今晚去尖沙咀食好西，呢間燒肉喺正尖東地鐵站L1出口，過條馬路就係，地點一流！燒肉前先食個「烤和牛肩他他配凱撒沙律」，和牛份量都多，配埋沙律菜，清新健康！之後也少不了要試吓刺身，組合由師傅發板，全部都好新鮮肥美，其中吞拿魚魚肉軟腍，另外炙燒太刀魚又別有一番風味。接著就是主菜燒肉，今次點的是特選和牛盛合，共有五款肉，包括和牛肉眼及和牛三筋是和牛級數，油脂分布均勻，好腍好好味。另外仲有牛冧、內側後腿肉和内腹肉。牛冧即係牛臀肉，肉質彈牙。接著還有阿波尾雞頸、鹿兒島縣產雞心和帆立貝。第一次食雞心原來好爽嘅，有啲似雞腎嘅感覺。
雞頸都似豬頸肉咁。帆立貝都幾大粒，切忌燒太耐否則會太韌唔好食！另外還點了些即食不用燒的，包括香辣雞翼，令我想起KFC的😂辣辣地好惹味，好食到停唔到！點同唔點醬都好食。驚唔夠飽可以食埋和牛煲仔飯，細細個煲仔都好夠食，仲有隻蛋喺面似足窩蛋牛肉飯！當然呢個係用和牛嘅，估唔到和牛份量咁多，而且好腍呢！啲飯索哂和牛精華，好好味🤤最後仲有一球雪糕做甜品，平時好少食開心果味，簡直令我一試愛上，雪糕質地又滑，十分讚！

曾幾何時去過銅鑼灣嗰間和牛燒一朗，念念不忘，不過今次唔想過海就嚟佐敦呢間，地方都好大，啲枱夠晒闊，坐得都幾舒服，仲有埋圍裙相當貼心。A至F餐任君選擇，上次食咗個貴嘅，今次就食個平嘅B餐試吓， 100分鐘挑戰開始！食肉之前梗係要食啲沙律打下底，沙律菜、車厘茄、粟米、甘筍絲、洋蔥、青瓜等配料樣樣齊，自助吧形式喜歡食幾多就夾幾多，仲有Salad dressing可配搭。另外仲有自助牛郎丼，不過要留肚食燒肉，所以我哋冇試。用手機落單後啲食物都好快到，而且係自動經輸送帶送到座位旁邊，自己打開個門拎出嚟就得，好先進啊！😆😆第一主打當然食牛，所謂一分錢一分貨，呢個B餐就冇得食日本黑毛和牛，主要食牛肋肉，只要掌握好火候，不要Overcooked，肉質都OK嘅。仲有特色啲嘅橫膈膜同埋牛舌可以選擇，算唔錯。牛以外，海鮮都係我嘅重點，青口鮮甜，海蝦好大隻有驚喜，魷魚夠新鮮，多春魚燒到又香又脆好味！仲有幾十種嘢食任食，我哋都好鍾意叫生菜夾住啲肉黎食，感覺無咁熱氣，而偏偏佢個黑松露薯條係勁好食，又大碟，唯有自己返去飲涼茶🤣第三大重點當然係甜品，雪糕雪條有好多選擇，另外仲有啲蛋糕仔，可惜我真係食得太飽，只可以食到一條雪條咋🥲

今日有事到屯門一趟，順便食埋個午餐，呢間urban嘅選擇都幾多，門口嘅蛋糕同埋牛角包都十分吸引，最後我叫咗「慢煮法國黃油春雞」（ $118 ）。 主菜未黎之前，先飲附送嘅龍蝦湯，味道都唔錯，龍蝦味突出。 主菜出場，雞有半隻，皮唔係好脆，肉都夠嫩，另外仲有沙律同埋薯條配搭，啲薯條又幾好食喎！ 門口咁靚嘅蛋糕又點可以唔試呢？午餐只係需要加$25就有一件，於是要咗一款士多啤梨蛋糕，有趣在有一支針筒插着，比你自己吱啲士多啤梨醬出嚟，唔好以為白色嗰啲係cream，應該係蛋白嚟嘅，所以唔會甜到漏，蛋糕好食呀！ 午餐仲附送飲品，冇加錢轉其他特飲，淨係要咗佢嘅凍蜜桃茶，都好唔錯啊！

朋友約埋一齊踩單車去屯門，差不多到目的地已經好肚餓，見到單車徑旁邊嘅卓爾廣場，一於入去食埋晚餐先至搭屯馬綫返屋企。
呢個商場都好多嘢食，發現有間可以堂食嘅手撕雞專門店，啱晒我哋做完運動嘅人去補充能量。店裏面嘅裝修光猛感覺乾淨，自行到櫃枱點餐點，然後等叫號碼憑發票去攞食物。
兩個都好肚餓揀飯餐，招牌手撕雞三寶飯$56, 可以轉做米粉、湯麵或者水晶粉👍 所謂三寶其實就主要係手撕雞，再响小食嗰個餐單裏面揀兩種小食，可供選擇嘅小食包括：海蜇、鳳爪、豬肚、豬耳、雞腎、麻辣豬肚、麻辣豬耳、小冬菇、醬油冬筍

我哋兩個果然係好朋友，飯餐同小食都揀埋一樣，連飲品都係一樣🤣🤣
飯餐有例湯飲送，味道清甜，飲落順口解渴。
招牌手撕雞三寶飯
三寳：手撕雞、雞腎、醬油冬筍 手撕雞啖啖肉有雞味😋
醬油冬筍爽脆帶咸香，雞腎好爽唔會韌，食到停唔到口，飯上面仲有一隻溏心蛋，加埋薑蔥蓉撈飯就最惹味嘞。

食飯要有菜先健康，
上湯娃娃菜鮮甜淸新。 又加咗$38兩款特色小食海蜇+麻辣豬耳
海蜇夠爽口，麻辣豬耳香辣又爽脆，正！
食完飯飲番杯嘢，個樽幾趣緻，飲管由蓋面插入去就飲得，金桔奇亞籽水晶蜜，啜一啖滿腔金桔味，連埋滑滑奇亞籽，甜甜地，飲完覺得滋潤又滿足。

從來都以為廚師發板係極高級嘅嘢冇我份，不過其實都有啲價錢相宜少少可以一試嘅，就例如今日呢間鮨竜，最平嗰個廚師發板都只係每位$480，但係就冇刺身，所以決定比多$200食「竜」餐。
呢間位於黃埔嘅餐廳，裝修感覺優雅，前邊一大張枱係師傅工作位置同埋吧枱，不過今日就冇機會坐吧枱欣賞師傅嘅刀工，不過都欣賞呢度嘅服務水準，每上一道菜，店員都會好仔細咁介紹，讓我認知更多。 第一道菜係茶碗蒸，作為美食嘅開始，我都感覺相當滿意，啲蛋蒸得好滑又夠香。
第二道菜係四點刺身，今日有鮮帆立貝、間白魚、笛鯛和拖羅，新鮮就不在話下，嗰件拖羅真係令人回味，嗰種有油脂香氣在口中浪浪下，唔捨得吞呀！
第三道菜係一個熱食叫「佃煮黑梅貝」，其實即係東風螺，不過來自日本梗係唔同啲，店員提醒連最尾嗰部份都可以食，好煙韌彈牙，而且好鍾意佢個汁，忍唔住飲多兩啖添。 第四道菜有六件壽司，是日師傅精選包括馬糞海膽，上邊嗰一小舊綠色的係Wasabi個莖整出嚟，加添口感。伊佐木魚配上自家製嘅酸汁，十分開胃。 活赤貝，仲細心到上面放幾粒黑色的竹炭鹽，不過我就食唔到鹽味，赤背爽口新鮮。
星鰈原來即係右口魚，上面仲加咗烏魚子粉粉增加鮮度。 星鰻都係鰻魚嘅一種，都幾大件。
拖羅，加上芽蔥和芝麻，增添一份香氣。
全部壽司飯已經混有醬油，所以其實食嘅時候真係唔需要點豉油，最後仲有舊玉子燒呢！ 是晚飲既係赤麵豉湯，用咗蝦頭嚟熬製，所以鮮味好濃。 連最後嘅北海道低糖豆腐味雪糕，都一樣令人心花怒放，今晚很開心呀！

新港城二期開咗間新嘅茶星人，喺正合一堂隔離，今日試咗杯草莓雙朱脆皮（$33），一開始見到有啲朱古力醬同埋粉紅色沉底，不過攪勻飲之後就唔覺，但飲飲下發覺原來裏面真係有啲朱古力脆皮一塊塊，就好似食朱古力脆皮雪糕嗰塊脆皮咁樣，打開杯蓋才發現原來都好大塊，好彩嘅係呢啲脆皮朱古力唔會太甜，如果唔係應該會好漏，杯嘢仲有少少士多啤梨果肉，我冇減甜度但係都覺得唔算好甜，幾適合女士。 另外仲叫咗杯手工芋泥鮮奶（大$38），第一次飲呢個又覺得幾好味喎，芋泥唔會太杰但又帶口感，少少甜感覺仲幾飽肚。喜歡芋頭的朋友都應該試呢個 由於雙朱脆皮無得加大，拍埋就覺得加$5大杯好多！

今日同朋友去咗間勁搞笑既鋪頭打邊爐，店名「香香宮煮」已經玩食字，一入門口，即刻整張龍椅俾你打卡，仲有黃袍和各種妃子/公主宮廷服你玩cosplay，餐廳佈置亦化身為中式皇宮，有不少「xx宮」包廂，認真過癮。 嘟一下QR code落單，菜名亦一一精心打造，我哋選了「建寧公主-特色卜卜蜆鍋」（ $198 ），個鍋本身都已經靚，仲加埋乾冰冒煙， 十分戲劇性， 同時睇得又食得，大量白沙蜆新鮮可口，老實說，我哋兩個女仔食，食完咁多蜆其實都飽左三份一，好彩其他嘢食唔係瘋狂叫。 打邊爐當然要食牛，佢都有唔同份量和款式嘅拼盤，我哋就揀咗「花花公主牛魔王拼盤」（$396細），包括頂級安格斯、本地牛肉、牛展和黃喉等7款，兩個人食份量夠晒，肉質鮮嫩，色澤鮮明，都幾靚嘅，朋友第一次食黃喉，都幾鍾意佢嗰種爽口嘅感覺。 另外「滑㭩㭩」系列中選了「瑤柱乾貝滑」（$108/2支）都真係見到有啲瑤柱說，識落都幾彈牙，仲有「十指纖纖手打丸」系列也不能錯過，點了「香香宮煮肉丸拼盤」（ 10粒/ $128 ），包括包括櫻花蝦豬肉丸、手打鮮牛肉丸、黑松露芝心墨魚丸、手打蟹子鮮蝦丸和手打蟹子墨魚丸，都真係幾好食，全部都好彈牙，尤其喜愛芝心墨魚丸，好正啊！ 佢都仲有好多其他類型食品，菜和麵嗰啲當然都有，飲品方面我們點了一壺自家製竹蔗茅根，個股都係充滿中國特色， $68都飲到好幾杯，健康之選。呢度仲有好多酒精飲品，愛酒之人切勿錯過。 埋單後仲送上一小碗奶凍，實在太開心了！老實說，這裏價錢不算便宜，但整體感覺都十分滿意，無論食材、服務態度，都有賓至如歸的感覺，有要求嘅人可以揀呢度。

雖然疫情期間減少外出，不過煮飯煮得多都總想食下街外野，今日就去W M買個西餐外賣。 想食扒，所以揀咗個「美國極佳級安格斯大草原自然西冷配燒汁」（ $169 ），塊扒都幾大塊，仲有格仔紋，輕輕的有點燒烤焦味，很喜歡，啖啖肉又唔韌，唔錯，配有少量蔬菜和薯蓉。 另外叫了一個煮食「炸軟殼蟹香蒜魷魚圈墨汁飯」（ $89 ），隻軟殼蟹都有手板咁大，仲有蟹子喺上面，雖然攞到返屋企焗住左隻蟹濕咗少少，但係大致上味道都唔錯，墨魚汁飯份量都多，魷魚圈不過不失。晚餐附送餐湯和餐飲，餐湯分別有忌廉龍蝦湯及蕃茄湯，用杯裝外賣，龍蝦湯雖然顏色不是特別吸引，不過味道十分濃，蕃茄湯也不弱。 我哋另外加錢要多三隻雞翼和薯條，雞翼略嫌乾了一點，薯條菜就一百分，份量再多啲更開心！

難得今日和同事行遠啲食飯，黎咗龍泉冰廳，午餐時間當然人山人海，好彩呢間冰廳都算多位，又剛好有兩個位，唔使等！除咗一般午餐常餐，今日決定食d特別啲嘅，叫左「醬油炒蛋肥牛飯」（ $60 ）同埋「冬蔭功鮮蝦湯麵」（$65）share食。 醬油肥牛醃得剛好，唔會太咸又夠入味，又唔算好肥，真係幾好食，仲有一小碟醬油另上，方便自己再加，仲有三色椒同沙律菜，而塊炒蛋都唔太細，整體黎講我俾90分。 另外個冬蔭功就感覺似叻沙多啲，輕微辣，蝦有四隻，仲有索哂汁既豆卜和爽口芽菜，麵質ok. 加錢可以叫飲品，飲品就要龍鳳檸樂，一罐可樂自己倒，咸檸檬既味唔算好特出，不過極之解渴。

「屯馬開通真的很興奮…」，多左屯馬線既新地鐵站後，覺得出九龍城方便左好多，食飯自始多啲選擇，雖然呢邊出名食泰國菜，但今次我哋新嘗試食蒸海鮮，周五晚都幾旺場呢！

呢間話明叫蟹仙，所以每一個套餐都有蟹食，價錢由$299-499都有，另外仲可以追加火鍋配料。

我地就揀咗中間$399，都已經相當豐富！包括罕有大黃奄蟹、太平洋饅頭蟹、罕有琵琶龍蝦澳洲青年龍蝦（二選一）、越南大虎蝦、紐西蘭刀貝蚌、大西洋野生青口、台灣九孔鮑魚、日本大元貝、韓國南慶珍珠蠔以及有機蔬菜籃，真係食盡全球你食。佢哋寫明所有海鮮每日新鮮到港，唔靚唔食，確實見到隻蟹劏左一半都仲識郁，無花無假。

基本上全部海鮮都係好新鮮，鮮味突出，其中特別欣賞隻珍珠蠔，佢嘅蠔味喺個口裏面朗下朗下，真係好正！

另外來蟹仙梗係要食佢既蟹啦，兩款唔同嘅蟹加一款龍蝦，各有特色，饅頭蟹海水味比較重，樣子有趣。琵琶龍蝦比較罕有，唔係日日有貨，難得今日撞啱有就梗係要試吓，雖然樣子不美及細細隻，不過都幾鮮甜，啲肉好彈牙。

如果鍾意食蟹膏嘅話，就一定會鍾意大黃奄蟹，泥黃色的軟蟹膏齒頰留香，唔要慢慢品嚐，啲蟹肉都好鮮甜新鮮，真係食完都想再encore ！

開頭食嘅時候仲驚會食唔飽，不過去到後段都已經飽飽地，最後再食埋呢個海鮮精華粥底，就一定夠飽！呢個粥底其實用料好簡單，主要係有幾舊排骨、粟米和芋頭，煮好之後再加上香蔥同菜甫，鮮味又飽肚，一定要試。