琴晚去左food court 食個薯仔排骨湯🫠
叫咗少飯又冇少到🤷🏻‍♀️🤷🏻‍♀️🤷🏻‍♀️
雖然食個陣覺得味道正常
Food court可以有幾好食
所以都冇乜要求
但個food court勁大油煙

然後食完返去之後肚痛兼反胃
勁想嘔🤮🤮🤮🤮🤮🤮
今日起身即刻肚屙🤢
依然想嘔但嘔唔出🤢
以後唔會再去😵‍💫😵‍💫😵‍💫
一定勁污糟

打波前係附近搵野食 見間鋪細細間但都唔少人就入左去試下 入到去見到個quote 好正 令我諗係Friends 入面嘅Joey🤣 見間鋪叫薄餅怪獸 無理由唔食薄餅 所以叫左個細嘅Mexican Chillies 佢係厚批黎，兩個人食啱啱好 其實我個人黎講鐘意厚批多啲 餅底岩岩好熱辣辣 完全冇燶🤩 仲要好多料 不過本身以為佢好辣，點知又唔算 可能因為我揀咗蕃茄汁底 冇揀到辣嘅醬 所以所有辣嘅來源都係來自嗰啲辣椒 然後我哋嗌咗兩件烤雞 我朋友揀咗檸檬烤雞 我揀咗麻辣 雞肉好滑 個麻辣醬汁好夠辣！正！ 然後我哋再叫咗豬手拼香草腸 仲要有勁多薯條 食到超飽 一睇啲薯條嘅顏色就知道唔係用啲萬年油去炸 好味！！ 食咗咁多嘢先$300 唔使 好抵 以後打波前有多個選擇㨂🥳🥳

以前去過油麻地個間！ 估唔到宜家銅鑼灣開左新鋪☺️ 啲野食都仲係咁高性價比😉 我地叫左set~ 餐湯同沙律 我地㨂左湯 今日個湯係煙肉忌廉湯 配蒜蓉包 上枱時個湯同個包都好夠熱 呢個有啲驚喜 通常啲面包都係微溫 甚至係凍 呢個夠熱 抵讚👍🏻 面包點湯好好味😋 我地main course 分別叫左法式香煎紅鯛魚 同煙三文魚明太子意粉 紅鯛魚幾好味 夠大份 夠嫩滑 冇骨 但唔覺得係法式🤣 因為好重孜然味 魚下面有薯蓉有蔬菜 正常發揮～ 煙三文魚明太子意粉 都一樣好大份🤣👍🏻👍🏻👍🏻 口感都幾得意 一開始以為明太子會係同啲醬撈埋 但其實個醬汁係忌廉汁黎 明太子係切到一粒粒 同啲煙三文魚好似樣😆 最後上埋飲品 朱古力同青檸梳打💕 埋單每人都係二百幾👍🏻 dinner黎講都算平🫢

又想食omakase luuuuu🥰 今次去左尖沙咀鮨石試試師傅手勢 第一道頭盤有三樣食物要順次序食 第一個係醬油漬吞拿魚 完全無筋 好軟熟 魚鮮味好足🥰 然後係水雲 係海藻嘅一種 師傅切到超幼 好似頭髮咁幼 刀功好厲害👍🏻 食落脆脆地 酸酸地 好開胃 最後係靜岡果茄 同普通蕃茄好唔同 一食落去係酸酸地，然後食到最後係會回甜 好特別！ 開左胃之後 師傅上咗鹿兒島間八 魚嘅油脂好香🥹魚肉軟糯 好正！ 接着係北海道白象拔蚌 可以配芥末或者鹽去食 旁邊仲有橘子 沾一沾橘子先食會帶有橘子嘅香味 好清新😚 師傅跟住serve 左八爪魚腳同吸盤 個人嚟講鍾意吸盤多啲咬落去比較爽口 八爪魚腳幾厚身，但係略嫌有啲韌 鮟鱇魚肝配上醃製左嘅奈良西瓜 一食落去果下，完全唔知道嗰個係西瓜🤣🤣 就算我知道咗佢係西瓜，我都唔覺得佢係西瓜😂😂😂 係好神奇嘅口感，第一次試咁樣嘅西瓜 夾埋鮟鱇魚肝一齊食會令到個鮟鱇魚肝冇咁膩好食好多 跟住就係天婦羅 有北海道目光魚、青椒仔、本菇 梭子魚有燒過表面好香 卷左黎食啖啖肉😚😚 青森縣大王芋比起山藥更好食 唔會喉嚨痕🤪 食壽司前上左個帆立貝清湯 個湯超鮮甜 個帆立貝嘅鮮已經入哂個湯度 個湯比起粒帆立貝更加好味👍🏻👍🏻 壽司有石垣鯛、池魚、黑鯥、鰤魚、關鯖魚 、中拖羅 最好食係最後個生死戀 紫菜包住赤身刺身同埋燒過嘅拖羅 個拖羅係近鮫位，油香十足 夾埋一齊食，真係正到喊🥹🥹 食完壽司之後就上咗個魚湯 暖返個胃好舒服☺️☺️ 最後點少得甜品 個開心果雪糕加埋朱古力脆脆簡直係完美嘅句號😍

一諗唔到食咩就係要食泰國菜🥳 以前去泰國旅行嗰陣見過有得一路邊爐一路BBQ 估唔到香港而家都有得咁食法🤣🤣 呢個小火山BBQ set 有豬有牛仲有少量內臟 啲肉唔鞋都幾腍身！ 除咗烤肉仲可以打邊爐咁食 邊爐嗰度有兩個湯 一個係椰汁雞湯，一個係牛骨湯 椰汁雞湯同平時喺泰國餐廳可以點嚟飲嗰個湯一樣！ 好香椰子味 我食嗰陣鍾意燒完之後再淥一淥 咁就冇咁熱氣，又有少少椰子香😜😜 呢個雖然唔知道係咩醬 但係酸酸辣辣幾惹味 烤肉點呢個醬勁有泰式風味 另外仲叫咗蝦片 超級脆，勁好食🥹 淨係食肉又點得呢？ 所以嗌咗個大蝦青木瓜沙律😍 份量都幾多 青木瓜沙律酸酸辣辣😚😚 超級開胃 可以減輕食燒肉嘅油膩感😌 不過都幾辣 如果鍾意食辣嘅朋友應該幾鍾意😆 我哋叫咗一杯泰奶一杯奶綠 泰國奶茶都係偏甜少少 鐘意甜嘅就岩哂啦😋😋

岩岩去完清邁 食左好多日泰菜 係時候食返餐omakase歎下 今日㨂左$1980 嘅set 頭盤係，蟹肉蒸蛋 有人幫自己拆哂蟹肉真係好幸福 啖啖肉💕 舊蘿白仲好入味 鴨胸好味 同平時嘅鴨胸差好遠，肉質好軟熟好重鴨肉味 鰻魚同公魚都唔錯 木魚花下有希靈魚子，超爽口 黑豆好甜好好味🥰 海膽同蝦兩樣我的最愛嘅刺身放埋一齊點可以唔心心眼 海膽同蝦都好新鮮好甜 滿足度一百分💯 呢個造型都咪話唔吸精 由白身魚開始就食先 配搭住上刺身前師傅親手鮮磨wasabi 味道一流 跟住再黎就係赤貝 赤貝好爽口好鮮甜 金目鯛上面有自家製7味調料 好特別 仲有鯡魚加埋蔥一齊食更加食到佢嘅鮮 係拆哂肉嘅蟹啊💕仲有蟹膏蟹籽係底😋 新鮮係北海道黎嘅香箱蟹真係季節限定 遲多少少都未必食到 Omakase最重要就係不時不食 咁先對得住個價錢 然後有兩道魚 一個係鰆魚 配搭住椰菜花同皇帝菜嘅菜汁 個椰菜花汁食落同忌廉白汁嘅味好似 魚嘅肉質勁彈牙！好味！ 另一個係金鯛立鱗燒 配上紫菜整嘅汁令成個鮮味帶上更高一個層次 菇應該係有烤過好香，帶少少鹹香，好味！ 壽司有鹽漬池魚、松皮鰈魚、醬油漬赤身 （帶有柚子香） 、中拖羅，中拖羅超級好食，無渣無筋帶油香又唔膩🥹🥹 無得輸 然後再黎巨型帶子手卷同埋海膽壽司 個海膽壽司分別用左新鮮同昆布漬海膽 好甜好鮮好creamy 江戶前玉子燒 一望到佢覺得佢成嚿蛋糕咁 食落都覺得好似一嚿蛋糕😂 好有趣 麵豉魚湯🥰🥰 每次去親omakase 都必定有一碗熱湯 而當你食完咁多刺身壽司生冷嘢之後 有一碗暖笠笠嘅熱湯 真係會覺得好舒服 同埋飲過omakase嘅麵豉魚湯之後 就返唔到轉頭 因為個湯唔會死鹹，係有淡淡嘅麵豉味再加魚嘅鮮味，成件事好舒服 最後點少得甜品 有時令嘅靜岡士多啤梨 仲有自家製sake啫喱配香印提子 同埋用豆腐同埋糯米整成嘅小丸子配上抹茶紅豆🥰🥰 個甜品超級好食，係一個超完美嘅句號☺️

台灣嘢不嬲都唔係好貴 但我冇諗過平到咁🤫🤫 可能係因為咁，所以都幾多人食 我叫咗一個蕃茄紅燒豬頸肉麵 🍅🍅 個蕃茄湯底好正🤤 真係好濃郁嘅蕃茄味👍🏻 我揀咗幼面 面質唔錯，唔會太腍或者太硬 而豬頸肉佢係另上 份量都幾多 加$10就有多一碟仔嘅台灣香腸 雖然台灣腸份量唔係好多 勝在過吓口癮😋 台灣腸幾時都咁好食 食親台灣嘢都會好想叫🥳 烏龍茶都係跟餐嘅 烏龍茶係有一個茶包喺入面 跟餐嘅算係咁啦，冇得太多要求 有無糖嘅選擇已經好開心 食飯點少得菜 所以我都叫咗一碟滷肉燙青菜 啲菜都算翠綠冇燶邊 份量十分對得住價錢 個餐再加多$28就有甜品 都唔知幾耐冇見過$28嘅甜品🥳 我就揀咗桂蜜躺雪山 桂花蜜好香😚 連埋紅豆一齊食，都幾好味 入面仲有雲呢拿雪糕同埋芋圓 唔好講笑，真係飽到嘔 食完呢餐我真係捧住個肚走🤰🏻 買單先$150 仲唔係抗通脹😆😆😆

心血來潮突然好想食炸雞🍗 見附近有間韓國野就入左去 我記得好耐之前都食過一次外賣 記得個陣嘅炸雞都好好味😋 我星期三晚去 唔算好多人 近門口位就多啲人 但我坐得比較入有包場feel😆 然後坐得好近甜品自助區 估唔到呢度有得任食甜品 雖然唔係好多選擇 有三四款咁 但我幾欣賞佢有提供！ 我叫左半份無骨醬油香蒜脆雞 都幾大碟！ 兩個人食都好夠 個雞甜甜地少少蒜香 脆醬裹得好薄 唔係炸雞咁厚皮 肉質仲係好juicy 我仲叫左水冷面 上枱個陣侍應有比埋醋同埋wasabi 可以因應你嘅preference 自己落 我個人黎講鐘意落醋 酸酸地好開胃😋😋 而啲面已經剪左兩刀 所以食得好方便 係韓國食都會幫你剪埋 有跟返local 做法好貼心🫶🏻 仲叫左杯grapefruit juice 🥰 係飲得出真係新鮮榨 仲有果肉係入面👍🏻👍🏻👍🏻 本身掙扎緊要唔要飲啤酒 好彩揀咗果汁，好正🥴

難得同爸爸兩個去撐枱腳 梗係要食返餐好😆 呢間餐廳又好方便一出N1出口行多兩步就到 間餐廳有得揀坐入面定出面 我哋就揀咗坐入面 入面都幾有Cafe feel幾舒服幾靚 話到明撐枱腳點少得酒 一坐低即刻叫返兩杯Cocktail飲吓先 唔小心配合埋個燈光效果超靚😆😆 爸爸揀嘅係Sangria 我揀嘅就係加左elderflower liqueur嘅champagne cocktail 都幾好飲同好打卡able 店員大力推介熬左三日嘅龍蝦湯 所以我哋就叫咗 真係好彩有聽店員推介 超級好飲！龍蝦味超級濃！飲完一碗都好想再飲 入面嘅蝦同埋青口都好食！ 我哋仲嗌咗個意式蒜香牛油汁配藍青口及蜆 蜆係比較淡口味，但青口係極度入味 但食得出兩個都好新鮮，肉質爽滑唔會霉 我平時都冇特別鍾意食青口 但我覺得呢間青口真係幾好食 麵包上枱時已經搽咗牛油， 可以點埋啲汁一齊食👍🏻👍🏻👍🏻 炭燒豬胺扒大概係煮到八成熟 有陣陣嘅炭燒香味 肉質都尚算嫩滑 👍🏻 爸爸食完之後覺得好滿意 仲話要帶媽媽一齊再嚟食😆😆

又到左搵飯食時間🥳 去完歐洲之後成日都心心念念住法國生蠔 所以特登搵左間食生蠔嘅餐廳去止一止癮 一入去就見到個大餐牌 一共有7款蠔㨂🥳 而最重要係竟然有schaller!!!! Schaller 真係無得輸 一有schaller 基本上唔使睇其他 即刻叫兩隻食！ 蠔味好濃郁 加埋海水味同埋少少檸檬汁 真係最高嘅享受 食完成餐飯之後口腔都仲齒頰留香 真係冇得彈 鐘意食蠔嘅話 真係一定要試！ 呢杯並唔係水😆係椰青水💕 雖然食蠔好適合飲酒 但個日突然好小朋友口味😆 鵝肝多士都好好食 鵝肝好大件多士亦都好脆🤫 大滿足！ 燒山藥就正常水準，冇乜特別😆 $38有兩串比起其他餐廳都算抵食 但係個香辣蝦蝦意粉要讚下👍🏻 一碟意粉，有成七隻蝦！ 仲要隻隻都彈牙，夠晒入味！💕 辣度唔算好強勁係比較爽口嘅辣！