20/4/2024 📍喜煌點心專門店 同屋企人食飯 飲茶就最好不過啦 呢間係旺角嘅點心專門店主打係牛肉嘅點心 話自己係「牛肉世家」 好似好勁咁 入面裝修幾特別 好似舊式戲院咁 行懷舊風 用QR code落單 只限45分鐘落單時間 （唔知過咗時間係咪就冇得落呢？🤔） ⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯ ✨瑤柱杞子燒賣皇 （$35） 幾彈牙 加咗瑤柱令燒賣level up 咗 ✨竹炭熔岩奶黃包 （$28） 細細個 食一個啱啱好 甜度適中 有流心效果 ✨蜜汁叉燒腸粉 （$30） 切開咗6嚿 方便同人share 但餡料偏少 ✨海苔香煎蘿蔔糕 （$25） 係普通蘿蔔糕 果幾條紫菜係面都冇乜存在感 ✨芥末沙汁三文魚春卷 （$35） 沙律醬好多 食一嚿都好膩 仲搶埋三文魚嘅風頭 春卷配咁甜嘅野感覺唔係好夾 ✨蜜瓜炸鮮奶 （$32） 最奇怪係呢樣 陣蜜瓜味好假 冇乜奶味 ✨陳皮山竹牛肉球 （$30） 幾大嚿 夠彈牙 ✨酥皮焗叉燒包 （$32） 普普通通 可以再酥脆啲 個包好鬆軟 酥皮薄薄哋 食落似墨西哥包多啲 ✨粟米煎牛餅 （$30） 外皮脆脆哋 牛肉幾juicy 但粟米唔夠甜 ⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯ 我哋4個人食咗9樣野 加埋每人茶位 $8 用咗～$300 大家都食得夠飽嘅 除咗個炸鮮奶之外 其他都唔錯 仲有值得讚嘅係全部野食都好夠熱 推薦指數🌟：3/5 📍 旺角通菜街17號地舖

11/4/2024 📍Pickabowl 夏威夷蓋飯一直都係健康人士之選 主打用原型食物同埋高蛋白食材 而且可以自由配搭 呢間poke有好多種唔同類型嘅肉類選擇 有唔同調味嘅三文魚、呑拿魚、蝦、雞肉、豬肉、八爪魚 款款都好吸引 但係配菜方面只可以揀6個已經配搭好嘅set 而飯有得揀黃薑椰菜花飯去代替白飯 啱曬想cut carbs 嘅🤷‍♂️👩🏻‍🦰 呢間幾特別嘅係可以揀烏冬 不過我哋就冇試到 ⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯ ✨西班牙蒜油三文魚+經典呑拿魚+和風配菜+黃薑椰菜花飯+白飯 ($108) 蒜油三文魚嘅蒜味好夠 吞拿魚就係醬油味重啲 兩款嘅調味都幾好👍🏻啲魚都唔腥 和風配菜包括咗菠蘿、玉子燒、豆乾、南瓜、豆角、枝豆、車厘茄 配菜種類好多 但調味就冇乜 成個bowl嘅味道都係靠兩樣海鮮嘅醬汁 第一次食椰菜花飯 有少少菜味 冇想像中咁奇怪 都可以接受😉 ✨煙燻油辣味三文魚+慢煮天多利雞+蛋黃配菜+黃薑椰菜花飯+白飯 ($98) 三文魚嘅調味做得唔錯 而且唔會腥 辣辣地都幾開胃 雞胸肉都唔會太柴 連埋個汁食都唔錯 不過蛋黃組合就麻麻 只係青瓜粒 菠蘿粒 蟹籽粒撈蛋黃醬 有啲似日本餐廳會俾嘅前菜 而且有啲濟🙂‍↕️ ⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯ 我哋兩個人食咗$202（唔收加一） 食過幾間poke 呢間唔係最推薦嘅 有機會試到第二間好食嘅再推薦比大家☺️ 推薦指數🌟：3/5 📍 荔枝角長義街9號D2 Place ONE 1樓112號舖

13/4/2024 📍The Pizza Pig 上次食完Pici 行過睇到呢間以🐷做主題嘅餐廳就好想試下 餐廳嘅裝修偏歐陸風情 以藍白色做主調 俾人好輕鬆活潑嘅感覺 特別有holiday mood😚 我地坐係櫥窗邊 可以睇到人來人往嘅街 (或者係俾人望🤣) 不過衛生好一般 有啲飛飛會係張枱爬過🤢 ⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯ ✨Signature Piggie - 8 inch ($138) 見到佢係signature 就決定叫黎試下 每塊pizza上面都有一塊炸豬皮 同埋手撕豬肉 第一次見呢個combination 不過無咩特別 上面有好多番茄醬同芝士🧀食落好juicy 而且餅底好脆好香口 又唔油膩👍🏻 ✨香脆德國鹹豬手 ($308) 雖然比較貴 不過就寫明係for two 真係好大份 豬手肥瘦比例啱啱好 唔會淨係得肥膏 而且瘦肉又唔乾 上桌已經幫你切好 啖啖肉食落真係好爽快😋 豬皮算係脆 不過又未去到好似燒腩仔咁脆 如果再脆啲就好啦 佢仲有酸菜同埋芥末醬俾你refresh下 無咁油膩👍🏻 配菜有焗薯 烤蘿蔔 烤菜 都有調味 不過配菜可以多啲 話曬都係俾2個人食 ⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯ 我哋兩個人食咗$491（收加一） 我哋都幾鍾意個豬手 食得好滿足😚 但pizza 就唔夠impressive啦 推薦指數🌟：4/5 📍荔枝角長順街15號D2 Place TWO地下G02號舖

6/4/2024 📍Egg Slut 呢間係以slut egg為主題 專門食三文治🥪嘅餐廳 Menu 得幾款包同埋小食可以揀 description 有列明每款包嘅配料係咩 方便客人比較唔同口味 餐廳嘅座位好多 夜晚去食都有大把位坐 ⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯ ✨Fairfax Sandwich 招牌炒滑蛋三文治 ($78) 招牌炒滑蛋果然好好食！ 佢嘅炒滑蛋好重牛油香🤩 所以食落去好香好滑仲好邪惡 麵包係brioche bun 咬落好軟 一啲都唔乾 加埋入面嘅焦糖洋蔥同是拉差蛋黃醬 仲有靈魂角色：車打芝士🧀 所有有野都係啱啱好 係perfect match! 佢啲餡塞到超滿 每一啖都食得好滿足😋 ✨Cheeseburger 芝士漢堡 ($92) 相比佢嘅炒蛋sandwich Cheeseburger 嘅表現就好一般啦 味道普通 比得呢個價錢就唔好係度食啦😉 塊漢堡扒冇咩味 流心嘅煎蛋做得唔錯 但唔夠炒蛋出色 仲有啲pickle 吊下味 但整體都唔算好濃味 ✨Slut 招牌蛋薯蓉加法包 呢個用好薄好脆嘅法包 去點個蛋薯蓉一齊食 蛋薯蓉就係將半熟蛋撈埋薯蓉 熱熱地 再用鹽去調味 吊到蛋嘅香同埋薯蓉嘅甜 再加埋法包香脆嘅口感 非常唔錯✨ ⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯ 我哋兩個人食咗$234（唔收加一） 佢個招牌三文治同slut 都好值得試 價錢同quality都成正比嘅👍🏻鍾意食蛋嘅可以嚟試下 推薦指數🌟：5/5 📍銅鑼灣記利佐治街11-19號及百德新街27-47號Fashion Walk地下2號舖及1樓F-1號舖

6/4/2024 📍Camper’s 坐忘 今次都係👩🏻‍🦰心心念念不忘系列 之前試過一次之後就回味無窮 一直都話好想黎食多次🤤 佢地標明係無落MSG架 有天店同埋鰂魚涌兩間分店 今次黎食天店呢間 星期六嘅下晝1點幾都唔係好full 試過去鰂魚涌果間 平日放lunch 就好多打工仔都會排隊幫襯 入面空間唔細 但座位擺得都幾密 ⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯ ✨豬軟骨七小時煮白芝麻湯烏冬 （$75） 呢度最出名就係佢嘅豬軟骨 賣點係經過7小時慢煮❗️ 令到啲豬軟骨非常軟熟 唔講會以為係脂肪黎 食落去真係非常有驚喜 啲肉亦相當juicy 真係非常推薦 👍🏻 食過好多餐廳嘅豬軟骨 呢間真係最好食🥇 不過個白芝麻湯就有啲似食緊出前一丁嘅豬骨湯 唔係好特別 (定係出前一丁做得太好？) 烏冬就做得唔錯 非常彈牙有咬口 ✨蕃茄牛肋野菜咖哩飯 （$75） 呢個汁食落有啲奇怪🤔 蕃茄嘅甜酸溝咖哩嘅鹹辣 有啲兩頭唔到岸又唔係好夾 而且牛肋有啲乾 中間又唔係好入味 啲飯有啲粟米一齊煮 有少少蔬菜嘅甜味 不過啲飯就好濕 有啲奇怪 而且可能因為太濕 佢反而吸唔到啲咖哩汁 值得讚嘅係 蔬菜嘅量都幾唔少👍🏻 ✨原味乳酸 （$10） 唔係好甜 唔錯 ⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯ 我哋兩個人食咗$160（唔收加一） 豬軟骨的確好好食 會繼續掛住佢😊 但其他野就冇乜記憶點啦 揀定食或丼飯可能會更好 會繼續發掘下有冇可以超越佢嘅豬軟骨🤣 推薦指數🌟：3/5 📍 天后電氣道127號地舖

29/3/2024 📍Dear Coffee & Bakery 👩🏻‍🦰係麵包控 心心念念咗幾年 一直都想嚟試下呢間嘅麵包 呢日終於嚟咗啦！ 呢間小店位置相當偏僻 係屋邨商場地下 大圍站出咗之後要行15分鐘先到 當日1點幾到唔駛排隊就有位 入面裝修行簡潔文青風 門口都幾靚 可以打下卡 ⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯ ✨玄米綠茶X海鹽奶蓋乳酪 青提冰糖葫蘆夾心bagel ($48) 提子同bagel係分開擺嘅 想要同時食到兩樣野就要一啖包一啖提子咁食啦😂 提子本身已經好甜 加埋表面嘅麥芽糖就更加甜 而且雪凍咗 係對敏感牙齒嘅大挑戰😂 但係就令提子同糖嘅甜味好突出 🥯Bagel嘅口感幾好 有咬口 煙韌但係唔會冧 入面嘅cream係奶蓋味比茶味重 但兩隻味好夾👍🏻一咬落去就爆晒餡 好好食🤤 食半個都好滿足 ✨小山園抹茶brulee scone ($45) Scone冇bagel咁驚豔 但都好好食😋 茶味好濃 抹茶控會好鍾意 ❤️ 表面有層薄薄嘅焦糖 估唔到同抹茶味都幾夾 Scone整體唔算過乾 入面有少少濕潤 推薦！！但呢個價錢就貴咗少少咯🤏 ✨果醋豬軟骨溏心蛋茶漬飯 配 深煎焙茶高湯 （$118） 雖然食甜野真係好開心😙但食得多都會膩 呢個時候就要食下鹹野啦 呢個豬軟骨味道酸酸哋 好開胃 可惜啲骨位未夠腍 份量都可以接受 有三四舊 上面嘅半熟蛋做得唔錯 仲有溏心效果 本身啲飯已經有少少調味 店員都教我哋可以先試下原味 之後先加湯 呢個湯似係鰹魚湯 比想像中濃味 連埋有調味嘅飯一齊食就比較重口味 成個配搭都唔錯👍🏻 ✨Hot latte ($40) 咖啡味好香 飲落唔會苦或者酸 👱‍♂️覺得啱啱好 咖啡雖然有拉花 但係啲奶泡太少 得面頭薄薄一層 無左奶泡同奶一齊飲嘅口感 而且啲奶打得唔夠綿密 有好多氣泡 ⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯ 我哋兩個人食咗$250 （冇收加一） 雖然係cafe 不過係bagel 做主打 咖啡就麻麻而且位置實在太唔方便 如果唔係都想間唔中去試下佢每個月新嘅menu 嘅pastry 😌 推薦指數🌟：5/5 📍大圍田心街20號雲疊花園商場地下7號舖

27/3/2024 📍The Jungle 呢間係主要食尼泊爾菜嘅餐廳 入面嘅裝修幾有jungle 嘅feel🌴同埋東南亞風情😂 氣氛都好熱鬧 適合幾個朋友係到食飯吹水 但係就好逼 我地坐左係2張枱嘅中間 👩🏻‍🦰坐左係入面卡位 每次出入都要人地企起身讓位 Waiter 嘅態度都好好 服務速度好快 我哋係前一晚係OpenRice book位 都仲未full ⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯ ✨香料醬酥炸球 ($68) 呢個炸波波係中空嘅 入面有薯蓉 粟米片 果仁等等 口感好豐富🤩 然後中間有個凍嘅辣汁 俾你倒入去個炸波波一齊食 個汁好重口味 倒少少入去就好啦 唔係就搶晒其他配料嘅味 呢個小食嘅口感同味道都有驚喜 推薦！ ✨尼泊爾餃子 （$88） 尼泊爾菜最出名嘅就係Momo 呢個momo 都好出色 佢有得揀煎或蒸 外皮比起中式餃子嘅厚dd 蒸嘅momo外皮好嫩 就算係蒸嘅都好香😝 煎嘅momo 就比較油 （其實似係炸） 好重油香 中意食煎炸野嘅朋友一定要試下 佢有得揀饀料 我哋揀咗雞肉 內餡好滿同結實食落雖然未到爆汁嘅level 但都好juicy👍🏻 ✨ 尼泊爾炒米通 （$48） 呢道菜好特別 米通就係平時零食果種一舊舊嘅米通 不過就拆開晒一粒粒 外脆 入面就係咬唔爛嘅冧 似紙皮 口感都幾有趣 味道酸酸辣辣 加咗好多香料落去炒 有少少唔係幾接受到陣香料味😕同埋都幾辣下🥵 ✨煙薰牛肉乾 （$98） 又係好辣嘅一樣小食🥵 佢冇講錯 真係好乾好乾嘅牛肉 食得佢真係預咗會sip 牙😂 牛肉乾好香煙薰味 唧埋檸檬落去 連埋啲汁食落都係酸酸辣辣咁 ✨米布甸 （$68） 食完上面兩樣咁辣嘅野 好想食翻啲甜野嚟解辣 最後就嗌咗呢個甜品 本身以為係凍嘅先嗌 點知係熱嘅😂 食落好似麥皮 有啲煮爛咗嘅米粒 好香奶味又唔會過甜 出奇哋好食😋 呢個甜品要煮15分鐘 想食就記得早啲order ⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯ 我哋兩個人總共食咗～$400 （連加一） 撇除其中兩樣小食太辣之外（👩🏻‍🦰係食辣方面比較廢） 整體嚟講都係好食嘅 呢個價錢試到尼泊爾嘅特色菜 都算係咁啦😌 推薦指數🌟：3/5 📍佐敦廟街273-275號寶發大廈地下3號舖

23/3/2024 📍Pici 成日聽講呢間嘅Pasta 都係overrated 今次我地決定去試下 星期六嘅中午都唔多人 walk-in 都有好多位 一入到去就上咗一袋微暖嘅法包 可以點橄欖油+醋嚟食 可以揀brunch set 會包埋appetiser 同甜品但我哋都唔係好肚餓就單叫兩樣試下就算啦 ⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯ ✨Pappardelle beef cheek ($140) 不嬲都幾鍾意食牛面頰 呢間係以肉碎嘅形式 煮得好腍 唔會柴 佢地就話係慢煮8個鐘嘅🤓 牛肉嘅份量適當 連埋pasta食好滿足 上面仲有灑滿半融嘅芝士碎🧀 寬帶麵口感偏有咬口 幾好食 但整體都偏重口味同埋油膩 食晒碟底仲剩低好多油 但我哋覺得呢樣都唔大影響嘅😗 ✨Chitarra king prawn ($160) 上面有兩隻剝咗殼嘅蝦🦐 pasta入面都有唔少一粒粒嘅蝦肉 蝦都算新鮮 不過唔係好入味 醬汁用番茄做底 加上好多番茄仔🍅 食落好開胃 完全唔會膩 Pasta望落黒色係因為整麵嘅時候加咗魷魚汁🦑 食得出陣魚味 但又唔會食到成口黑媽媽 同蝦嘅味道都幾夾 令鮮味更有層次👍🏻 ⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯ 我哋兩個人總共食咗$340 （連加一） 兩個pasta我哋都幾鍾意 無論係味道定係意粉嘅口感都幾滿意 😆 餐廳會定期轉menu 所以未必次次都食到呢兩款pasta㗎☺️ 不過我哋係星期六去食 就唔係最抵嘅價錢 如果用weekday lunch set嘅價錢食到咁就💯 推薦指數🌟：4/5 📍 荔枝角長順街15號D2 Place TWO地下G03號舖

20/3/2024 📍Chill Vietnam Cuisine and Bar 係D2 place 嘅越南餐廳 裝修幾靚 係木系嘅色調 感覺好乾淨 燈光偏暗都幾好氣氛 連餐具都擺得好有心思 職員service幾好 😙 餐廳長期播緊越南歌 真係好有越南風情😂 座位好多 平日夜晚嚟walk-in 都冇問題 但都可以OpenRice 訂位 ⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯ ✨越式生蝦 （$28） 每日都有唔同嘅promotion 我哋星期三去食 果日做緊有$28/4隻🦐見幾平就試試佢 啲蝦都幾新鮮彈牙 呢個價錢呢講都算大隻 醬汁好重香茅味 唔駛點太多 但唔係好辣 ✨黑松露蒸粉卷 （$88） 呢樣係3月係special menu 首先分量真係好少 得兩嚿 真係兩啖就食完😂 性價比好低 如果唔黑松露加持 味道都冇乜特別 只係啲蔬菜碎係入面 而且俾黑松露搶曬啲味 ✨越式芝士咖喱農夫包 配牛柳 （$158） 咖哩唔係好辣 面頭果片芝士可有可無 撈埋都食唔出芝士味 不過睇上去就好fancy 食唔出越式咖哩有咩特別 但係幾好食嘅 總共有7嚿牛柳 幾厚身 煮得好腍 好好食👍🏻 個包好大個 擺咗一陣都脆脆哋 切開嚟沾咖哩食真係冇得輸！ 好彩得一嚿薯仔，唔係就真係碳水炸彈 ✨牛板腱火車頭雜錦牛河 （$98） 配料有🐮牛𦟌、肥牛片、牛丸、牛柏葉 同埋好多芽菜 牛𦟌切得好薄☹️比較鐘意台灣牛肉麵果種厚身啲嘅牛𦟌 有咬口啲 肥牛片一啲都唔肥 唔錯 唔鐘意太肥嘅牛肉 另外果兩樣就正正常常啦 無咩好特別 但係湯底唔夠濃味 有啲失色😕 ✨自選smoothie ($68) 有十幾款配料可以揀 最多可以揀3樣 除咗水果之外 仲有花生醬同曲奇 但我哋就唔想食得咁肥仔啦 揀咗士多啤梨🍓牛油果🥑椰子🥥 係想像唔到嘅配搭 但出到嚟又幾好飲喎😋 飲到士多啤梨嘅酸甜同椰子嘅香 牛油果味就唔係好明顯 不過牛油果令口感rich 啲 都幾好 但如果冇咗上面嘅cream就更加好啦 ⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯ 我哋兩個人食咗 $484 （連加一） 啲野食都幾好食👍🏻雖然價錢唔平 但環境都值嘅 推薦指數🌟：4/5 📍 荔枝角長義街9號D2 Place ONE 3樓301號舖

14/3/2024 📍 Tokyo Chikara Meshi 呢間係專食日式燒肉丼嘅餐廳 暫時全港有三間分店 呢間係旺角The Forest地下 位置幾方便 網上話佢係日本當地有「燒牛丼元祖」之稱 諗住應該好好食啦 一入去覺得店內裝修好普通 好似茶餐廳 光線唔係好夠 第一感覺已經麻麻哋😕 ⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯ ✨鐵板野菜燒牛肉定食 （$70） 跟餐有麵豉湯、沙律、白飯 份量都好夠飽 椰菜同牛肉嘅分量大概1:1 鋪滿成個鐵板 椰菜唔係好腍 都唔係好甜 一般般 牛肉肥瘦啱啱好 配埋洋蔥食 甜甜哋 幾好食😋 ✨重量燒豚肉飯 （$78） 用便當盒裝住 份量都唔算真係好重量級 同埋唔係好夠熱 但啲汁撈埋飯都ok 嘅 啲肉有陣泰式香料嘅味 有啲奇怪 🤔 同埋肥肉嘅部分都幾多下 有啲扣分 ✨唐揚炸雞 （$18） 有三嚿幾大嚿嘅雞 冇咩味 炸粉幾薄 都算juicy 但有樣好致命嘅野：雞肉中間滲咗啲炸粉漿入去 咬到中間有一pat pat 嘅粉漿 口感勁核突🤢好難食！從來冇食過咁難食嘅炸雞！ ⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯ 我哋兩個人食咗～$160 相比起其他丼飯專門店 呢間嘅味道真係好一般 🙁 用餐期間仲有烏蠅係枱面飛嚟飛去 衛生情況都麻麻哋 👎 我哋就寧願食sukiya 啦 推薦指數🌟：2/5 📍旺角奶路臣街17號THE FOREST地下G8號鋪