Nutmad其實唔係第一次食，觀塘區呢間由佢係工廈食到佢搬去商場，只可惜離我公司實在太遠，如果唔係應該會成日食，係一間「lunch不如食好啲」就會諗到嘅餐廳～估唔到叫同事推薦nice. d嘅farewell飯，佢哋都仲係推薦呢間😂，證明大家都認同無論環境同食物方面，佢都好見得人！ 黑毛豬扒 招牌菜，唔需多講，每次必點！肉質juicy,超級香口，醬調得非常好味，夠味，但唔過濃，又唔膩，第一次食嘅上司（平時食好多好野）都講左句「得喎」 豬豬卡邦尼 另一心頭好，意粉軟硬度算中等（可能算偏少少硬？）芝士脆片同香煎左嘅豬肉粒超香口，yummy 腐乳凱薩沙律 作為肉食動物嘅我平時係絕對唔會點嘅一道菜，上台呆一呆，第一次見成棵菜上嘅沙律😂腐乳味聽個名就夠晒fusion,但其實入口腐乳味只係淡淡地，唔會太搶，所以唔使擔心。整體冇咩特別，成棵上亦進食不便，不推薦😅 Tiramisu 因為驚多士等得耐就試左Tiramisu,跟左杯expresso 同finger biscuit上，個tiramisu係軟到慕士狀咁，好易溶，所以要點一下食一啖，咖啡味超濃，風味不俗～ 今次感想係食物質素一如既往keep到，但可能人手唔夠，服務上會有啲甩漏，但唔影響我想一食再食

係深水埗區住左超過廿年，呢間係我只要想食糖水就會諗到嘅鋪頭，三個字「平靚正」，再多四個字「包羅萬有」。基本上係你想食咩糖水呢度都有，同旺區/打卡餐廳唔同，呢度價錢超級相宜，唔使驚貴夾唔抵，盲點都唔會伏～食客都係街坊街里，平時都見唔少人打包走。 我嘅最愛係雜果類糖水，今次叫左雜果涼粉西水露，樣樣料都俾得超足，生果清爽，涼粉有啲趙口，而且甜度剛好，大推 呢度樣樣都好足料，晚餐食唔飽，係呢度都食飽你，超級滿足！次次推介朋友都冇翻車😎

平日晚上嚟食，好彩唔使排隊，鋪頭位置唔算大，座位唔多，使唔使排隊就睇你好唔好彩喇，我地去嘅時候都基本上客滿。 店名叫「煲煲掂」，但其實唔只得煲仔飯，仲有串燒食。三個女仔叫左兩個煲仔飯加十幾樣串燒，份量剛剛好～樣樣野都味道不錯，十分好味算不上，但價錢合理，性價比絕對有。推薦 蝦醬豬頸肉煲仔飯 煲仔飯熱辣辣上，自己淋醬油，點會唔好食，印象中飯焦唔算多，岩晒我呢啲唔好飯焦嘅人 窩蛋鮮牛肉煲仔飯 串燒 蒜蓉多到不能再多，唔建議食完之後見人

平日晚上差唔多九點左右，兩個人以上都仲要等下位，我一個人好彩唔使等～ 天氣凍唔使諗即刻叫左個牛肉壽喜燒鍋，大食嘅我仲要加多$20 order 雙份牛肉～ 其實材料同味道上同吉野家打邊爐分別唔大，但佢竟然本身跟左烏冬，再另上左飯，雙重碳水真係估佢唔到，所以一般食量嘅朋友仔唔使order雙份牛肉就足夠。 值得提下嘅係有一小碗另上嘅生菜，後來上網睇話係放入鍋煮，我當時唔知所以冇咁做，但我個做法大家都可以參考下～因為打邊爐啖啖肉而且熱辣辣,不如唔好將啲菜放入去，而係每啖牛同生菜撈埋一齊食，咁樣又冇咁熱又解到膩～

又一城lunch間間都排隊，今次簡左間稍為冇咁多人排嘅試下，望落set lunch價錢都係百頭左右，環境唔錯，台同台之間有返啲距離，就入去試下。 我簡左個「韓式炸雞溫泉蛋石鍋飯」，上台真係噴晒煙熱辣辣，炸雞醬係經典甜辣醬，味道不錯，質地都唔會過軟過硬，但個飯就唔多入味，本身重口味嘅我連另上嘅甜辣醬都撈埋落去都係覺得有啲唔夠惹味。 同行朋友叫左泰式蟹肉pizza,一食落去滿滿冬陰功味，非常有泰式風味，幾特別～ 我見menu有pasta,咖哩飯等茶式，即係呢間野行大雜燴路線，下次再去上下其他～

只要我人在尖沙咀又想食茶記，我就會嚟呢度食沙嗲牛餐，連埋腸仔、煎蛋、雞翼、西多士、熱飲埋單$60。 沙嗲牛個名叫招牌金菇沙嗲牛，雖然食落唔多覺，但唔影響沙嗲牛公仔面超夠味，牛肉軟、「諗」、惹味。雞翼煎得香口乾身，配公仔面一流

川菜迷岀動了！今次到銅鑼灣覓食！雖然地點有點偏離銅鑼灣旺街，但因為佢係地舖，所以都好易搵！而且佢門面用咗麻雀做deco，夠曬中式🤣 今次點咗金湯酸菜魚，螞蟻上樹同鐵板魷魚鬚。 金湯酸菜魚 份量大，好足料！而且有埋水晶粉皮，真係夠晒飽肚！今次我哋叫左小辣，但比我地想像中辣左少少。好重椒麻味，但蓋過左個酸味。而個魚片都尚算嫩滑！如果鐘意花椒味既人，應該會鐘意呢個餸！ 鐵板魷魚鬚 魷魚彈牙、濃味！啲醬料沾滿啲魷魚鬚上面，夠晒惹味！好多青椒同洋蔥，夾埋一齊食，口感爽！ 螞蟻上樹 永遠都係我心頭好，因為我好鐘意食粉絲！雖然好上色同入味，但略嫌太黏。成埋粉絲痴埋一舊，夾既時候有啲麻煩。

突然好想食啲日式家庭餐廳菜，所以嚟咗呢間cafe食lunch! 一去到就大排長龍，可能撞正咗lunch hour。但見店面好闊落，仔細望先發現原來佢大多數都係4人枱，即使1人去食，都係獨佔4人枱。呢點真係有好有唔好，好嘅係高私隱度，但唔好嘅係翻桌率慢，肚餓如我就排得好心急。如果佢可以4人枱坐2個1人就好啦！ 言歸正傳，我叫咗個吉列豚肉佐咖喱蛋包飯同南蠻炸雞。份量超大，上菜果刻真係呆咗，所以最終我係加左$1拎外賣盒打包的。 吉列豚肉佐咖喱蛋包飯 份量大，豬扒肉質厚實，食起上嚟，肉汁係keep到，唔會太乾。而咖喱味道偏甜，係典型日式咖喱風味。撈埋個滑蛋一齊食，oishi! 南蠻炸雞 賣相靚，炸皮同肉比例岩岩好，啲醬汁酸甜酸甜，可以中和油膩感。第2日用氣炸鍋翻炸，都仲好好食！

大熱既法式布甸麵包終於比我買到啦！！！之前見人分享都係要提早排隊，如果唔係就好快售罄。但我好好彩，咁岩撞正唔駛排隊兼可以買到一盒！！好開心！！
店員姐姐介紹左2種食法，一係凍食，一係熱食。我2種食法都試過，而我比較鐘意熱食，貪佢有流心既效果，大啖大啖食啲吉士醬入口，邪惡度滿分！😝😝😝 而且雪左一晚既法包經翻叮後，會軟身啲，更易入口。 

難得入梅窩，當然要搵好西食啦！見到好多人都介紹呢間餐廳，所以決定黎試試佢。可惜，我地唔係星期日黎，無緣食到最出名既蟹茄湯檬。但唔緊要，都可以食到另一款出名既鮮茄牛腩湯檬。 蕃茄湯底味道濃郁鮮甜，真材實料，而唔係重味精味，食完空虛兼要搵水飲。 而牛腩就帶到驚喜我，非常入味同埋嫩滑！重點係，瘦腩佔多！！哈哈，因為本身我唔係咁鐘意食肥腩。所以特食呢碗湯檬食得好開心🥳另外，我地都叫左越式拼盤，有雞翼豬扒魚餅果啲，呢個就不過不失，唔會有太大驚喜。
P.S. 原來間店唔收毫子，但餐廳姐姐好好人，主動幫我地換成1蚊銀。真係麻煩晒佢地！