元朗要搵比較傳統嘅東南亞菜唔難 Fusion 嘅就真係唔多 每次黎依到對住個餐牌都有少少選擇困難 因為真係每樣都有少少想試下 侍應好好人會過黎問有冇需要幫手 亦都會推介一下食物 其實仲有啲二人餐揀..不過份量太多所以最後都散嗌 揀左豬腩片黑蒜濃湯伴飯 上菜已經聞到碗湯好香 食落一啲都唔油 先飲一啖湯 熱辣辣 有微微嘅黑蒜味 需然唔算話好濃好濃 但撈埋飯都好夠香 飯面有少少椰子碎 一齊食有少少咬口仲有好香椰子味 碗飯仲好大碗 豬腩片有好多塊 冧滑唔油膩 香菇同萵荀就吸晒啲湯汁 有啲蔬菜食下令成個湯都清新左 另外揀左吉列豬扒三文治 上菜真係嘩左一聲 因為真係成座山咁高 除左佢講嘅配料 面頭仲有沙律菜同車厘茄 中間就擺左吉列豬扒 已經切開左一舊舊 仲收埋左一隻滑蛋 厚面包上面鋪左一層泡菜 成個賣相已經好吸引 店員好貼心 每人都俾左一副刀叉同一隻細碟 吉列豬扒酥脆 熱辣辣 一啲都唔𠝹口 泡菜微辣 帶少少酸 夾埋炸野食變得一啲都唔會漏 厚多士烘得岩岩好 外面脆 內裡仲保持副面包嘅軟熟 配合埋隻流心滑蛋 好香好好味 為食嘅關係就叫埋個小食炸雞 唔會炸到乾爭爭 咬落仲有肉汁 配左蛋黃醬 都幾香 不過依個份量就好似少左啲 得3粒 野飲方面揀左tonic 因為已經飽 唔想飲好多奶嘅野 依到tonic 幾岩我地口味 出面飲過會勁酸 啲梳打水好喇喉 依到唔會有咁嘅情況 微微酸味 反而令我想一啖接一啖咁飲晒佢

好耐冇食越南野 見到價錢都合理 所以即管試試佢 叫左個二人餐 有兩個主食、兩份小食、兩杯野飲 價錢$176 都算係咁 第一個揀左香茅雞扒撈檬 見佢menu有俾所以試下 個人都偏好食撈檬 貪佢會有多少少蔬菜落肚 賣相係吸引嘅 撈檬個汁另外用碗上 份量好足夠 一啲都唔孤寒 其他店舖一般用一個樽/壺咁俾啲汁 通常都黐立立 啲料沉晒底 個人覺得感覺一碗俾汁仲衛生 仲可以用匙羹𢳂起啲料 依個方法比較好 雞扒好香 唔知點解個調咪有啲似叉燒 外皮香脆 肉質都幾嫩滑 配菜有青瓜 蘿蔔 生菜 芽菜 全部都咁爽脆 撈埋檬粉 酸酸甜甜 十分開胃 另一個揀左四寶湯河 有牛丸、牛展、生牛肉… 啖湯就一般般啦 份量都算足 不過就未食到好似去左越南咁嘅味道 小食有 春卷、炸蝦餅、炸魚餅、雞翼 味道都係不過不失 不過有樣野想提嘅 都明白關成本問題 可能真係每款俾到一件 但係如果個雞翼可以變成兩件單骨雞翼咁就更好喇 柚子蜜如果俾到個長匙羹就好喇 其實overall都ok 不過就有一位侍應比較神不守舍、心不在焉 由落單到執枱都係比較論論盡盡 執枱個時倒瀉左碗湯淋左落我對腳到 佢呆左停晒手 望住我俾唔到反應😅 我自己仲要搵隻手兜住枱邊繼續滴緊落黎嘅湯😂😂 反應係慢左啲架喇 但係最後佢都俾左一大疊紙巾 同好體貼咁斟左一大杯暖水俾我 等我慢慢抹乾淨番 依樣又抵讚番 希望下次即使有同樣事件發生 可以處理得更好啦

話說如果唔係佢地放棄左年青人 以前的確幾鍾意食依個集團嘅野食 今次因有人俾左現金卷我地 所以先係到食飯 唔用仲蝕左俾佢😤😤 三個人叫左個四人餐 坦白講 野食足料好食 制作好認真 已經好耐冇見過叉燒會有依啲蜜豆做伴碟 半肥瘦叉燒肉質爽口唔痴牙 油雞入味 可惜上碟已經凍冰冰 雪燕海皇羹 每人分到兩大碗 蝦仁鮮甜 蝦米醬炒雞球蝦仁 蝦仁大大隻 肥美爽口 雞肉嫩滑 炒埋蝦米醬 好惹味 涼瓜斑腩煲 塊塊都真係腩位 有魚嘅鮮味 涼瓜甘甜 蟲草花小雲耳粥水浸菜遠 菜心新鮮 小雲耳爽脆 唔錯 合時甜品係蛋白杏仁茶 依個好好味 又唔太甜 每一啖都充滿杏仁香 因為3個人都照俾左4碗 所以我食左兩碗 雖然成餐飯都食得滿足嘅 但畢竟都已經互相放棄左 所以👋🏻👋🏻

因為要行會展 所以過黎搵食 見到依間啲滑蛋好似好正 標榜用日本雞蛋 決定黎試試佢 滑蛋叉燒蝦仁飯雙拼飯 黎到個賣相已經勁吸引！ 大大隻蝦仁 爽口彈牙 唔會冇黎聞味 食落咸咸香香 叉燒偏瘦 但好冧 一啲都唔會痴牙 重點係啲滑蛋 加左少少蔥花 食落有淡淡嘅香味 半熟嘅滑蛋真係超級滑溜 又有雞蛋香 配上甜豉油 令成個飯錦上添花 另外一個餐點左特濃蕃茄湯午餐肉粒通粉 配 4.3 牛奶炒日本滑蛋 鮮牛油麥包多士 滑蛋一樣咁好味 多士香脆得黎唔會硬到介口 面頭搽左一層薄薄嘅牛油 不過就唔係好食得出係麥包 但整體黎講都比好多餐廳高質 午餐肉份量唔多 大概有5粒 但粒粒都炸到外脆內軟 浸埋啲蕃茄湯吸晒味好正 蕃茄湯好濃味 好似將好多蕃茄煮爛晒咁 好濃稠 蕃茄愛好者一定會鍾意依個湯 通粉比較薄身個種 唔會勁厚食落好粉個啲 配埋個濃湯 每一啖充滿蕃茄香 酸酸甜甜 好開胃 兩個餐都配左凍忌廉咖啡 野飲就不過不失啦

每隔一排一定會番黎食依間嘅寬粉 因為依到嘅寬粉煮得特別彈牙唔會過林 今次男朋朋揀左胡椒豬骨湯底 加左辣腩肉同豬大腸 湯底食得出好足料 上菜已經聞到好香胡椒味 每啖湯都充滿胡椒個種飲落會辣喉嚨嘅感覺 遲下冬天飲完應該會好暖身 豬腸洗得好乾淨 唔會每舊中間好有好肥膏 第一次試依間嘅辣腩肉 嘩！黎到個刻真係勁吸引 肉同肥均勻地一層一層咁交接住 睇到都流晒口水 食落都好淋 但又唔會好漏好肥膩 而我就叫左麻辣豬潤寬粉 豬潤爽滑 唔會煮到過熟好粉 亦唔會一大陣內臟嘅餲味 分量都幾多 麻辣湯底有肉碎同花生 🥜 花生都好香脆 湯底香濃 不過略嫌今次比較油 另外叫多左個口水雞例牌 依個就不過不失啦 雞都算滑嘅 但就好似搭左比較多骨頭位 同埋唔知點解今次啲粉叫左小辣但比平日辣多左好多 所以我唔係好食得出口水雞嘅味😂😂😅😅 不過順帶一提 大頭蝦嘅男朋友又倒瀉水 真係超唔好意思 侍應同老闆都即刻幫手 搞到人地又拖地又抹枱 做多咁多野 佢地都冇黑面 值得讚揚

終於的起心肝寫番個食評 真心足料又抵食 例牌叫左酸菜魚柳小辣 魚柳好多塊 塊塊又大又滑 仲有薯粉底 酸菜味出 酸酸辣辣 極之開胃 依間嘅外賣最大好處係你唔使叫佢分湯 因為佢自動分開裝大碗湯 送到黎啲薯粉唔會浸到發晒爛晒 川式炒薯粉又係幾乎每次都會點 雖然只係將酸豆角、肉碎同薯粉炒埋一齊 但好有鍋氣 每一條薯粉都炒得好均勻 送到黎都仲係熱辣辣 又香又辣 最鍾意就係依到嘅薯粉彈牙又煙韌 十分滋味 唔只食薯粉嘅 仲叫左手撕雞 花生香甜 脆口 同微辣嘅手撕雞十分配合 手撕雞仲有淡淡嘅麻油香 仲有爽脆新鮮嘅青瓜係底 成餐即刻冇咁漏

第二次黎依到食晚飯 味道同份量都冇令人失望 睇食評見人地話依啲服務好差 但我黎左兩次都唔太覺 環境同食具乾淨企理 落單都係一樣scan QR code 點餐 今次食左果醋骨 份量多 成碟都有10舊以上 一上菜熱辣辣 咋咋聲 好吸引 排骨夠林 骨肉一咬就輕易分離 係略嫌肉唔夠滑 有幾舊乾左少少 個汁酸酸地 配左少少雜果同洋蔥 好好送飯 特別開胃 另外點左涼瓜蛋 擺盤幾有心思 冇諗過會擺到好似把扇咁 以為會一個圓形就算 涼瓜同肉鬆唔算好多 加左少少蔥落去煎 都幾香 如果啲燶邊可以再脆啲就更加正喇 茶位每人$8 兩個人食夠晒

食餐台灣便當 當去一轉台灣 黎到要排隊 職員有禮 安排同指示都十分清晰 先係counter 買野食 再入座 侍應會根據客人手上嘅號碼牌送餐 揀左台灣鐵路大排骨便當 加左$12升級南部滷肉飯 份量十足 排骨好大份 配埋粉絲 蛋角 好豐富 不過老實講 滷肉就比預想中少 而且味道唔算太出色 但就唔太油 唔會搞到啲飯油林林 另外就仲叫左麻辣鴨血肉燥寬粉 麻辣食得好過癮 鴨血滑溜 吸晒啲麻辣湯 成碗總共有5、6舊 寬粉唔同平時米線鋪個啲又闊又厚嘅寬粉 依到係幼啲同薄身啲個款 一樣有煙煙韌韌嘅口感 而且掛湯能力十足 十分出色 唯一唔好係個碗對我黎講太高身 有啲難夾啲粉同𢳂湯 同埋成碗得4粒肉燥 另外每個餐可以加$14追加小食 揀左鹽酥雞同脆地瓜 鹽酥雞不過不失 香脆似普通炸雞粒 地瓜本身唔太甜 但加左梅子粉又唔錯 飲品就揀左焙茶同埋蘋果茶 焙茶茶味濃郁 食左咁多野可以消消濟 而蘋果茶就好香蘋果味 好似平時紙包飲品蘋果綠茶咁 但依一到嘅就冇左個種死甜 十分之清香 都係一個唔錯嘅選擇

睇完其他foodie專登過黎試 入黎見到話新出左冬蔭公湯 所以湯餃加左$18配冬蔭公湯底 湯餃揀左肉三鮮 每一隻入面都有一隻蝦 粒粒都漲卜卜 而且韮菜味濃郁 鍾意食韮菜應該好岩食 湯餃相對煎餃個皮會厚少少 但係個皮好滑又有啲煙煙韌韌咁 都唔錯 另外有少少驚喜 冇諗過一鍋咁上 仲有個火熱住 湯餃再加$18 轉餐可以揀一個小食同一杯野飲 揀左醉香雞翼同無糖豆漿 雞翼就不過不失 聞落都香酒味 但食落隻雞翼就唔夠酒香 煎餃揀左孜然羊肉餃 皮薄餡靚 煎到孜香孜脆 咬落仲爆晒肉汁 真係要小心辣親嘴🙈🙈 擔擔面真係好驚喜 好耐冇食過咁香嘅擔擔面 同行嘅朋友原來一直覺得擔擔面好垃圾 今次真係令佢改觀晒 湯底香濃花生醬味 加少少肉碎 每一條面都掛晒湯 好似中式沾面咁 冇諗過本身係為食餃子而黎 結果係個擔擔而令我地印象最深刻

最近見到有人係社交平台分享黎左依間餐廳 見到幾吸引 於是放假突登入黎試 每次食印度野必定要點naan 今次試左比較fusion 嘅軟殼蟹butter masala配garlic naan 一黎到已經聞到香噴噴garlic味 軟殼蟹睇得出係新鮮炸完再放上咖喱上面 賣相十分吸引 而且食落仲保留到軟殼蟹嘅香脆 butter masala 唔太辣 配埋naan食一流 另外點左海德拉巴羊肉香料飯 依個真係同佢個餐牌圖文不乎到有啲過分😂😂😂 黎到啲羊肉仲多過餐牌張相 本身對印度嘅米冇乜好感 可能食開泰國/日本米都比較黏身一啲 冇咁鍾意食印度米又散又乾 但食完依個飯簡直對印度餐廳嘅飯改觀 依個飯加左香料 每粒飯好均勻好香又有微微辣味 個口感就好似食緊炒得好香又乾身嘅炒飯咁 羊肉又冧又滑 有淡淡嘅膻味 鍾意食羊肉嘅朋友可以一試 每個餐再配左mango lassi 同埋印度香料奶茶 味道都唔錯 男朋友有段時間要係海德拉巴做野 佢話依到比起佢係印度食嘅更加好食想多啲黎懲罰依間餐廳