最近係top行完街落樓下food court就發現有放題食，入面有唔同嘅套餐，我哋就揀咗澳洲和牛牛小排火鍋放題 因為係用一人一鍋嘅形式，我哋就揀咗雞湯同埋蕃茄湯，湯底都係比較清淡，就可以比較食到食材嘅味道，尤其係蔬菜 喺牛肉方面，我最鍾意食嘅都係澳洲和牛牛小排，呢度嘅牛肉品質唔錯，好有肉味，切得都比較薄，基本上碌幾秒就已經食得 叫呢個套餐仲會跟兩隻鮑魚同埋廣島蠔，食落都幾鮮，任叫既沙白都幾鮮甜，推介大家試吓 飲品區嚟講，雪櫃入面嘅韓國飲品比較多，另外亦都有汽水機、咖啡機等等，選擇都算多

間唔中都會去呢間度食辣嘢，今次就嚟呢度食酸菜魚，份量足夠比三至四人食，湯底我哋就揀咗麻辣同埋青藤椒，我哋揀咗小辣，但係可能食物嘅份量比較多，都唔算太辣 酸菜魚嘅主角就梗係係魚啦，今次我哋就揀咗鯛魚，上菜嘅時候已經係一片片，食落有魚嘅甜味，魚皮幾爽脆，個人覺得口感比鱸魚好食 另外嘅配料仲有鴨血、午餐肉、肥牛等等，份量都幾充足，底層會有薯粉，本身都有配主食，所以食晒嘅話真係會好飽 另外仲叫咗份麻辣手撕雞，雞肉會有少少韌，麻辣味夠晒辣，作為開胃小菜亦都唔錯

又去到古今食特色卷物😋實在太好食，每次都吸引到我返去，今次就去咗銅鑼灣分店，靠窗嘅位置都會望到靚景 煙花：三文魚卷上面有甘甜嘅吞拿魚蓉，魚蓉係冇筋嘅位置，所以處理得相當好，而且呢個煙花卷有陣辣味，都幾過癮，上面嘅蟹籽同埋脆片營造出脆嘅口感 搖滾樂：好味多汁嘅鰻魚放喺炸蝦卷上面，炸蝦仲保持到脆嘅口感，而且仲捲埋牛油果同埋芝士，有幾香嘅芝士味 埼玉網燒牛舌：呢碟牛舌嘅火候掌握得相當好，咬開之後會見到係微微嘅粉紅色，軟腍有肉汁 鹽燒鯖魚：雖然呢條鯖魚唔算話好多脂肪，但係都燒得相當美味，配上醬汁就更加提升到魚嘅味道

近日就去咗一間好chill嘅餐廳，呢度係可以見到海景，嗰日店員安排坐Bar枱嘅位置就可以近距離欣賞調酒師調酒 KABOOM Sharing Platter $248: 前菜叫呢個實在係太豐盛，拼盤入面有各種炸物，比較特別嘅係庶蝦肉，食到啖啖蝦肉，其他炸物例如春卷同雞翼嘅火候都係炸得啱啱好，春卷嘅餡料亦都幾惹味，拼盤仲配咗三種唔同嘅醬料，可以比客人配搭，自己最鍾意嘅都係泰式辣醬，酸酸甜甜開胃 Scallop Carpaccio $128.0: 基本上呢款係帶子刺身，味道上比較清淡，旁邊嘅醬汁同佢好夾，唔會搶走帶子嘅鮮味 Lobster Pasta With Lobster Tail $268.0: 意粉嘅醬汁係充滿龍蝦嘅風味，配料例如蕃茄、菇都索埋汁，而主角龍蝦肉亦都非常厚實，燒過嘅部份會稍微有脆嘅口感 Grilled Gai Yang Chicken: 呢道係泰國東北部菜式，因為用咗唔同香料醃，所以隻雞都醃得好入味，肉質上就同平時嘅春雞差唔多，雞嘅份量都係幾大隻 Whoo, What A Day! $128.0 : 視覺效果嚟講覺得有春天幾清新嘅感覺，表層奶泡有好香既椰子味 Every Day Feels Like A Monday $128 : 呢杯就有亮眼既藍色，飲落柚子味好出，所以都幾開胃

最近朋友生日，知道佢鍾意食韓式嘢，所以特登安排佢去element嘅一間韓式餐廳度食晚飯，好好慶祝，而壽星都係對當日嘅菜式讚不絕口。🤣🫶 綻放的櫻花生牛肉：喺生牛肉旁邊放咗唔少配料，例如松子，撈埋埋一齊之後，生牛肉反而有一種甘甜嘅感覺，再配上新鮮炸嘅紫菜，係一個唔錯嘅開胃菜 韓牛大蔥卷：牛肉卷嘅份量非常多，職員會為客人煮熟牛肉卷，火候都係掌握得唔錯。蔥都算幾粗，個人會比較鍾意幼一啲嘅，牛肉食落質素上乘，而且有香濃牛肉味。職員會建議我哋去點麻油鹽，都算係幾新嘅體驗。剩低少量嘅牛肉會用嚟做一個牛肉炒飯，牛油會滲入飯度，好惹味 大邱櫻花蝦煎餅：平時都有入廚嘅朋友話呢個煎餅好難煎得好，佢都大贊呢個煎餅幾好食，櫻花蝦煎餅作為點綴，食呢個餅嘅時候最鍾意嘅都係韓式辣醬 櫻花蝦蕈菇釜飯：除咗菇同同埋櫻花蝦之外，主要嘅調味係來自於表面嘅炸蒜，炸蒜嘅味道充滿成個飯，而呢個飯係比較清淡嘅，亦都幾啱同牛肉一齊食 另外我哋都試咗兩杯Cocktail ,snowing night同see you ,喜出望外嘅係酒精味都唔算太重同埋偏甜，朋友飲既see you因為用咗檸檬汁同埋柑橘等材料，比較酸啲同開胃啲，snowing night 就比較清新

用平台叫take away 又唔覺得價錢有幾平民 去到間舖先發覺原來有更加高性價比嘅選擇 叫咗鰻魚飯同埋雞扒飯 個飯平係平 餸同飯都冇乜 勉勉強強先至夠飽 鰻魚飯就真係幾腥 成個感覺就係食汁咁 雞扒嘅感覺就係嗰啲包裝咗嘅照燒雞肉 啲汁又太多，搞到成個飯好鹹 另外叫咗少少sushi 我特登就試咗佢哋嘅花之戀 因為見到有人recommend 我就真係從來都未見過咁細嘅花之戀 同埋最奇怪嘅就係 唔明點解叫sushi， 係可以冇豉油同wasabi 我覺得呢啲真係基本囉

間唔中都會去金玉滿堂度食雞煲，今次試吓花甲海蝦雞煲，我都幾食得辣嘅，所以就揀咗小辣，對於我嚟講辣度啱啱好 撈完一輪之後，蝦嘅味道其實都會滲入汁入面，會越嚟越香，花甲嘅尺寸唔算大隻，不過都係非常鮮美，配上汁就更加好食，蝦都係大隻新鮮，雞件嫩滑，兩個人食細雞煲都好夠食，入面嘅香菇同埋熟蒜頭都好惹味 椒鹽排骨：先將排骨拎去炸，然後再以椒鹽相配，上面嘅炸蒜香脆可口，排骨係比較肥，肥膏同肉勻稱，比較邪惡嘅選擇 另外就順便試吓魚皮，魚皮好爽，但唔會有腥味，仲可以點有麻油同Wasabi嘅豉油，幾啱佐酒

一直都好掛住龍鳳呈祥嘅雞煲，所以趁天氣仲凍凍地就返嚟食，今次叫日本廣島蠔雞煲，雖然叫嘅係小辣，但係都已經相當辣，雞件都係大大嚿嘅，而且相當嫩滑，廣島豪索咗啲雞汁之後更加惹味。食晒啲雞之後就加咗豬骨湯底繼續打邊爐。 牛肉拼盤（細）：二人嘅話嗌呢個份量已經好足夠，可以一次過試晒唔同嘅部位，特別鍾意嘅係牛柳粒，烚完之後都係好腍，而且仲有少少油脂 五香肉丁餃：覺得呢個口味都幾新奇，入面係冇乜辣汁，所以都唔算太辣 黑松露羊肉餃：估唔到黑松露同埋羊肉嘅味道都係幾夾，羊肉唔會太騷 豐盛雜菜拼盤：餐廳好有心機，切咗啲心形蘿蔔，入面有幾款唔同嘅蔬菜，包括黃芽白、油麥菜等等 生啤：見到佢做緊買一送一嘅優惠，真心覺得幾抵，食雞煲就梗係要飲啤酒

有一日約咗朋友喺Harbour city行街，見到呢間泰國餐廳，由於我啱啱喺泰國返嚟，實在太掛住泰國，所以就好有興趣想試吓 黄咖喱燒鴨胸意大利飯：lunch set包冬陰功同沙律，冬陰功酸辣開胃，辣度係一般人都可以接受到，入面有少少菇，沙律菜新鮮。主角意大利飯嘅飯熟透，唔會好似某啲餐廳做到好生咁，黃咖喱汁非常惹味，太食得辣嘅朋友都食到，鴨胸嘅份量都幾多，肉質偏鞋，但係有鴨肉嘅香味 泰式羅勒芝士素肉醬意粉：泰式嘅意思應該就係加咗少少炸過嘅香葉入去，成為肉醬意粉嘅配搭，雖然用嘅係素肉醬，但係感覺同食真肉冇咩分別，醬汁嘅調味都非常好，上面有一層燒香嘅芝士🧀 凍泰式奶茶：特登加$18飲杯泰式奶茶，都係喜出望外，喺泰國飲嘅都冇太大分別，值得加錢叫呢款嘢飲

之前經過上環就留意到呢間Cafe,裝修以黑白設計為主，最近得閒就同朋友一齊試吓呢度嘅午餐 煙三文魚飛魚籽蘆筍扁意粉：呢個醬汁係以忌廉汁作為基調，細細粒嘅飛魚籽增加口感，忌廉汁嘅調味唔錯，扁意粉亦都幾索汁，煙三文魚揀得幾好，油份唔重，仲捲成好睇嘅玫瑰花 蒜香辣椒大蝦干扁意粉：呢個意粉就比較乾啲，而且真係好夠辣，真係喜出望外，蒜嘅味道同大蝦都好夾，蝦既份量亦都幾多 雜莓雪糕窩夫：同朋友一人一球朱古力雪糕真係好滿足，窩夫嘅質感屬於唔係脆，亦都唔係淋嘅嗰一種，頗有蛋香味 芒果菠蘿伯爵星塵茶：因為有伯爵茶嘅茶底，所以呢杯嘢飲係特別有風味，加上水果比較清新，芒果味會更突出 Latte:呢度採用嘅咖啡豆都唔錯，成杯咖啡既油分足夠