今日同同事去朗豪坊搵嘢食，竟然俾我發現我喺台灣最愛嘅天婦羅店❤️ 每次我同老公去台北都一定要去呢間天吉屋食天婦羅 好嘢好嘢！12:45到竟然唔使等位 內𥚃環境 香港分店選擇感覺比台灣少，不過我最愛嘅天幕餐都有喎 仲有好新鮮爽脆嘅椰菜沙律同前菜任食 等咗唔夠10分鐘個餐就到喇！so quick! 好大份呀！ 記得跟住指示食呀 隻蝦好大隻又爽又鮮 仲有我好愛嘅天婦羅南瓜、茄子、洋蔥。呢個餐仲有一件軟殼蟹！全部都炸得好好味！食落唔覺得油膩！不過碗飯就爭少少。 記得問侍應攞秘製高湯整泡飯呀❗️ 下次要約老公一齊回味下台灣嘅感覺！

今日同同事去咗呢間西餐廳食嘢，餐廳好近油麻地地鐵站。 午市都算多人，午餐有意粉、牛扒、漢堡包、Pizza。 我同同事分別叫咗紐西蘭肉眼扒拼意粉、墨西哥雞肉水牛城薄餅、同埋蜜糖芥末煙肉安格斯牛肉漢堡包🍔。 塊肉眼扒好大塊，淨係食晒塊扒已經好飽。小編覺得啲意粉比較硬身，配飯會好啲，如果有薯菜選擇更好。午餐係包餐湯同埋嘢飲。 $62漢堡包都算大個，d薯角幾好食。 加錢可以叫特飲，我杯嘢飲好有夏日海洋feel，打卡一流。

今日同同事放工一齊約埋去食春宴半席。 可能而家係四月份啦，酒樓晚上唔算多人，呢度裝修都幾靚同乾淨，好適合一家大細嚟食。 呢個春宴餐喺黃埔呢間clubOne先有餐。 油鹽焗奄仔蟹 呢隻奄仔蟹真係不得了，油鹽焗到好入味，打開個蓋超多膏超多肉，食到唔停得口。 如果俾我食多隻就好 響螺燉冬瓜盅 食完隻奄仔蟹，就嚟個清熱嘅冬瓜盅，半席 嘅冬瓜盅都好大個，其實六個人係食唔晒。入面啲料非常足，除咗螺肉仲有帶子同蝦。 海斑相輝映 海斑啖啖肉又夠滑，一邊係炒嘅另外一邊椒鹽炸嘅，兩隻味都咁好食。 蒜蓉蒸大扇貝 呢隻扇貝撈飯一流，啲粉絲吸晒啲汁好好味，不過小編略嫌隻扇貝細咗少少，再大返d就更完美。 原隻鮑魚花菇翡翠 大大隻花菇，仲有超入味嘅鮑魚！ 燙手燒鵝 半邊燒鵝都好大隻，六個人真係食唔晒，如果個皮整得脆啲仲正。 勁多薑粒蛋白菜粒飯 夠哂薑味嘅粒卡粒炒飯 大蟠桃 拳頭咁大嘅蓮蓉壽包，每個入面仲有成隻鹹蛋黃！ 小編覺得呢個春宴餐性價比高，半席其實已經夠8個人食，係家庭聚會同生日飯之選！

今日朋友帶路嚟咗呢間近油麻地嘅酒家食嘢。見到個門面，仲以為係食火鍋，睇清楚原來係小茶樓。 小編好耐都未嚟過呢啲地道酒家飲茶，唔知點解好有兒時嘅回憶。 呢間酒家有幾多特式點心，我哋今次就叫咗一啲傳統點心同埋一啲特色點心試試。 嘩！佢啲點心全部都係即叫即蒸，叫咗個奶黃流沙包，真係熱辣辣，啲流沙真係會流。朋友都忍唔住encore多一籠。佢啲蝦餃大大粒，啲蝦肉都好新鮮，好好味！ 極品鮑魚燒賣 大粒到一啖都食唔哂😍 與別不同脆皮蝦腸 佢入面唔係炸兩，係好似雀巢嗰啲脆脆，食落去好鬆脆！ 流沙煎堆仔 熱辣辣，外脆內軟，黃金流沙 蜂巢黑糖糕 煙甄度、鬆軟度、仲有甜度都啱啱好。好想帶媽咪黎試！ 半肥瘦叉燒 佢真係一半肥一半瘦，味道唔錯，但係真係有啲肥，如果燒得脆啲仲好食。 龍蝦伊麵 真係成隻龍蝦見得返🦞🦞 龍蝦size都唔細，啖啖肉，啲伊面索晒啲汁，又唔太淋！ 好想快啲帶埋屋企人食多次！

天氣開始熱，又係時候食下刺身、壽司。 今日朋友帶咗我嚟食呢間日本放題。 呢間日本餐廳非常近朗豪坊，平日中午來，唔算特別多人。 一入到餐廳，就見到充滿嘢飲同雪糕嘅雪櫃，都係任飲任食嘅。 一坐低就梗係飛快咁叫晒啲刺身試試先啦。刺身種類都唔少，有帶子、大赤蝦、大甜蝦、池魚、油甘魚、吞拿魚、三文魚等。小編覺得帶子同埋大甜蝦最好食！encore! 除咗刺身之外，火炙香蔥左口魚邊壽司同埋海膽伴拖羅蓉壽司都好正！重點一題係啲壽司飯唔會好大舊。 不得不提呢間餐廳有好多款熱食選擇，天婦羅、牛肉粒、牛柏葉、仲有燒菠蘿、燒牛舌！ 午市放題都算抵食！

天氣今日灰灰地，攪到個人好悶。 忙咗成個上午，終於又到Lunch!今日同一班同事來個韓式BBQ，吹吹水，燒走d悶氣。 呢間Running燒地點好方便，好近旺角同太子地鐵站。 餐廳嘅內裏環境同一般嘅韓燒店差唔多，啲枱都唔算好迫，坐得都幾舒服。 我哋今日呢個午餐韓燒係110分鐘任食，午餐時段仲有個七折。如果我個lunch hour可以長啲就好喇 呢度嘅韓燒食物主要分為牛、豬、雞、羊、蔬菜、麵/飯。 飲品放題（有多款韓式飲品選擇） 前菜都係任食嘅（泡菜好好味） d肉都幾新鮮！啱哂我地d食肉獸！ 另外，小編一定要推介豬大腸、豬耳、雞腎同辣味雞！ 記得叫返個水冷麵，甜甜酸酸凍冰冰，中和下啲熱氣，正❤️ 中午嚟呢度食韓燒放題，七折之後，非常抵食！

龍蝦、龍蝦、龍蝦🦞！

小編今日嚟呢間餐廳食咗個好特別嘅情人節套餐❤️
呢個套餐嘅主角就係龍蝦囉
餐廳位於The One商場4樓，地點非常方便。餐廳裝修簡約時尚，如果想氣氛浪漫啲嘅話，小編建議可以坐餐廳較入位置，因為燈光會暗d。




情人節套餐有頭盤、餐湯、主菜、甜品及特色飲品。


頭盤
🦞龍蝦🦀蟹肉芝士醬配多士


呢個芝士醬真係超濃味，原來係有忌廉芝士、巴馬臣芝士同水牛芝士仲有龍蝦汁同埋白酒一齊整，入面仲有龍蝦肉粒同埋蟹肉。


可唔可以比多塊多士我食埋個芝士醬!
4塊心形多士都用唔晒全部嘅芝士醬。


頭盤
小龍蝦沙律配蜜糖芥末醬

沙律菜都幾新鮮，入面都真係有幾多隻小龍蝦喎。


龍蝦濃湯
個湯d龍蝦味好濃，好似飲緊龍蝦汁咁！


必食主菜
原隻火焰龍蝦比薩🍕

真係有成隻龍蝦放咗係個比薩上面，上枱嘅時候仲會點上火焰🔥。Pizza個皮夠薄又夠脆，龍蝦肉都放晒上Pizza面。龍蝦殼入面原來放咗海鮮粒及蘑菇粒。


小編另一推介主菜
波士頓龍蝦芝士通粉

大大隻波士頓龍蝦蟹鉗！仲有小編最鍾意嘅巨型煙斗粉！啲煙斗粉吸晒啲龍蝦汁，加上超多水牛芝士放埋一齊炒同焗，啲味入晒落啲意粉度，食到暖笠笠！好正嘅comfort food!


慢煮鴨胸配過歌弓蘇拉芝士比薩

呢間餐廳整嘅Pizza都真係用料十足，呢個鴨胸Pizza個面完全鋪滿晒鴨胸、蔥絲、仲有合桃！呢幾樣野配埋一齊，再加埋佢特別嘅醬汁，感覺好似食緊片皮鴨咁！


甜品
比利時朱古力心太軟&雜莓乳酪慕絲蛋糕
平時我哋食開嘅心太軟都係配雪糕嘅，呢間餐廳嘅心太軟就配左酸酸甜甜嘅雜莓慕絲，呢兩樣野擺埋一齊好㚒，唔會好似平時加雪糕咁漏。


特色飲品
Mango with Lemongrass

特色飲品嘅Menu有多款含酒精同埋不含酒精嘅飲品選擇。小偏叫咗呢杯飲品，賣相好靚，不過略嫌偏甜。


小編覺得呢間餐廳除左適合情侶拍拖食飯，亦都好適合一家大細family gathering！

食完晚飯，好剛剛想搵啲嘢飲，見到呢間鋪面佈置好有香港味道嘅奶茶店，就停低睇下個Menu。 全部飲品都係用港式香滑奶茶做底嘅，諗左一陣就叫做杯香滑珍珠奶茶試下。 港式香滑珍珠奶茶 茶底真係又香又滑！推！

行過麼地道K11附近見到一間非常搶眼嘅日本麵店。 餐廳入面嘅裝修都好日式，座位並唔多。如果四個人可以坐梳化位，兩個人就冇得揀啦，要同其他人一齊左。 睇吓餐牌，原來呢間日式麵店係主賣石燒沾麵。 一碗麵價錢大概$90至$130。正常尖沙咀拉麵價啦！ 石燒肉盛豚肉魚介沾麵 嗰4塊肉真係超級厚切，唔算好juicy，如果薄返少少，口感應該好d。 魚介汁好好味，沾晒成碗面都唔會覺得好漏。 咖哩豚肉魚介沾麵 咖喱汁幾香濃喎！ 沾晒成碗麵就覺得有d漏 原味餃子 煎得好香脆

又到快樂星期五，梗係又要同hubby撐下枱腳啦。今日係尖沙咀收工，就即刻搵下有咩好嘢食。 尖沙咀商場出咗名多人，餐廳又偏貴。 心血來潮又想食泰國凍檬粉，酸酸甜甜夠開胃。 Openrice搵到一間近尖東嘅泰國餐廳，hubby即刻打電話去book位，竟然book到喎！❤️ 餐廳啲食物係正常價錢，係尖沙咀區唔算太貴。 是日推介生蝦八隻 啲🦐唔算大隻，唔係好鮮甜。 大娘王牌火車頭🚆 呢個河粉真係好足料，淨係牛筋都有四舊，牛肉湯牛腩都好新鮮，湯夠鮮甜，推介！ 香茅牛肉撈檬 牛肉嘅味道其實都幾好，不過好似老左啲。小編都係鍾意食一片片juicy嗰隻香茅牛肉。 炸蝦餅 呢個蝦餅炸到啱啱好，唔會炸到乾晒，夠晒大塊好好味！ 是日推介煮大蜆 總共有六隻，個湯好鮮甜，老公全部飲晒。