天氣凍就梗係要打邊爐啦！香港成日都有新邊爐舖 真係試唔哂㗎 今日同朋友嚟試呢間 環境靚 食物新鮮 可以再嚟！ 叫咗個醉火入鍋湯底 見幾特別同埋係呢度招牌所以試下 呢度有四個唔同湯底 一次食到唔同口味唔怕悶 有啲花神玩下🤣 醬料盤好齊全 啲料都夠新鮮 打邊爐一定要食肥牛！ 呢個細份頂級安格斯牛小排肥瘦各半 夠冧 同埋肉味都好夠 呢個手打蝦丸好新鮮同爽口 又係手功嘢 黑松露蝦蟹餃好香口 個皮又唔會太厚 黑松露味都好夠 什菌拼盤有好多唔同菇食 正 蔬菜都好新鮮～ 食埋個三色生麵夠哂飽啦 竹蔗茅根同紫貝天葵都夠解渴 又唔會太甜

聽聞呢度開咗間性價比好高嘅omakase 拉咗朋友嚟試  我地揀咗$1580/位嘅 omakase set 同埋呢個set做緊優惠 二人同行就送 300ml 嘅 sake! 頭盤有菠菜同南瓜 打頭陣嘅魚生係鱈魚嘅白鮨 配上酸汁、味粉同蔥
口感綿密 夠滑嫩
富山灣嘅冰結寒鰤 好肥美 
呢個賣相好特別嘅係池魚碎切同菊花  口感亦好豐富 個醬係醬燥麵豉
岩首縣生蠔 比較crispy 好新鮮又大隻 配上酸酸嘅mousse泡 好好食！
又有好特別嘅菜式! 梳打水柚子皮浸住昆布湯粒貝
粒貝好新鮮 浸咗梳打水仲會爽口啲 同埋咀嚼仲會有梳打水啲氣
賣相同整法都好新穎
深海池魚 燒鐵網再將佢「辣」落魚皮度迫油份  面頭係炒香咗嘅木魚 成個刺身都好香口
安康魚肝撈咗士多啤梨碎 面頭係海鹽碎 咁樣食就冇咁溜 磯煮鮑魚 係呢度其中一個signature 面頭係鮑魚肝醬 果然冇令人失望 好新鮮彈牙 個肝醬更加係錦上添花  金雕立鱗燒 南瓜湯分子料理 個魚整得好好 面頭好脆 魚好嫩滑多汁 一粒嗰個入面係南瓜湯嚟 好得意 之後就係壽司環節 赤貝、喜之次、北海道BB銀鱈魚、海膽 全部都足料又新鮮  最後仲有個天婦羅紫菜夾住兩塊拖羅 好香口 一咬落去個口充滿住魚油 好滿足 之後有個好濃嘅魚湯 好飽 甜品係上信玄餅 蝶豆花茶 唔會太甜 第一次食呢樣嘢 幾有趣呢度嘅裝修都好靚

呢日喺呢頭搵cafe食brunch, 見到呢間新開嘅cafe就嚟試下～ 大蝦香辣蒜香欖油意粉 呢個意粉整得好好呀！意粉好彈牙好爽口，食落夠哂乾身唔會油笠笠咁，又好香蒜同黑椒味 蝦都幾大隻同夠新鮮 呢個意粉幾有驚喜 見到menu有牛角包窩夫多士食，第一次見呢樣嘢所以叫咗嚟試，又幾得意！ 呢個係牛油果醬炒蛋，個牛油果醬整得好好食 入面有啲醋香料同洋蔥撈埋一齊勁香口，夠哂開胃！ 炒蛋夠滑同埋係半生熟，全部嘢一齊食好正～ 伴碟仲有好多蔬菜 呢個抹茶牛奶超好飲 抹茶係有幾種日本茶粉比我地㨂，我地揀咗山政小山園，好濃好香 抹茶愛好者一定要去試！ 咖啡師拉咗個聖誕老人公仔出嚟 好靚 咖啡豆都係有幾隻揀，我地揀咗哥倫比亞考卡省天堂莊園，係比較fruit嘅 飲落士多啤梨味同荔枝味較重 好啱女仔飲～ 門口仲有啲位，可以喺度chill下

之前行海旁嘅時候見到呢間新開嘅café好有feel, 就叫埋朋友一齊嚟試下 首先嚟嘅係餐前嘅麵包 有三款咁多 – 無花果 黑松露同五穀 配埋佢嘅garlic butter同 pumpkin bacon醬 好好味 D麵包好軟熟 雖然驚會食飽咗但最後都忍唔住食哂 Main course 叫咗個炭烤牛骨髓同慢煮和牛面肉意大利闊麵 醬汁係紅酒牛尾 個牛骨髓好香口 而且好嫩滑 D油滋喺口腔中散發 好好味 意粉同好彈牙同好掛汁 連埋D牛肉同牛骨髓一齊食真係回味無窮! 另一個嗌咗北海道帶子意大利飯 個香草南瓜忌廉醬好濃郁 南瓜味好出之餘仲好creamy D意大利飯都係粒粒分明 又唔會太淋 我就嗌咗杯pineapple passionfruit vodka 好靚呀! 好啱用嚟打卡~ 酒味都夠 又唔會太甜 呢度真係好啱約朋友嚟食嘢飲嘢同傾計～ 入面裝修好靚 好溫暖同cozy 好似時光倒流去咗d外國地道餐廳仔咁

好耐無去過樓上cafe, 聽朋友話呢間有靚景嘢食唔錯就嚟咗試下。 呢度啲嘢食比想像中好食，下次會再嚟！ 個饅魚飯好滿足，條鰻魚好大條，啖啖肉，夠哂餸成碗飯。 啲飯粒粒分明，個汁都好夾 仲有其他配料，撈埋一齊食好味 帶子明太子意粉都有驚喜 個汁唔會太重cream味食到好膩 同時又好足料 啲明太子同蟹柳絲都有好多 面頭主角帶子夠大粒同新鮮，煮得啱啱好唔會太老 推介呢個意粉！ 個抹茶豆乳好好飲！完全唔會太甜，飲到好濃嘅抹茶味同淡淡嘅豆乳味，兩個味都好平均，一定要試！ 個芝士蛋糕做甜品幾light唔會太滯，同時都好夠芝士味。 呢度個景夠開揚 望住海旁嗰邊，無論日頭定夜晚同朋友嚟傾計食嘢都好啱

呢間餐廳喺一棟大廈嘅樓上所以唔起眼，係有朋友介紹先知道有呢間餐廳。 今日搵埋個好鍾意打邊爐嘅朋友一齊試下～ 啲食材係超級超級新鮮，超級驚喜🤩 餐廳喎工推介咗個百花齊放套餐150分鐘放題比我地，除咗大量火鍋配料揀，仲有得叫點心🤣 我地見幾得意就試下 同埋宜家做緊優惠價 $328 (原價$398) 好似幾抵食！ 湯底揀咗花膠雞同野菌豆乳 兩邊都足料 食完無咩頸渴 係真材實料冇味精👍🏼 花膠雞湯底嘅花膠 有好多片 同埋夠冧 補補身 我地叫咗啲點心 全部都好好味 如果一家大細嚟 有啲鍾意食點心多過火鍋嘅都可以嗌多啲點心食 (叫呢個餐仲有得免小童嗰份錢!) 嚟到火鍋主菜啦！ 火鍋餐跟嘅一碟牛同豬 新鮮好味 個安格斯牛雪花分佈平均 有肉汁 個豬都係肥瘦適中 仲有呢個海鮮盤，啲嘢全部都超級新鮮，份量都幾大 睇下啲蝦嘅顏色都知有幾新鮮 仲好爽口 個魚好嫩滑 啲菜勁大盤又新鮮 好正 啲竹笙勁新鮮爽口 叫咗勁多嚟食🤣 啲丸同滑都係佢地手打同自家製 好食👍🏼 打邊爐點少得響鈴😝

聽聞海港城開咗間日本過江龍居酒屋, 之前行街經過見到有個靚景, 就搵日約埋朋友去試下啦~
呢度環境好靚, 對住個大海景, 如果早d book枱可能會request到窗邊位?! 望住個景食嘢心情都靚d呀!呢個梳乎厘玉子燒-鰻魚($108) 好好食, 同埋都幾大份下
佢個外貌同平時食嗰D唔同, 但質感同味道都好好呀😋 高湯味好夠又唔會太咸。啲鰻魚喺最底，餸玉子好味火鍋叫咗澳洲牛同鹿兒島天然豚肉($628)，雞湯底，都算係有驚喜呀！
個雞湯就咁當湯飲好好味，之後淥埋啲肉同菜仲好味
火鍋個賣相幾特別🤣啲牛肉同豬肉個樣唔係話好吸睛嗰種，但食落係好新鮮同好味呀！
啲肉好林，有肉汁，同啲湯好夾厚薄度都啱啱好個豬冇膻味，好新鮮，如果肥膏少返啲就完美啦！最估唔到係啲菜淥完係超好味！
啲菜好新鮮，同埋全部切到細細塊咁好易煮，同埋好吸到啲湯味，正呀！
走嗰時經過見到有人淨係食哂啲肉無食菜，浪費咗咁靚嘅食材

新開咗咁大間商場梗係要去行下啦！呢度好熱鬧，見到呢間燒肉裝修好靚，就同朋友入咗嚟試下～
我地唔想諗咁多，所以嗌咗個二人餐嚟食，見佢有前菜主菜同甜品

嗌咗嘢食無耐就有職員拎幾碟小菜嚟，有青瓜，泡菜同芽菜 etc.
D小菜好開胃，加錢就可以任添Order左冇耐店員就送上前菜嘅燉牛筋牛舌，睇落冇乜特別，但食落有驚喜！
牛筋同牛舌都煮到好淋，蘿蔔亦都好入味。味道方面有啲似日式嘅牛筋煮，啱晒我地口味😋 個豆腐海苔沙律D菜好新鮮，份量都夠兩個人食。食咗D菜因間食燒肉無咁大罪疚感
仲有冷豆腐同車厘茄～之後就上咗芝士粟米同埋帶子牛油燒，啲帶子好大粒呀！好期待煮完會係咩味餐廳主打燒肉，但估唔到呢度嘅冷麵都好好味。
呢個雪梨水冷麵嘅麵質煙靭，配上清爽又酸酸甜甜嘅冷麵汁，加埋醃蘿蔔同青瓜絲一啖擺入口，真係夠晒消暑😌
而且冷麵份量都幾多，一碗兩個人share都夠晒。終於嚟到主打嘅燒肉啦！
呢盤係和牛肩肉盛，好正呀！
見到D雪花分佈得幾平均，肥瘦適中，D顏色都好鮮艷，厚度都係適中呢碟牛仲會跟個蛋黃同D甜甜地嘅醬比我地點牛食，幾得意，都幾夾呀～呢個係慶州黑毛豬水果醬油五花肉同埋和牛外裙肉
個牛係大一塊燒到咁上下要剪開嘅，呢個係厚厚地嘅肉，但唔會韌，仲好有肉汁
個豬都醃得好入味，同埋幾林，同牛肉一樣咁出色呢個係肩肉盛嘅肉，薄薄地咁唔洗燒到全熟，超好味！一路燒D肉一路燒芝士粟米同牛油帶子～
D帶子好新鮮，連埋D牛油好香口，不過我地唔小心煮得太耐（掛住食肉😖）呢個烤香蕉配朱古力肉桂粉嘅甜品好特別呀，未見過呢樣甜品🤣職員會換過燒網同埋同我地燒埋如果面頭曬多D糖就好啦！因為個焦糖燒得好香，再多D會仲好食！呢個焦糖布甸嘅質感同出面嘅布丁有啲唔同，有一種類似食moose嘅口感，夠滑，又好濃味，小編同朋友都好鐘意，係下次encore之選！
我地叫咗個柚子檸檬梳打同荔枝梳打嚟餸，夠哂refreshing!

上網見到呢間餐廳啲嘢食好靚好吸引，所以搵埋朋友一齊放工嚟食～ 我地幾晏嚟到都好多人，果然係人氣餐廳！ 未見過menu咁靚咁有心機整😍 我地揀咗個夏日限定嘅盛夏風物詩套餐 呢個琉球族八爪魚香場個外型好得意🤣 咁樣切開咗去炸有多啲香脆嘅橫切面，食落脆卜卜好有口感，當小食一流呀！😋 跟住嚟個雞肉炒麵，係日式炒麵嘅味道，好食！ 啲菜同雞都喺最底～ 啲麵幾彈牙，好入味 啲雞幾嫩滑，一啲都唔柴，同埋都係好入味，而且份量都唔少呀！ 連埋啲椰菜一齊食就唔怕溜啦😋 跟住就係炸雞親子丼，好大份！ 本身以為得炸雞，點知飯面頭仲有雞肉🤣 面頭啲雞肉嫩滑多汁，好啱餸飯，撈埋個蛋黃食好好味🤤 個炸雞啱啱炸起，唔會太燶，好香口 有成四大件雞🤣 個炸雞比預期好食，本身驚會乾，但結果係又滑又有肉汁！如果呢個炸雞可以就咁嗌應該都會幾受歡迎！ 個甜品上面係波子汽水啫喱，下面有啲奶凍，都幾夾 一開始驚藍色會係怪味，點知係好refreshing嘅波子汽水味，唔會太甜，真係好有夏天feel☀️ 呢個海洋梳打都係波子汽水味，個樣好靚😍 又唔會夾甜，又係好啱夏天 仲叫多咗個焙茶沙冰，好濃嘅焙茶味，好好飲！

已經唔係第一次嚟三田製麵㗎啦~ 咁啱試咗新嘢就打返個食評分享下先啦! 濃厚蝦海老麵係呢度嘅季節限定, 見個樣幾吸引就叫嚟試下~ 個湯真係好濃郁好有蝦味, 算係重口味, 不過食哂成碗都唔會太膩 呢碗麵有成三塊肉咁多, 都大塊, 啱啱好餸哂成碗麵, 同埋肥瘦適中, 醃得夠入味 個麵夠哂彈牙, 又夠掛湯, 好味 啲配菜都好多, d櫻花蝦好多又好香口, 隻溏心蛋好夠流心 另一碗嗌咗沾麵, 平時都係食開呢碗, 個湯好香豬骨同埋魚介味, 味蕾好滿足 個湯入面都有D豬肉 個麵可以嗌熱麵或者凍麵 我就鍾意食熱麵多D, 因為可以慢慢食, 唔驚個湯會唔夠熱嚟餸哂成碗麵 個麵好掛湯, 麵質亦都彈牙 跟餐嘅揀咗份炸雞, 係新鮮炸起, 皮薄酥脆, 雞肉有肉汁