今日經過天后，想停低休息一下，所以就去左呢度飲咖啡。 其實除左咖啡之外，仲有其他的飲品可以選擇。不過咖啡味好香，所以我同朋友就擇左Flat White。 個咖啡好味！好有咖啡香，唔苦唔酸，適合我呢d 少飲咖啡的人。另外個外賣杯蓋都幾有趣，設計到唔使用飲管都好容易飲到。 由於人好多所以都等左幾耐，不過我覺得可以接受ge。但我會覺得環境可以改善一下，比如menu 字太細睇得唔係好清楚。雖然將menu project 係牆係一個幾有趣的idea，但要行近睇個menu 就會同坐係長椅上的人打正照面，有d 尷尬。 overall, 係唔錯的。相信少人d 果陣去氣氛更好！

星期六下午去，都人幾多人排，等左一陣入去。 我同朋友叫左lunch set。我ge 係明太子鮮蝦意粉。唔算真係好好食，但覺得真係好抵，我記得好似係70幾蚊左右（未加一）一個餐，包餐湯餐包餐飲！而個意粉都ok，硬度岩岩好，蝦幾新鮮。 朋友叫左burger，我覺得ok，但佢就好鍾意～ 餐包同餐湯都好味！好鍾意蘑菇湯。 然後我地另外叫左兩件蛋糕。呢個法式燉蛋芝士餅好creamy好好食！但係係有d 濟ge。 跟住呢個個名好靚ge 48小時冰滴咖啡蛋糕就一般般啦。 整體來講，質素中上，價錢係西餐來講好經濟，值得一去呀～

好耐之前來過呢間素食店，上次好滿意，今次來依然係咁好食。 我叫ge 係lunch set，包前菜餐湯餐飲。前菜同湯好好味。 前菜四擇二，我叫左芝麻醬蕃茄同照燒菇。估唔到日式芝麻醬同蕃茄兩樣都酸酸地ge 野竟然match 到。菇都好食，不過我估唔到原來唔係熱ge。 湯二擇一。我好鍾意個中湯！素湯好多時候都好淡口，但呢個好足料味道好濃郁！印度椰子的椰子味好重。成碗飲哂，湯渣都食哂。 主菜叫左泰式金邊粉。好食但有d 肥膩，有點重口味，食唔哂。 食物質素好，環境都唔錯，幾安靜。值得再去！

因為米芝蓮推介，所以去左試呢間甜品店。 同朋友叫左芝麻糊同杏仁露。味道好好，但佢地做法係磨得好幼滑的。個人來講比較鍾意有番d 顆粒感的。 另外外賣包裝值得一讚，佢個盒係有d 似雪糕盒，幾硬淨同密實。

行經灣仔，想試下呢間出名的鋪頭。雖然星期六下午先去，但都要排隊，不過等左陣就入得。 見佢門口個牌寫住咖哩豬扒飯同乾炒牛河，知佢對呢兩樣好有信心。所以我同朋友都係食咖哩豬扒飯。 我其實好少去港式餐廳食重口味的野，但豬扒真係好食，炸得好好，肉幾juicy，好薄好易咬，外皮唔係卜卜脆到硬果種，而係岩岩好。咖哩都幾好。 85 蚊一個咖哩豬扒飯係貴的，但豬扒好多，而且好好食，所以我覺得ok。另外我覺得員工態度幾好，雖然鋪頭好逼好多人，好容易會起爭執，但佢地唔會郁d 就發脾氣，係香港都幾難得。 總結而言，係好食的，值得推介。但由於我本身唔特別鍾意重口味的食物，所以唔會特登再去。

good service, high quality! 已經有幾年無食過老闆手勢，非常懷念，睇新聞先知佢係觀塘新開張。今日下晝去食，間店靚左又多左人手，好舒服。 煎雞排都係咁拿手，塊皮好脆，肉好juicy。覺得份量岩岩好，而且好均真。因為今日來貨ge 雞扒比平時細塊，專登補多左半塊比我。 黑毛豬胺厚而不老，肉都係好juicy，有唔同既汁點，配搭都很好。 主菜好正，配菜都好好食，頭盤沙律同磨菇湯有驚喜。 甜品蘋果批一定要試下，非常懷念以前老闆親自出黎切，不過今次都冇見到佢lu。 野飲有「蜜月」（即係檸蜜？）同凍檸茶。侍應好似話d 檸檬係有d 特別～ haha 佢地都幾nice。 蜜月係好飲ge。檸茶d 茶都好香。唔錯。 overall 係正ge，不過出菜要等幾耐，所以如果好趕時間就唔建議來啦。