呢間餐廳都幾多選擇， 唔似一般茶記。 又有粥、又有乳鴿、又有啲特色小菜咁。 雖然見到佢招牌係雞粥，不過無試到，反而叫咗另一款出面好似少有啲嘅粥。 黃鱔田雞粥 $74 啲肉幾多，同埋黃鱔整到啲肉質爽爽哋咁，幾好食！ 田雞好滑，同埋唔多地方有得食。 幾推薦！ 紅燒脆皮乳鴿 $76 抵唔抵食就見仁見智， 不過都炸得幾香口，拎出嚟係熱辣辣，好多汁！ 焗豬扒飯 $61 炒底做得唔錯👍 芝士舖得好滿！ 泰式鳳爪 $53 份量幾多！味道正宗！ 做開胃小菜都幾好！ 鮮蝦腸粉 $32 不過不失，如果個皮再薄啲就更加好

第一次食，感覺幾好👍🏻 首先佢有個早食時段，7:30前離座可以有8折價，都平好多吓👍🏻 如果收得早、或者放閒日嘅人食呢個時段就啱晒🥳 跟住我哋簡咗中價位，有得食牛頸脊、黑毛豬果個餐，配咗個醉雞鍋湯底🍲 開頭略嫌個湯底有啲苦，不過其實烚咗啲食物，食落口個味係啱啱好😋愈食愈好味！ 食材就同其他台式火鍋🍲大同小異，無乜好好好signature嘅嘢食，不過好推薦啲手打丸，好好味🤤 除咗打邊爐外，啲小食都幾好味，一開始送咗碟蕃薯條🍟仲跟咗啲shake shake粉，食落又甜又糯～ 最後一個細節位都做得好好，就係一開始已經Stand by咗兩壺湯喺枱度方便比客人refill。 雖然好似唔係好困難嘅嘢，但真係無幾可有其他火鍋會咁做。 所以整體成餐飯都好滿足😌幾出色😚

話說落完五百年一遇嘅大雨之後，呢幾日天氣好似涼咗啲，即時想去打邊～ 呢間食台式火鍋，環境幾乾淨企理👍🏻 手機落單再加出面自助拎菜、丸、飲品等.. 最正係有芋圓任食！！Häagen-Dazs任食！！ 芋圓喺鮮W鮮食一碗都要$50啦，呢度食2碗都抵返😂 Häagen-Dazs雖然味道唔算勁多，不過有雪糕筒任拎，同埋好脆！ 湯底今次揀咗鴛鴦鍋，一邊養生鍋、一邊麻辣鍋，愈食愈濃味，幾正 肉類有好多選擇，牛小排是全晚覺得最好食！ 台式小食都唔錯，尤其係炸嗰啲～ 一定要拎自己夾嘅芋頭丸，好好食，外面係肉，咬入去係流心芋蓉，第一次食，出面好似好少見👍🏻👍🏻👍🏻 另外個滷肉飯都好好食，忍唔住食咗兩碗( ´▽｀)

茶園自助餐食過大概已經四次， 包括下午茶同埋自助晚餐都有試過( ´▽｀) 除咗環境靚樓底高，食物亦都貴精唔貴多， 所以一直都有捧場～ 親朋好友生日唔想食太貴，基本上嚟呢度實冇死😂 不過最近嗰次食，發現鵝肝多士換咗第二隻鵝肝，口感都OK，但相比起上一隻真係差好遠， 之前嗰隻鵝肝係煎到好香，外層薄脆，一咬開好creamy。 但今次食果隻就算係啱啱煎起，都無咗薄脆嘅外層，口感比較鞋，好在都仲係夠香。 而其他食物嘅食材都仲keep得好好👍🏻

好耐都無食拉麵🍜 聽朋友講試過呢間好食，今日就親身嚟試吓～ 2個人就叫咗2款唔同麵。 🍜 海老辛醬背脂煮干沾麵 $118 沾麵嘅湯頭較濃厚，入面有好多湯料， 味道偏甘甜，入面有好多肉。 拉麵嘅質地好有彈性，同埋好掛汁👍🏻 🍜 海老辛醬背脂煮干拉麵 $108 相比起沾麵，拉麵湯頭明顯偏辛辣， 但又唔會話真係好辣好辣果種。 拉麵同樣好掛汁，而且叉燒都幾大塊！ 食完可以飲埋湯，唔會口乾！ 價錢正常，同出面其他拉麵店差唔多。 但感覺上佢好似比較多麵😆 飲埋杯冰凍嘅烏龍茶，真係正到不得了！

耐唔耐都會去西九龍中心食嘢， 呢間店個舖位上一手係間無味精茶餐廳， 而家轉咗做食小雲吞、川菜、麵食之類， 一直都想試吓，今日終於入咗嚟🙈 店面光猛，位唔係話好多，落單似快餐店，要自己喺收銀處同店員落單再自己拎食物返埋位食。 因為所有嘢食單價都好平，2個人都忍唔住點多咗😂叫咗6樣嘢食再加咗支茶。 但埋單先$200，平到～～～ 一口鮮蝦豚肉雲吞｜$32（10隻） 一啖一粒，味道適中，好食👍🏻👍🏻 傷心重慶酸辣粉｜$35 叫咗小辣，但比想像中唔辣😂 食得辣嘅朋友，可以再叫辣啲。 粉條好煙韌，口感好好食！ 傳統風味手工涼皮｜$30 比出面食開嘅涼皮特別，唔係透明色，而係米白色，手工質感，好有口感！ 好掛汁👍🏻👍🏻 芝麻鹽焗手撕雞｜$38 調味好香，份量都唔少，夾埋青瓜一齊食，口感特別清爽！ 涼伴松花皮蛋｜$22 彈牙得嚟，蛋黃好綿💕💕 不過不失！ 孜然椒麻炸雞翼｜$35（5隻） 大推🔥🔥🔥🔥🔥🔥 大推🔥🔥🔥🔥🔥🔥 驚喜到我了，炸得超好食！ 孜然味啱啱好，唔會太攻鼻！ 炸皮好香，入面仲滿滿肉汁！ 加埋$8一支自家製茉莉花茶， 茶香味好足，微微甘甜～ 雖然只係平平哋一餐，但真心覺得性價比好高，好值得再嚟食！

可能太耐冇食泰國嘢嘅關係， 嚟到一打開個餐牌就好多嘢都想叫😂 今次叫咗個冬陰功， 上菜嗰陣會燃點一個細火keep warm👍🏻 所以飲到最後都唔會凍晒， 入面有勁多海鮮🦐🦞🦑🐟 想講入面啲魚肉好彈牙，好好食！ 仲要有花膠！ 湯頭酸酸辣辣，唔會太過搶喉， 非常開胃💕💕 跟住再點左個泰式生蝦， 冰冰地好爽口，夾埋塊蒜片一齊食， 少少辛辣咁樣， 好啱夏天食🥰 最後仲嗌咗個蟹肉炒飯， 本身只係諗住隨便嗌一款主食， 可以飽肚少少， 點知出奇地覺得幾好食喎🤩🤩 蟹肉非常多不特止，仲有蝦同埋蟹子！ 食落好香，米飯粒粒分明！ 仲要有蟹籽嘅脆口感！ 雖然佢哋並冇放喺餐牌Top嘅位置， 但真係非常推介👍🏻👍🏻 總括嚟講嘢食都好好味， 仲要咁啱安排咗個望住海景食飯嘅位置， 感覺真係好寫意，好啱情侶過嚟一齊食嘢👍🏻👍🏻

因為真係好鍾意食海南雞飯， 所以無論平定貴價嘅海南雞飯， 基本上每個月都會搵唔同餐廳試吓🤣 今次就試咗呢間🏞️海南少爺🏞️ 地點喺海港城海運大廈，裝修靚！坐得舒服！👍🏻👍🏻 叫咗兩份海南雞飯套餐。 🐤海南雞飯拼馬來西亞肉骨茶 $138 肉骨茶好足料！藥材味好香！ 飲落會有種回甘味👍🏻 油飯好好食🤤香口得嚟米飯粒粒分明！ 雞肉份量都好多，肉質嫩滑，雞皮唔會太肥。 🐤海南雞飯拼海鮮喇沙 $138 呀！呢度嘅喇沙超級好食！ 一定一定要點💕💕 奶香同喇沙比例適中，比起好多餐廳一味重椰就以為好食差好遠！ 甜味都啱啱好，一碗仔入面都好多料， 有雞蛋、魚片、豆卜、魷魚、蝦、粉麵。 之後再叫咗2份小食 🐤香脆蜜糖單骨雞翼 發明單骨雞翼嗰個人真係好聰明，食起上嚟 非常之方便，啱啱炸起個皮好鬆脆，甜甜地嘅蜜糖香味，真係好好食！ 🐤獅城脆蝦卷 入面應該溝咗唔同嘅配料，識落層次好豐富！ 啖啖肉！ 想坐得舒舒服服食海南雞飯嘅朋友非常推薦試吓呢一間！

晚餐時間喺屋企附近諗住求其搵間未試過嘅餐廳仔食飯，無意中發現左呢一間覺得可以keep住長食嘅餐廳。 本身7點鐘左右入去，唔係話好多人，點知坐咗唔夠15分鐘已經開始爆場，聽得出好多都係熟客，同啲侍應有講有笑。 叫咗個招牌嘅油渣麵， 好大碗，真係可以食得飽。 豬油渣好鬆化，唔會好油。 兩溝魚肉翅 魚肉好多🤤🤤 碗仔翅啲料都好足！ 蓮藕肉餅飯 跟豆漿 以為呢度淨係小食好味， 但原來飯餸都整得好食！ 呢個肉餅食落層次好豐富，爽爽哋，又啖啖肉，唔會好鹹，就好似屋企整嘅餸咁。 跟埋啲醬汁非常好食，好好餸飯。 鴛鴦自家製湯餃 有椰菜同埋韭菜2款， 呢度啲餃偏向多菜少肉， 啱健康人士，Size好大隻，放滿晒成個匙羹。 開頭以為啲份量唔會好多，所以嗌多咗， 點知差啲食唔晒😂😂 下次會再去！

放連假前嘅上班日，收工想搵好嘢食。 見好評幾多，就試吓啦。 點知都幾難搵😅原來要穿入一行仔先到，好容易會行過咗。 好啦，坐低叫嘢食，果晚都幾爆場，服務員好nice，講咗幾次話招呼唔到。 🔥秘製馬來西亞咖喱喇沙湯麵🍜 配 脆炸梅子一口雞 個湯整得幾好食，唔會一味淨係個椰香味太濃而冇咗喇沙咖喱味👍🏻 梅子一口雞新鮮炸起熱辣辣，但其實都唔一口😂都幾大粒～～味道酸酸哋開胃嘢。 🔥燒美國安格斯西冷牛扒 配黑松露薯條 服務員上菜講話燒汁係佢哋自己熬製，唔係開粉，都幾有誠意👍🏻 不過落單果陣無問我哋要幾成熟，食果陣覺得有啲輕微Overcooked咗，但可接受，食落啲肉好琳，肉味都好濃！ 黑松露薯條🍟超級好食！炸物都係即炸起！ 熱辣辣！個黑松露醬好香🥰🥰 好似食薯條開心過食扒🤣 🔥日式吉列炸蠔 最後叫咗個小食都係炸嘢，炸皮出色，鬆脆唔油膩，略嫌個蠔炸得少少over咗啲，無哂水份，不過不失咁啦。 總結來講，大部分嘢都好食🤤 尤其係炸嘢！ 雖然部份嘢食可能Overcooked咗，但可能咁啱夜晚爆場，所以take care 唔到咁多張枱掛。 不過店員態度好好， 希望下次再嚟食，如果少啲人出品會更加好啦！