Taco Time 佢個皮唔係太厚，但係今次揀咗蟹肉，佢嘅蟹肉味好出好濃烈，唯一唔係太好，就係個皮唔夠燶，搞到賣相差咗少少。 Southern Scallops 佢個帶子雖然唔係好熱，但係個味好特別，作為前菜一流，好醒胃，搞到食慾大增。食落口好新鮮，唔會有好腥味道。 Tandoori Jumbo Prawns 大蝦嚟講，佢煮得好入味，亦都好新鮮，完全冇霉嘅感覺。不過反而就搞到鹹咗少少，但係整體個味唔錯，有啲洋蔥伴碟，令到個口有啲清新感覺。 Tamatar Ka Shorba 蕃茄湯一飲落口就飲得出佢係新鮮蕃茄難而成，唔係普通蕃茄罐頭湯嗰種，10分濃郁嘅蕃茄肉同埋汁，好有田園感覺。好似飲緊野菜汁。 Truffle Butter Chicken 呢個黑松露味10分突出，好重黑松露味。雞嚟講亦都煮到啱啱熟，又唔鞋。肉嚟講真係好好食。佢個黑松露牛油汁配埋個包就好好食。 Baigan Bharta 今次呢個香草焗茄子蓉就有少少失色，佢個味道唔錯嘅。不過拼埋落去，黑松露雞，同埋紅洋蔥羊就差咗少少喇。 Lamb Roganjosh 佢個羊炆到10分入味同埋好腍，食落去唔會有韌嘅感覺。初頭食落口一啲都冇羊羶味，不過當你食耐啲就發現好羶。但係除咗嗰浸味，佢個汁都相當唔錯。 蒜蓉烤餅 蒜蓉烤餅蒜蓉味唔係好濃郁，配埋啲汁食就變得好好食。 環境 佢整體環境好靚，裝修好有阿拉丁味道，一出門已經有嗰浸印度味，佢仲有戶外開放俾大家出去打卡影相。侍應服務周到，都好有笑容。佢哋全部都係印度人，就係呢一點睇落去都已經好正宗！埋單1426就有啲貴，不過久唔久一次都可以。

蒜蓉蝦春卷 之前佢就用長條型，不過今次食就轉左傳統粗又矮。不過好彩，呢個都keep到水準，大件又抵食，不過唔好期望好好食，正常發揮。 香煎南瓜餅 佢個南瓜餅入邊包住豆沙餡，就唔係咁正宗㗎啦，不過呢就好黏同好痴牙，但係就唔係太甜。 香煎韭菜餃 今次我韭菜餃仲特別，你唔好以為好似平時食開用肉包嘅韭菜餃，佢係用鯪魚肉包。不過要一讚嘅就係佢煎炸得好香口，就有別於一般嘅韭菜餃，可能我唔係好識食，我覺得一般嘅就正常好多，同啱返我口味。

海葡萄沙律 海葡萄好爽口，亦都好清新。搭配沙律醋同海帶，口感好特別，爽同淋不停喺個口度交替嘅感覺。令到食主菜前十分開胃。 燒象拔蚌 今日店員話呢個好新鮮，本身以為吹水。點知一嚟到香味十足，見佢面頭配上蒜蓉同青蔥。食落口象拔蚌非常彈牙，果然冇吹波。我都十分推薦大家試吓。 燒白鱔串 我見佢餐單上推介呢個，於是叫一串食吓。點知真係物有所值。今次我揀咗鹽燒食魚本身嘅味道。食落口肉質非常結實，好有實在感。亦都十分香口。 燒牛舌串 燒牛舌非常彈牙入味，食落口好有滿足感。而且非常有牛味，亦都唔會燒到好乾身，都好juicy。 燒雞皮 燒雞皮會有啲肉同脂肪黐住，相比之下就會有少少肥膩。但係反而令到成串燒雞皮嘅口感上升不少。 黑松露珍寶菇薄餅 呢個薄餅真係一流，首先佢個餅底已經好特別，手抓餅餅底。珍寶菇係用幾種菇溝埋。焗完之後個餅底有啲淋，不過呢個先至係精粹，佢將焗出嚟嗰啲菇汁，收晒落個餅入邊。加上有黑松露味，令到個Pizza 食落口好多層次感覺。呢個真係值得推介！ 燒茄子 燒茄子十分大碌，性價比好高。佢個茄子就唔會燒到啲皮爛晒，或者皮同肉分離唔到。 鰻魚炒飯 鰻魚炒飯汁同埋飯嘅比例相當好，每一粒飯同埋汁都撈得好勻循。唔會出現一啲白飯嘅情況，而且炒飯入邊加有鰻魚粒同埋洋蔥粒令到炒飯口感有啲不同。另外佢再喺面頭會加兩塊鰻魚。十分足料！個人相當推薦！ 環境 雖然係舖仔，用膳位置喺閣樓位置，不過佈置相當日式，亦都叫咗一杯1664，佢用冰杯上，令到啤酒都十分冰凍。店員都好有禮貌，態度和藹周不時會同你推介邊啲好食。佢亦都會同你講，你叫餐單上面嘅嘢今日唔係太新鮮，會推薦你食其他。呢種態度相當好！我相信呢間餐廳日後都會成日過嚟，嘢食一流同埋環境都比到一種好舒服嘅感覺！

韓式菜包黑毛豬五花（200g） 呢個餐包一兜山菜，咁佢五花肉個數量都幾多，但係佢係博切嘅五花肉，同埋佢呢個餐冇飯跟。不過勝在夠平，性價比都好高。 極上之選（150g） 呢一個餐，有牛小扒同埋牛橫膈膜。2款牛比例就2:1 咁啦，餐可以揀泡菜或沙律。另外有個飯可以比大家。不過牛肉油脂分佈都平均，對得住個價，不過不失。另外加咗50蚊3塊和牛，3塊既和牛嘅質量就比較好，牛味同埋油脂味就重好多，$50真係抵加！ 奶醬牛角包窩夫 牛角飽窩夫就都幾好，咬口幾好同好脆！佢大概有1個手掌份量，價錢合理，係出面既一半！ 朱古力醬3.6牛乳雪花冰 喱個雪花冰好重奶香味，而且份量好多，而當中有朱古力麻糬。變相有幾重口感。所以都十分推薦！

今次我叫咗牛肋條，牛筋，韭菜餃同牛丸。牛肋條同韭菜餃我不嬲都會嗌，水準都一流，韭菜餃皮薄，搞到食嘅時候都穿咗。牛筋就好入味，好有腩汁味。牛丸亦都好彈牙，講真呢啲餸真係會繼續食。 不過出事嘅地方嚟啦，今次貪新鮮叫咗個麻辣湯。對比番佢以前嘅馬來沙嗲湯遜色不少！個湯就冇乜川辣味，反而只係得一味辣同少少麻，反而少咗其他米線舖嗰隻湯底味。搞到好大失落，所以下次都會帶返普通湯，再加返藍汁應該好食好多！所以我極度唔推薦今次嘅川式麻辣湯！

牛小扒壽喜燒 佢面頭上有6塊牛左右，另外有金菇同娃娃菜。而壽喜燒湯底，鹹甜適中。另外加咗個稻庭烏冬，成個好似求籤筒咁，好特別。牛小扒份量就唔係太多，但係味道都唔錯。 鱈魚片 新鮮燒出嚟好脆，鱈魚味都好濃夾埋美乃滋醬，十分香口，令到我係咁食，食唔停口！ 鵝肝壽司 鵝肝壽司佢幾大件，剩返鵝肝都差啲跌出黎。鵝肝食入口油脂感好飽滿，成口都有好滿足既感覺，真係值得一試！ 燒物 今次都叫咗大量燒物，有安格斯牛蔥卷，鰻魚，雞翼，雞軟骨同牛舌。佢燒物既水準幾好，另外有黑椒豬頸肉，佢豬頸肉又厚又彈牙，都果算係廚師推介一種。 環境 最後佢環境清幽，入邊裝修都好日式，亦都有唔同嘅清酒可以飲。今日我哋坐卡位，下次可以試吓坐吧枱，我諗會有別有一番風味。

照燒雞蛋黃醬Pizza 呢個Pizza，有日式小丸子嘅味道，因為佢蛋黃醬好濃味，而且好香口，價錢又唔貴，性價比幾高！ 意式炸魷魚圈配他他汁 呢個同我想像中好大落差，我睇圖係應該幾好食，點知嚟到，個魷魚圈係凍嘅，炸粉嚟講又好油。雖然佢唔係太貴，不過對於呢個真係好失望。 蒜味芝士雞翼 雞翼唔算好大隻，不過入口都可以，配埋個蒜味醬都唔錯，幾好食對得起個價錢。 雙重辣味煙肉蒜香魔鬼意粉 呢個意粉嚟到就見到全部都係辣粉，食落啲辣味好正，又唔會太辣。不過煙肉就唔係太多，我仲加咗$10加大意粉，所以份量都好夠，食到捧住個肚走！ 香煎鮭魚配味噌忌廉鮮製意份 呢個係今期特色嘢，所以我有特別同驚喜。佢個意粉好重忌廉味，一食就成口忌廉，仲有啲雜菌增加口感。個三文魚好重魚油味，好香口，又唔會太冧，所以覺得10分特別！呢個我好推薦！ 環境 環境來講算係有啲普通，有啲似小型日式溝西式Cafe。相對嚟講價錢都唔係太貴，適合出街食啲唔係太隆重嘅西餐。期間仲有個新嘅蝶豆花飲品，賣相唔錯，打卡都一流！

香草牛油燒大蝦配青蘋果沙律 呢個青蘋果沙律一食食落口好有新鮮嘅味道，而且佢個沙律醋十分開胃，不過亦都令到成個沙律有啲鹹。而蝦方面都挑選比較大隻，但係蝦唔係咁入味，相比起沙律個味道有啲淡。 燒美國安格斯西冷扒配黑松露薯蓉 西冷牛扒就燒得比較生，今次我叫咗medium Rare，但係嚟到都覺得比一般餐廳煮得生，不過識落有幾有咬口，配埋香草汁一流，另外佢有跟個燒汁，可以調返燒牛扒嗰陣香味出嚟。另外佢有個黑松露薯蓉，反而呢個黑松露味好出，不過份量比較少。 黑松露薯條 黑松露薯條，佢新鮮炸出嚟，不過佢呢款就落黑松露粉，而且粉嘅份量就比較少，現在黑松露嗰陣味唔係好香，食落都唔係好有黑松露味。最後要要求加啲黑松露醬比我地。 環境 佢裝修好有西式風格，不過就燈光有啲暗。佢服務有啲貼心，會自己問使唔使拎碟比你，同推介邊款Cocktail好飲。今次都好好彩可以坐到面對廚房嘅巴枱位，可睇住入邊個廚房煮嘢食，同埋睇到啲廚師好忙咁，有時有嗰煮野食火光睇下幾有feel。

韓燒烤肉菠菜意大利飯 呢個意大利飯食落口唔太硬，而且當食烤肉嘅時候亦都有韓燒烤肉嘅香味，肉質嚟講算係不過不失，又唔好期望係咩和牛入口即溶。飯入邊亦都有啲蒜蓉同埋黑松露，不過亦都有我最唔鍾意食嘅青豆。所以大家要考慮吓。 蒜香甜辣秘製炸雞 炸雞想點唔會太乾，撕開會有啲肉汁喺入邊。而且個皮亦都好脆，有執得來又唔會搞到個皮林晒。不過美中不足就係佢嘅醬汁唔多，好難每一舊雞都可以沾長醬汁。佢個汁嚟講唔係太辣，蒜香味突出。 環境 佢有店內同店外，店內就有歌聽，而且裝修比較舒服，店外就坐喺商場走廊。而呢度服務通常都係外國人，所以都係用手指指叫野食，不過咁樣就可能令到大家覺得有風味啲。

刺身拼盤 雖然種類唔多，有三文魚希靈魚八爪魚同北寄貝，每樣都係有一塊。叫少食多滋味，刺身嚟講都算新鮮，刺身都好鮮味！ 海鮮拼盤 成盤上菜嘅時候好新鮮，啲蝦不停跳，鮑魚又係咁郁，另外龍蝦都郁吓郁吓咁。佢指定嘅有波士頓龍蝦、鮑魚、聖子、另外就有其他六款就由佢決定。食落口龍蝦都好有口感，不過佢收三百幾蚊，每樣就得一個，你唔好預佢有好多。但整體嚟講好食嘅！成盤拎嚟打卡一流！ 醬汁 混醬方便呢度嘅款式就唔算太多，但係最令我出奇嘅係呢度又有麻辣醬（即係花椒辣油），對於麻辣一族真係福音！ 胡椒豬肚湯 個湯就好重胡椒味，冇乜豬骨味道。不過以打邊爐個湯底就都合格，仲鹹咗少少。 手切牛肉 牛肉切得厚薄啱啱好，有啲咬口得來又好似食緊紙咁。上碟嘅時候仲有冰襯下，打卡都得。 潮州那哥魚蛋 呢個魚蛋，好有驚喜，原先睇佢潮州魚蛋心諗應該都爽口但普通。但係食過先發現入面有少少汁。啲汁又教返個魚蛋，但成件事好驚喜，我覺得值得一試 環境 佢裝修都好啲簡約，不過佢就中式食堂。睇落就幾乾淨。不過衛生來講就有啲唔太理想，可以再做得好啲。其實整體想睇間嘢做得都比較用心。有好多細節位睇到其他打邊爐舖頭無既野，但係可以再改進多少少。