 $15 烤餅都幾大一塊，有五塊，點咖哩食一流但本身食唔出奶油味。個咖哩都有好多舊雞，大大舊成4，5舊，份量好多適合兩個人share食，香料味都重嘅，但味道一般食得多都有啲膩。同埋手套一人只會有一隻，會有啲唔方便。 印度烤雞 $42 大件夾抵食，但個雞就得啲香料味，無咩其他調味鹹味都無乜，個醬汁好淡味又有怪味，整體黎講味道麻麻，除咗份量之外無咩可取之處。 芒果乳酪 係套餐加$13就有 原價$28 幾好飲，乳酪味厚實，但店家不夠貼心，杯野咁高但枝飲管咁短，飲到底仲要揾手撩返上黎。

同朋友行行下街有啲攰，見到有慢煮工業，外面望入面環境都幾靚，就入去試吓 下午茶時段環境清幽，以黑色為主，令人覺得好舒適，好啱朋友坐低high tea傾計 黑松露薯條 薯條炸得金黃酥脆，屬於粗款薯條，份量又足仲一啲都唔油，配合埋黑松露醬香氣十足，不知不覺好快食晒成兜！ 迷你朱古力布朗尼配雪糕 見到擺盤灑上糖粉同彩色糖碎已經覺得好靚，朱古力布朗尼甜得黎又唔膩，濃濃嘅朱古力味，口感紥實，啱晒鐘意食朱古力嘅人 荔枝接骨木花特飲 荔枝味好重，少少接骨木花嘅香氣，好fresh好清新 蜜桃水果茶 成杯野都好足水果，好多蜜桃粒粒，菠夢同藍莓，飲落好重蜜桃茶味好清新，食完甜品飲返啖即刻解返膩，又可以再食過 脆辣一字雞翼 雞翼炸得好脆又香口，灑上少少孜然辣粉，又唔會好辣好刺激到味蕾，份量亦好足，配合埋附上嘅黃芥末醬，可以改變吓味道無咁易覺得膩，再飲返啖荔枝特飲即刻refresh返

-野菜山拉面 揀呢個面嗰陣以為會有extra芽菜同椰菜，最後只係比其他面多小小，同埋無荀，不過就多咗好多蒜粒同䓤花，令到個湯鮮甜好多，加埋本身個湯已經好濃，岩曬用尼送拉麵，每條麵都好咬口好掛湯，仲有兩舊叉燒都半肥瘦入口即溶，成個拉麵都食得好滿意，如果大家怕口臭記得唔好食埋蒜粒，不過夾埋其他配菜索曬d湯汁會忍唔住食曬再飲埋個湯，成個拉麵食曬連埋湯飲會好飽，建議大食都可以唔洗加底，最尾記得加荀片就可以了 -辛辣拉麵 拉麵筋道彈牙有咬口，湯底好濃厚，但係咁飲都唔覺膩，超好味。雖然話辛辣但其實辣味適中，啱啱好可以刺激味蕾，令到胃口大開！ 一碗有兩塊叉燒，一半瘦一半帶點肥，叉燒經灼燒後香味十足，而且入口即化，一啲都唔難咬！拉麵裏面嘅荀帶鮮甜，一啲都唔會老非常嫩，唔會啲纖維多到咬唔到。溏心蛋好入味，而且個蛋黃半熟恰到好處，下次經過都一定會再食 -綠茶汽水 覺得好特別，從未見過就叫黎試吓，同普通可樂有少少分別，帶點茶味甘甘地，除此之外都係一樣。

-試管鹽酥雞 炸皮好乾爽，唔會痴曬油好淋，咬入去舊雞有d汁，雞嘅底味都足夠，有好多唔同味粉揀七彩顏色好colourful，個人首推辣粉，大家可以試下幾溝尼食 -黑糖撞奶 黑糖味好足，而且面頭嘅奶霜加重咗成杯嘅奶味，奶香濃又滑，珍珠彈牙有咬口又大大粒，每次食都必叫黎飲！ -蔬果清燉牛肉麵 之前試過紅燒牛肉麵好驚艷，今次試蔬果牛肉麵個味就清d，大家可以按個人口味揀，不過蔬果牛肉面依然足料，有幾大舊牛展咁嘅肉，面質結實有咬口，湯清甜食完都唔覺滯 -五月星椒麻拌麵 五月星椒麻拌麵應該係本人食過數一數二好食，有微微醋酸，椒麻香味濃嘅汁，好惹味。而麵非常順滑有咬口，撈落啲醋汁黎食會食到停唔到口。配料方面好足料，有滷肉 菇 黃椒 青瓜，都索晒啲汁好入味。個人覺得有4.5/5，值得一試。

-新加玻喇沙摻摻 夏天熱辣辣最岩食d濃味辣辣地嘅野開下胃，試咗呢個摻摻好大碗，絕對夠飽，擺面仲有半隻温泉蛋，魚彈蝦豆卜之類，配埋有個醬唔辣嘅類似xo海鮮醬，連埋青檸汁加埋落湯度更加鮮味，成個湯好有南洋風味，只係有小小辣，計返譚仔應該得二十至三十小辣，加埋湯底可能有椰奶中和返，仲增加咗香味，我覺得喇沙湯底比咖喱更加鮮。唯一美中不足係可以再加多幾條菜索埋個湯一齊食會更正，不過對女士尼講食曬成碗會有d飽滯。 -老街咖哩麵 老街咖哩麵係油麵同粉絲混埋嘅，湯底咖哩椰味香濃，梛漿為本身咖哩湯增添咗香味，令麵底都十分入味！成碗麵都好足料，有蝦蜆等海鮮，食到碗底都仲有好多，值得一試！ -馬來拉茶 有少少似泰式奶茶嘅味道，好滑好香，但個人略嫌甜咗少少，不過都好好飲 -香茅青檸荔枝梳打 如圖所見有原碌香茅，再加埋d薄菏葉成個視覺望落好refreshing，飲落就有荔枝味不過只係好小甜，岩曬我唔鐘意飲甜野又想食飽消滯，仲有個底係梳打水飲完嗝返啖氣爽曬！最尾仲可以咬埋條香茅清新下個口氣。

海福小館 見到門口有金剛小儀食過嘅相，仲有好多其他名星食過，應該好好味就坐入去，睇咗陣餐牌見到有好多羊肉牛肉飯面，第一次就食佢招牌嘅羊肉試試先！ -咖喱羊 有好特別嘅藥材味！ -烤餅 烤餅淨係嗌咗兩塊，好好味夠香又有小小甜，點咖喱一流，不過有d油唔可以食太多 -羊肉米線 湯底比較清似滾過羊肉加䓤嘅湯，送羊肉食就唔會搶咗本來嘅鮮味，而羊肉塊數量好多，呢個價錢絕對超值，而且唔會太羶，肥瘦適中，下次可以試埋個崩沙腩應該都好好味。米線就正常，唔會係橡膠米線咬唔爛。雖然係羊肉但成個湯面食完好清新！

桂花味很清香，甜而不膩，很多拿破侖中間夾雜嘅醬都比較死甜，但依間就唔會。紅棗桂花雪梨醬較杰身 ，卻又唔會整濕出面個餅，非常鬆脆，而且有啲雪梨碎又有咬口👍🏻 圖二有好多蟹肉碎，料足，食落一啲都唔會咸，蟹肉碎加少少番茄味醬包裹住意粉 ，啖啖都食到足料蟹肉👍🏻食到停唔到口。 抹茶牛奶有全脂奶同脫脂奶可以揀，今次揀咗全脂奶，配合抹茶粉，飲落好滑又唔會太甜，抹茶又香濃，恰到好處