『廚師發辦』呢幾年一直都好受香港人追捧，香港都真係越開越多。但Omakase係香港一般都係比較高消費，要搵到性價比高嘅有時都要碰吓運氣。 而呢間Sushi N，算係我食過咁多Omakase入面top3 高CP值嘅餐廳。今次係我第二次食，呢個$698嘅set依然無令我失望，真係物有所值。 呢個餐包括：（按上菜順序） 沙律，茶碗蒸，岩手縣生蠔，安鱇魚肝，間八魚刺身，漬物，鰈魚西京燒 壽司：春子鯛昆布漬，帆立貝，左口魚裙邊 鰈魚，清酒蒸鮑魚，海膽，拖羅，螢光魷魚，和牛海膽卷 麵豉湯，甜品 以上所見，1個$698嘅set，可以話應有盡有。食材新鮮，款式亦算多。如果你咁啱諗緊食邊間omakase，不妨試一試Sushi N。

係香港想食『家鄉菜』（日本菜），選擇真係好多，但要搵到性格比高既，就真係廖廖可數。近排就搵到呢間上環既『鮨燐』，dinner menu 11款壽司+1款手卷都係$488（另收加一）。印象中做到呢個價位既日本餐廳，真係唔多，所以即管試一試佢。 我係平日夜晚去，全店得我哋一枱客。 落左單，上左沙律，師傅就開始準備食材。 呢晚師傅為我哋做嘅壽司有： 北海道墨魚 剝皮魚 鯛魚 帆立貝 右口魚（鮫鰈） 張虹魚 銀雪魚 赤貝 呑拿魚腩 馬糞海膽 竹韱魚 呑拿魚手卷 全部壽司手卷都係水準以上，而且師傅都好親切，好用心咁介紹每一款壽司。成晚既整體體驗都好舒暢，有機會一定會再泥。

要係銅鑼灣揀日本餐廳真係好多選擇，對於中意食日本菜既我泥講真係花多眼亂。 今次就揀左泥呢間位於渣甸街嘅樓上鋪『螢雪』。 撘𨋢上到去，典型樓上鋪格局，四四方方，地方都企理整潔。今次就點左『11貫+手卷』既lunch set，然後師傅就開工喇。 呢個set有： 頭盤沙律 深海池魚 （配柚子皮） 真鯛魚 （配炒烏魚子） 大溝背 墨魚配海膽 黑目魚 赤身醬油漬 醋漬鯖魚 赤海膽 春魚 炭燒大拖羅 赤座海老 碎蒽吞拿魚 蛋卷 茶碗蒸 湯 綠茶紅豆雪糕 Overall泥講，我覺得食材相當新鮮，而且感受到師傅係好用心咁製作，每一道壽司我都中意。不過有一兩道壽司會用紫蘇葉，如果唔中意個味道，記住同師傅講。

銅鑼灣食lunch，選擇真係多籮籮。 今日心血來潮想食好d，就泥左亨利中心12樓嘅呢間『Sushi N』，嘆番個Omakase。 12點正上到去啱啱開鋪，所以我係第一個客人，坐低左即刻叫左個lunch set。無幾耐之後，師傅就出泥開始為我準備料理。 前菜係沙津同『三文魚子蒸蛋』。 跟住係差唔多手掌咁大既『北海道岩蠔』，相當鮮甜味美。 今日既seasonal sashimi 2 品分別係『間白魚刺身』同『鱈白子』（姐係鱈魚既精子）。咁大個仔都係第一次食魚精子，比我想好味，師傅話鱈白子呢排當造，所以特別肥美。 Hot dish 係『香煎油甘魚』，點埋佢特製醬汁一齊食，就會食到唔同味道層樓。 壽司方面，分別有『春子鯛』，『左口魚裙邊』，『醋鯖魚』，『帆立貝』，『酒煮鮑魚』，『拖羅』，另外仲有『海膽軍艦』，『海膽和牛手卷』。每一款我都中意，無乜可以挑剔嘅地方。 最後飲埋個湯，食埋雪糕，咁就大功告成。 總結，好滿足嘅一次Omakase 。有機會一定會再泥食。

車仔麵不嬲都係我最中意既美食之一，登龍街呢間『麵尊』我已經唔記得咗泥食過幾多次。呢日同埋老婆阿女再食多次。 當日我哋下就2點幾到，唔算多人等，好快就有位。 我廢事諗就揀左『大尊』加牛腩。 老婆同阿女就自選左『紅腸、豬頸肉、雞翼、墨丸、貢丸、芝士腸』 我個大尊加埋腩汁，湯底無得彈。 豬紅，豬皮，魚蛋，紅腸，簡單既食材，但都絕對唔馬虎。我特別欣賞既係果兩舊蘿蔔，無渣之餘仲好甜。 另外，值得一提既係個雞翼，滷得好味之餘，隻隻都好大隻，我覺得絕對值得一試。

年紀開始大，真係要注意吓自己飲食。以前無肉不歡，但近來開始學人食沙律。 呢日行開中環威靈頓街，見到呢間LITE，就入去試吓。 入到鋪面一眼望晒，有4-5張枱供堂食。 我揀咗『SEASAME SHREDDED CHICKEN SALAD』with Peanut butter sauce. 飲品就揀咗杯『Piccolo』咖啡同埋加多杯『Apple juice』。叫完野食就坐低等野食喇。 等咗5-10分鐘到，野食就準備好喇。一望碗沙律第一印象係：『嘩，咁大碗！』，跟手就倒汁撈兩撈開餐。 雞肉，粉皮，蔬菜撈埋啲汁一齊食，口感豐富之餘，味道仲相當唔錯。 蘋果汁加左lemon，所以飲落好清新，消滯解渴。 食完個餐，最後嘆埋杯咖啡，成個人好滿足又舒暢。😇

今日接完阿女放學，順便帶埋佢去食個lunch。佢話要食燒肉喎，知道北角匯商場地下有間石燒，就帶佢去試吓啦。 由於餐廳係係一田超市入面，所以鋪面唔大，bar枱位大概坐10個左右。 我叫左200g『美國上級牛小排』，加埋套餐有飯、沙律、湯同汽水。另外我仲加左條『日本芝士豚肉腸』添。 係等餐期間，我就先裝好啲燒肉汁，店員都好好人，逐款汁介紹俾我聽。 無幾耐，成份餐就準備好喇，店員好細心比多隻碟我裝住塊肉，因為驚石板太熱會燒過龍。 簡單講下塊扒，牛小排唔好啲肉質稔既位置，所以比較有咬口，但肉味真係好濃，阿女都食到停唔到口。 下次有機會再泥，店員介紹我可以試吓橫隔肌。期待下一次😆

成日行times square地庫，都會經過呢間燒肉餐廳，見佢放題都好似幾吸引。呢日終於泥試下佢既『薩摩和牛』lunch 放題，人頭4百幾蚊，簡單來講我覺得係物有所值，性價比都唔錯。
以下就等我簡單講吓我食左啲乜啦。  

牛五花 
油脂會偏多少少，燒香左一擺入口會有好香既油脂味  

里肌肉 
油脂分布無牛五花咁多，但肉味香濃  涮涮燒 呢隻肉相對薄少少，肉味都好唔錯，勝在好快燒熟，可以食多兩塊  

羊架 
羊架泥講，最怕就係燒完會好韌，但呢隻羊架肉質好稔，而且夠晒酥。唯一要注意既係佢肉比較厚，要確保燒到夠熟先好食  

另外，我地仲加錢叫左個『薩摩牛精選部位盛合』，四款牛包括有『特上牛五花』，『腹脅肉』，『內裙肉』同埋『腰脊芯』。 
特上牛五花比起普通牛五花既油肫分布更多，而且更大塊，食落更香油脂味。 
至於其餘三款肉，屬於唔同部位，老實講，我自己就唔太識得分辨佢哋既分別，但我唯一可以comment既係，雖然呢三款肉肉質都好鮮嫩，唔會好韌，而且肉味濃郁。有興趣既朋友不妨去試吓，再參照餐牌上既介紹，睇吓食唔食得出個分別。  食到最後，去咗自助飲品吧揀左個『茉莉花綠茶』茶包，沖杯茶泥消下滯。  

總括而言，呢度既燒肉放題唔可以話好便，但價錢就反映左食物質素。所以我一開始就話係物有所值！  

一年前泥食過一次，食完之後一直念念不忙，呢晚終於有機會再泥食鐵板燒喇。 餐廳佈置好似比起一年前靚左，成個感覺都坐得舒服左。 同老婆兩個人去，所以揀左『虎鐵套餐』（二人set）。 『牛油果海蝦沙律』 唔知點解覺得個牛油果特別好食，蝦都好新鮮，食完成個沙律即刻開晒胃。 『蟹肉海膽松露溏心蛋』 溏心蛋上面鋪左海膽松露，連埋半個蛋殼一齊上枱，有心思之餘，味道都確係唔錯。 『火焰北寄具』 睇餐牌果陣心諗佢點樣火焰法呢？姐係炙燒？原來係上左枱之後，再係你面前點火，估唔到好味之餘，仲有官能既刺激。而呢個北寄具加左啲菊花瓣係面，食落會有淡淡菊花既清香。 『活鮑魚配蟹肉海苔醬』 首先鮑魚接近手掌咁大，而且唔韌，又有咬口，配埋海苔醬一齊食就更出色。另外佢伴碟有個煎香左飽魚肝臟，都係幾好味。 『活龍蝦配海膽醬』 成日覺得龍蝦肉好難好食，但估唔到呢度處理得幾好。首先肉質爽口彈牙，無『鞋颯颯 』既感覺。然後個加埋龍蝦膏既海膽醬就更加係畫龍點睛，點埋呢個醬一齊食真係鮮味十足 『日本熊本A5和牛厚燒/薄燒』 因為我地有兩個人，所以我地試晒厚燒同薄燒。 我個人就比較中意厚燒，肉味濃啲。 薄燒都唔錯，會比較適合中意食蔥既朋友。因為薄燒其實係用塊牛卷住啲蔥花再煎，所以有別於一般既薄燒和牛。 『刺身帶子豆腐鯛魚湯』 食到呢到，其實已經飽飽地，但呢個鯛魚湯清清地，飲落去好舒服，有消滯既感覺。 『黑松露三文魚子海膽杯炒飯』 其實幾欣賞個廚師擺盤既心思，呢個炒飯用個杯仔上，份量適中，而且望落都幾靚。建議食呢個飯既時候，可以請侍應幫手轉落隻碟到食，因為用杯食既話可能會整到啲海膽三文魚子跌晒出泥。 『鐵板梳芺厘雪糕』 甜品我唔係太好，不過呢個梳乎厘我真係幾中意，軟綿綿，配搭埋雪糕一齊食，幾好味。 總括成餐飯，其實真係無乜野好彈，期待下一次再泥食，希望會再有驚喜。

牛扒係我最中意既食物之一，不過風乾牛肉聽就聽得多，真係咁大個仔都未試過。
呢晚就搵左『The Victuals』呢間西餐廳同老婆一齊試下。

餐廳好近地鐵站，好容易就搵到。一出𨋢第一時間就見到一排酒櫃，再轉個彎就係餐廳。佢鋪面唔算好大，不過勝在夠乾淨企理。

Chicken Golumpki
頭盤點左呢個Chicken Golumpki ，佢係用捲心菜包住啲雞肉同其他配料，咬落去好有層次感，點埋佢特配既醬一齊食，更加出色

Seared Foie Gras & Duck Terrine
食西餐又點少得鵝肝呢？
呢度既鵝肝煎得恰到好處，面到加左啲紅莓肝，酸酸甜甜，可以中和番鵝肝既重味。

30 days Dry aged 'Cedar River Prime Stirploin
主菜我地首先點左呢個三十天風乾stirlpoin，呢個係牛既前腰脊部份，肉質最富彈性和嚼勁，加埋風乾既效果，估唔到咁juicy同埋肉味好濃。

Sous Vide 24 hr Iberico Pork Rack
另外，我地仲叫左豬鞍，呢個豬鞍可能係我食過最好味既豬鞍。首先佢控制生熟程度真係啱啱好，肉質好稔，我幾乎未試過豬鞍係可以咁稔。我本身諗住牛扒已經好味，呢個豬鞍仲更加有驚喜。

The Victuals Tiramisu
最後當然要食番個甜品。今晚揀左Tiramisu。雖然已經食到好飽，但係呢個Tiramisu真係整得唔錯。同埋佢伴碟既『抽真空朱古力』，之前真係未試過，食落口感都幾得意。

總括泥講，從食物之中，可以睇得出個廚房真係幾有心思，每一道菜無論伴碟，擺碟都落足心機，只要你試過就會感受到廚師熱誠。有機會一定會再去食過。